Jv/Alkitab/Purwaning Dumadi/1

^1:1 ꦲꦶꦁꦗꦩꦤ꧀ꦏꦸꦤꦱꦶꦁꦮꦶꦮꦶꦠ꧀ꦠꦤ꧀ꦩꦸꦭꦒꦸꦱ꧀ꦠꦶꦄꦭ꧀ꦭꦃꦤꦶꦠꦃꦲꦏꦺꦗꦒꦢ꧀꧉​

^1:2 ꦧꦸꦩꦶꦏꦲꦤꦤꦺꦲꦶꦱꦶꦃꦲꦺꦴꦫꦏꦫꦸꦏꦫꦸꦮꦤ꧀꧈​ꦠꦸꦂꦱꦼꦥꦶꦧꦔꦼꦠ꧀꧉​ꦱꦭꦸꦩꦃꦲꦺꦧꦸꦩꦶꦏꦼꦠꦸꦠꦸꦥ꧀ꦥꦤ꧀ꦧꦚꦸ꧈​ꦩꦁꦏꦏꦲꦤꦤꦺꦥꦼꦠꦼꦁꦤ꧀ꦝꦼꦝꦼꦠ꧀꧉​ꦢꦺꦤꦺꦫꦺꦴꦃꦲꦺꦄꦭ꧀ꦭꦃꦩꦏꦂꦪꦲꦤꦲꦶꦁꦱꦤ꧀ꦝꦸꦮꦸꦂꦫꦺꦧꦚꦸ꧉​

^1:3 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦔꦤ꧀ꦢꦶꦏ꧈​"ꦲꦤꦲꦥꦝꦁ꧉"​ꦧꦚ꧀ꦗꦸꦂꦲꦤꦥꦝꦁ꧉​

^1:4 ꦒꦸꦱ꧀ꦠꦶꦄꦭ꧀ꦭꦃꦩꦶꦂꦱꦤꦶꦪꦺꦤ꧀ꦥꦝꦁꦩꦲꦸꦮꦶꦱ꧀ꦧꦼꦕꦶꦏ꧀꧉​ꦥꦚ꧀ꦗꦼꦤꦼꦁꦔꦤ꧀ꦤꦺꦤꦸꦭꦶꦩꦶꦱꦃꦥꦝꦁꦏꦫꦺꦴꦥꦼꦠꦼꦁ꧈​

^1:5 ꦱꦶꦁꦥꦝꦁꦢꦶꦲꦫꦤ꧀ꦤꦶ"ꦫꦶꦤ꧈"​ꦱꦶꦁꦥꦼꦠꦼꦁꦢꦶꦲꦫꦤ꧀ꦤꦶ"ꦮꦼꦔꦶ"꧉​ꦩꦼꦁꦏꦺꦴꦤꦺꦴꦮꦶꦱ꧀ꦢꦢꦶꦱꦺꦴꦫꦺꦭꦤ꧀ꦲꦺꦱꦸꦏ꧀;ꦪꦏꦸꦮꦶꦢꦶꦤꦏꦁꦏꦥꦶꦱꦤ꧀꧉​

^1:6 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦔꦤ꧀ꦢꦶꦏ꧈​"ꦲꦤꦲꦥꦼꦤ꧀ꦛꦺꦁꦔꦤ꧀ꦏꦁꦩꦶꦱꦃꦲꦏꦺꦧꦚꦸꦢꦢꦶꦭꦺꦴꦫꦺꦴ꧈​ꦲꦶꦁꦥꦁꦒꦺꦴꦤ꧀ꦤꦤ꧀ꦤꦺꦝꦺꦮꦺꦝꦺꦮꦺ꧉"​ꦧꦚ꧀ꦗꦸꦂꦲꦶꦪꦢꦢꦶꦩꦼꦁꦏꦺꦴꦤꦺꦴ꧉​

^1:7 ꦏꦪꦩꦼꦁꦏꦺꦴꦤꦺꦴꦒꦸꦱ꧀ꦠꦶꦄꦭ꧀ꦭꦃꦮꦸꦱ꧀ꦪꦱꦥꦼꦤ꧀ꦛꦺꦁꦔꦤ꧀ꦏꦁꦒꦺꦴꦩꦶꦱꦃꦲꦏꦺꦧꦚꦸꦱꦶꦁꦲꦤꦱꦔꦶꦱꦺꦴꦂꦫꦶꦁꦥꦼꦤ꧀ꦛꦺꦁꦔꦤ꧀ꦏꦫꦺꦴꦧꦚꦸꦱꦶꦁꦲꦤꦱꦤ꧀ꦝꦸꦮꦸꦂꦫꦺꦥꦼꦤ꧀ꦛꦺꦁꦔꦤ꧀ꦩꦲꦸ꧉​

^1:8 ꦥꦼꦤ꧀ꦛꦺꦁꦔꦤ꧀ꦏꦸꦮꦶꦢꦶꦲꦫꦤ꧀ꦤꦶ"ꦭꦔꦶꦠ꧀"꧉​ꦩꦼꦁꦏꦺꦴꦤꦺꦴꦮꦶꦱ꧀ꦢꦢꦶꦱꦺꦴꦫꦺꦭꦤ꧀ꦲꦺꦱꦸꦏ꧀;ꦪꦏꦸꦮꦶꦢꦶꦤꦏꦁꦏꦥꦶꦤ꧀ꦝꦺꦴ꧉​

^1:9 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏ꧈​"ꦧꦚꦸꦏꦁꦲꦤꦲꦶꦁꦱꦔꦶꦱꦺꦴꦂꦫꦶꦁꦭꦔꦶꦠ꧀ꦥꦝꦔ꧀ꦭꦸꦩ꧀ꦥꦸꦏ꧀ꦏꦢꦢꦶꦱꦶꦗꦶ꧈​ꦱꦸꦥꦪꦏꦠꦺꦴꦤꦝꦫꦠ꧀ꦠꦤ꧀ꦤꦺ꧉"​ꦧꦚ꧀ꦗꦸꦂꦲꦶꦪꦢꦢꦶꦩꦼꦁꦏꦺꦴꦤꦺꦴ꧉​

^1:10 ꦝꦫꦠ꧀ꦠꦤ꧀ꦩꦲꦸꦢꦶꦲꦫꦤ꧀ꦤꦶ"ꦧꦸꦩꦶ꧈"​ꦭꦤ꧀ꦏ꧀ꦭꦸꦩ꧀ꦥꦸꦏ꧀ꦏꦤ꧀ꦤꦺꦧꦚꦸꦢꦶꦲꦫꦤ꧀ꦤꦶ"ꦱꦼꦒꦫ"꧉​ꦒꦸꦱ꧀ꦠꦶꦄꦭ꧀ꦭꦃꦩꦶꦂꦱꦤꦶꦪꦺꦤ꧀ꦏꦲꦤꦤꦺꦮꦶꦱ꧀ꦧꦼꦕꦶꦏ꧀꧉​

^1:11 ꦥꦚ꧀ꦗꦼꦤꦼꦁꦔꦤ꧀ꦤꦺꦤꦸꦭꦶꦔꦤ꧀ꦢꦶꦏ꧈​"ꦧꦸꦩꦶꦩꦼꦠꦺꦴꦏ꧀ꦤꦠꦼꦠꦸꦮꦸꦃꦲꦤ꧀ꦫꦸꦥꦫꦸꦥ꧈​ꦪꦏꦸꦮꦶꦛꦼꦛꦸꦏꦸꦭ꧀ꦭꦤ꧀ꦏꦁꦤꦸꦮꦸꦃꦲꦏꦺꦮꦶꦗꦶ꧈​ꦭꦤ꧀ꦮꦶꦠ꧀ꦮꦶꦠ꧀ꦠꦤ꧀ꦏꦁꦩꦼꦠꦺꦴꦏ꧀ꦏꦏꦺꦮꦺꦴꦃꦮꦺꦴꦃꦲꦤ꧀꧉"​ꦧꦚ꧀ꦗꦸꦂꦲꦶꦪꦢꦢꦶꦩꦼꦁꦏꦺꦴꦤꦺꦴ꧉​

^1:12 ꦧꦸꦩꦶꦩꦼꦠꦺꦴꦏ꧀ꦏꦏꦺꦠꦼꦠꦸꦮꦸꦃꦲꦤ꧀ꦮꦼꦂꦤꦮꦼꦂꦤ꧈​ꦲꦶꦪꦛꦼꦛꦸꦏꦸꦭ꧀ꦭꦤ꧀ꦱꦶꦁꦤꦸꦮꦸꦃꦲꦏꦺꦮꦶꦗꦶ꧈​ꦱꦼꦩꦺꦴꦤꦺꦴꦲꦸꦒꦮꦶꦠ꧀ꦮꦶꦠ꧀ꦠꦤ꧀ꦱꦶꦁꦩꦼꦠꦺꦴꦏ꧀ꦏꦏꦺꦮꦺꦴꦃꦮꦺꦴꦃꦲꦤ꧀꧉​ꦒꦸꦱ꧀ꦠꦶꦄꦭ꧀ꦭꦃꦩꦶꦂꦱꦤꦶꦪꦺꦤ꧀ꦏꦸꦮꦶꦩꦲꦸꦏꦧꦺꦃꦮꦶꦱ꧀ꦧꦼꦕꦶꦏ꧀꧉​

^1:13 ꦩꦼꦁꦏꦺꦴꦤꦺꦴꦮꦶꦱ꧀ꦢꦢꦶꦱꦺꦴꦫꦺꦭꦤ꧀ꦲꦺꦱꦸꦏ꧀;ꦪꦏꦸꦮꦶꦢꦶꦤꦏꦁꦏꦠꦼꦭꦸ꧉​

^1:14 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏ꧈​"ꦲꦶꦁꦭꦔꦶꦠ꧀ꦲꦤꦲꦥꦼꦥꦝꦁꦔꦺꦱꦶꦁꦩꦶꦱꦃꦲꦏꦺꦫꦶꦤꦭꦤ꧀ꦮꦼꦔꦶ꧈​ꦱꦂꦠꦏꦁꦒꦺꦴꦠꦼꦔꦼꦂꦫꦤ꧀ꦮꦶꦮꦶꦠ꧀ꦠꦤ꧀ꦤꦺꦢꦶꦤ꧈​ꦠꦲꦸꦤ꧀ꦭꦤ꧀ꦩꦁꦱꦫꦶꦪꦪꦩꦤꦸꦠ꧀ꦥꦽꦤꦠꦤꦶꦁꦲꦒꦩ꧉​

^1:15 ꦏꦫꦺꦴꦩꦼꦤꦺꦃꦥꦝꦢꦢꦶꦪꦥꦼꦥꦝꦁꦲꦶꦁꦭꦔꦶꦠ꧀ꦭꦤ꧀ꦩꦝꦁꦔꦤꦧꦸꦩꦶ꧉"​ꦧꦚ꧀ꦗꦸꦂꦲꦶꦪꦢꦢꦶꦩꦼꦁꦏꦺꦴꦤꦺꦴ꧉​

^1:16 ꦒꦸꦱ꧀ꦠꦶꦄꦭ꧀ꦭꦃꦪꦱꦥꦼꦥꦝꦁꦭꦺꦴꦫꦺꦴꦱꦶꦁꦒꦼꦝꦺ꧈​ꦪꦏꦸꦮꦶꦱꦽꦔꦺꦔꦺꦔꦼꦫꦺꦃꦮꦪꦃꦫꦶꦤ꧈​ꦭꦤ꧀ꦉꦩ꧀ꦧꦸꦭ꧀ꦭꦤ꧀ꦲꦶꦁꦮꦪꦃꦧꦼꦔꦶ꧈​ꦩꦼꦁꦏꦺꦴꦤꦺꦴꦲꦸꦒꦪꦱꦭꦶꦤ꧀ꦠꦁꦭꦶꦤ꧀ꦠꦁ꧉​

^1:17 ꦥꦼꦥꦝꦁꦥꦼꦥꦝꦁꦩꦲꦸꦢꦶꦥꦽꦤꦃꦲꦏꦺꦢꦺꦤꦶꦁꦒꦸꦱ꧀ꦠꦶꦄꦭ꧀ꦭꦃꦲꦤꦲꦶꦁꦭꦔꦶꦠ꧀ꦏꦁꦒꦺꦴꦩꦝꦁꦔꦶꦧꦸꦩꦶ꧈​

^1:18 ꦔꦼꦫꦺꦃꦮꦪꦃꦫꦶꦤꦭꦤ꧀ꦮꦪꦃꦧꦼꦔꦶ꧈​ꦲꦥꦢꦺꦤꦺꦩꦶꦱꦃꦲꦏꦺꦥꦝꦁꦏꦫꦺꦴꦥꦼꦠꦼꦁ꧉​ꦒꦸꦱ꧀ꦠꦶꦄꦭ꧀ꦭꦃꦩꦶꦂꦱꦤꦶꦪꦺꦤ꧀ꦏꦧꦺꦃꦩꦲꦸꦮꦶꦱ꧀ꦧꦼꦕꦶꦏ꧀꧉​

^1:19 ꦩꦼꦁꦏꦺꦴꦤꦺꦴꦮꦶꦱ꧀ꦢꦢꦶꦱꦺꦴꦫꦺꦭꦤ꧀ꦲꦺꦱꦸꦏ꧀;ꦪꦏꦸꦮꦶꦢꦶꦤꦏꦁꦏꦥꦠ꧀꧉​

^1:20 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦔꦤ꧀ꦢꦶꦏ꧈​"ꦲꦶꦁꦧꦚꦸꦲꦤꦲꦏꦺꦮꦤ꧀ꦧꦚꦸꦮꦼꦂꦤꦮꦼꦂꦤ꧈​ꦭꦤ꧀ꦲꦶꦁꦲꦮꦁꦲꦮꦁꦲꦤꦲꦩꦤꦸꦏ꧀ꦏꦺ꧉"​

^1:21 ꦒꦸꦱ꧀ꦠꦶꦄꦭ꧀ꦭꦃꦤꦶꦠꦃꦲꦏꦺꦏꦺꦮꦤ꧀ꦏꦁꦒꦼꦝꦺꦒꦼꦝꦺꦧꦔꦼꦠ꧀꧈​ꦭꦤ꧀ꦮꦼꦂꦤꦮꦼꦂꦤꦱꦶꦁꦥꦝꦲꦸꦫꦶꦥ꧀ꦲꦶꦁꦧꦚꦸ꧈​ꦱꦼꦩꦺꦴꦤꦺꦴꦲꦸꦒꦱꦏꦺꦃꦲꦺꦩꦤꦸꦏ꧀꧉​ꦒꦸꦱ꧀ꦠꦶꦄꦭ꧀ꦭꦃꦩꦶꦂꦱꦤꦶꦪꦺꦤ꧀ꦏꦸꦮꦶꦏꦧꦺꦃꦮꦶꦱ꧀ꦧꦼꦕꦶꦏ꧀꧉​

^1:22 ꦤꦸꦭꦶꦥꦝꦢꦶꦧꦼꦂꦏꦃꦲꦶ;ꦥꦔꦤ꧀ꦢꦶꦏꦤꦺꦩꦫꦁꦏꦺꦮꦤ꧀ꦏꦺꦮꦤ꧀ꦱꦶꦁꦲꦤꦲꦶꦁꦧꦚꦸ꧈​"ꦥꦝꦧꦼꦧꦿꦤꦃꦲꦤꦭꦤ꧀ꦠꦁꦏꦂꦠꦸꦩꦁꦏꦫ꧈​ꦔꦼꦧꦏ꧀ꦏꦤꦧꦚꦸꦤꦶꦁꦱꦼꦒꦫ꧉​ꦭꦤ꧀ꦩꦤꦸꦏ꧀ꦩꦤꦸꦏ꧀ꦥꦝꦠꦁꦏꦂꦠꦸꦩꦁꦏꦫꦲꦤꦲꦶꦁꦧꦸꦩꦶ꧉"​

^1:23 ꦩꦼꦁꦏꦺꦴꦤꦺꦴꦮꦶꦱ꧀ꦢꦢꦶꦱꦺꦴꦫꦺꦭꦤ꧀ꦲꦺꦱꦸꦏ꧀;ꦪꦏꦸꦮꦶꦢꦶꦤꦏꦁꦏꦭꦶꦩ꧉​

^1:24 ꦒꦸꦱ꧀ꦠꦶꦄꦭ꧀ꦭꦃꦧꦚ꧀ꦗꦸꦂꦔꦤ꧀ꦢꦶꦏ꧈​"ꦲꦶꦁꦧꦸꦩꦶꦲꦤꦲꦏꦺꦮꦤ꧀ꦮꦼꦂꦤꦮꦼꦂꦤ꧈​ꦏꦺꦮꦤ꧀ꦲꦶꦔꦺꦴꦤ꧀ꦲꦶꦔꦺꦴꦤ꧀ꦭꦤ꧀ꦏꦺꦮꦤ꧀ꦲꦭꦱ꧀ꦱꦤ꧀꧈​ꦏꦁꦒꦼꦝꦺꦭꦤ꧀ꦏꦁꦕꦶꦭꦶꦏ꧀꧉"​ꦧꦚ꧀ꦗꦸꦂꦲꦶꦪꦢꦢꦶꦩꦼꦁꦏꦺꦴꦤꦺꦴ꧉​

^1:25 ꦒꦸꦱ꧀ꦠꦶꦄꦭ꧀ꦭꦃꦪꦱꦱꦠꦺꦴꦏꦺꦮꦤ꧀ꦏꦸꦮꦶꦩꦲꦸꦏꦧꦺꦃ꧈​ꦱꦂꦠꦢꦶꦥꦶꦂꦱꦤꦶꦮꦶꦱ꧀ꦧꦼꦕꦶꦏ꧀꧉​

^1:26 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦔꦤ꧀ꦢꦶꦏ꧈​"ꦲꦪꦺꦴꦏꦶꦠꦥꦝꦪꦱꦩꦤꦸꦁꦱ꧈​ꦤꦸꦭꦢ꧀ꦒꦩ꧀ꦧꦂꦭꦤ꧀ꦥꦱꦼꦩꦺꦴꦤ꧀ꦏꦶꦠ꧉​ꦩꦤꦸꦁꦱꦲꦶꦏꦸꦔ꧀ꦮꦱꦤꦤꦲꦶꦮꦏ꧀ꦲꦶꦮꦏ꧀꧈​ꦩꦤꦸꦏ꧀ꦩꦤꦸꦏ꧀꧈​ꦭꦤ꧀ꦱꦏꦺꦃꦲꦺꦏꦺꦮꦤ꧀ꦲꦶꦔꦺꦴꦤ꧀ꦲꦶꦔꦺꦴꦤ꧀ꦭꦤ꧀ꦏꦺꦮꦤ꧀ꦲꦭꦱ꧀ꦱꦤ꧀꧈​ꦱꦶꦁꦒꦼꦝꦺꦠꦼꦏꦤ꧀ꦱꦶꦁꦕꦶꦭꦶꦏ꧀ꦝꦺꦮꦺꦥꦶꦱꦤ꧀꧉"​

^1:27 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦪꦱꦩꦤꦸꦁꦱꦤꦸꦭꦢ꧀ꦒꦩ꧀ꦧꦂꦭꦤ꧀ꦥꦱꦼꦩꦺꦴꦤꦺꦥꦶꦪꦩ꧀ꦧꦏ꧀꧉​ꦲꦼꦁꦒꦺꦴꦤꦺꦤꦶꦠꦃꦲꦏꦺꦩꦤꦸꦁꦱꦩꦲꦸꦭꦤꦁꦭꦤ꧀ꦮꦢꦺꦴꦤ꧀꧉​

^1:28 ꦤꦸꦭꦶꦥꦝꦢꦶꦧꦼꦂꦏꦃꦲꦶ꧈​ꦥꦔꦤ꧀ꦢꦶꦏꦤꦺ꧈​"ꦥꦝꦧꦼꦧꦿꦤꦃꦲꦤꦭꦤ꧀ꦠꦁꦏꦂꦠꦸꦩꦁꦏꦫ;ꦠꦸꦫꦸꦤ꧀ꦩꦸꦥꦝꦔꦼꦧꦏ꧀ꦏꦤꦭꦤ꧀ꦔ꧀ꦮꦱꦤꦤꦧꦸꦩꦶ꧉​ꦩꦼꦁꦏꦺꦴꦤꦺꦴꦲꦸꦒꦥꦝꦔ꧀ꦮꦱꦤꦤꦱꦏꦺꦃꦲꦶꦁꦲꦶꦮꦏ꧀꧈​ꦩꦤꦸꦏ꧀ꦩꦤꦸꦏ꧀ꦭꦤ꧀ꦏꦺꦮꦤ꧀ꦏꦺꦮꦤ꧀ꦲꦭꦱ꧀ꦱꦤ꧀꧉"​

^1:29 ꦱꦂꦠꦥꦔꦤ꧀ꦢꦶꦏꦤꦺꦩꦼꦤꦺꦃ꧈​"ꦏꦺꦴꦮꦺꦥꦝꦢꦏ꧀ꦥꦫꦶꦁꦔꦶꦱꦫꦸꦥꦤꦺꦛꦼꦛꦸꦏꦸꦭ꧀ꦭꦤ꧀ꦏꦁꦩꦼꦠꦺꦴꦏ꧀ꦏꦏꦺꦮꦶꦗꦶ꧈​ꦲꦥꦢꦺꦤꦺꦱꦫꦸꦥꦤꦺꦮꦺꦴꦃꦮꦺꦴꦃꦲꦤ꧀ꦩꦶꦤꦁꦏꦥꦔꦤ꧀ꦩꦸ;

^1:30 ꦤꦁꦔꦶꦁꦱꦏꦺꦃꦲꦶꦁꦱꦠꦺꦴꦏꦺꦮꦤ꧀ꦲꦭꦱ꧀ꦱꦤ꧀ꦭꦤ꧀ꦱꦏꦺꦃꦲꦶꦁꦩꦤꦸꦏ꧀ꦱꦂꦠꦱꦫꦸꦥꦤꦶꦁꦏꦺꦮꦤ꧀ꦏꦺꦮꦤ꧀ꦭꦶꦪꦤꦺꦢꦏ꧀ꦥꦫꦶꦁꦔꦶꦱꦸꦏꦼꦠ꧀ꦭꦤ꧀ꦒꦺꦴꦝꦺꦴꦁꦔꦺꦠꦼꦠꦸꦮꦸꦃꦲꦤ꧀ꦩꦶꦤꦁꦏꦥꦔꦤ꧀ꦤꦺ꧉"​ꦧꦚ꧀ꦗꦸꦂꦲꦶꦪꦢꦢꦶꦩꦼꦁꦏꦺꦴꦤꦺꦴ꧉​

^1:31 ꦒꦸꦱ꧀ꦠꦶꦄꦭ꧀ꦭꦃꦤꦸꦭꦶꦩꦶꦂꦱꦤꦶꦱꦩꦸꦧꦫꦁꦪꦱꦤꦺ꧈​ꦭꦤ꧀ꦏꦧꦺꦃꦩꦲꦸꦮꦶꦱ꧀ꦧꦼꦕꦶꦏ꧀ꦧꦔꦼꦠ꧀꧉​ꦩꦼꦁꦏꦺꦴꦤꦺꦴꦮꦶꦱ꧀ꦢꦢꦶꦱꦺꦴꦫꦺꦭꦤ꧀ꦮꦶꦱ꧀ꦢꦢꦶꦲꦺꦱꦸꦏ꧀;ꦪꦏꦸꦮꦶꦢꦶꦤꦏꦁꦏꦤꦼꦩ꧀꧉​