Jipuls Melopik

From Wikisource
Jump to navigation Jump to search

In nüm bevü lätiks National Review'a (Revidableda netik) penädel sembal epübom laltügi nitedik tefü voms melopik. Cödatöl vomi melopik feleigü yulopik, zesüdos balüdo konsidön das sit daduka in Melop binom löliko difik. Jidadukels domo binofs ti penesevöl, sesumü in Solüdatats, kö aniks patuvofs nogo demü def julas gudik. In Nolümelop daduköps e tidastits sibinoms sumöl tidastits plivadik obas, ab, dadukasegiv binom so delidik, das pakosadoms fa jipuls te liegik. Sit daduka pabizugöl tefü jiplus klada lafik binom jul publügik, balidlik e telidlik, e jenos ofeno das jipuls e puls bevütlidoms in klad ot togo.


Dif kaladik sibinom bevü tidam vomik melopik e yulopik: balid binom ofeno dibälikum e lefulnikum ka telid; diseinom födi gletikum fägälas e, du jul yulopik desänom fomön jijulelis valik ma sam leigik, jul melopik desänom födön tidami jialika ma kalad ofik. Daduk pelefulnöl, jipul melopik lüvof juli ofeno e viliko sunumo ka jipul yulopik, e paels, pla jepön ai e konsidön ofi as jicili, konfidoms löliko in of. Padälof lasumön visiti mena aikiom mobinü fat e mot; vüdön yunani, pesevöl in ledanüd, al visitön ofi domo, spatön i in vab ko om anikna, pakopanöl fa pösod nonik famüla. Läsevamo lib lölik at pagevom ofe sukü zelad das jipul okodötof äso päzümof la fa tlup galelas jalepik.


Nu logobsöd liko föd südlik mostepom ven nitlidof in sog. Sagobs büo das mot binof limödöf pöluletöl, natiko tefü kosad sogik, bi te sepet desida motik binom valikos tefü jison löföl moti. Ab as jigalel, jitütel, mot labof jenöfo söti nonik. Jiyunans padälofs gälodön ma plüd ofsik e ,bi binos ti nemögik das jipul pepöladukof la, atos blöfos das sit at binom gudik, du südods melopana binoms jalepikum ka uts yulopana.


Semliko, yunans genas bofik tölatoms balvoto in Melop ma mod oksik; spatoms kobo, kobo in vab, in nafil, gladajukoms kobo, e men stimom oki, kodötöl kol jipuls äso votik äkodötomöv kol jiblod okik.


Sukü lib at kosadas, jipul melopik vöbof natiko süeni gletikum. Logof manis mödik in pötatimöfs kels jonoms kaladi omas, e plöpof vemo nefikulikumo al cödatön omis, ka kolkömöl omis sotimo du düps nemödik, in pötatimöfs in kels mens lesteifoms al kodötön snatiko: e somo jipul venüdof luumo citön oki pötatimü seväl okik. Logedof dibikumo in natäl mana, kapälof omi gudikumo e sukado yeg dlimas ofik binom sibinel menik e plagik, kludo cüts biedik zidoms ofe seledikumo ka jipule yulopik.


Zesüdos tikön ai tefü atos, das dil gletikün dölas obas tefü mük, zadäl, modalib e. l. binoms te tefamik. If kels mekoms lonis sogik äbalamoms la al lesagön das jepön tenalo jipulis binos smilik, u das binos nesüdlik das läd jonof oki ko nökeb penüdöl, döls obsik tefü materim päcenomsöv pos yels lul e votam äjenomöv posetenöl da klads sogik valik. In dins at kösöm stabom pedälikosi e penedälikosi, südlikosi u nesüdlikosi, e atos pablöfos fa Melopans it, kels, nestü südodalib oksik, blamoms ofenumo ka obs klotadis manifik lädas e lületoms omis selediko in glezifs, as sam New-York e Chicago, kels binoms bufumo volazifs ka melopazifs jenik.


I stud, keli jipuls melopik gebofs ai al gudumön okis, jonom kaladi ofsik, kel kanom pacedön mödikumo u luumo as sek daduka ofsik, ab lenzugom ai meni kapälik e pedadukÖl. Voms melopik, kösömo, dutofs ai daduki oksik. Al atos, lasamofs segunü bäled e stip alimas in klubs nenümik, kels binoms lasams gudumama balvotik, pejäföl no demü sötasiäm, sod kulivalöf. Sukads pajonoms; läds melopik mödikün visitöl fimäni obsik, nolofs sagön oles, büfü visit, in top kiom Vaticano'a pänod u galif sembal sibinom, e pükofs skilo dö kalads julas lekanik difik. Kuliv at dälom ofis visitön zifi sembal du tim nemödikum ka tävels flentänik e nelijänik kels, visitöl zifi sembal, bisenoloms selediko nitedikosis sibinöl in ot.



Se Nunal 1889, Nüm: 5, Pads: 4-5.


Vödem rigädik se L'Illustrazione Popolare; petradutöl fa vomül ISOLABELLA CARMEN.