Hec est instructio Fresonum

From Wikisource
Jump to: navigation, search

<< Haadside

Hec est instructio Fresonum.

[1] Hic est scriptum. Hir is escriwen, thet wi alsadene landriucht halde, sa God selua erest <sette and> bad, thet wi alle afte and alle riuchte thing helde.

[2] Efter tham beden hit and bonden alle ertkeningan. Julius <and> Octauianus, <sa heten> tha furma, ther <to> Rome <keningan> weren.

[3] God ief Moysi twa stenena tewla; ther weren on escriwen tha tyan bode and alle tha riucht, ther tha israheliske lude heden, tha se in ther westenia weren. And alsa God sine liude latte fon Egyptra londe, alsa lat hi alle thene to tha himele, ther tha riuchte fulgiat. And hwasa thet riucht brecht, sa bislute hine God in there helle, alsa hi bislat tha Egypteran in tha Rada Se, tha se sina liude vrdera wolden. Bi thio bislut thene God in there helle, ther tha riuchte brekat. Want hit selua scref mith sine h ondum and bad alle sine liudum to haldan.

[4] Alsa helden hit Aaron ende Samuel anta keningan Dauid and Salomon, ther er Christus berde weren.

[5] And ther efter Christus berde weren, thet was thi ersta Julius an Octauianus, Titus and Vaspacianus, Augustus, Nero, Domicianus, Alexander, Decius, Germanus, Traianus, Adrianus, Tyberius, Gayus, Claudius, Dyoclesianus, Maximianus, Antonius, Aurelius, Constantinus, Justianus, Otto, Julianus, Theodosius, Archadius, Honorius, Gallianus, Henricus, Conradus, Lucianus, Valerianus, Valentinus, Fredericus.

[6] Disse keningan iewen alla londum kesta an londriucht.