Gser gyi me tog mdzes pa rin po che sgron ma 'bar ba'i rgyud

@1
282
bod skad du
gser gyi me tog mdzes pa rin po che
sgron ma 'bar ba'i rgyud ces bya ba
bcom ldan 'das dpal snang ba rang shar ba nyid la phyag 'tshal lo
'di skad bdag gis bstan pa'i dus gcig na
stong pa nyid kyi gzhi tshad med par gsal ba'i dkyil 'khor na
mi 'byed pa chen po'i 'dul stangs so so ma yin tha dad pa ma yin
pa'i snang ba chen po rnam par bkod cing
283
ye nas rang gsal chen po'i gzhi
rang snang chen po'i spyod pa 'gag med du shar ba'i klong nas
'gag pa med pa'i rig pa shar nas
brjod du med pa'i don 'di gsungs so
gsung ngo
gsung bar 'gyur ro
sar ba a sa ma la dha thim
bhe ta a lo ka
a na ma pe lam ki
sar ba ma ni sha
a
a a
a a a
284
a a a a
ma ma
e ka sa ra
'di skad bdag gis thos pa'i dus gcig na
sgron ma snang bar byed pa
sna tshogs rin po che'i sa gzhi la
ye shes rnam pa lnga'i mig spras pa
kha dog gsal ba chen po
gzhi dpag tu med pa'i snang ba rgya che la dkyil yangs pa
mtha' rnam par gsal ba
rtse mo kun tu bzang thal ba
phyogs bcu kun tu 'char byed ma 'gags pa
phyi dang nang med pa'i sa la bkod pa yongs su rdzogs pa
rgyan thams cad kyis mdzes par byas pa
phyogs bcu gang nas bltas kyang kun tu zang thal ba'i chos nyid
kyi pho brang nas
snang ba rnam par dag pa'i rdo rje chang chen pos rgyud dag pa'i
rdo rje 'chang la
rang bzhin snang mdzad chen po'i thugs rjes gzigs nas
285
snying po bla med chen po'i gsang ba thun mong las 'das pa 'di
gnyis su med pa'i ye shes kyi klong du dril ba'i thugs nas yangs
pa'i mgur gyi bum par dril te
thabs thun mong ma yin pa'i ljags kyis dbang po la bkram nas
rdo rje sgron ma snang bar byed pa'i tshig gsum du 'di dag bka'
stsal to
rang bzhin rgyud dag rdo rje 'chang
ngas ni 'gag med dran pa la
spyod pa'i yid ni kun tu shar
snang ba med pa'i phyogs nas ni
yid bsam dran pa bcad pa'i phyir
theg pa rnams kyi rtse mo pa
nga yis spros kyis khyod kyis nyon
'jig rten khams ni thams cad du
rig pa 'gag med rang snang kyang
'di kun sus kyang mthong ba med
mthong med ye shes chen po ni
gang gis me tog mdzes pa mthos chos sku dang rig pa
ma mthong ba yi ye shes la
sgron ma nyid kyi ye shes su
thog ma nyid ni rang snang bas
rdo rje snying po nyid du shar
shar tsam nyid nas nub pa med
286
nub med ye shes gter chen 'di
su yis spyod pa skal pa bzang
skal bzang bde ba'i ngang tshul can
'di la mi dge rdul tsam med
rdul dang bral ba'i rang rig nyid
'di la tha snyad tshig dang bral
'di kun sgron ma rnam bzhi yis
sems can kun gyi snang ba 'dzin
rgyang zhags chu yi sgron ma yis
gzugs sogs ngo bo nyid du sdud
shes rab rang byung sgron ma yis
theg pa rnams kyi the tshom gcod
thig le stong pa'i sgron ma yis
'khor 'das bsre ba'i mtshams sbyor byed
dag pa dbyings kyi sgron ma yis
rnal 'byor nyams kyi bogs 'don byed
'di kun khyad par snang ba'o
de nas rgyud dag rdo rje 'chang
dga' mgu rang ba rab skyes nas
snang dag rdo rje 'chang ba la
zhu ba'i tshig ni 'di skad gsol
kye ma ston pa rdo rje 'chang
sangs rgyas kun gyi rang snang ba'i
ston pas sgron ma bzhi gsungs pas
rgyang zhags chu yi sgron ma zhes
287
ston pas tshig tu sngar gsungs pa
'di nyid ma 'tshal bdag la gsungs
de nas rdo rje 'chang chen gyis
tshig ni 'di skad rab tu gleng
e ma rgyud dag rdo rje 'chang
ngas sgron ma rnams bzhi yi
snang ba nyid la bltas pas
'di kun rim gyis blo yul snang
rgyang zhags chu yi sgron mas ni
gsum gyi snang ba 'dzin par byed
des ni gsum gyi snang bzung bas
lta ba kun gyi snying por yang
de kun 'di yis blta bas na
'di ni lta ba'i gzhi 'dzin par
skyed byed sa bon bzhin du gnas
rgyu yi rdo rje yang 'chang bas
ston pa rdo rje 'chang chen la
tshig ni 'di skad ces gsol to
kye kye ston pa rdo rje 'chang
rgyang zhags chu yi sgron ma zhes
'di yi ngo bo ci lta bu
'di la nges tshig ji skad gsung
dbye ba rnam pa du zhig yod
288
mtshan nyid bzhugs tshul ji lta bu
gnas ni gang la gnas pa lags
'char sgo'i snang ba ji lta bu
'di yi mthun dpe gang zhig lags
'di kun tshad rnams gang gis bzung
ston pas 'di kun bdag la gsung
de nas ston pas yang gsungs pa
kye ma rgyu yi rdo rje 'chang
ngas bstan khyod kyis ma 'khrul bar
'di kun zung zhig rdo rje 'chang
rgyang zhags chu yi sgron ma yi
ngo bos snang ba gnyis ka sdud
mthong byed 'dzin cha ma 'gags phyir
gnyis ka'i cha 'dzin blta bas na
'khor 'das mthun pa'i blta ba'o
nges pa'i tshig ni 'di lta bu
rgyang ni ring ba'i rgyud 'dzin pas
gzugs su snang ba 'dzin pa dang
kha dog la sogs sdud pa dang
rig pa'i sku yang rgyang ring nas
mthong byed 'dzin par byed pa dang
'khor ba rtogs pa'i phyogs nas ni
rgyang du 'phen pas rgyang zhes bya
289
de bzhin ma rtogs phyogs nas kyang
myang 'das 'phen pas rgyang yin no
de bzhin 'khor ba'i snang cha nas
gzugs dang 'dod yon lnga rnams ni
'di yis 'ching bas zhags pa yin
dbang po'i yul la snang ba yi
dran bsam bdag tu 'dis 'dzin pas
zhags pa zhes ni rgyang nas 'dzin
de bzhin nam mkha' sprin bral la
rig pa bdag med skur snang bas
snang ba yas su mi 'jug par
'di yis 'dzin pa zhags zhes bya
chu ni snang ba de dag la
zhen pa rang sar log nas ni
kun la chags pa'i sems med par
snang ba rang sar bzhag nas ni
bdag 'dzin bral bas chu zhes bya
sgron ni rang gi snang ba kun
gong nas gong du 'phel ba yis
rig pa'i ye shes gsal bas sgron
'byung ba rags pa'i snang ba kun
290
rang shes spyod pa 'gag med cing
dbang po'i rab sgor gsal bas sgron
rig pa phyi yi dbyings bzhag pas
nang dbyings rang sar dag ste snang
nyams kyi snang ba 'di skyes pas
dbyings rig 'dres pas ma yang yin
dbang po kun gyi dangs ma yang
'char byed sgo ni mig yin pas
kun gyi gzhi 'dzin ma zhes bya
dbye ba rnam pa gsum yin no
'byung ba'i dangs mar rang 'dus pa'i
rgyang zhags chu yi sgron ma dang
ye shes 'dus pa'i rgyang zhags dang
dbang po 'dus pa'i rgyang zhags so
'di yi mtshan nyid 'di lta bu
'char byed 'gag pa med pa yis
dbang po'i dangs ma mig gi sgor
bskyed pas dangs ma'i spyan du gnas
rang gi mtshan nyid dbang po 'dzin
'byung ba las ni 'phen pa dang
291
sdud dang 'dzin dang mched par snang
ye shes las ni blta ba dang
gnas dang gong ma 'dzin pa'o
dbang pos yul dang yul can dang
yul med rnams ni rang 'dzin pa'o
'di yi gnas ni mig yin te
mthong byed 'gag pa med pa yis
yul rnams 'dzin par byed pa yin
klad pa dung khang dkar po la
g.yas su 'khyil pa gsum yod pa
rtsa ni ba men rwa yid byibs
dbang po'i dangs ma kun 'dus nas
dbang po yul la 'char byed pa'i
rtsa yi nang na 'di nyid gnas
thog ma rang gi lus bskyed pas
ma yi mang la du zhugs pa'i tshe
lus kun gyi ni thog ma ru
lte ba'i rtsa mdud chen po las
dbus kyi gru gsum nyid du yang
pha ma'i rgyu rkyen dangs ma las
mi gi 'bras bu nyid du chags
de yang pha ma'i cha gnyis las
dkar nag 'dres pa nyid du'o
292
'char ba'i sgo ni mig gnyis dang
dbang po yul la 'char byed kyi
rtsa las 'di kun snang bar shar
dper na 'dzin byed lcags kyu yis
gang snang sna nas 'dzin pa bzhin
'khor dang mya ngag 'das pa yi
sna gnyis 'di yis 'dzin par byed
sgron mas snang bar byed don gyis
yul gzugs snang ste rig pa yang
lu gu rgyud snang tshad yin no
zhes sgron ma 'bar ba'i rgyud las
rgyang zhags chu yi sgron ma ston pa'i le'u ste dang po'o
@2
de nas rgyud dag rdo'i chang
nyid kyis gsungs pa blor tshud nas
yang ni tshig gis 'di skad gsol
kye kye bcom ldan rdo rje 'chang
ston pa nyid kyis gsungs pa las
bdag ni dam pa'i nges pa rnyed
chu yi sgron ma de ltar na
nyid kyis gong du gsungs pa yi
shes rab rang byung sgron ma zhes
gsungs ba'i don de bdag nyan 'tshal
de yi ngo bo ji lta bu
de bzhin nges tshig rnam pa gang
dbye ba du yis bstan pa lags
'di yi mtshan nyid ji lta bu
sgo ni 'char byed gang la snang
293
de bzhin gnas pa gang gis lags
dgongs pa'i tshad rnams ji lta bu
'di la mthun dpe gang gis mdzad
ston pa thugs rje chen po la
'di kun bdag gis nyan par 'tshal
de nas ston pas yang gsungs pa
kyi ma rgyu yi rdo rje 'chang
nga yis bstan gyis khyod kyis nyon
'di kun 'khrul pa med par zung
shes rab rang byung sgron ma ni
'di ni sgron ma thams cad kyi
shes byed nyid du gnas pas na
kun gyi cha la 'di nyid las
'byed pa'i shes rab nyid pas ni
'byed pa med pa'i tshul du gnas
cha phra bskyed pa'i ngo bo ni
ye thog nyid nas gnas pa'o
shes pa dngos dang dngos med pa'i
snang ba kun la rab zhugs nas
spyi yi don rnams shes pa dang
ma bcol bzhag pa'i gding rnyed de
rang gi ye shes tshad rnams shes
rang bzhin dag pa'i chos sku ni
sus ma rnyed par rang rig pas
kun las khyad 'phags rab tu snang
294
gzhan gyis dpyad pa'i gnas med pas
rang shar ye nas dag pa'i yum
gzhan gyi yul min rang zhes bya
byas pas 'di don rnyed pa med
su la re ba med pa'i phyir
ye nas rang snang byung zhes bya
sgron ni chos nyid thams cad kun
gnyis su med par snang bar byed
mas ni rang ngo khyab pas so
chos nyid ma skyes mi 'gag pas
mi gnas rang sar grol ba ni
ma chags gnas pa med pa ste
ye nas bcing grol med pa'o
dbye ba rnam pa lnga yin te
gzhig nas rang byung shes rab kyis
lus sogs chos kyi rten rnams byed
snang ba cer 'dzin shes rab kyis
dbyings dang rig pa'i dun pa 'dzin
dran pa 'gag med shes rab kyis
shes pa rtse gcig yul rnams sprad
so sor rtogs pa'i shes rab kyis
spyi dang rang gi mtshan nyid 'byed
'jug byed rnam gsum shes rab kyis
rang bzhin bar do gtan la 'bebs
snang dang mi snang chos rnams kun
rang bzhin med par sus shes pa
'di ni de yi mtshan nyid do
'char byed sgo ni dbang po lnga
khyad par snying nas 'char bar byed
295
de rtags mtshan mo'i dus nyid du
glo dang sbring pa drag po dang
shin tu glo drags lus pa'i tshe
dmar la dangs pa'i 'od zer ni
me stag bzhin du rnam 'phros pas
de yi tshad dang rtags de yis
'char bar byed pa'i sgo ngos zin
skyed par byed pa'i rtsa bzhi nas
'gyu dang 'gul dang 'phrigs pa dang
yang zhing bskyod pa'i bdag nyid du
cit ta'i dkyil 'khor nyid la 'khor
dangs ma shes pa'i bcud rnams ni
me stag yar ba'i mtshan nyid du'ang
lnga bzhi las kyi rlung dang bcas
shes pa gsal gsal rig rig po
shes rab rnams kyi rang bzhin du
ro ma rkyang ma kun 'dar ma
shel sbug khog pa stong pa'i nang
gsal ba shes rab chen por bzhugs
ming bzhi 'dus pa'i ye gdangs su
thams cad 'byed pa'i ngo bor ni
ye nas lus kyi cha la gnas
skabs su rlung gis rang bzung bas
shes pa dran med rmugs pa yang
shes rab rtsal rnams rgyas 'thums pas
gsal ba'i cha med rmugs par 'gyur
296
rlung gis shes rab rtsal bskyod tshe
sngon ma thos ba'i chos rnams kyang
yid la dran zhing gsal bar 'char
gsal dang mi gsal rtsal rnams ni
rlung gi g.yo 'gul nyid las byung
lus dkyil rtsa nang gnas pa'o
gzhi gnas shes rab rang byung tshad
chos kun mnyam pa'i nyams skyes nas
shes pa brtan pa'i gdings rnyed yin
de nyid bgyur ba ma yin par
rtag tu rgyud la gnas pas na
'dis ni gzhi gnas shes rab zin
'di yi lus kyang yang ba dang
shes pa rnams ni gsal ba'o
snang ba cer 'dzin shes rab tshad
cog bzhag nyams su myong ba'i rtags
lus dkyil kha dog lnga yi 'od
rtsol ba med par phyir shar nas
'di la shes pa rang sa zin
lus kyang sa la reg pa med
'di yis shes pa gar gtad pa'i
bem po rnams kyang 'gul bar 'gyur
rang rtsal 'byongs pa'i tshad yin no
dran pa 'gag med shes rab tshad
shes pa gzhan la 'jug pa med
gcig pur 'dug bar dga' ba dang
297
dben pa'i sa la rtag tu dad
mi dang 'grogs snying mi 'dod par
shes ba rtse gcig 'gyur ba med
gzhan gyis brjod pa'i gtam la yang
gzungs su 'dzin pa nyid dang bral
blta ba mi 'gyur gding nyid du
nam mkha' dag la 'gro ba snyam
sems de gar gtad sa der chags
pha rol rnams kyi rkyen gyis kyang
'di la bsgyur du ga la nus
bag med shes pa bde yangs pa
'di ltar shes pa'i mi de ni
dran pa 'gag med shes rab zin
so sor rtogs pa'i shes rab tshad
kun gzhi dang ni chos sku yang
'di ltar phyed rtags 'di lta bu
lus la zhen pa'i blo bral nas
rig pa gar gtang sar gnas te
lus ni bem po bzhin du 'gyur
sems dang ye shes phyed pas ni
'gyu byed rnams kyi sgo yang 'gag
'byung ba dwangs snyigs su phyed pa
rags pa'i snang ba rang 'gags te
lu gu rgyud la bde bar spyod
de bzhin 'khor 'das sus phyed par
'khrul pa'i blo rnams skye mi srid
gal te skyes kyang phan gnod bral
298
de la sogs pa'i shes rab kyis
'khor 'das gtan la 'phebs pa ni
so sor rtogs pa'i shes rang po
'jug byed rnam gsum ges rab tshad
chos kun tshig gcig smos pas ni
de yi gzhung kun shes pa ni
thos pa'i shes rab tshad du phyin
shes pas gang la bsam pa yis
zungs de rgyud la bder shar na
bsam pa yang ni de bzhin 'byongs
gang byung rkyen gyis mi gnod par
'khrul rtog zhen pa rang 'gag pa
'dis ni bsgom pa'i shes rab rnyed
dper na spra ba rlan med la
me stag phra ba nyid phrad kyang
spra ba kun mched mes bsregs bzhin
shes rab kyis ni bag chags bsregs
'di kun shes rab sgron ma'o
zhes sgron ma 'bar ba'i rgyud las
shes rab rang byung gi sgron ma bstan pa'i le'u ste gnyis pa'o
@3
de nas rgyu yi rdo rje 'chang
rang gis yid ches tshig shar nas
mi rtog mnyam pa chen por gyur
shes rab chen po rang shar nas
299
chos kun ro gcig rtsad nas chod
dngos bral stong pa'i yul rnyed nas
ma 'ongs sems can kun don du
rdo rje 'chang la 'di skad gsol
kye kye sangs rgyas rdo rje 'chang
bdag nyid chos kun rang gsal bas
dri ma med pa'i mig rnyed nas
spros bral ka dag chen po yi
chos kun rtsad nas 'dir chod de
ma 'ongs sems can thams cad la
snying rjes snying nas bzung ba'i phyir
shes rab sgron ma de ltar na
thig le stong pa'i sgron ma nyid
ston pas gong du tshig gsungs pa
'di yi ngo bo ji lta bu
nges pa'i tshig ni gang rnams lags
de bzhin dbye ba du tsam mchis
mtshan nyid dgongs pa ci zhig yod
'di yi gnas ni gang na gnas
'char bar byed pa'i sgo de gang
de la rang bzhin ci lta bu
yul ni ci ltar snang la lags
de kun tshad ni gang gis bzung
'di nyid dngos ni gang zhig lags
de yi thabs kyi man ngag ci
de la mthun dpe ji ltar lags
'di kun sems can kun don du
300
rdo rje 'chang la bdag nyid 'tshal
de nas rdo rje 'chang ba yis
rang bzhin dag ba chen po des
'di skad tshig tu yang gsungs so
kye ma rgyud dag rdo rje 'chang
khyod kyis zhus pa de legs so
nga yis khyod la bstan par bya
'di ltar ma 'ongs don du yang
ngas bstan khyod kyis tshig 'di zud
thig le stong pa'i sgron ma ni
chos rnams kun gyi yid ches su
'di nyid su yis shes pa de
thig le sku la longs spyod de
goms pa rnams kyi spyod yul lo
de phyir 'di yi ngo bo ni
nyag gcig che phra spros dang bral
stong pa'i mun 'bral rang gsal che
rang bzhin rang gsal mnyam pa med
mi rtog spros bral zlum por gnas
ma skyes chos nyid stong pa nyid
mi skye rdzas med 'jig dang bral
chos nyid ma yengs rang shar nyid
ma 'gags ma grub mtshan nyid bral
ma bskur rang dbang bzhi rdzogs phyir
dmar por rang gsal le nas stong
dri ma med cing ka dag pas
bdag 'ching nyon mongs rnams dang bral
rang gis rang gsal dngos pos stong
301
'di ni de yi ngo bor 'dod
thig ni mi 'gyur drang po la
ye nas bcos pa nyid dang bral
ye ni gdal ba chen po la
snang ba rnams ni rang sar rdzogs
stong pa dngos po'i 'dzin pa ni
yul la zhen pa'i blo rnams bkag
rang bzhin stong pa chen po yi
gsal la rang bzhin blo mi snang
sgron mas 'od lngar snang ba ni
byas te rang ngo gsal rig bcas
'di rnams nges pa'i tshig yin no
chos nyid stong pa ma bcos pa
lhun grub chen por ye nas gnas
thams cad ma spangs rang shar nyid
rgya chad phyogs lhung ye nas med
rang shar rang grol rdzogs pa'i klong
sems can sangs rgyas gnyis med rdzogs
dbye ba nyid ni rnam par lnga
gzhi gnas rang rig thig le yis
snang srid 'khor 'das gcig tu bzlum
lus gnas rtsa yi thig le yis
bde dang sdug bsngal gcig tu bzlum
kun rdzob rgyu yi thig le yis
phung sems bskyed pa'i rgyu yin te
phung po khams sogs chos rnams kun
bya bral rdzogs pa chen por bzlum
don dam spros med thig le yis
302
dbyings dang rig pa gcig tu bzlum
rang byung 'bras bu'i thig le yis
sangs rgyas kun gyi dgongs pa ni
mtha' bral lhun grub rdzogs pa'i ngang
rtsol bsgrub bral ba'i dbyings su bzlum
'di kun de yi dbye bas na
mi 'gyur thig le stong pa las
snang ba'i yul la rnam pa lnga
cig char bzlum pa'i gnas na gsal
gsal ba 'di la nub pa med
ye nas rang byung chen po'i tshig
'di kun spros med gcig tu gnas
de nyid mthong ba de rang nyid
gzhan nas btsal ba'i gnas med do
rang gnas dgongs pa gcig yin pas
tha snyad rnams kyi grangs zad de
gnyis su 'dzin pa'i zhen pa bral
'di la gnyis su ga la srid
rang gi mtshan nyid ngo bo stong
rang gis mngon par zhen pa 'gag
rang bzhin mi 'gyur rtog med dge
ma bsgoms pa dang mtshams med par
thig le zla dang bral ba yi
rang gnas chen po'i dgongs pa la
bya byed bral bar rgyun du gnas
mtshan nyid stong pa gsal bas khyab
rang ngo lus kyi mtha' rnams zad
mdor na bdag 'dzin yul las grol
303
stong pa chen po'i ye gdangs las
rang gnas sus kyang byas med par
ye nas mnyam pa chen por gnas
sems can kun gyi lus kyi dkyil
cit ta rin chen gzhal yas khang
rtsa ni stong phrag grangs mang yang
khyad par chen po'i rtsa bzhi las
ka tig ser kyi rtsa chen dang
dar dkar snal ma lta bu ni
phra la 'khril dang shel sbug can
'di bzhi'i nang du khyad par ni
gnas shing rlung gi rta la zhon
'byung dang 'jug dang rang shar dang
snang ba yi ni bdag nyid du
ye nas spros pa med par yang
gzhi yi thig le bzang po dang
lam gyi thig le de bzhin bzang
bzang po rnams kyi rtse mo dang
bzang po'i rgyan dang ldan par yang
rtsa rnams kyi ni nang na gnas
'di kun rtags kyi rang bzhin du
lus gnas rtsa yi nang na yang
sems can gyi yang lus rten du
thog ma nas ni gnas pa yi
snang ba yi ni 'char byed pa
rkyen gyis ma bsgribs sems can mig
tsak shu zhes pa'i sgo nas ni
nyi ma'i dkyil 'khor bzhin du yang
rang gi 'od zer nyid du lang
304
rang chos rnams su rnam par snang
'char byed 'byung tshul ma 'gags pas
dbang po rnams dang 'brel pa'i tshul
snang ba'i yul du gsal bar yang
kun gyis mig nus 'char ba'o
stong pa nyid la rang log pa
myong byed gsal ba'i snang bar ni
ye gdangs lnga dang bcas par yang
rang bzhin bab kyis gnas pa la
gsal byed rnams kyi ngo bo yang
dngos po las ni log par zhugs
stong pa nyid du ma yin te
rang gsal shes pa'i thog mar ni
ye nas rang gi mtshan nyid du
thog ma'i ka dag chen po'i las
rang bzhin nyid ni 'de lta bu
sus kyang ma byas rang gsal bar
ye nyid nas ni rang bzhin no
bar snang nyid ni stong pa las
snang ba rang ngo ma 'gags pas
rang byung thig le chen por gnas
brjod med rang gnas ngo bo yang
ye nas nam mkha'i khams su snang
thig le spro dang bsdu med par
bar snang nyid du sus zin pas
de yi tshad du de 'gyur te
rtsol med grol ba'i rtags su snang
rtsol bcas la ni tshad med do
'od lnga 'dus pa'i thig le ni
305
lha rnams la ni rang mtho gang
zlum po rang gsal chen por yod
lha min rang gi chag gang yod
mi rnams rang gi mtheb gang ngo
zlum po zag pa med par yod
byol song la ni phyir mi snang
yi dwags rang ngo phra bar yod
dmyal ba rnams la rang gsal tsam
lha la dkar po shes cher snang
lha min de bzhin ljang gu che
mi la dmar gsal rang chags bral
byol song nyid la mthing shas che
yi dwags ser po de bzhin no
dmyal ba rnams la kha dog lnga
rang gsal shes pa'i char gnas pa
sgron ma dngos ni de bzhin no
rang gi mtheb dang mdzub mo yis
tsak shu'i phugs dang 'gram btsir na
mngon du snang ste yid ches kyis
goms par gyur pa'i gnad kyis ni
dmar po'i shes med lnga ldan par
gyur te nam mkhar snang nas yang
'dis ni rig pa'i rang dbang thob
de ni rtsol med rang grol lo
rtsol ba can lang 'di lta ste
rang gi mjing pa'i phyi rol rtsa
'phrig cing 'phar ba drag pa la
sor dang mdzub kyis yang btsir nas
mig gi 'dug stangs mkhas pas bya
306
'od ni mda' gang tshun chad gsal
de las mched pa'i dus rnams bzung
de yi thabs ni man ngag tu
de kun de yi nges 'gyur ro
dper na rma bya'i mdongs dang mtshungs
de bzhin khra yi mig gam ni
yang na de bzhin nya yi mig
de bzhin srog chags rkun mo'i mig
'di rnams bzhin du gnas pa'o
zhes sgron ma 'bar ba'i rgyud las
thig le stong pa'i sgron ma bstan pa'i le'u ste gsum pa'o
@4
de nas rgyud dag rdo rje 'chang
mi gnas ye shes go phye nas
yang ni 'di skad bya ba gsol
kye kye bcom ldan rdo rje 'chang
thig le stong pa'i sgron ma nyid
ston pas gsungs pa de ltar na
nyid kyis gong du gsungs pa yi
dag pa dbyings kyi sgron ma nyid
sbar gsungs pa yi tshig 'di yi
ngo bo ci lta bu ru lags
'di yi nges don rnam pa ci
'di la dbye ba du tsam mchis
de yi rang bzhin de nyid gang
mtshan nyid dgongs pa ji lta bu
'di la goms pa ji ltar bgyi
de yi tshad ni gang gis bzung
'di yi gnas ni gang na gnas
de bzhin sgo ni gang nas 'char
de nyid dngos ni ji lta bu
mthun dpe gang gis bgyid lags so
307
'di kun bdag gis sngar 'tshal kyang
ma 'ongs sems can don du yang
rdo rje 'chang la bdag nyan 'tshal
de nas rdo rje 'chang chen gyis
'di skad tshig tu bka' stsal to
nyon cig rgyud dag rdo rje 'chang
ngas bstan pa la nor ba med
khyod kyis nor med sems la zung
rnam dag dbyings kyi sgron mas ni
rig pa yi ni ngo bor sdud
lu gu rgyud kyi ra bar snang
'di la sus goms don de nyid
mthing ga mi 'gyur gsal ba la
mu khyud kyi ni dab ra gnas
rang gsal phyi yi yul du snang
ngo bo nyid ni ma bcos pa'i
dbyings kyis rig pa'i rang yul byed
rdo rje nyid ni lu gu rgyud
'di nyid nang du 'jug par bya
rang gi ngo bo rtog med du
nang gi dbyings kyi go rar lang
ma bzung mi gnas tshul gyis ni
'bral ba med par rgyun du gnas
rnam pa yul du snang ba la
dag pa dri ma'i gangs mtha' zad
sgron ma rdo rje lu gu rgyud
nam mkha' nyid la cer bton te
rang bzhin med par snang bar byed
mas ni de yi don gzigs pas
rang bzhin nyid kyi nges tshig tu
308
ye nas 'du 'bral med par gnas
dbye ba rnam pa gsum yin te
gzhi la gnas pa'i dag dbyings kyi
rig pa'i ye shes sku ru 'dzin
lam la snang ba'i dbyings kyis ni
rig pa'i thig le dangs ma sdud
yul la snang ba'i dbyings kyis ni
lu gu rgyud de btson du 'dzin
'di kun de yi dbye ba'o
rang bzhin snang ba ma 'gags pas
blo dngos dran pa kun zad de
snang ba rang dag dbyings su ni
rtog pa med pa'i rig pa yang
mi g.yo mnyam pa nyid shes pas
thams cad mnyam pa'i dbyings su yang
ye nas rnam rtog zad par ni
rang bzhin rnam dag dbyings su gnas
brjod cing snang tshig gnyis med pas
phyi dang nang med dbyings su yang
rang dal chen po'i ngang du gnas
phyi nang med par zang thal bas
ma bsgribs dri ma med par ni
ye nas ka dag chen por yang
rnam par dag pa'i dbyings kyi ni
mtshan nyid du ni ye nas bzhugs
'di med rig pa'i yul med pas
snang ba 'gag pa med pa yi
char ni dbyings kyi sgron ma'o
'khor 'das ru shan phyed nas ni
309
lus ngag rnams ni [lus ngag yid ni / lus ngag yid gsum] rnal du phab
de nas dbyings rig snang ba brtags
'di la goms pa'i tshad rnyed nas
phyi rol yul gyi snang ba ni
gong nas gong du yang 'phel bas
rim gyis rang goms chen po thob
'di la brtan pa'i tshad rnyed nas
chos rnams zad par gyur pa ni
de nyid goms par byid pa yi
yan lag tu ni ngas bshad do
mthing ga mi 'gyur snang pa las
kha dog gsal ba'i 'od lngar yang
'di nyid rab tu gsal 'gyur zhing
rang gi mdun gyi yar mtshams su
sor bzhi 'am ni mtho gang las
'phags te lus dang bral ba na
de yi tshad dud de 'gyur ro
mig ni 'byung ba'i rkyen med la
gnas pas rang gi rig pa yang
lu gu rgyud du snang ba ste
sprin bral mkha' la 'dzin par byed
rang shes nang du gsal ba'i tshe
cit ta'i nang du gnas pa yin
phyir 'phros sprin bral nam mkha'o
mig gi rnam shes dag pa la
gsal byed 'bar ba'i 'od zer lngar
mi 'gyur khyab pa'i tshul du yang
mthing ga'i rang gdangs chen por gnas
'char byed snang ba ma 'gags pas
310
phyi yi yul la rnam par snang
'di ni 'char sgo mig nas kyang
'gyur med khyab pa'i tshul du snang
'di yi snang ba rang dag pas
dbyings dang rig pa zung 'jug par
ye shes gnas te cog bzhag go
rang shar rang gi spyod yul lo
snang ba mig dang rang 'brel pas
de nyid rkyen bral nam mkha' shar
de ltar 'char sgo ma 'gags pa'o
'di ltar gnad gsum man ngag dang
su la 'dzom pa'i skyes bu ni
dbyings la goms te mngon du'o
srid pa yi ni yar mtshams na
'di ni gnyis 'jug zung las ni
thabs dang shes rab rang bzhin las
gnyis ni 'khril te gcig par yang
sor gcig gis ni ma reg par
nyin dus 'byung ba'i rkyen ldan pas
snang bar 'gyur te mtshan mo yang
mthing ga rang ngo nyid du sbyar
dbyings kyi rang bzhin 'od kyi khyim
'gyur med ye gdangs chen por ni
sangs rgyas sems can thams cad la
sus kyang byas ba med par ni
ye nas gnyis med mnyam par gnas
'di ni khyab che phra ba las
311
rang gi shes pa'i char shar nas
mngon sum nyid de rab tu gsang
gsang ba chen po 'di nyid la
gang su spyod par 'dod pa de
ye sangs nyid la yang sangs rgyas
dngos po'i phyogs la bltas na ni
gsal byed mtshan ma'i cha ltar snang
stong pa nyid la bltas pa yis
rang gsal gzung ba'i yul med pas
sus kyang mi zin stong pa nyid
'di ni gsal dang stong pa ni
ye nas khyab cing gnas pa'o
rang snang stong nyid gsal ba'i yul
'dis ni dgongs pa'i tshad rnams 'dzin
rang dag chen po nyid du bstan
dus med snang ba'i mkha' la ni
'gyur med dbyings su thams cad 'dus
'di la 'byung rkyen nas bral na
sangs ma rgyas pa gcig kyang med
'khor ba'i snang ba mi srid do
dper na yi ge'i na ro bzhin
gnyis kyis bzung ste sdom gcig pa
nag po bsgyur du btub pa min
de las goms pa'i gdeng rnyed nas
bar snang 'ja' tshon ci bzhin du
kha dog ma 'dres yongs yongs su rdzogs
de nas yang gcig goms stobs kyis
de yi rtags dang ldan pa la
312
bar snang khams kyang de bzhin no
rgyud 'di 'dzin bar sus 'dod pa
'di ni dam pa skal ldan pas
rgyud 'di so sor bzung ba yis
yon tan bsam med chen por thob
rgyud kyi mtshan nyid rnam gsum ste
de yi ngo bor sbyor shes bya
ji ltar rgyud kyi mtshan nyid kyis
rang gi ngo bo rtogs pa'o
zhes sgron ma 'bar ba'i rgyud las
dbyings rnam par dag pa'i sgron ma bstan pa'i le'u ste bzhi pa'o
de skad ston pas gsungs pa yis
rgyud dag rdo rje 'chang la sogs
dga' zhing mgu ba'i sems skyes nas
de nyid gsungs la mngon par bstod
gser gyi me tog mjos pa rin po che sgron ma 'bar ba'i rgyud ces bya ba
'bum phrag drug cu rtsa gzhi'i bcud phyung ba rdzogs so
rgya rgya rgya
rgya gar gyi mkhan po bi ma la mi tra dang
lo tsa ba ska ba dpal brtsegs gnyis kyis bsgyur cing zhus te gtan la phab pa'o
dpal sngags kyi sung ma lcam dral gyis
rgyal ba'i bka' 'di srungs shig
dpal ldan zhwa'i mgon po dang
dam tshig gi bdag po rnams kyis
313
dam med sdig can gyi srog rtsa chod cig
rgyud 'di'i 'phrel pa ni mu tig phreng ba zhes bya ba yod de
sgron ma 'bar ba nyid la ma bu lnga
dge'o dge'o dge'o