Flenädans
Äkanitölo nelaodiko stänalidi redimik flenädan: ‚Huddicott‛ ägolom de nibudastopöp lü domil oka. Lan omik äfulon me drimamagots plitik. Ädrimälom dö del, tü kel in zif alik, kel äsevedon diniti okik, cödetadeids öjenons-la. „Senälonsöd bo dinädi ön mod Rusänik!“ ämurülom ninälo.
Mu nilo fo yan doma okik äkolkömom eli ‚Alf Gargon‛: keslopan lanälik.
„E lio ejenädos-li? o ‚Orace‛!“ atan äsäkom.
„Magifiko!“ gespik äbinon. „Binos pidik, das no ekomol pö atos! Ninikolös e kedrinolös väreti seimosa!“
Söl: ‚Gargon‛ ädasumom vilöfo atosi, ibä kafibötöps valik äfärmons.
El ‚Huddicott‛ äleadom ninikön omi ed äfilidom gasinaliti. Su tab säned omik äbinon ko fladil labü bir. Änügifom fulio väris tel, ed äsagom: „Ad saun ola! - e moonsöd katädans!“
„Ad flenädans Rusänik obas!“ söl: ‚Gargon‛ ämurülom, älabölo ya nudi in vär oka. „Konolös seimna bosi dö asoar!“ äfövom spiki oka.
„Imutol-la lilön obi naedilo‚“ el ‚Huddicott‛ äsagom. „Espikob sio dü düp bal. Spikami no plu neodobs, äsagob. Espikobs ya dü yels luldegbalion - e kisi at eprodon-li? Luspikots! dins valik binons te luspikots, e nos...“
„Ab ol it ga i äspikol!“ votikan äküpetom dinöfäliko.
„Stebedolöd boso! Äsagob: Ols mutols dunön bosi. Mutols sumön katädi. Logolsöd lü katädans in doms jönik gretik onas, lü mon onsik e votikos valik onas! Ats dutons lü ols! Ab ons no ogivons oles atis. Mutols maibreikön domis onsik e sumön utis, kels dutons lü ols. Dalabons mödikumosi ka obs.“
„E pold-li?“ el ‚Gargon‛ äsäkom.
„Pold-li?“ el ‚Huddicott‛ ti äteafom in vöd sekü vut. „Pold-li? Mö kis demob-li poldi? At ga i binon te dünans katädanefa e raistokratanefa. If poldan seimik künomöv ad kömön ini dom obik, täno motridodoböv omi. Hetob poldi. No dredob, pro men nonik. Ob...“
Löpao vög zaniälik laodik ätonon: „O ‚Orace‛! Kömol-li nu spido lü bed?“
„Lesi! o löfäb!“ dugan gretik ägespikom.
Söl: ‚Gargon‛ ädrinom spidiko biri oka, ed ädopladom väri. Om it ämatom e däsuemom stadi. Mö minut lafik pos atos el ‚Huddicott‛ äfärmükom föfayani po om.
Suno äslipom, äsä gidan slipon, ab süpo pägalükom dub joik ta ribs okik.
„O ‚Orace‛!“ jimatan ävispof. „Löädolöd! dono nübreikans dabinoms.“
„Nübreikans-li?“ el ‚Huddicott‛ ädonuom. „Nübreikans-li? Nesiämö!“ „Sagob ole, das is nübreikans dabinoms!“
El ‚Huddicott‛ älöikom ed ädalilom. Äcedom, das älilom bosi, ab ton no äbinon nefätiko.
„Gololöd ga ad logön!“ jimatan ästigädof.
El ‚Huddicott‛ ästepom se bed ed älenükom bliti oka.
„Nübreikans! Oträitob omis!“ ämurülom, pö süad plitik, das no ädabinoms is; ab äfredom, das nu naedilo äkanom jonön jimatane oka, das ädredom demü nek. Älasumom störömi, ed ägolom donio. Da yan lafiko pimaifüköl föfacema äkanom logön filami fiböfik gasinaflamila. Ästepom ninio - ab süpiko kurad omik ämoikon löliko. „Löükolöd namis!“ vög takedik äbüdon.
El ‚Huddicott‛ ägügolom lü völ ed äfölom büdi. Äleadom falön störömi sui teans okik, ab töbo äsenom osi.
„So binos gudik“, vög äsagon. „Nu kanobs filidön litis.“
Poso, ün timül fovik, el ‚Huddicott‛ älogom in logs mana defädiko piklotöla, kel älüodükom lü om rövulapistoli.
„Go diabö!“ nüdranan ävokädom. „Binol-li ol utan?“
„Bo binob utan“, el ‚Huddicott‛ ägespikom lezuniko. „Ud ätikol-li ba, das äbinob telädablod obik?“
„Nö! ab... o flenädan: ‚Horace Huddicott‛! Löliko no äsevob, das lödol is. Äkomob pö kobikam, ed älilob spikami olik. Magifö!“
El ‚Huddicott‛ äsenälom boso plu takedi. Man at äsevom omi, fe nemu logamo - e zuo äbinom flenädan kobädimik!
„Benö! kikodo binol-li is?“ äsäkom.
„No ikömoböv is, if no ililob äsoaro spikädi glorik ola“, votikan äsagom. Snatiko no, mu pato no, if isevoböv, das at äbinon dom ola. Ab sio sevol, das äsagol, das obs ämutobs ramenön neodotis de utans, kels ädalabons mödikumosi ka obs...“ „Si! ab no esagob, das mutols kömön is‚“ el ‚Huddicott‛ ävüspikom ome sagi.
„Ab ol dalabol mödikumosi ka ob, o flenädan! ob dalabob lenosi.“
„Ab esagob: gololöd lü liegikans. Äsagob...“
„Lesi! atosi sio sevob. Ab primob ön mafäd smalik - me domils äs ats. Äsagol, das leno ämutobs demön poldi.
„Fümö! Ab...“
„Sekü kod at äsevob fümo, das ol no öramenol poldi, o flenädan! igo no, if no laboböv rövulapistoli at, ad neletön ole osi. Ab ob no lindifob tefü pold. Ob leno klienob ad nügolön ini fanäböp. Katädans koedons galedön gudiko domis oksik. Demü atos ätikob: oprimob ön mafäd smalik, ed osteifülob osi pö domil äs at. Is mödikos vo no okanon paramenön, ab no binob labiälik.“
El ‚Huddicott‛ no äsevom gudiko, vio ämutom tikön dö lotan no pivüdöl oka. Fe äbinom no plu so dredik, ab vemo plitiki no äcedom osi. Büikumo ilabom nog speti foböfik, das jimatan okik ömaifükof löpo fenäti ed övokof yufi; ab ven vom brafik dub vöds anik, kelis ililof fädo, iküpof‚ das nüdranan pivafom, iklänedof kapi oka disi tegeds.
„Drinolös värileti bira!“ el ‚Huddicott‛ äsagom daifidäliko.
„Danö!“ votikan äsagom. „Obinob so flagälik.“
„E seadolös nu naedilo!“ el ‚Huddicott älaisagom, „täno okomob ole naedilo utosi, kelosi ädiseinob‚ ven äsagob, das dalab valik voik binom tif.
Logö! katädans et dalabons mödikumosi ka ob...“
„Si! sevob atosi‚“ nübreikan äspikom. „Ab prinsip blebon ot, vo-li? Ons dalabons mödikumosi ka ol - klu ramenolöd ati täno de ons! Ab ol dalabol mödikumosi ka ob; sekü kod at ob kömob lä ol ad ramenön ati, suemol-li atosi? Binobs ga flenädans, vo-li? Labob kludo gitäti ad laf uta, keli dalabod. Seidolös oli nu naedilo, e dilobsös snatiko...!“
„Kio-li?“ el ‚Huddicott‛ ävokädom sidiniko.
„Sevob, das binos düfälik, o flenädan! Ab odelo kanol segolön e ramenön lä balan katädanas et uti, keli dalabon tu mödiko.“
„Si! ab binob balan slopanas paleta obsik! Suemolöd ga naedilo atosi!“
Votan älemufükom lügiko kapi.
„Dredob, o flenädan! das binol in ladäl olik leigo katädan somik. Ab ledunob ma utos, kelosi ol it äsagol: no plu luspikots, ab duns. Lötenükolöd namis olik! Vemo lepidob osi, o flenädan! ab bi nu refudol ad dilön, omutob liedo tanön oli, ed it ramenön dilodi obik.“
Ädulos ba nog mö düps anik, büä jimatan ela ‚Huddicott‛ äkünof ad kömön, ed älibükof omi. E balid, kelosi om ädunom, äbinon: golön muvifiko lü poldabür.
Se Volapükagased pro Nedänapükans 1947, Nüm: 1, Pads: 1-3.