Fascinazion
Gaitan Cresp Legorin (1852-1913)
Fascinazion (1887)
Che Donato d'Egitt, ma che ipnotismo
bisogna ved el mè bagaj che forza
el gh'ha su mi, cont el sò magnetismo.
Me regordi che el dì del sposalizzi
hoo dit: se gh'avaroo per sort di fiœu,
me guardaroo ben ben de dagh di vizzi,
come fan squasi tucc al dì d'incœu.
Vuj no ch'abbien de veng i sò caprizzi,
han de vegnimm adree come cagnœu,
e guai se me farân di malefizzii. -
Però me acorgi, car el mè Tanœu,
che sti proponiment hin deslenguaa
come la nev al sô; tutt in d'on bott,
diventaa pà anca mì, me son cambiaa.
Adess pu de bajad, pu de scuffiott;
e di mè idej de gran severitaa,
ghe son reussii a cavagh on bell nagott.
El m'ha magnetizzaa
quell scigollin!, me par de vess pu mi.
E sì che cerchi semper de reagì,
ma lu el me conscia lì
tant locch, che 'l se fasess anca el ciappin,
in scambi d'on castigh, ghe doo on basin.