Fag fistelas de tal

From Wikisource
Jump to navigation Jump to search

Al kleilön lilanes oka fagi fistelas de tal, stelavan melopik evälom in pükats popanolavik oka modi makabik at: Ludas lelodakopanöms anik ibumoms-la lelodaruti al stel »a centauri«, al fegebön plusuami okas tefü dunanäm e katäd; fikuls kaenik binoms-la pevikodöl e pelam lönelas lutaspada peuzugöl fa lelodalien ejenöl kotenölo. Sikod dilekels esludoms, flagön suämis vemo nedelidik, al nefikulön melaki, o. b. fenigis 5 plo milmets a 100 in vabaklad balid. Sembal vilom gebön pöti nedelidik at, lemom, al labön sammoni plo täv, debi tatik Flentäna e flagom peblimöl so len käd bilieti vabaklada balid al »a centuari«. As peli lovegivom zöti plo tatadeb flentänik, kel suämom baliads 15 e mutom poseplön baliads nog 9. Na esiadom oki, säkom lekopaneli, ko vif kiom lezug vegom, e getom gepüki: »Milmets 100 in düp bal!« »E kiüp onakömobs in ,a centauri?«' »Pos yels 48663000, o söl oba!«




Se Volapük: Gased al pakam Volapüka 1894, Nüm: 2, Pad: 7.