Hola

From Wikisource
Jump to navigation Jump to search
nadpis Hola
awtor Handrij Zejler
lěto
žórło http://texty.citanka.cz/
licenca public domain

    Hdyž chce nas zyma spóžerać,
    Hdyž wějo ćmi so w polu:
    Štó lěsa khwalbu njespěwać,
    Štó chcył mi zacpić holu?
    Stup, towaŕšo mój předuty,
    Do jstwički ćišišeje,
    Do stołpatej' pój drjewiny,
    Hdyž w polu wućek njeje.

    O hola, zymy skludźeŕka,
    Štó njewě, kak nam słužiš?
    Přez wopor twojoh' bohatstwa
    Najhóŕkšu zymu stužiš;
    Hdyž khwatajo do ćopłej' jstwy
    Połmódri huhotamy:
    Dha wěmy, što ći dołžimy,
    A što na tebi mamy.

    Dha hordź so w włóskach zelenych,
    Kiž twoje dźěći pyša;
    Hordź so do časow šedźiwych,
    A kaž će sněhi tyša
    Twójj njewjestny wěnc njezblědnje,
    Hdyž lěta khód so minje,
    Hdyž wo krónu haj žaruje
    A krasnosć łukow zhinje!