lipu lili ni li lipu nanpa wan tan lipu suli Sitata · wile kulupu la mi kama pana e lipu nanpa tu · lipu tu taso li lon · o toki e pilin sina e wile sina · toki kulupu la mi ken sona e wile jan ·
lipu ni li kama tan kon Eman Ese · taso ni li jan seme? tenpo pini la ona li jan lipu suli · ona li kama tan ma Tosi suli · lipu mute la ona li wile pana e sitelen pi alasa sona · kon jan pi lipu ona li alasa e lon e sona e nasin sewi · kon Ese la nasin mute li ken sewi · nasin wan li nasin taso ala ·
jan pi toki pona li lukin e lipu ni la ona o awen sona e ni · lipu ni li pana ala e sona lon pi nasin Puta, li pana ala e nasin sewi pi kon Ese · taso la ona li pana e sitelen wile pi kon Ese : sitelen la jan li ken alasa e lon e sewi kepeken nasin pi ona taso · jan ale o kama sona e lon ona · ken la lon ona li lon pi jan ante ala · taso ni li ike ala · sina wile kama sona lili e nasin Puta lon la mi pana e sitelen lili lon pini lipu · ni la jan li sona pona e ante pi nasin Puta e ante pi nasin Sitata e sitelen pi kon Ese ·
lipu Sitata li sitelen lon tenpo pi jan pini Puta · kon Ese li kepeken nimi mute li pana e ma mute tan tenpo pini pi jan Puta, tan lipu pi nasin Puta · jan li sona pona ala e nimi ni la sona lipu li ken nasa · ni la mi pana kin lon pini lipu e nimi ale ni pi toki ante · sina wile kama sona e kon e tan la o lukin · taso o sona kin e ni : mi ante e toki mama pi lipu Sitata la nimi li ken ante · ken la nimi pi toki Inli li kama ante kepeken nimi pi toki pona · ken la nimi tan tenpo pi jan Puta li kama weka, li kama nimi ante kepeken toki pona · mi ante e nimi la mi wile e ni : jan ale li ken sona pona kepeken toki pona ·
kulupu o lukin pona, o musi pona a!
— jan Kala
