Fiour pass
Jump to navigation
Jump to search
Gioann Lonad (1852-1920)
Fiour pass
Dis la Pèppa: "G'òo miss in fresca 'n fiour
trii dé fa, ma adèss l'è bell'e pass:
l'aa pèrs la soo belezza, el bòn oudour,
e l'aa finit an' luu de faa 'l so s'ciass.
Ste mond l'è fatt cousé: gioia e doulour
teutt tramonta, e teutt va in de n'amass;
pèrd la faccia 'l frèsch di so coulour,
crepa le piante e se sbrisoula i sass.
Gh'è sol 'na ròbba che ne g'àa mai mòrt
che teutt rinova e che soustèn el mond:
l'è n'angel de speranza e de counfòrt
che dòmina per aria e in del profond:
l'è quella smania che me sènti in cor...
g'òo de dila, el me Pèppo?... l'è l'Amor".