Framment del cant XXXIII dell'Inferno del Dant

by Alfonso Porro-Schiaffinati

Alfonso Porro-Schiaffinati (1798-1872)‎

Framment del cant XXXIII dell'Inferno del Dant

Ma, quand el sol l'ha comenzaa a lusì
in la preson, e che ho poduu vedè
su quatter facc la faccia mia de mì,

hoo morduu i man per la gran rabbia... e i mè
pover bagaj, credend che mi el fasess
per voeuja de mangià, m'hin saltaa ai pè...

Sent: sti quattr'oss te ni hee faa ti!... Ma, adess,
mort ti, cossa faremm nun derelitt?
Semm robba toa!... Màngen... L'è l'istess!

Me sont quiettaa, ma in grazia di fiolitt!
Nissun ha parlaa per dò giornad anmò,...
terra birbonna... perchè no dervitt?...

Chè, in del quart, Gaddeu el me borla giò,
propi del pè di pee, smort e finii,
disend: O pà, perchè me juttet nò?

L'è mort... e, dopo, hoo vist i olter trii
a borlà giò vun a vun... e mi, su lor,
ghe sont tomborlaa adoss come inorbii!

Quand hin staa mort, hoo seguitaa di or,
a ciamaj per trii dì... ma, poeu, la famm,
l'è stada pussee forta del dolor!