I bellezz del Lagh de Comm

Speri Della Chiesa Jemoli (1865-1946)‎

I bellezz del Lagh de Comm

Mì ghe l'hoo in ment anmò, quella matinna,
tanti ann indrée, ch'hoo faa sta passeggiada
sul Lagh con la mia cara Mariettinna,
come franguej scappaa de la niada;

qui bei vill, e coi giardin miss lì in spegginna,
tutt a fior e a tappee d'erba rasada,
formaven propri ona cornîs divinna
per inquadrà la nostra limonada.

Man man che on bel paesagg l'era passaa,
el vedevom anmò come in d'on specc
in fond ai noster oeucc innamoraa....

O morôs (l'è on parêr de galantomm
che vi veoo col coeur, de pover vecc):
a fà l'amor, vegnii sul Lagh de Comm!