Heisei/I
| ←Cronologia | Heisei by I |
II→ |
I[edit]
Se passèt lo 15 d'agost de 2078. Me'n brembi enqüèra. Adara que't disi aquò, n'ei pas important que sia estat en agost, n'ei pas important tanpauc lo dia de la setmana. I avèva dus dias qu'èri tornat ende casa, a Gèdra, on m'esperèvan la hemna e los tres mainats. Un retorn a casa aprèps tres setmanas passadas a organisar, per montanhas e per arribèras, grops de resisténcia a la deportacion. Dens totas las montanhas de Tèrra-Mair, los pòbles de las resèrvas avèvan entenut a parlar d'aqueth metòde navèth de l'Empèri de's deishar deus qui ne dintrèvan pas dens las termièras de la puretat etnica o de la docilitat sociau. La puretat etnica, segon l'Empèri, èra lo vàser Japonés o Han. La docilitat sociau èra de's deishar escarnir peus Imperiaus shens reaccion. Ja los Cèltas, apialocats dempuish 2060 dens lo Nòrd d'Escòcia, avèvan presa ua husada ende Deimòs. Aquí demorèvan lo passatge cap a la Galaxia deu Can, cap a la planeta Heisei. Informacions de las medishas avèvam suus Samis e suus Macedonians tanben. E suus Berbèrs. Los autes pòbles petits èran tròp luenh, damb lo conta-ròtle de l'informacion per l'Empèri, per qu'agossem informacions recentas. Calèva passar peus riales non Imperiaus qui avèvan lo dret de viatjar, e enqüèra calèva que volóssen hèser passar informacions.
En mei d'aquò, la hrèita d'aur ende reciclar los motors de las husadas intergalacticas avèva miat l'Empèri a tornar aubrir la prospeccion dens los arrius de montanha. E lo tractat de Baiona èra ua empaisha de las granas ende l'Empèri. En 2010, las armadas de l'Empèri, en tot arribar en Euròpa, avèvan signat un tractat ende desseparar França e Espanha per un airau de resèrva autonòm e non agressiu. Se parlèva de ne hèser pas jamei servir las tèrras d'aquera "resèrva" ende l'economia de l'Empèri. A Baiona, la Comunautat deus pòbles pirenencs s'èra proclamada la creacion lo medish dia que la signatura deu tractat. Catalans, Aragonés, Occitans de Foish, Aranés, Gascons, Bascos s'èran trobats atopiats dens ua meitat d'estat drin engleubat au començar peus problèmas de lenga. Puish tots s'èran hicats au gascon, pr'amor que los Bascos ne volèvan pas enténer a parlar deu catalan e qu'avèvan ua tradicion de gascon administratiu. Prepausèn quasi de hèser servir la Costuma de Sola com Constitucion. Lo purmèr comissari deus sagèths, lo Claudi Miquèu, degot hèser ua adaptacion d'aquera costuma purmèr en gascon modèrn, puish en tot téner compte de las "costumas" navèras...
Comencèva atau lo tèxte de la Constitucion - me'n brembi que l'aprenèvam a l'universitat :
"Per la costuma de tota ancianetat observada e guardada, tots los natius e abitants de la tèrra pirenenca son francs e de franca condicion, shens taca de servitut. E arrés no a ni ne pòt préner nada suita de gents demorant en la dita tèrra, ni exigir nat dret a causa de la persoa e deu corsadge deus dits manants e abitants, ni de nat de eths."
Totun contunhèva en tot mentàver l'Empèri :
"E se pòden maridar los dits natius e abitants de la dita tèrra de los Pirenèus e passar testaments e gessir deu dit païs si ei que n'an lo permés deus Oficèrs de l'Empèri."
Mei luenh, dens la Constitucion, se parlèva de l'empaisha qu'avèvan los deu dehòra - los Imperiaus com los autes - de dintrar dens la tèrra de Pirenèu shens autorisacion, sauv ende las operacions de manténer de la seguritat de l'Empèri.
Lavètz, lo Burèu de Colonisacion Espaciau (que totes aperèvan lo Bucolic...) avèva ja previst - ce'm digot hèra de temps aprèps un deus oficèrs deu vaishèth Asa Maru - la deportacion deus pòbles de montanha cap a Heisei, tanben...
Heisei, la purmèra planeta descobèrta e proclamada colonisadera dens la Galaxia deu Can. La darrèra capvath lo regne deu mikado Heisei. La descobèrta deu motor intergalactic, en 2010, per un praube Indian au servici de las fòrças de l'Empèri avèva revolucionada la vita. Purmèr que viste eston descobèrts riquèrs en minerau, en aiga e sustot en tèrras ende cultivar. L'Empèri comencèva de's pausar lo problèma de la populacion, a maugrat los chaples de las annadas 2000-2005, de la Tresau Guèrra Mondiau. Las explosions nucleàrias sus Euròpa de l'Èst, Lhevant, Africa deu Sud e America avèvan tuat un quart de la populacion. La guèrra e las sangnèras, un aute quart. En America, lo tractament deus Asiatics e de las autes minoritats deu temps deu conflicte avèva provocat, a la fin, e abans la represa en man peus soldats d'occupacion de l'Empèri, ua vengança collectiva viste vasuda ua sangnèra generau. Mèi de 10 milions d'Americans blancs avèvan tuats.
Lo motor intergalactic permetèva de sautar d'un punt a l'aute de la Galaxia, d'aqueths punts dits de Chatterjee. En tot espiar dempuish l'observatòri de Ryohoku, Chatterjee avèva arremarcat diferéncias dens la refleccion de la lutz a quauques punts de la galaxia nòsta. Lo de mandar ua fusada Yoshori damb totas las atrunas de mesura estot l'idèa deu son collèga Samphiravong. En tot la véser disaparéisher puish en tot saber qu'èra passada en mensh d'ua òra a 200 annadas de lutz, enlà un aute punt que disem adara de Chatterjee, l'observatòri imperiau qui hasèva sonque mesuras atau atau vasot un lòc d'interés peus oficiaus deu MITI, puish deu MEG (Ministèri de l'Espaci e de la Guèrra). Oficèrs, generaus, ministres i passèn dias e nueits. Èra ua mitat de vergonha que las descubèrtas e avèvan estadas hèitas per Asiatics non Japonés. Samphiravong lo dèn lo nom de Tanaka Yoshihiro, que damb la soa pèth èra possible de lo hèser passar per Japonés, mes Chatterjee se pensèn de l'eliminar. Totun, èra ja tròp coneishut (lo Tomori Akiyashi, president de l'Observatòri, estot mutat dens un servici de decontaminacion en Euròpa de l'Èst pr'amor n'avèva pas avut lo reflèxe d'escóner lo nom deu descobridor aus mèdis). Lo MIPI (Ministèri de la Propaganda e de l'Informacion) organisè tot un sarròt de manifestacions sus l'integracion ben escasuda deus pòbles d'Índia (los Assamés qui eston los purmèrs deportats sus Deimòs ne pàrlan enqüèra...) damb lo Chatterjee en vedèta americana (si ac poish díser atau).