jan lawa Oliki (2022)

by soweli Elepanto

jan lawa Oliki by soweli Elepanto

toki musi ni li tan tenpo pini weka a, li tan kulupu Lowan. jan Alesan Pusin li sitelen e toki musi ni lon tenpo poka. tenpo sike nanpa 2009 la soweli Elepanto li lukin e sitelen pi jan Alesan Pusin li pali e toki musi sama kepeken toki pona. tenpo sike nanpa 2022 la soweli Elepanto en jan Pensa li pona e toki musi ni li pana e ona tawa lipu pu pi toki Epelanto. toki musi ni li lon lipu Wikiso pi toki Epelanto kin, li lon Tokipono: La lingvo de bono/Rakonto: jan lawa Oliki, li jo e ante toki pi toki Epelanto.

English (toki Inli): An old Slavic legend, retold in Toki Pona by soweli Elepanto, loosely adapted from the version by Russian poet Alexander Pushkin. Originally posted on the Toki Pona forums in 2009. In 2022 jan Pensa collaborated with soweli Elepanto to make a more polished version to publish as a bonus text in the Esperanto version of the book Toki Pona: The Language of Good. The same text with Esperanto translation can be found at Tokipono: La lingvo de bono/Rakonto: jan lawa Oliki on the Esperanto Wikisource.

jan lawa ma Oliki li kama tawa utala li tawa kepeken soweli tawa. tenpo wan la ona li kama lukin e jan pi sona mute li toki e ni: “jan sona o toki e ni tawa mi: tenpo kama la mi pilin pona ala pona? mi kama moli tan seme?”

jan sona li toki e ni: “jan lawa o! sina kama suli li kama wawa. sina anpa e jan ike sina ale. sina lawa e ma e telo. jan ala li ken anpa e sina. taso sina kama moli tan soweli tawa sina ni.”

soweli ni li pona tawa jan lawa Oliki. jan Oliki li pilin ike tan sona sin ni. taso ona li toki e ni tawa jan utala ona:

“jan mi o pana e soweli tawa ante tawa mi. o weka e soweli ni tan poka mi. mi wile ala tawa kepeken ona. mi wile ala lukin e ona. taso mi wile e ni: ona li pilin pona.”

utala li pini. tenpo sike mute li pini la jan Oliki en jan utala mute ona li moku li toki. jan Oliki li toki e ni: “soweli tawa mi li pilin pona ala pona?” taso ona li kama sona e ni: tenpo pini suli la soweli ni li kama moli…

ni li nasa mute tawa jan lawa. ona li toki e ni: “soweli mi li moli. taso mi awen lon. pakala! jan sona ni li ike li nasa! mi wile lukin e soweli moli!”

jan Oliki li tawa li lukin e soweli moli. ona li kama lon soweli ona la… a! akesi linja li lon soweli moli! ona li moku lili e jan lawa li pana e telo moli. jan lawa Oliki li kama moli tan ni a.