Jv/Alkitab/Purwaning Dumadi/18

^18:1 ꦏꦼꦕꦿꦶꦠꦒꦸꦱ꧀ꦠꦶꦄꦭ꧀ꦭꦃꦔꦼꦠꦶꦔꦭ꧀ꦩꦼꦤꦺꦃꦩꦫꦁ​꧊ꦄꦧꦿꦲꦩ꧀꧈​ꦲꦶꦁꦱꦕꦼꦝꦏ꧀ꦏꦺꦮꦶꦠ꧀ꦮꦶꦠ꧀ꦠꦤ꧀ꦥꦥꦤ꧀ꦤꦺꦥꦔꦶꦧꦢꦃ꧈​ꦲꦶꦁ​꧊ꦩꦩꦿꦺ꧉​ꦤꦭꦶꦏꦱꦼꦩꦺꦴꦤꦺꦴꦮꦪꦃꦲꦮꦤ꧀ꦥꦶꦤꦸꦗꦸꦥꦤꦱ꧀ꦥꦤꦱ꧀ꦱꦺ꧉​​꧊ꦄꦧꦿꦲꦩ꧀ꦭꦒꦶꦭꦶꦁꦒꦶꦃꦲꦤ꧀ꦲꦶꦁꦔꦉꦥ꧀ꦥꦤ꧀꧈​

^18:2 ꦢꦸꦩꦢꦏ꧀ꦏꦤ꧀ꦲꦤꦥꦿꦶꦪꦪꦶꦠꦼꦭꦸꦠꦼꦏ꧉​

^18:3 ꦲꦺꦁꦒꦭ꧀ꦲꦺꦁꦒꦭ꧀​꧊ꦄꦧꦿꦲꦩ꧀ꦩꦼꦚꦠ꧀꧈​ꦩꦼꦛꦸꦏ꧀ꦏꦏꦺ꧈​ꦧꦚ꧀ꦗꦸꦂꦱꦸꦩꦸꦁꦏꦼꦩ꧀꧈​ꦱꦂꦠꦩꦠꦸꦂ꧈​"ꦩꦼꦤꦮꦶꦝꦁꦔꦤ꧀ꦲꦶꦁꦥꦼꦁꦒꦭꦶꦃ꧈​ꦩꦁꦒꦱꦩꦶꦏꦸꦭꦲꦠꦸꦂꦫꦶꦥꦶꦤꦫꦏ꧀ꦲꦶꦁꦥꦺꦴꦤ꧀ꦝꦺꦴꦏ꧀ꦏꦸꦭ꧈​ꦩꦁꦏꦺꦧꦝꦺꦏꦸꦭꦱꦼꦒꦃꦱꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀꧉​

^18:4 ꦩꦁꦏꦺꦏꦸꦭꦥꦼꦤ꧀ꦝꦼꦠ꧀ꦠꦏꦼꦤ꧀ꦠꦺꦴꦪꦏꦒꦼꦩ꧀ꦮꦶꦗꦶꦏ꧀꧈​ꦭꦗꦼꦁꦏꦼꦂꦱꦲꦊꦁꦒꦃꦲꦤ꧀꧈​ꦔꦱꦺꦴꦲꦶꦁꦲꦺꦪꦸꦧ꧀ꦧꦤ꧀꧉​

^18:5 ꦩꦁꦏꦺꦭꦗꦼꦁꦧꦝꦺꦏꦸꦭꦲꦠꦸꦂꦫꦶꦝꦲꦂꦱꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀꧈​ꦏꦁꦒꦺꦮꦼꦮꦃꦲꦶꦁꦏꦼꦏꦶꦪꦠ꧀ꦠꦤ꧀꧉"​ꦮꦁꦱꦸꦭ꧀ꦭꦤ꧀ꦤꦺꦥꦫꦏꦁꦫꦮꦸꦃ꧈​"ꦲꦶꦪ꧈​ꦢꦏ꧀ꦠꦿꦶꦩ꧈​ꦲꦏꦸꦢꦏ꧀ꦩꦩ꧀ꦥꦶꦂ꧉"​

^18:6 ​꧊ꦄꦧꦿꦲꦩ꧀ꦤꦸꦭꦶꦲꦺꦁꦒꦭ꧀ꦲꦺꦁꦒꦭ꧀ꦩ꧀ꦭꦼꦧꦸꦲꦶꦁꦏꦺꦩꦃꦔꦤ꧀ꦝꦤ꧀ꦤꦶ​꧊ꦱꦫꦃ꧈​ꦠꦼꦩ꧀ꦧꦸꦁꦔꦺ꧈​"ꦒꦼꦭꦶꦱ꧀꧈​ꦒꦮꦺꦪꦫꦺꦴꦠꦶ꧈​ꦚ꧀ꦗꦸꦥꦸꦏ꧀ꦏꦒ꧀ꦭꦼꦥꦸꦁꦠꦼꦭꦸꦁꦠꦏꦼꦂ꧉"​

^18:7 ꦧꦚ꧀ꦗꦸꦂꦲꦺꦁꦒꦭ꧀ꦲꦺꦁꦒꦭ꧀ꦩꦼꦚꦁꦥꦁꦒꦺꦴꦤ꧀ꦤꦤ꧀ꦤꦺꦱꦥꦶ꧈​ꦩꦶꦭꦶꦃꦥꦼꦝꦺꦠ꧀ꦱꦶꦁꦊꦩꦸ꧈​ꦢꦶꦥꦱꦿꦃꦲꦏꦺꦩꦫꦁꦧꦠꦸꦂ꧈​ꦢꦶꦏꦺꦴꦤ꧀ꦲꦺꦁꦒꦭ꧀ꦲꦺꦁꦒꦭ꧀ꦚꦼꦩ꧀ꦧꦼꦭꦺꦃꦭꦤ꧀ꦔꦺꦴꦭꦃꦢꦒꦶꦁꦔꦺ꧉​

^18:8 ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴꦧꦚ꧀ꦗꦸꦂꦔ꧀ꦭꦢꦺꦏ꧀ꦏꦏꦺꦱꦸꦱꦸꦏꦼꦤ꧀ꦛꦼꦭ꧀꧈​ꦥꦺꦴꦲꦤ꧀ꦭꦤ꧀ꦢꦒꦶꦁꦥꦼꦝꦺꦠ꧀ꦱꦶꦁꦢꦶꦲꦺꦴꦭꦃꦩꦲꦸ꧈​ꦏꦧꦺꦃꦏꦱꦲꦺꦴꦱ꧀ꦱꦏꦺꦥꦫꦠꦩꦸ꧉​ꦢꦺꦤꦺ​꧊ꦄꦧꦿꦲꦩ꧀ꦝꦺꦮꦺꦤꦸꦁꦒꦺꦴꦤ꧀ꦤꦶꦏꦫꦺꦴꦔꦢꦼꦒ꧀ꦲꦶꦁꦱꦕꦼꦝꦏ꧀ꦏꦺꦥꦫꦠꦩꦸꦏꦁꦥꦝꦝꦲꦂ꧉​

^18:9 ꦥꦫꦠꦩꦸꦥꦝꦤ꧀ꦢꦔꦸ꧈​"ꦧꦺꦴꦗꦺꦴꦩꦸ​꧊ꦱꦫꦃꦲꦤꦲꦶꦁꦔꦼꦤ꧀ꦢꦶ?"ꦲꦸꦚ꧀ꦗꦸꦏ꧀ꦏꦺ​꧊ꦄꦧꦿꦲꦩ꧀꧈​"ꦮꦺꦴꦤ꧀ꦠꦼꦤ꧀ꦲꦶꦁꦔ꧀ꦭꦼꦧꦼꦠ꧀꧉"​

^18:10 ꦲꦤꦠꦩꦸꦤꦺꦱꦶꦗꦶꦱꦶꦁꦤꦸꦭꦶꦔꦤ꧀ꦢꦶꦏ꧈​"ꦱꦔꦁꦱꦱꦶꦲꦼꦁꦏꦱ꧀ꦲꦏꦸꦧꦏꦭ꧀ꦩꦿꦺꦤꦺꦩꦼꦤꦺꦃ꧉​​꧊ꦱꦫꦃ꧈​ꦧꦺꦴꦗꦺꦴꦩꦸꦧꦏꦭ꧀ꦮꦶꦱ꧀ꦢꦸꦮꦺꦲꦤꦏ꧀ꦭꦤꦁ꧉"​ꦩꦁꦏ​꧊ꦱꦫꦃꦔꦿꦸꦔꦺꦴꦏ꧀ꦏꦏꦺꦱꦏꦲꦶꦁꦩ꧀ꦧꦸꦫꦶꦭꦮꦁ꧈​ꦲꦶꦁꦥꦼꦁꦏꦼꦂꦫꦤ꧀ꦤꦺꦠꦩꦸꦱꦶꦁꦥꦝꦊꦁꦒꦃꦲꦤ꧀꧉​

^18:11 ​꧊ꦄꦧꦿꦲꦩ꧀ꦭꦤ꧀​꧊ꦱꦫꦃꦏꦸꦮꦶꦝꦺꦏ꧀ꦱꦼꦩꦤꦮꦶꦱ꧀ꦥꦝꦠꦸꦮ꧈​ꦭꦤ꧀​꧊ꦱꦫꦃꦮꦶꦱ꧀ꦲꦺꦴꦫꦒꦫꦥ꧀ꦱꦫꦶ꧉​

^18:12 ꦩꦸꦭꦤꦺ​꧊ꦱꦫꦃꦲꦶꦁꦧꦠꦶꦤ꧀ꦔ꧀ꦒꦸꦪꦸ꧈​ꦏꦫꦺꦴꦔꦸꦤꦤ꧀ꦢꦶꦏ꧈​"ꦲꦥꦠꦼꦤꦤ꧀ꦲꦏꦸꦲꦶꦱꦶꦃꦧꦶꦱꦢꦸꦮꦺꦲꦤꦏ꧀?ꦮꦺꦴꦁꦲꦏꦸꦮꦶꦱ꧀ꦤꦶꦤꦶꦤꦶꦤꦶꦩꦼꦁꦏꦺꦤꦺ꧈​ꦩꦁꦏꦧꦺꦴꦗꦺꦴꦏꦸꦪꦮꦶꦱ꧀ꦠꦸꦮ꧉"​

^18:13 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏꦏꦫꦺꦴ​꧊ꦄꦧꦿꦲꦩ꧀꧈​"ꦪꦒꦺꦤꦺ​꧊ꦱꦫꦃꦏꦺꦴꦏ꧀ꦔ꧀ꦒꦸꦪꦸ꧈​ꦭꦤ꧀ꦩꦸꦤꦶꦲꦶꦁꦧꦠꦶꦤ꧀꧈​‘ꦲꦥꦪꦠꦼꦩꦼꦤ꧀ꦤꦤ꧀ꦲꦏꦸꦧꦏꦭ꧀ꦢꦸꦮꦺꦲꦤꦏ꧀?’

^18:14 ꦲꦶꦁꦔꦠꦱ꧀ꦱꦺꦄꦭ꧀ꦭꦃꦲꦺꦴꦫꦲꦤꦧꦫꦁꦱꦶꦁꦩꦺꦴꦏꦭ꧀꧉​ꦱꦸꦏ꧀ꦠꦲꦸꦤ꧀ꦔꦉꦥ꧀꧈​ꦥꦼꦤ꧀ꦝꦏ꧀ꦏꦺꦩꦁꦱꦲꦶꦏꦶ꧈​ꦲꦏꦸꦧꦏꦭ꧀ꦩꦿꦺꦤꦺꦩꦼꦤꦺꦃꦭꦤ꧀​꧊ꦱꦫꦃꦩꦼꦱ꧀ꦛꦶꦮꦶꦱ꧀ꦢꦸꦮꦺꦲꦤꦏ꧀ꦭꦤꦁ꧉"​

^18:15 ꦩꦼꦂꦒꦱꦏꦮꦼꦢꦶꦤꦺ​꧊ꦱꦫꦃꦱꦺꦭꦏ꧀꧈​"ꦏꦸꦭꦩ꧀ꦧꦺꦴꦠꦼꦤ꧀ꦒꦸꦩꦸꦗꦼꦁ꧉"​ꦱꦼꦤꦗꦤ꧀ꦩꦼꦁꦏꦺꦴꦤꦺꦴꦒꦸꦱ꧀ꦠꦶꦄꦭ꧀ꦭꦃꦔꦤ꧀ꦢꦶꦏ꧈​"ꦲꦺꦴꦫ꧈​ꦏꦺꦴꦮꦺꦮꦶꦱ꧀ꦔ꧀ꦒꦸꦪꦸ꧉"​

^18:16 ꦱꦮꦶꦱ꧀ꦱꦺꦩꦼꦁꦏꦺꦴꦤꦺꦴꦥꦫꦠꦩꦸꦠꦼꦭꦸꦩꦲꦸꦠꦶꦤ꧀ꦢꦏ꧀ꦧꦼꦧꦉꦁꦔꦤ꧀ꦔꦼꦤꦼꦂꦲꦶꦁꦏꦸꦛ​꧊ꦱꦺꦴꦢꦺꦴꦩ꧀꧉​​꧊ꦄꦧꦿꦲꦩ꧀ꦔꦸꦤ꧀ꦠꦥ꧀ꦥꦏꦺꦠꦩꦸꦤꦺ꧉​

^18:17 ꦒꦸꦱ꧀ꦠꦶꦄꦭ꧀ꦭꦃꦔꦸꦤꦤ꧀ꦢꦶꦏ꧈​"ꦲꦥꦲꦏꦸꦲꦺꦴꦫꦲꦉꦥ꧀ꦧ꧀ꦭꦏꦏꦫꦺꦴ​꧊ꦄꦧꦿꦲꦩ꧀ꦧꦧ꧀ꦲꦥꦏꦁꦲꦉꦥ꧀ꦢꦏ꧀ꦠꦶꦤ꧀ꦢꦏ꧀ꦏꦏꦺ?

^18:18 ꦩꦁꦏꦠꦸꦫꦸꦤ꧀ꦤꦺ​꧊ꦄꦧꦿꦲꦩ꧀ꦲꦶꦏꦸꦫꦏ꧀ꦧꦏꦭ꧀ꦢꦢꦶꦧꦁꦱꦒꦼꦝꦺꦭꦤ꧀ꦏ꧀ꦮꦱ꧈​ꦭꦤ꧀ꦱꦏꦺꦃꦲꦺꦥꦫꦧꦁꦱꦲꦶꦁꦧꦸꦩꦶꦫꦏ꧀ꦧꦏꦭ꧀ꦏꦧꦼꦂꦏꦃꦲꦤ꧀ꦩꦼꦂꦒꦱꦏꦝꦺꦮꦺꦏ꧀ꦏꦺ?

^18:19 ꦲꦥ​꧊ꦄꦧꦿꦲꦩ꧀ꦲꦺꦴꦫꦮꦶꦱ꧀ꦢꦏ꧀ꦥꦶꦭꦶꦃꦱꦸꦥꦪꦩꦸꦭꦁꦩꦫꦁꦲꦤꦏ꧀ꦠꦸꦫꦸꦤꦺꦤꦼꦠꦼꦥ꧀ꦥꦶꦥꦶꦠꦼꦢꦃꦲꦺꦄꦭ꧀ꦭꦃ꧈​ꦱꦂꦠꦲꦸꦫꦶꦥ꧀ꦔ꧀ꦭꦏꦺꦴꦤ꧀ꦤꦶꦏꦲꦸꦠꦩꦤ꧀ꦭꦤ꧀ꦏꦧꦼꦤꦼꦂꦫꦤ꧀?ꦪꦺꦤ꧀ꦥꦝꦤꦸꦫꦸꦠ꧀꧈​ꦲꦏꦸꦧꦏꦭ꧀ꦤꦼꦠꦼꦥ꧀ꦥꦶꦲꦥꦏꦁꦮꦶꦱ꧀ꦢꦏ꧀ꦗꦚ꧀ꦗꦺꦏ꧀ꦏꦏꦺꦩꦫꦁ​꧊ꦄꦧꦿꦲꦩ꧀꧉"​

^18:20 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏꦩꦫꦁ​꧊ꦄꦧꦿꦲꦩ꧀꧈​"ꦲꦏꦸꦏꦿꦸꦔꦸꦥꦼꦱꦩ꧀ꦧꦠ꧀ꦠꦸꦩꦿꦥ꧀ꦏꦸꦛ​꧊ꦱꦺꦴꦢꦺꦴꦩ꧀ꦭꦤ꧀​꧊ꦒꦺꦴꦩꦺꦴꦫ꧈​ꦩꦼꦂꦒꦢꦺꦴꦱꦤꦺꦒꦼꦝꦺꦧꦔꦼꦠ꧀꧉​

^18:21 ꦩꦸꦭꦲꦏꦸꦲꦉꦥ꧀ꦩꦿꦤꦚꦠꦏ꧀ꦏꦏꦺꦲꦥꦥꦼꦱꦩ꧀ꦧꦠ꧀ꦩꦲꦸꦧꦼꦤꦼꦂꦩꦼꦁꦏꦺꦴꦤꦺꦴ꧉"​

^18:22 ꦠꦩꦸꦤꦺꦩꦲꦸꦱꦶꦁꦭꦺꦴꦫꦺꦴꦧꦸꦝꦭ꧀ꦩꦼꦚꦁ​꧊ꦱꦺꦴꦢꦺꦴꦩ꧀꧈​ꦤꦁꦔꦶꦁ​꧊ꦄꦧꦿꦲꦩ꧀ꦲꦶꦱꦶꦃꦏꦺꦫꦶ꧈​ꦔꦢꦼꦒ꧀ꦲꦤꦲꦶꦁꦔꦂꦱꦤꦺꦒꦸꦱ꧀ꦠꦶꦄꦭ꧀ꦭꦃ꧉​

^18:23 ​꧊ꦄꦧꦿꦲꦩ꧀ꦩꦉꦏ꧀ꦭꦤ꧀ꦩꦸꦚ꧀ꦗꦸꦏ꧀꧈​"ꦩꦼꦤꦥꦥꦚ꧀ꦗꦼꦤꦼꦁꦔꦤ꧀ꦲꦶꦁꦒꦶꦃꦧꦝꦺꦤꦸꦩ꧀ꦥꦼꦱ꧀ꦠꦶꦪꦁꦩꦸꦂꦱꦶꦢ꧀ꦱꦉꦁꦏꦭꦶꦪꦤ꧀ꦠꦶꦪꦁꦢꦸꦫꦏ?

^18:24 ꦱꦲꦸꦥꦩꦶꦲꦶꦁꦱꦊꦧꦼꦠ꧀ꦠꦶꦁꦤꦼꦒꦫꦶꦔꦿꦶꦏꦸꦮꦺꦴꦤ꧀ꦠꦼꦤ꧀ꦠꦶꦪꦁꦱꦺꦏꦼꦠ꧀ꦲꦶꦁꦏꦁꦩꦸꦂꦱꦶꦢ꧀꧈​ꦩꦼꦤꦥꦠꦶꦪꦁꦠꦶꦪꦁꦩꦼꦤꦶꦏꦲꦶꦁꦒꦶꦃꦧꦝꦺꦥꦚ꧀ꦗꦼꦤꦼꦁꦔꦤ꧀ꦠꦸꦩ꧀ꦥꦼꦱ꧀?ꦩꦼꦤꦥꦥꦚ꧀ꦗꦼꦤꦼꦁꦔꦤ꧀ꦩ꧀ꦧꦺꦴꦠꦼꦤ꧀ꦩꦶꦭꦸꦗꦼꦁꦔꦏꦼꦤ꧀ꦤꦼꦒꦫꦶꦩꦼꦤꦶꦏꦏꦿꦤꦠꦶꦪꦁꦩꦸꦂꦱꦶꦢ꧀ꦱꦺꦏꦼꦠ꧀ꦲꦶꦁꦏꦁꦩꦁꦒꦺꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦔꦿꦶꦏꦸ?

^18:25 ꦥꦚ꧀ꦗꦼꦤꦼꦁꦔꦤ꧀ꦩꦼꦱ꧀ꦛꦶꦩ꧀ꦧꦺꦴꦠꦼꦤ꧀ꦧꦝꦺꦩꦼꦗꦃꦲꦶꦠꦶꦪꦁꦩꦸꦂꦱꦶꦢ꧀ꦱꦉꦁꦏꦭꦶꦪꦤ꧀ꦠꦶꦪꦁꦢꦸꦫꦏ꧈​ꦲꦮꦶꦠ꧀ꦩꦼꦤꦮꦶꦩꦼꦏꦠ꧀ꦠꦼꦤ꧀ꦫꦏ꧀ꦩ꧀ꦧꦺꦴꦠꦼꦤ꧀ꦩ꧀ꦧꦺꦢꦏ꧀ꦏꦏꦼꦤ꧀ꦠꦶꦪꦁꦩꦸꦂꦱꦶꦢ꧀ꦏꦭꦶꦪꦤ꧀ꦢꦸꦫꦏ꧉​ꦩꦼꦤꦥꦲꦶꦁꦒꦶꦃꦲꦏꦶꦩ꧀ꦲꦶꦁꦏꦁꦔꦢꦶꦭ꧀ꦭꦶꦠꦶꦪꦁꦱꦗꦒꦢ꧀ꦩ꧀ꦧꦺꦴꦠꦼꦤ꧀ꦧꦝꦺꦤꦶꦤ꧀ꦢꦏ꧀ꦏꦏꦼꦤ꧀ꦏꦲꦢꦶꦭ꧀ꦭꦤ꧀?"

^18:26 ꦥꦔꦤ꧀ꦢꦶꦏꦤꦺꦒꦸꦱ꧀ꦠꦶꦄꦭ꧀ꦭꦃ꧈​"ꦪꦺꦤ꧀ꦲꦶꦁꦤꦼꦒꦫ​꧊ꦱꦺꦴꦢꦺꦴꦩ꧀ꦲꦤꦮꦺꦴꦁꦩꦸꦂꦱꦶꦢ꧀ꦱꦺꦏꦼꦠ꧀ꦮꦲꦺ꧈​ꦩꦼꦱ꧀ꦛꦶꦢꦏꦺꦩ꧀ꦩꦤ꧀ꦏꦿꦤꦱꦏꦮꦺꦴꦁꦮꦺꦴꦁꦩꦲꦸ꧉"​

^18:27 ꦲꦸꦚ꧀ꦗꦸꦏ꧀ꦏꦺ​꧊ꦄꦧꦿꦲꦩ꧀ꦩꦼꦤꦺꦃ꧈​"ꦝꦸꦃꦥꦔꦺꦫꦤ꧀꧈​ꦏꦸꦭꦩꦼꦤꦶꦏꦤꦩꦸꦁꦊꦧꦸꦭꦤ꧀ꦲꦮꦸꦏꦺꦩꦮꦺꦴꦤ꧀꧈​ꦩꦶꦭꦩ꧀ꦧꦺꦴꦠꦼꦤ꧀ꦥꦤ꧀ꦠꦼꦱ꧀ꦩꦸꦚ꧀ꦗꦸꦏ꧀ꦲꦶꦁꦔꦂꦱꦥꦚ꧀ꦗꦼꦤꦼꦁꦔꦤ꧀꧉​

^18:28 ꦠꦶꦪꦁꦩꦸꦂꦱꦶꦢ꧀ꦱꦺꦏꦼꦠ꧀ꦮꦲꦸꦩ꧀ꦧꦺꦴꦏ꧀ꦩꦼꦤꦮꦶꦮꦺꦴꦤ꧀ꦠꦼꦤ꧀ꦏꦶꦫꦁꦔꦶꦥꦸꦤ꧀ꦒꦁꦱꦭ꧀꧉​ꦩꦼꦤꦥꦏꦿꦤꦱꦏꦶꦁꦏꦶꦫꦁꦠꦶꦪꦁꦒꦁꦱꦭ꧀ꦮꦲꦸꦥꦚ꧀ꦗꦼꦤꦼꦁꦔꦤ꧀ꦧꦝꦺꦤꦸꦩ꧀ꦥꦼꦱ꧀ꦠꦶꦪꦁꦱꦤꦼꦒꦫꦶꦱꦼꦢꦪ?"ꦥꦔꦤ꧀ꦢꦶꦏꦤꦺꦒꦸꦱ꧀ꦠꦶꦄꦭ꧀ꦭꦃ꧈​"ꦩꦼꦤꦮꦲꦶꦁꦏꦺꦴꦤꦺꦴꦲꦤꦮꦺꦴꦁꦥꦠꦁꦥꦸꦭꦸꦃꦭꦶꦩꦮꦲꦺꦏꦁꦩꦸꦂꦱꦶꦢ꧀꧈​ꦤꦼꦒꦫꦲꦶꦏꦸꦩꦼꦱ꧀ꦛꦶꦲꦺꦴꦫꦢꦏ꧀ꦠꦸꦩ꧀ꦥꦼꦱ꧀꧉"​

^18:29 ​꧊ꦄꦧꦿꦲꦩ꧀ꦤꦸꦭꦶꦩꦸꦚ꧀ꦗꦸꦏ꧀ꦩꦼꦤꦺꦃ꧈​"ꦩ꧀ꦧꦺꦴꦏ꧀ꦩꦼꦤꦮꦶꦲꦶꦁꦔꦿꦶꦏꦸꦤꦩꦸꦁꦮꦺꦴꦤ꧀ꦠꦼꦤ꧀ꦠꦶꦪꦁꦏꦮꦤ꧀ꦢꦱꦲꦶꦁꦏꦁꦩꦸꦂꦱꦶꦢ꧀?"ꦥꦫꦶꦁꦮꦁꦱꦸꦭ꧀ꦭꦤ꧀ꦤꦺꦒꦸꦱ꧀ꦠꦶꦄꦭ꧀ꦭꦃ꧈​"ꦩꦼꦱ꧀ꦛꦶꦧꦏꦭ꧀ꦢꦏ꧀ꦮꦸꦫꦸꦁꦔꦏꦺ꧈​ꦩꦼꦂꦒꦱꦏꦮꦺꦴꦁꦥꦠꦁꦥꦸꦭꦸꦃꦩꦲꦸ꧉"​

^18:30 ꦲꦠꦸꦂꦫꦺ​꧊ꦄꦧꦿꦲꦩ꧀꧈​"ꦝꦸꦃꦄꦭ꧀ꦭꦃ꧈​ꦱꦩ꧀ꦥꦸꦤ꧀ꦔꦤ꧀ꦠꦺꦴꦱ꧀ꦢꦸꦏ꧉​ꦩ꧀ꦧꦺꦴꦏ꧀ꦩꦼꦤꦮꦶꦮꦺꦴꦤ꧀ꦠꦼꦤ꧀ꦤꦶꦥꦸꦤ꧀ꦤꦩꦸꦁꦠꦶꦒꦁꦢꦱ꧉"​ꦥꦔꦤ꧀ꦢꦶꦏꦤꦺꦒꦸꦱ꧀ꦠꦶꦄꦭ꧀ꦭꦃ꧈​"ꦩꦼꦱ꧀ꦛꦶꦢꦏ꧀ꦮꦸꦫꦸꦁꦔꦏꦺꦪꦺꦤ꧀ꦲꦤꦮꦺꦴꦁꦠꦼꦭꦸꦁꦥꦸꦭꦸꦃꦮꦲꦺꦱꦶꦁꦩꦸꦂꦱꦶꦢ꧀꧉"​

^18:31 ꦲꦸꦚ꧀ꦗꦸꦏ꧀ꦏꦺ​꧊ꦄꦧꦿꦲꦩ꧀ꦱꦼꦥꦶꦱ꧀ꦱꦤ꧀ꦩꦼꦤꦺꦃ꧈​"ꦚꦸꦮꦸꦤ꧀ꦔꦥꦸꦤ꧀ꦠꦼꦤ꧀꧈​ꦢꦺꦤꦺꦏꦸꦭꦱꦩ꧀ꦥꦸꦤ꧀ꦏꦸꦩꦮꦤ꧀ꦠꦸꦤ꧀ꦲꦶꦁꦔꦂꦱꦤꦶꦥꦸꦤ꧀ꦥꦔꦺꦫꦤ꧀꧉​ꦏꦢꦺꦴꦱ꧀ꦥꦸꦤ꧀ꦢꦶꦱꦲꦸꦥꦩꦶꦲꦶꦁꦔꦿꦶꦏꦸꦤꦩꦸꦁꦏꦼꦥꦁꦒꦶꦃꦠꦶꦪꦁꦏꦭꦶꦃꦢꦱꦲꦶꦁꦏꦁꦩꦸꦂꦱꦶꦢ꧀?"ꦥꦔꦤ꧀ꦢꦶꦏꦤꦺꦄꦭ꧀ꦭꦃ꧈​"ꦩꦼꦱ꧀ꦛꦶꦲꦺꦴꦫꦧꦏꦭ꧀ꦢꦏ꧀ꦠꦸꦩ꧀ꦥꦼꦱ꧀꧉"​

^18:32 ​꧊ꦄꦧꦿꦲꦩ꧀ꦲꦶꦱꦶꦃꦔꦼꦚꦁꦩꦼꦤꦺꦃ꧈​"ꦱꦩ꧀ꦥꦸꦤ꧀ꦢꦸꦏ꧈​ꦝꦸꦃꦥꦔꦺꦫꦤ꧀꧈​ꦲꦮꦶꦠ꧀ꦱꦏꦶꦁꦲꦠꦸꦂꦏꦸꦭꦲꦶꦁꦏꦁꦥꦸꦁꦏꦱ꧀ꦱꦤ꧀ꦩꦼꦤꦶꦏ꧈​ꦩ꧀ꦧꦺꦴꦏ꧀ꦩꦼꦤꦮꦶꦲꦶꦁꦔꦿꦶꦏꦸꦤꦩꦸꦁꦏꦼꦥꦁꦒꦶꦃꦠꦶꦪꦁꦱꦼꦢꦱꦲꦶꦁꦏꦁꦩꦸꦂꦱꦶꦢ꧀꧉"​ꦥꦔꦤ꧀ꦢꦶꦏꦤꦺꦒꦸꦱ꧀ꦠꦶꦄꦭ꧀ꦭꦃ꧈​"ꦩꦼꦱ꧀ꦛꦶꦲꦺꦴꦫꦧꦏꦭ꧀ꦢꦏ꧀ꦠꦸꦩ꧀ꦥꦼꦱ꧀ꦩꦼꦂꦒꦱꦏꦮꦺꦴꦁꦱꦼꦥꦸꦭꦸꦃꦱꦶꦁꦩꦸꦂꦱꦶꦢ꧀꧉"​

^18:33 ꦱꦮꦶꦱ꧀ꦱꦺꦫꦩ꧀ꦥꦸꦁꦔꦤ꧀ꦢꦶꦏꦏꦫꦺꦴ​꧊ꦄꦧꦿꦲꦩ꧀꧈​ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦠꦶꦤ꧀ꦢꦏ꧀꧈​ꦭꦤ꧀​꧊ꦄꦧꦿꦲꦩ꧀ꦤꦸꦭꦶꦩꦸꦭꦶꦃ꧉​