In disprezzo
Jump to navigation
Jump to search
VII
In Disprezzo
Oh cazz, semm an' mò chì con sto sonaj
che tutt el dì me sta a romp el scervell:
vala mò on pezz andà a baià in bordell,
testa de balotron, de paramaj ?
No sét comè la va da dì d'i baj,
che t' faró stà da pé, master Scinell,
poetta dottorá lì al Cantonscell
e incoroná cont ona resta d'aj?
Che diset mò mostasg da lutrian,
cera da cavezza cont i fuston,
somenza de cazzon de quij nostran,
battasg da fà soná quel campanon
che domanda a consej tugg i roffian,
cassina de pan marsc e balestron,
prió d'i bolgiron,
abbá d' vaccasg e pû guidon falli:
va' via, mò, vatt a scond, che t'hó ciari.