Fiesta Mayor
¡ Qué ceo xiringüela
N' a ilesia la campana !
¡ Qué allegre gargolitia
El paxarín del alba !
Paez que va á l' apuesta
Co' l' tambor y ia gaita,
Qu' espabilen la xente,
Tocando l' alborada !
Siempre pinta el gaiteru
De la fiesta á l' albanza,
Y dend' en ca del Cura
Va de porta en corrada,
Semando 'l maravayu
Por mor de la pitanza;
Y barrunto que ogaño
Abonda ha coliechala,
Qu' el fautor de la fiesta
Ye Don Pancho el de Xuaca,
Que agora fai dos meses
Que vieno de la Bana.
Los mozos que n' a vispora
Llograron el pintalla,
Saltando la foguera
Y esguilando la maya,
Al sonsón del punteru
Pezpuntien so tonada,
Magar qu' allá n' a ería
El mozu de llabranza
Meyor gargolia ainda
Qu' el xilgueru y callandra
Al golver de la fonte
De dar á los gués agua.
Afumien los fogares
De toa la quintana;
Los cazos del atuestu
Semulen tren en marcha,
Rustiendo los torrendos
Pa l ' hora de la parva;
Con cara de pascuines
La xente endomingada,
Lluciendo los paxellos
Continta sal de casa;
Hoy dende el más probitu,
Afayau á carpanta,
Al ricu faneguero
Que gasta más fanfarria
Y cunta de la villa
Con xente convidada,
Yanten pucheru frescu,
Que á un calavre llevanta,
Y pitos con arbeyos
O carne encazuelada
Perbién aperiadina
Ansí como Dios manda,
P' amoyentar pan blanco
En pebre de tomata,
Y á toos á la postre
Ha pingayos la baba
Co n' el arroz con llechi
Y mantega floriada,
Que faen rutiar de góciu
A un defuntu n' estauta.
Nisina la melguera,
Rosuca la reitana,
Sabel la repolía,
Maruxa la chavala,
La Rosa del Ponticu
Y Cóncia y Mirablanca,
Les moces más llucíes
D' enriba y so la bárdia,
Les qu' han llevar los ramos
Y son la flor y ñata,
Dentera de los mozos
De toa l' arrodiada,
A tema llevantaron
De lloreu y retama
Dos arcos qu' hay que vellos
Metanos na calzada,
Estrada de genoyu,
Tumío y espadaña.
Ya tronen les xiraldes
Y bulle la campana,
Ya pe' l llugar allante
La prucisión avanza,
Cargando co' l pendón
El diañu de Foxaca
Con cara de marmiellu
En son de moxiganga,
Faciendo mil veyures,
Folixa de gandaya,
Por mor de que n' hay Corpos
Sin qu' hebia una tarasca.
Al paso la custodia
Por baxo de l ' arquiada,
Los cures s' ababorien
Por vella y remiralla;
El de la incensariera
No atina á pendulala,
Y el tambor se arronquiella
Y empapiza la gaita.
¡ Ay qué maja la fiesta !
¡ Ay la fiesta qué maja !
Sospirando la xente,
De rodíes exclama:
Y dalgún empapiella
Y s' ensucha una llárima,
Al mirar de la Virxen
La carina de gracia,
Y ente ñubes y flores
La custodia que pasa.
 
|
This work is in the public domain in the United States because it was first published outside the United States prior to January 1, 1929. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1953 or earlier (more than 70 years ago).[1]
This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1929 works copyrighted at home. |