I mè visit d'inverno
Gioann Bertacch (1869-1942)
I mè visit d'inverno
Se i contadin che viv in di frazzion
spanduu su per la Mera e per el Lir
in certi sir d'inverno
quand i montagn i enn lì biott e pelaa
e l'aqua di duu fium
la va via scarsa scarsa e mez gelada,
e del negher di tecc, sui mur de sass,
che i paren quasi stremenzii del fregg,
vegn fœura adasi el fum come on caligh,
se quii bon contadin che viv là su,
in certi sir d'inverno,
i podessen pensà con che passion
'sto pover vegg bagaj
che 'l s'è perduu in del mond
adree a ona gran bosia
el vegn'a saludai,
i credaressen propi de vedem
a spontà chiett in l'ora de la zena,
con l'odô del vin nœuv e di braschee,
o quand che i donn i disen la novena;
i me faressen post al fogolaa,
per parlà di sò viv e di sò mort,
de l'uga, del bestiam, del formenton
e, presentandom, senza sudizzion,
i fiœu de carezzà
me ciamaressen el sò sant de cà.