Gözlemeýin bolarmy

by Magtymguly Pyragy

Gözlemeýin bolarmy by Magtymguly Pyragy

GÖZLEMEÝIN BOLARMY

Bir käkilik aldyrsa zürýe balasyn,
Saýraý-saýraý, gözlemeýin bolarmy?
Bir bilbil ýitirse gyzyl lälesin,
Hasratyndan sözlemeýin bolarmy?

Kürresi elinden gitse eşegiň,
Telmuryp tört ýana, gözlär uşagyn,
Akamaýa aldyrsa elden köşegin,
Bagryn bozup, bozlamaýyn bolarmy?

Bir jeren aldyrsa elden owlagyn,
Bala sesin diňläp, salar gulagyn,
Döke-döke gözýaşynyň bulagyň.
Mäleý-mäleý, yzlamaýyn bolarmy?

Agsagyň elinden alsaň agajyn,
Ýaman derde düşer, tapmaz alajyn,
Bir güýçli duşmana duşsa mekejin,
Jojugyny gizlemeýin bolarmy?

Aýralyga adam ogly neýlesin?
Kim galar görmeýen ajal hilesin,
Magtymguly, haýwan bilse balasyn,
Ynsan bagryn duzlamaýyn bolarmy?

---