I duu campanin, version 1
Gioann Bertacch (1869-1942)
I duu campanin, version 1
El campanin de San Bartolamee
l'è 'l prim che sona i or sora Ciavena;
e, dopo on quai minutt, ghe vegn adree
la vos de San Lorenz, rodonda e piena.
Ten! Ten! L'è 'l giovinott che g'ha premura
de levà su, de mœuves, de rivà.
Ton! Ton! L'è 'l bon regiô, che già el misura
su l'esperienza i pass che l'ha de fà.
A vun ghe pias l'april, cont i campagn
che trapella speranz de tutt'i pori...,
a l'olter el genar di sò montagn,
quand che 'l fioca sui tecc e sui memori.
Ma se se tratta de visà el paes
dei moment d'importanza capital,
i duu quadrant alora i vann intes:
l'è lora del regiô quella che val.
L'è lu che 'l derv el dì, lu che 'l le sara
coi segnai di sò duu avemarì;
che 'l ferma i lavoreri e che 'l prepara
el bon disnà che fuma in sul mezdì.
O forsi quell che cunta l'è on Regiô
che sta de sora a tutti i campanin
e 'l registra la pendola del sô
per ben fissà el nost temp e 'l nost destin;
e segond se 'l se acorda col celest
e col nigol del cel, el cambia son,
e 'l me fa pussee gram o pussee bon.