I trii partii in Italia
Jump to navigation
Jump to search
Camillo Cima (1827–1908)
I trii partii in Italia
Se discuteva on dì sui pocch speranz
che s'abbia de fenì de tribulà,
per via che, ogni tratt, se fan innanz
di partii noeuv, politich, a seccà.
Monarchich e covin ghe n'è d'avanz;
poeu gh'è i repubblican, tant per cambià;
poeu i socialista de divers nuanz
papista e comunard per sigillà.
E on tal, scaldaa, el vosava: "Avii capii
che vemm tucc a fenì in del cagaratt,
con sta poca missolta de partii?"
"Oh, giust (salta su on Tizzi, on resiatt),
Partii in in Italia no ghe n'è che trii!
Vorii savej? Asen, baloss e matt!"