jan mun
tenpo la jan mun li lon li lili a.
ona li lon kulupu suli pi jan mun.
ona li wile musi li wile pona tawa ale.
kin la ona li wile olin e jan mun suwi.
taso ona suwi li lon ma weka.
ona tu li toki lon tenpo, li toki kepeken ilo, li toki suwi mute.
taso ona tu li kama ala lon poka.
ona li ken ala kama lon poka.
ona li weka suli tawa ona.
ona li ken ala kama lon poka, taso ona lili li sona e ni:
ona li ken pana e pilin pi olin ona tawa ona suwi.
pana la nasin li seme?
jan mun li kama moli la, ona li kama lon sewi, lon poka pi mun suno ale.
sina ken lukin e ona lon sewi pimeja.
ona ale li wawa a tawa lukin.
ona li lon sewi la, ale li ken lukin e ona, e pona ona, e wawa ona!
taso! mun mute a li lon sewi.
jan mun li wile e lukin la ona o kama suli!
jan mun li suli lon moli ona la ona li awen suli lon sewi!
ni la, jan mun lili li wile e ni: ona li kama suli nanpa wan lon sewi.
ni la, olin ona li ken lukin e ona, li ken sona e pilin ona.
jan mun ni li lili.
lon la, ona li lili nanpa wan.
jan mun sin taso li lili tawa ona!
ni la, ona li kama lon sewi la, ona li lili tawa mun ante.
ni la, sina ken ala sona e ona tan mute mun tan lili ona!
ona li wile kama suli.
ona li wile kama suli nanpa wan.
ni la, olin ona li ken sona lukin e ona.
ni la, jan mun ale li ken sona lukin e ona, li ken sona e wawa pi olin ona!
jan mun lili li tawa tomo pi pali sijelo.
ona li sewi mute e ijo suli.
ona li tawa wawa lon ma lon telo lon ilo pi tawa noka lon nasin ante mute!
ona li moku mute a tawa pona sijelo tawa wawa sijelo tawa suli sijelo.
lon la, sijelo ona li pilin ike lon tenpo tan pali ona.
taso, ona li sona e ni: ona o awen pali tawa kama suli.
ni la ona li awen pali.
tenpo suli li kama li weka li pini.
jan mun lili en jan mun suwi li awen toki suwi.
ona tu li awen olin.
taso jan mun lili li kama lili ala lon tenpo.
ona li kama suli a!
ona li kama suli nanpa wan lon kulupu! lon a!
kin la, ona li awen kama suli.
pilin ona la, suli ona li sama suli pi olin ona.
ni la, ona li awen kama suli.
tenpo la, jan mun suli li moli.
ona li kama mun pi suli wawa lon sewi.
olin ona li lukin e mun ni la ona li sona e ni:
ni li mun pi olin mi.
ona li lukin e mun pi olin ona li sona e wawa pi pilin ona li pilin sama tawa ona.
jan mun suwi li awen lon tenpo, li lukin e mun ona lon sewi lon tenpo suli.
tenpo la, ona kin li moli, li kama lon poka pi olin ona lon sewi.
mun li moli la seme?
lon poka pi tenpo moli la mun pi suli wawa li kama suli sin.
ona li mute wawa e suli ona tan ni:
mun li lon la ona li wan e kon lon insa.
ni li wawa e ona li seli e ona li suno wawa e ona.
kon li kama wan la ona li kama kon ante.
kon ni kin li ken wan.
pini la kiwen taso li lon.
kiwen ni li wile e wawa tawa wan la mun mute li ken ala wan e kiwen.
mun pi suli wawa li ken wan e kiwen tan ni: suli ona li pana e wawa sin.
wawa ni li ken wan e kiwen.
taso, pini o lon.
wawa li pini la kon ale li wan li kama kiwen.
kiwen ale li wan li kama kiwen wawa.
tenpo la mun li kama ken ala wan e ijo lon insa ona.
ni la mun li lon poka moli.
ale pi insa mun li wan la insa ona li alasa weka e insa ona.
ona li kama suli li kama loje tan wawa pi kiwen insa tan alasa weka.
ona li kama suli la ona li moku e ijo mute lon poka tan suli sin ona.
tenpo la wawa pi kiwen insa kin li pini.
ni la kama suli ona li pini.
wawa pi suli ona li awen lon.
ni li taso.
wawa pi suli ona li lili e ona li moku e sijelo ona.
ni la ale mun li kama lon ma lili wan.
ale mun li mute mute mute a!
ijo mute li lon ma lili wan la ijo nasa li kama:
ijo mun li kama lupa.
lupa ni li moku wawa e ijo ale lon poka tan wawa ona.
ona li moku e mun ante e ma ale.
wawa ona li nasa e nasin tenpo lon poka.
sina lon poka ona la sina ken ala weka tan wawa ona.
sina alasa weka la sina ken kama lukin e monsi sina tan nasa ma tan nasa tenpo.
lupa ni li wawa li nasa.
mun olin li suli wawa la ona li kama lupa li moku e ale.
nnn, lupa ala.
ona li kama
| lupa | lupa | |||
| lupa | lupa | |||
| lupa | lupa | |||
| lupa | lupa | |||
| lupa | lupa | lupa | lupa | |
| lupa | lupa | lupa |
pini
