Estatutu d'Autonomía del Principáu d'Asturies

LLEI ORGÁNICA 7/1981, DE 30 D’AVIENTU, D’ESTATUTU D’AUTONOMÍA DEL PRINCIPÁU D’ASTURIES (B.O.E. , númberu 9, de 11 de xineru de 1982).

TÍTULU D’ENTAMU

Artículu 1 1. Asturies constitúise en Comunidá Autónoma, acordies cola Constitución y esti Estatutu, que ye la so norma institucional básica. 2. La Comunidá Autónoma, comunidá histórica constituyida nel exerciciu del derechu al autogobiernu amparáu na Constitución, llámase Principáu d’Asturies.

Artículu 2 El territoriu del Principáu d’Asturies ye’l de los conceyos que tán dientro les llendes actuales de la provincia d’Asturies; pal so cambéu atenderáse a lo qu’apaez nel artículu 56 d’esti Estatutu.

Artículu 3 1. La bandera del Principáu d’Asturies ye la tradicional cola Cruz de la Victoria n’amariello enriba de fondu azul. 2. El Principáu d’Asturies tien escudu de so y per Llei del Principáu escoyerá’l so himnu.

Artículu 4 1. El bable gociará de protección. Promoveráse'l so usu, al so espardimientu nos medios de comunicación y la so enseñanza, mirando en tou casu poles sos variantes y pola voluntariedá del so deprendimientu. 2. Una llei del Principáu regulará la protección, usu y promoción del bable.

Artículu 5 El llugar u s’asitien les instituciones del Principáu d’Asturies ye la ciudá d’Uviéu, ensin perxuiciu de que per Llei del Principáu, dalgún de los sos muérganos, servicios o dependencies puea afitase n’otru llugar del territoriu.

Artículu 6 1. El Principáu d’Asturies ta organizáu en Conceyos y en Fasteres. 2. A la Parroquia reconoceráse-y personalidá xurídica, como forma tradicional que ye de xuntura y asitiamientu de la xente asturiano. 3. Podrán facese Faces Metropolitanes.

Artículu 7 1. A los efectos d’esti Estatutu tienen la condición política d’asturianos los ciudadanos españoles que, acordies coles lleis xenerales del Estáu, tean avecindaos no alministrativo en dalgún Conceyu d’Asturies. 2. Como asturianos, esfruten los derechos políticos inxertos nesti Estatutu los ciudadanos españoles asitiaos nel estranxeru que tuvieren la última vecindá alministrativa n’Asturies, y dexen niciu d’ello nel Consuláu d’España que correspuenda. Tendrán los mesmos derechos, si asina lo piden, los sos descendientes inscritos como españoles na forma qu’afite la Llei del Estáu.

Artículu 8 Les comunidaes asturianes asitiaes fuera d’Asturies podrán pidir, como tales, la reconocencia de la so asturianía, entendiéndola como’l derechu a collaborar y entrar a la parte na vida social y cultural d’Asturies. Una Llei del Principáu d’Asturies regulará, ensin perxuiciu de les competencies del Estáu, l’algame y sen d’esa reconocencia, qu’enxamás llevará inxerío que se-yos dean derechos políticos. El Principáu d’Asturies podrá pidir al Estáu que, pa favorecer lo dicho enantes, faiga los Trataos o Acuerdos Internacionales afayadizos colos Estaos u tean les mentaes comunidaes.

Artículu 9 1. Los derechos y obligaciones fonderos de los asturianos son los que s’afiten na Constitución. 2. Les Instituciones de la Comunidá Autónoma d’Asturies, dientro de les sos competencies, curiarán sobre manera por: a) Dar seguranza pal exerciciu afayadizu de los derechos y obligaciones fonderos de los que s’asitien nel Principáu. b) Dar puxu a una política empobinada a meyorar les condiciones de vida y trabayu. c) Tomar aquelles midíes empobinaes al llogru de más puestos de trabayu y a la estabilidá económica. d) Facer los posibles, empuestos nel camín de llograr les condiciones afayadices y valtar los pilancos, p’algamar de mou efectivu y real la llibertá y la igualdá del individuu y de los grupos nos que s’inxer. e) Dar facilidaes pa que tolos ciudadanos s’inxerten na vida política, económica, cultural y social d’Asturies.

TÍTULU I DE LES COMPETENCIES DEL PRINCIPÁU D’ASTURIES

Artículu 10 1. El Principáu d’Asturies tien competencia dafechu nes materies que siguen darréu: 1. Igua, réxime y funcionamientu de les sos instituciones d’autogobiernu. 2. Alteriamientu de los términos y nomes de los conceyos inxertaos nel so territoriu, amás de la creación d’organizaciones d’ámbitu inferior y superior a los mesmos, nos términos qu’apaecen nel artículu 6 d’esti Estatutu. 3. Igua del territoriu y de la costa, urbanismu y vivienda. 4. Obres públiques que nun tean dientro del interés xeneral del Estáu nin cinquen a otra Comunidá Autónoma. 5. Los ferrocarriles, carreteres y caminos que tengan un itinerariu namái pela Comunidá Autónoma, y nos mesmos términos el tresporte per tierra, mar, cable o tubería. 6. El tresporte per mar ente puertos o puntos de la Comunidá Autónoma ensin conexón con puertos o puntos d’otros ámbitos territoriales. 7. Centros de contratación y terminales de carga en materia de tresporte. 8. Afitamientu de bolses de valores y afitamientu y regulación de centros de contratación de mercancíes, acordies cola llexislación mercantil. 9. Puertos d’abellugu y tamién los puertos, aeropuertos y helipuertos que nun seyan d’interés xeneral pal Estáu. 10. Agricultura, ganadería ya industria agroalimentaria, acordies cola igua xeneral de la economía. 11. Tratamientu especial de les zones de monte. 12. Proyectos, fechura y esplotación de los aprovechamientos hidráulicos y tamién los hidroeléctricos, preses y de riegu d’interés pa la Rexón. Agua mineral y termal. Agua soterraño cuando’l calce del agua tea dafechu dientro del territoriu de la Comunidá Autónoma. Igua y concesión de recursos y aprovechamientos hidráulicos cuando’l calce del agua tea dafechu dientro del territoriu de la Comunidá Autónoma. 13. Pesca n’agua interior, de ríos y llagos, marisquéu, acuicultura, oclecultura, lo mesmo que l’esporpolle d’otra forma cualesquiera de cultivu industrial. Caza. Curiáu de los ecosistemes onde se faigan eses actividaes. 14. Comerciu interior, ensin perxuiciu de la política xeneral de precios, de la llibre circulación de bienes nel territoriu del Estáu y de la llexislación sobre defensa de la competencia. Feries y mercaos interiores. Denominación d’orixe, en collaboración col Estáu. 15. Planificación de l’actividá económica y fomentu del desendolque económicu de la Comunidá Autónoma dientro de los oxetivos marcaos pola política económica xeneral. Creación y xestión d’un sector públicu de la Comunidá Autónoma. 16. Artesanía. 17. Museos, archivos, biblioteques, hemeroteques, servicios de Belles Artes y otros centros de depósitu cultural o colecciones de triba asemeyada y conservatorios de música d’interés del Principáu d’Asturies, que nun seyan de titularidá esta­tal. 18. Patrimoniu cultural, históricu, arqueolóxicu, incluyida l’arqueoloxía industrial, monumental, arquitectónicu, científicu y artísticu d’interés pal Principáu d’Asturies. 19. Investigación, ensin perxuiciu de lo mentao nel artículu 149.1.15ª de la Constitución. Academies con llar social nel Principáu d’Asturies. 20. Cultura, y de mou especial dando puxu a les sos manifestaciones autóctones y a la enseñanza de la cultura asturiana, too ello ensin perxuiciu de lo mentao nel artículu 149.2 de la Constitución. 21. Afitamientu y protección del bable nes variantes que, como modalidaes llingüístiques, empléguense dientro’l territoriu del Principáu d’Asturies. 22. Turismu. 23. Deporte y tiempu llibre. 24. Asistencia y bienestar social. Desendolque comunitariu. Actuaciones de inxerimientu social. 25. Protección y cuidáu de menores, ensin perxuiciu de lo mentao nel artículu 149.1.6ª y 8ª de la Constitución. 26. Casinos, xuegos y apuestes sacante les apuestes mutues deportivo-benéfiques. 27. Cooperatives y entidaes asemeyaes, mutues non inxertaes nel sistema de Seguridá Social, ensin perxuiciu de lo conseñao nel artículu 149.1.6ª de la Constitución. 28. Espectáculos públicos. 29. Estadístiques pa les finalidaes de la Comunidá Autónoma, n’andecha cola xeneral del Estáu y cola de les demás Comunidaes Autónomes. 30. Fundaciones que faigan principalmente les sos actividaes nel Principáu d’Asturies. 31. Industria, ensin perxuiciu de lo que determinen les disposiciones del Estáu nel exerciciu de les sos competencies por razones de seguridá, sanitaries o d’interés militar y les rellacionaes coles industries que tengan que siguir la llexislación de mines, hidrocarburos y enerxía nuclear. L’exerciciu de la competencia fadráse acordies coles bases y la ordenación de l’actividá económica xeneral y la política monetaria del Estáu, nos términos de lo afitao nos artículos 38, 131 y 149.1.11ª y 13ª de la Constitución. 32. Instalaciones de producción, distribución y tresporte de cualquier enerxía y fluyíu enerxético, cuando’l so tresporte nun salga d’Asturies o’l so aprovechamientu nun afecte a otra Comunidá Autónoma. Too ello ensin perxuiciu de lo conseñao nos númberos 22 y 25 del apartáu 1 del artículu 149 de la Constitución. 33. Procedimientu alministrativu deriváu de les especialidaes del derechu sustantivu y de la organización propia de la Comunidá Autónoma. 34. Publicidá, ensin perxuiciu de les normes dictaes pol Estáu pa sectores y medios específicos, acordies col artículu 149.1.1ª, 6ª y 8ª de la Constitución. 35. Serviciu meteorolóxicu de la Comunidá Autónoma. 36. Caxes d’Aforros ya instituciones de creitu corporativu públicu y territorial, dientro de la ordenación xeneral de la economía y acordies coles disposiciones que n’usu de les sos facultaes dicte l’Estáu.

2. Nel exerciciu d’estes competencies corresponderá al Principáu d’Asturies la potestá llexislativa, la potestá reglamentaria y la función executiva, qu’exercerá respetando, en tou casu, lo que ta afitao na Constitución.

Artículu 11 Dientro de la llexislación cimera del Estáu, y nel so casu, nos términos que la mesma estableza, correspuende al Principáu d’Asturies l’esporpolle llexislativu y la execución nes materies que siguen darréu: 1. Montes, aprovechamientos y servicios forestales, víes pecuaries, pastos y espacios naturales protexíos. 2. Sanidá ya hixene. 3. Coordinación d’hospitales en xeneral, inxeríos nella los de la Seguridá Social. 4. Ordenación farmacéutica. 5. Protección del mediu ambiente, incluyíos los vertíos industriales y contaminantes en ríos, llagos y agües interiores y normes amestaes de protección del mediu ambiente. 6. Réxime mineru y enerxéticu. 7. Ordenamientu del sector pesqueru. 8. Defensa del consumidor y del usuariu, acordies coles bases y la ordenación de l’actividá económica xeneral y la política monetaria del Estáu, les bases y la coordinación xeneral de la sanidá, acordies colo conseñao nos artículos 38, 131 y nos númberos 11, 13 y 16 del apartáu 1 del artículu 149 de la Constitución. 9. Corporaciones de Derechu públicu representatives d’intereses económicos y profesionales. Exerciciu de les profesiones titulaes. 10. Réxime llocal. 11. Sistema de consultes populares nel ámbitu del Principáu d’Asturies, acordies colo que disponga la Llei a la que se refier l’artículu 92.3 de la Constitución y demás lleis del Estáu, correspondiendo a ésti l’autorización de la so convocatoria.

Artículu 12 Correspuende al Principáu d’Asturies la execución de la llexislación del Estáu, nos términos que na mesma s’afiten, sobre les materies que siguen darréu: 1. Execución dientro’l so ámbitu territorial, de los trataos internacionales no que cinca a les materies propies de les competencies del Principáu d’Asturies. 2. Asociaciones. 3. Feries internacionales. 4. Xestión de los encontos y servicios sociales del sistema de Seguridá Social. IMSERSO. La determinación de los encontos del sistema, los requisitos p’afitar les condiciones del beneficiariu y la financiación fadránse acordies coles normes afitaes pol Estáu nel exerciciu de les sos competencies tal lo que se diz nel númberu 17 del apartáu 1 del artículu 149 de la Constitución. 5. Museos, archivos, biblioteques, hemeroteques y colecciones asemeyaes de titularidá estatal con una xestión que nun tea reservada pa l’Alministración del Estáu. Los términos de la xestión fadránse pente medies d'acuerdos. 6. Peses y midíes. Contraste de metales. 7. Planes afitaos pol Estáu pa implantar o reestructurar sectores económicos. 8. Productos farmacéuticos. 9. Propiedá intelectual ya industrial. 10. Llaboral. Acordies col númberu 7 del apartáu 1 del artículu 149 de la Constitución, correspuende al Estáu la competencia sobre llexislación llaboral y l’alta inspección. Queden reservaes al Estáu toles competencies no que cinca a migraciones interiores y esteriores, fondos d’ámbitu nacional y d’emplegu ensin perxuiciu de lo qu’afiten les normes del Estáu sobre estes materies. 11. Protección civil. Salvamentu marítimu. 12. Puertos, aeropuertos y helipuertos d’interés xeneral cuando l’Estáu nun guarde pa sí la so xestión directa. 13. Xestión de l’asistencia sanitaria de la Seguridá Social, acordies colo previsto nel númberu 17 del apartáu 1 del artículu 149 de la Constitución, guardándose l’Estáu pa sí la cimera inspección qu’empobina al cumplimientu de la función a que se refier esti preceptu. 14. Creitu, banca y seguros, acordies coles previsiones de les regles 6, 11 y 13 del apartáu 1 del artículu 149 de la Constitución. 15. Tresporte de mercancíes y viaxeros que tengan el so orixe y destín nel territoriu del Principáu d’Asturies, ensin perxuiciu de la execución directa que guarde pa sí l’Estáu.

Artículu 13 Acordies coles lleis del Estáu, el Conseyu de Gobiernu nomará a los notarios y rexistradores de la propiedá y de mercáu, amás d’a los corredores de comerciu y participará nel afitamientu de les llendes correspondientes. Artículu 14 1. La Xunta Xeneral del Principáu d’Asturies podrá exercer la iniciativa llexislativa conseñada nel artículu 87.2 de la Constitución pa l’aprobación pol Estáu de les lleis previstes nel artículu 150.1 y 2 de la Constitución. 2. En cualquier casu, el Principáu d’Asturies podrá facer de so les demás competencies que la llexislación del Estáu reserve pa les Comunidaes Autónomes.

Artículu 15 1. Toles competencies conseñaes nos artículos anteriores y nos demás d’esti Estatutu entenderánse referíes al territoriu del Principáu d’Asturies. 2. Nel exerciciu de les sos competencies, el Principáu d’Asturies tendrá les potestaes y privilexos propios de l’Alministración del Estáu, ente los que s’alcuentren: a) La presunción de llexitimidá y la executoriedá de los sos actos, asina como los poderes d’execución forzosa y revisión en vía alministrativa. b) La potestá d’espropiación, inxiriéndose nello la declaración d’urxente ocupación de los bienes cincaos, y l’exerciciu de les restan­tes competencies de la llexislación espropiatoria atribuíes a l’Alministración del Estáu cuando se trate de materies de competencia de la Comunidá Autónoma. c) La potestá de sanción dientro los finxos qu’afite l’ordenamientu xurídicu. d) La facultá d’emplegu del procedimientu d’apremiu. e) La inembargabilidá de los sos bienes y derechos, de la mesma manera que los privilexos de prelación, preferencia y demás, reconocíos a la Facienda pública pal cobru de los sos creitos, ensin perxuiciu de los que correspuendan nesta materia a la Facienda del Estáu y con igualdá de derechos a les otres Comunidaes Autónomes. f) La lliberación de toa obligación de garantía o prenda delantre cualquier muérganu alministrativu o Tribunal xurisdiccional. Nun s’almitirán interdictos escontra les actuaciones del Principáu en materia de les sos competencies, feches acordies col procedimientu llegal. 3. Nel exerciciu de la competencia prevista nel artículu 10.1.1 del presente Estatutu y acordies cola llexislación del Estáu, correspuende a la Comunidá Autónoma, ente otres materies, l’afitamientu del réxime estatutariu de los sos funcionarios, el réxime xurídico-alministrativu deriváu de les competencies asumíes, la regulación de los bienes de dominiu públicu y patrimoniales que seyan titularidá de la Comunidá Autónoma, amás de les servidumes públiques no que cinca a la so competencia y la regulación de los contratos y concesiones alministratives nel ámbitu del Principáu d’Asturies.

Artículu 16 EI Principáu d’Asturies dará puxu al caltenimientu y recoyida del derechu tradicional asturianu.

Artículu 17 1. En materia de medios audiovisuales de comunicación social del Estáu, el Principáu d’Asturies exercerá toles potes­taes y competencies que-y correspuendan, nos términos y casos afitaos na llexislación cimera del Estáu. 2. Correspuénde-y tamién, dientro de les normes cimeres del Estáu, el desendolcu llexislativu y la execución del réxime de prensa y, en xeneral, de tolos medios de comunicación social. 3. Nos términos afitaos nos párrafos anteriores d’esti artículu, la Comunidá Autónoma podrá regular, crear y caltener la so propia televisión, radio y prensa y, en xeneral, tolos medios de comunicación social pal algame de los sos finxos.

Artículu 18 1. Correspuende a la Comunidá Autónoma la competencia de desendolcu llexislativu y execución de la enseñanza en tola so estensión, niveles y graos, modalidaes y especialidá, acordies colo mentao nel artículu 27 de la Constitución y lleis orgániques que, acordies col apartáu 1 del artículu 81 de la mesma, desendólquenlu, y ensin perxuiciu de les facultaes que-y da al Estáu’l númberu 30 del apartáu 1 del artículu 149 y de l’alta inspección pal so cumplimientu y seguranza. 2. Col envís de dar seguranza d’una ufierta homoxénea y afayadiza del serviciu públicu de la educación que faiga posible correxir les desigualdaes o desequilibrios que puean dase, la Comunidá Autónoma dará a l’Alministración del Estáu la información qu’ésta-y pida sobre’l funcionamientu del sistema educativu nos sos aspectos cualitativos y cuantitativos y collaborará cola Alministración del Estáu nes actuaciones de siguimientu y evaluación del sistema educativu nacional. 3. Nel exerciciu d’estes competencies, la Comunidá Autónoma dará puxu a la investigación, sobre manera a la que cinque a materies o aspectos que dan calter al Principáu d’Asturies, y a la creación de centros universitarios na Comunidá Autónoma.

Artículu 19 1. Según los finxos y númberu que la llexislación xeneral del Estáu afite, el Principáu d’Asturies propondrá les persones que formarán parte de los muérganos d’alministración d’aquelles empreses públiques de titularidá estatal asitiaes n’Asturies que llexislación tala diga. 2. El Principáu d’Asturies podrá facer y unviar al Gobiernu tolos informes, estudios y propuestes relatives a la xestión de les empreses citaes o a la so incidencia na socioeconomía de la Comunidad Autónoma. Estos informes, estu­dios o propuestes darán llugar a resolución motivada del Gobiernu o de los muérganos o Entidaes titulares de la participación de les Empreses.

Artículu 20 1. Correspuende a la Comunidá Autónoma del Principáu d’Asturies la vixilancia y protección de los edificios ya instalaciones de la propia Comunidá y la coordinación de les policíes llocales asturianes, ensin perxuiciu de la so dependencia de les autoridaes municipales. 2. Pal exerciciu de la competencia prevista nel apartáu anterior, la Comunidá Autónoma podrá acordar col Estáu l’allugamientu d’unidaes del Cuerpu Nacional de Policía nos términos y pal exerciciu de les funciones previstes na Llei Orgánica mentada nel artículu 149.1.29ª de la Constitución.

Artículu 21 1. El Principáu d’Asturies podrá facer acuerdos con otres Comunidaes Autónomes pa la xestión y ufierta de ser­vicios propios de la esclusiva competencia de les mesmes. Si se faen los mentaos acuerdos, enantes de que tengan puxu llegal, habrá que ponelo na conocencia de les Cortes Xenerales. Si les Cortes Xenerales, o dalguna de les Cámares, punxeren torgues dientro los trenta díes de magar reciban l’anunciu del acuerdu tendrá que dir acordies colo afitao nel párrafu que sigue. Si pasáu esi plazu nun se punxeren torgues al acuerdu, tendrá puxu dafechu. 2. La Comunidá Autónoma podrá tamién facer acuerdos de collaboración con otres Comunidaes Autónomes, algamando, enantes, el preste de les Cortes Xenerales.

TÍTULU II DE LOS MUÉRGANOS INSTITUCIONALES DEL PRINCIPÁU D’ASTURIES

Artículu 22 Los muérganos institucionales del Principáu d’Asturies son la Xunta Xeneral, el Conseyu de Gobiernu y el Presidente.

CAPÍTULU I DE LA XUNTA XENERAL DEL PRINCIPÁU D’ASTURIES

Artículu 23 1. La Xunta Xeneral del Principáu d’Asturies representa al pueblu asturianu, exerce la potestá llexislativa, aprueba los presupuestos, empobina y controla lo que fai’l Conseyu de Gobiernu y exerce les otres competencies que-y da la Constitución, esti Estatutu y demás normes del ordenamientu xurídicu. 2. La Xunta Xeneral ye inviolable.

Artículu 24 Ye tamién competencia de la Xunta Xeneral: 1. Escoyer d’ente los sos miembros al Presidente del Principáu d’Asturies. 2. Nomar los Senadores a que se refier l’artículu 69.5 de la Constitución, acordies colo que s’afite nuna llei de la Xunta, qu’en tou casu dará seguranza a la representación proporcional afayadiza. 3. Exercer la iniciativa llexislativa como diz la Constitución. 4. Fixar les previsiones de tipu políticu, social y económicu que, acordies col artículu 131.2 de la Constitución, vaya empobinar el Principáu d’Asturies al Gobiernu pa facer los proyectos de planificación. 5. Exercer les competencies que según l’artículu 10.1.2 correspuenden al Principáu d’Asturies no que cinca a camudar finxos y nomes de los conceyos de la mesma manera que les facultaes relatives a facer l’aniciu de muérganos territoriales de que se fala nel artículu enantes mentáu. 6. Regular la delegación de competencies alministratives del Principáu nún o en dellos conceyos o nes organizaciones territoriales a que se refier l’artículu sestu. 7. Autorizar al Conseyu de Gobiernu el preste pa obligase nos acuerdos y acuerdos del Principáu d’Asturies con otres Comunidaes Autónomes, y al empar, supervisar la so execución. El Conseyu de Gobiernu informará a la Xunta Xeneral de los demás acuerdos y acuerdos qu’obliguen al Principáu. 8. Afitar contribuciones. Autorizar el recursu al creitu. 9. Aprobar el programa del Conseyu de Gobiernu y esixir la so responsabilidá política na forma qu’afite una Llei de la Xunta. 10. Ver y aprobar la Cuenta Xeneral del Principáu, ensin perxuiciu de lo afitao nos artículos 35 ter y 55 d’esti Estatutu. 11. Poner recursos d’inconstitucionalidá y presentar delantre’l Tribunal Constitucional talamente y nes circunstancies afitaes na Constitución y na Llei Orgánica del Tribunal Constitucional. 12. Recibir la información que-y mande’l Conseyu de Gobiernu sobre trataos y acuerdos internacionales no que cinque a materies d’interés particular pal Principáu d’Asturies, amosando’l so paecer sobre los mesmos.

Artículu 24.bis 1. La Xunta Xeneral podrá delegar nel Conseyu de Gobiernu la potestá de dictar normes col rangu de llei. 2. Les disposiciones del Conseyu de Gobiernu que tengan llexislación delegada recibirán el títulu de Decretos Llexislativos. 3. Nun podrá delegase l’aprobación de la Llei de Presupuestos nin la de normes con rangu de llei pa les qu’esti Estatutu, les lleis o’l Reglamentu de la Xunta Xeneral necesiten de mayoríes cualificaes. 4. La delegación llexislativa tendrá que se dar al Conseyu de Gobiernu de manera espresa pa materia concreta y con plazu pal so exerciciu. La delegación estríncase pol usu que d’ella faiga’l Conseyu de Gobiernu pente medies del espublizamientu de la norma correspondiente. Nun se podrá entender como concedida per tiempu implícitu o tiempu indetermináu. Tampoco se podrá permitir la subdelegación a autoridaes estremaes de les del propiu Conseyu de Gobiernu. 5. La delegación llexislativa tendrá que se dar pente medies d’una llei de bases cuando’l so oxetu seya la formación de testos articulaos o per una llei ordinaria cuando seya refundir dellos testos llegales nún solo. 6. Les lleis de bases perllendarán con precisión l’oxetu y algame de la delegación llexislativa y los principios y criterios qu’han siguise nel so exerciciu. Les lleis de bases nun podrán en nengún casu autorizar el so propiu cambéu nin dar el preste pa dictar normes con calter retroactivu. 7. L’autorización pa refundir testos llegales determinará l’ámbitu normativu al que se refier el conteníu de la delegación, especificando si se refier namás a la formulación d’un testu únicu o si s’inxerta la d’iguar, aclariar y harmonizar los testos llegales que tienen que ser refundíos. 8. Cuando una proposición de llei o una enmienda fuera contraria a la delegación llexislativa n’usu, el Conseyu de Gobiernu ye llibre pa oponese a la so tramitación. Nesi supuestu, podrá presentase una proposición de llei pa desaniciar en too o en parte la llei de delegación. 9. Ensin perxuiciu del control xurisdiccional, el Reglamentu de la Xunta Xeneral y les lleis de delegación podrán afitar fórmules amestaes de control.

Artículu 25 1. La Xunta Xeneral del Principáu d’Asturies escuéyese pa cuatro años per sufraxu universal, llibre, igual, directu y secretu, aplicándose un sistema de representación proporcional. 2. Per llei del Principáu, que lo mesmo p’aprobase que pa camudase necesita’l votu favoratible de la mayoría absoluta de la Xunta Xeneral, afitaráse’l númberu de miembros, ente trenta y cinco y cuarenta y cinco, les sos causes d’inelixibilidá y d’incompatibilidá y les demás circunstancies del procedimientu electoral. 3. El Presidente del Principáu, depués de discutiniu del Conseyu de Gobiernu y baxo la so responsabilidá esclusiva, podrá acordar la disolución de la Cámara, con anticipación al términu natural de la Llexislatura. La disolución acordaráse per Decretu, nel que tamién se convocarán elecciones, apaeciendo nél tolos requisitos qu’esixa la llexislación electoral aplicable. El Presidente nun podrá acordar la disolución de la Cámara nel primer periodu de sesiones de la Llexislatura, cuando quede menos d’una añu pa que fine, nin cuando tea tramitándose una moción de censura. Tampoco se va poder acordar la disolución enantes de que pase’l plazu d’un añu dende la última disolución per esti procedimientu. Enxamás el Presidente podrá desfacer la Cámara en tando convocáu un procesu electoral estatal. En tou casu, la nueva Cámara que resulte de la convocatoria electoral tendrá un mandáu llendáu pol términu natural de la Llexislatura orixinaria. 4. El Presidente del Principáu llamará a elecciones, acordies colo conseñao na Llei de Réxime Electoral Xeneral, de mou que se faigan el cuartu domingu de mayu de cada cuatro años, ensin perxuiciu de lo qu’afiten les Cortes Xenerales, col esclusivu envís de coordinar el calendariu de les estremaes consultes electorales. 5. La Xunta Xeneral escoyida convocarála’l Presidente del Principáu saliente, dientro los quince díes que sigan a la celebración de les elecciones.

Artículu 26 Los miembros de la Xunta Xeneral del Principáu: 1. Nun tan venceyaos a mandáu imperativu. 2. Tendrán, mesmamente, n’acabando’l so mandáu, inviolabilidá poles opiniones asoleyaes n’actos parllamentarios y polos votos daos nel exerciciu del so cargu. A lo llargo’l so mandáu nun podrán detenelos nin retenelos polos actos delictivos fechos nel territoriu d’Asturies sinón cuando se trate de flagrante delitu, correspondiendo decidir, en tou casu, la so inculpación, prisión, procesamientu y xuiciu al Tribunal Cimeru de Xusticia de la Comunidá Autónoma. Fuera d’esti territoriu la responsabilidá penal será esi­xible, nos mesmos términos, delantre la Sala de lo Penal del Tribunal Supremu. 3. Tienen derechu a facer entrugues, interpelaciones y mociones, acordies colo afitao nel Reglamentu. Tamién tienen derechu a llograr de les Autoridaes de la Comunidá Autónoma la información que-yos faiga falta pal desendolque de les sos funciones. 4. Pol exerciciu del so cargu representativu, los Diputaos de la Xunta Xeneral sedrán retribuyíos. Les modalidaes de les asignaciones afitaránse acordies colo que se conseñe nel Reglamentu de la Cámara.

Artículu 27 1. La Xunta Xeneral del Principáu aconceyaráse, añalmente, en dos tandes de xuntes, la primera ente los meses de setiembre y avientu, y la segunda ente febreru y xunu. 2. A pidimientu del Conseyu de Gobiernu, de la Diputación Permanente o d’un cuartu de los miembros de la Xunta, ésta podrá aconceyase en xunta estraordinaria, que se zarrará acabante terminar l’orde del día pal que la convocaren. 3. Les xuntes plenaries de la Xunta son públiques, a nun ser naquellos casos que diga’l Reglamentu. 4. Pa la deliberación y toma d'acuerdos, la Xunta tien que s’aconceyar acordies col reglamentu y tando presentes la mayoría de los sos miembros. Los acuerdos fáense per mayoría de los presentes si ye que l’Estatutu, les Lleis o’l Reglamentu nun piden otres mayoríes más cualificaes. 5. El votu ye personal y nun pue delegase.

Artículu 28. 1. La Xunta Xeneral aprueba’l so presupuestu y l’estatutu del so personal, y fai’l so Reglamentu onde s’inxerirá, tamién, l’estatutu de los sos miembros. P’aprobar el Reglamentu y camudalu fai falta’l votu favoratible de la mayoría absoluta. 2. La Xunta, nel so primer aconceyamientu, escueye’l so Presidente y los miembros qu’habrán asitiase na Mesa, que nun podrán ser, enxamás, miembros del Conseyu de Gobiernu nin Presidente del mesmu.

Artículu 29 1. La Xunta Xeneral del Principáu funciona en Plenu y en Comisiones. 2. Les Comisiones son permanentes y, nel so casu especiales o d’investigación. 3. Mentanto la Xunta Xeneral del Principáu nun tea aconceyada o cuando’l so mandáu tuviera acabáu, habrá una Diputación Permanente, pa la que’l Reglamentu afitará’l mou d’elección, la so composición y les sos funciones.

Artículu 30 Los que formen la Xunta estrémense en Grupos y el Reglamentu inxertará les condiciones de formación, organización y funciones. Tou miembru de la Cámara tará inxeríu nun Grupu y daráse seguranza de la presencia de caún d’estos nes Comisiones y Diputación Permanente, según el so númberu de miembros.

Artículu 31 1. La iniciativa del exerciciu de la potestá llexislativa y reglamentaria afitaes nel artículu 23 d’esti Estatutu correspuende a los miembros de la Xunta Xeneral y al Conseyu de Gobiernu. Per llei del Principáu regularáse la iniciativa de los Conceyos y la iniciativa popular nes materies que seyan competencia dafechu del Principáu d’Asturies. 2. Les lleis aprobaes pola Xunta Xeneral promulgaránse en nome del Rei pol Presidente del Principáu, que fairá que s’asoleye nel Boletín Oficial del Principáu d’Asturies dientro los quince díes acabante aprobase y tamién nel Boletín Oficial del Estáu. Los Reglamentos asoleyaránse per orde del Presidente del Principáu, dientro’l mesmu plazu, nel Boletín Oficial del Principáu d’Asturies.

CAPÍTULU II DEL PRESIDENTE DEL PRINCIPÁU D’ASTURIES

Artículu 32 1. La Xunta Xeneral escoyerá al Presidente del Principáu d’Asturies d’ente los sos miembros y el Rei ye quien lu noma. Tien que lu escoyer la mayoría absoluta de los miembros de la Xunta na primer convocatoria y la mayoría cenciella nes otres, pero ente caúna de les convocatories habrán pasar cuarenta y ocho hores polo menos. Si pasáu’l plazu de dos meses acabante constituise la Xunta dengún candidatu llograra que lu escoyeren, la Xunta Xeneral escoyida esfairáse llamando darréu a unes nueves elecciones. El mandáu de la nueva Xunta durará, en tou casu, hasta la fecha que debiera acabar la primera. 2. El Presidente del Principáu d’Asturies ye’l del Conseyu de Gobiernu y empobina’l so facer, coordina l’alministración de la Comunidá Autónoma, noma y separta a los conseyeros y tien la representación cimera del Principáu y la ordinaria del Estáu n’Asturies. 3. El Presidente del Principáu d’Asturies respuende política­mente delantre la Xunta Xeneral. 4. Una llei del Principáu, aprobada pel votu favoratible de la mayo­ría absoluta, afitará l’estatutu personal, el mou d’elección y separtación y les atribuciones del Presidente.

CAPÍTULU III DEL CONSEYU DE GOBIERNU

Artículu 33 1. El Conseyu de Gobiernu ye’l muérganu colexáu qu’empobina la política de la Comunidá Autónoma y al que correspuenden les funciones executiva y alministrativa y l’exerciciu de la potestá reglamentaria. 2. Per llei del Principáu, aprobada per mayoría absoluta, regularánse les atribuciones del Conseyu de Gobiernu, asina como l’estatutu, mou de nomamientu y separtación de los que nél s’inxeren. 3. Una llei de la Xunta regulará’l réxime d’asoleyamientu de les normes y publicidá de les disposiciones y actos que surdan del Conseyu de Gobiernu y de l’Alministración del Principáu d’Asturies. 4. El Conseyu de Gobiernu sedrá informáu de los acuerdos y trataos internacionales que puean afectar a materies del so interés específicu.

Artículu 34 1. El Conseyu de Gobiernu respuende política­mente delantre la Xunta Xeneral de mou solidariu, ensin perxuiciu de la responsabilidá directa de caún de los sos miembros pola so xestión. 2. Una llei de la Xunta, aprobada pel votu favoratible de la mayoría de los sos miembros, regulará la responsabilidá afitada nel númberu anterior y, en xeneral, les rellaciones ente la Xunta y el Conseyu.

Artículu 35 1. El Presidente del Conseyu de Gobiernu, depués de delliberar, pue plantegar delantre la Xunta Xeneral la cuestión del enfotu nel so programa o nuna declaración de política xeneral dientro les competencies que tien el Principáu con esti Estatutu. Entiéndese que lu algama cuando vote favoratiblemente la mayoría ­cenciella de los miembros de la Xunta. 2. La Xunta Xeneral pue esixir responsabilidá política al Conseyu de Gobiernu faciendo per mayoría absoluta la moción de censu­ra. Ésta tendrán que la proponer polo menos un 15% de los miembros de la Xunta, y habrá d’inxertase nella un candidatu a Presidente del Principáu d’Asturies. La moción de censura nun se votará enantes de los cinco díes de que tea presentada. Nos dos díes primeros d’esti plazu podrán presentase mociones alternatives. Si nun s’aprobara la moción de censura na Xunta Xeneral, los que la roblaren nun podrán entamar otres nueves mentanto nun pase un añu d’aquella dientro la mesma Llexislatura. 3. Si la Xunta Xeneral adoptara una moción de censura, el Presidente del Principáu presentará la so dimisión delantre la mesma, y el so Presidente llamará en quince díes a la xunta plenaria pa escoyer un nuevu Presidente del Principáu según el mou afitáu nel artículu 32.1, ensin qu’en dengún casu s’esfaiga la Xunta Xeneral. 4. Si la Xunta Xeneral negara’l so enfotu, el Presidente del Principáu presentará la so dimisión delantre la mesma y el candidatu inxeríu naquélla entiéndese que tien l’enfotu de la Xunta. El Rei nomarálu Presidente del Principáu. 5. El Presidente del Principáu nun podrá plantegar la cuestión d’enfotu mentanto tea tramitándose una moción de censura. 6. El Conseyu de Gobiernu saliente siguirá coles sos funciones mentanto la toma posesión del nuevu Conseyu nun se faiga.

Artículu 35.bis. 1. La responsabilidá penal del Principáu d’Asturies y de los miembros del Conseyu de Gobiernu esixiráse delantre’l Tribunal Superior de Xusticia del Principáu d’Asturies polos actos cometíos nel territoriu del Principáu. Fuera d’ésti, la responsabilidá penal esixiráse énte la Sala de lo Penal del Tribunal Supremu. 2. Delantre los mesmos Tribunales respectivamente esixiráse la responsabilidá civil en que les mentaes persones cayeren con ocasión del exerciciu los sos cargos.

TÍTULU II. BIS DE LOS MUÉRGANOS AUXILIARES DEL PRINCIPÁU D’ASTURIES

Artículu 35.ter. 1. Créase la Sindicatura de Cuentes del Principáu d’Asturies. Per llei del Principáu regularáse la so composición y funciones. 2. Dependerá directamente de la Xunta Xeneral del Principáu y exercerá les sos funciones per delegación d’ella nel esame y comprobación de la Cuenta Xeneral del Principáu.

Artículu 35.quater. Créase’l Conseyu Consultivu del Principáu d’Asturies como muérganu cimeru de consulta de la Comunidá Autónoma. Per llei del Principáu regularánse la so composición y competencies.

TÍTULU III DE L’ALMINISTRACIÓN DE XUSTICIA

Artículu 36 El Tribunal Cimeru de Xusticia del Principáu d’Asturies, nel que s’inxerirá l’Audiencia Territorial d’Uviéu, ye’l muérganu xurisdiccional fechu cumal de la organización xudicial nel so ámbitu territorial y delantre’l que s’estrinquen les socesives instancies procesales, según afita l’artículu 152 de la Constitución y acordies con esti Estatutu, y la Llei Orgániques del Poder Xudicial.

Artículu 37 1. La competencia de los muérganos xurisdiccionales n’Asturies algama: a) Nel orde civil a toles instancies y graos, a nun ser los recursos de casación y revisión. b) Nel orde penal y social, a toles instancies y graos, a nun ser los recursos de casación y revisión. c) Nel orde contencioso-alministrativu, a los recursos que se deduzan escontra los actos y disposiciones de les Alministraciones públiques, según s’afite na Llei Orgánica del Poder Xudicial. d) A les cuestiones de competencia ente los muérganos xudiciales n’Asturies. 2. Nes otres materies podrán ponese, cuando proceda, delantre’l Tribunal Supremu, el recursu de casación o’l que correspuenda según les lleis del Estáu y, nel so casu, el de revisión. El Tribunal Supremu resolverá tamién les cuestiones de competencia ente los Tribunales d’Asturies y los del restu España.

Artículu 38 1. El Presidente del Tribunal Cimeru de Xusticia del Principáu d’Asturies nomarálu’l Rei en pidiéndolo’l Conseyu Xeneral del Poder Xudicial. El Presidente del Principáu d’Asturies mandará que s’asoleye’l so nomamientu nel Boletín Oficial del Principáu d’Asturies. 2. El nomamientu de los Maxistraos, Xueces y Secretarios del Tribunal Cimeru de Xusticia d’Asturies fairáse según s’afite na Llei Orgánica del Poder Xudicial.

Artículu 39 Pidiéndolo’l Principáu, el muérganu afayadizu llamará a los concursos y oposiciones pa enllenar les places llibres n’Asturies de Maxistraos, Xueces, Secretarios Xudiciales y demás personal al serviciu l’alministración de Xusticia, según s’afite na Llei Orgánica del Poder Xudicial.

Artículu 40 Desaniciáu.

Artículu 41 No que cinca a l’Alministración de Xusticia, a nun ser la militar, correspuénde-y al Principáu: l. Exercer toles facultaes que la Llei Orgánica del Poder Xudicial reconozan o atribuyan al Gobiernu del Estáu. 2. Fixar los finxos de les llendes territoriales de los muérganos xurisdiccionales n’Asturies y l’asitiamientu de la so capital.

TÍTULU IV FACIENDA Y ECONOMÍA

Artículu 42 EI Principáu d’Asturies, dientro les llendes de coordinación coles Faciendes estatal y llocal y de la solidaridá ente tolos españoles, tien autonomía financiera, dominiu públicu y patrimoniu de so, acordies cola Constitución, con esti Estatutu y cola Llei Orgánica de Financiación de les Comunidaes Autónomes.

Artículu 43 1. Son bienes del Principáu d’Asturies: a) Los que seyan propiedá del Muérganu Preautonómicu y de la Diputación Provincial. b) Los que tuvieren inxeríos nos servicios que se trespasen al Principáu. c) Los que llograra per títulos xurídicos afayadizos. 2. El Principáu tien capacidá dafechu pa llograr, alministrar y enayenar los bienes que faen el so patrimoniu. 3. El réxime xurídicu de los bienes patrimoniales y de dominiu públicu del Principáu deberán regulase per una llei de la Xunta Xeneral, acordies con esti Estatutu.

Artículu 44 La Facienda del Principáu d’Asturies fáenla: 1. Los rindimientos algamaos coles propies contribuciones. 2. Los rindimientos de les contribuciones cedíos del Estáu y afitaos na disposición amestáu. 3. Los recargos percima les contribuciones estatales. 4. Un porcentax de participación nos ingresos del Estáu. 5. Nel so casu, los ingresos que surdan del Fondu de Compensación Interterritorial y d’otros Fondos pal esporpolle rexonal. 6. Otres asignaciones con cargu a los Presupuestos del Estáu. 7. La emisión del Delda y el recursu al Creitu. 8. Los rindimientos surdíos del so patrimoniu. 9. Ingresos de Derechu priváu. 10. Multes y sanciones impuestes según les sos competencies. 10 bis. Ingresos de cualquier otra triba que la llexislación prevea nel marcu del artículu 157 de la Constitución. Artículu 45 1. La xestión, lliquidación, recaldu, inspección de les propies contribuciones, asina como la conocencia de les reclamaciones que-yos cinquen corresponderá al Principáu, que tendrá toles atribuciones pa la execución y organización d’eses xeres, ensin perxuiciu de la collaboración que puea facese cola Alministración Tributaria del Estáu, sobre manera cuando venga pidida asina pola naturaleza de la contribución. 2. Nel casu de contribuciones cedíes, el Principáu tomará per delegación del Estáu la xestión, lliquidación, recaldu, inspección y revisión, nel so casu, de los mesmos ensin perxuiciu de la collaboración que puea facese ente les dos Alministraciones, too ello acordies colo que se perafite na llei que fixe la llargura y condiciones de la cesión. 3. La xestión, lliquidación, recaldu, inspección y revisión, nel so casu, de les demás contribuciones del Estáu, feches n’Asturies, corresponderá a l’Alministración Tributaria del Estáu, ensin perxuiciu de la delegación que’l Principáu puea recibir d’ésti y de la collaboración que puea facese sobre manera cuando asina lo pida la naturaleza de la contribución.

Artículu 46 Regularánse, necesariamente per Llei de la Xunta Xeneral les materies que siguen darréu: 1. L’afitamientu, cambéu y desaniciu de los sos impuestos, tases y contribuciones especiales. 2. L’afitamientu, cambéu y desaniciu de los recargos percima les contribuciones del Estáu. 3. El réxime xeneral presupuestariu del Principáu.

Artículu 47 1. Correspuende al Conseyu de Gobiernu facer el Presupuestu del Principáu y a la Xunta Xeneral el so esame, igua, aprobación y control. 2. El Conseyu de Gobiernu presentará’l proyectu del Presu­puestu a la Xunta enantes del trimestre caberu del añu. 3. El Presupuestu tendrá calter añal y nél inxertaránse perdafechu tolos gastos y entraes del Principáu y de los muérganos ya instituciones que d’él dependen. 4. Si la llei del Presupuestu nun s’aprobara enantes del día primeru del so exerciciu económicu correspondiente, consideraráse allargáu’l Presupuestu del exerciciu anterior hasta que’l nuevu s’apruebe. 5. Desaniciáu.

Artículu 48 1. El Principáu d’Asturies, col preste d’una Llei de la Xunta Xeneral y pa financiar gastos d’inversión, podrá acordar operaciones de creitu o sacar Delda Pública representada en títulos, valores o n’otros documentos. 2. La llargura y característiques d’estes operaciones iguaránse según les normes xenerales del Estáu. 3. Los títulos sacaos tendrán la consideranza de fondos públicos, a tolos efectos. 4. El Principáu d’Asturies podrá facer operaciones de creitu per un plazu que nun trespase l’añu, p’asina cubrir les sos necesidaes transitories d’ayalguería. 5. Lo que s’afita nos apartaos anteriores fairáse acordies colo que diz nesti sentíu la Llei Orgánica de Financiación de les Comunidaes Autónomes.

Artículu 49 1. El Principáu d’Asturies, acordies coles disposiciones del Estáu, dará puxu al asitiamientu d’instituciones públiques de creitu y aforru territoriales, y podrá adoptar les midíes que-y paezan necesaries pa dar seguranza de la so funcionalidá y dar posibilidaes al llogru y afitamientu del aforru rexonal. 2. El Principáu d’Asturies tien llibertá pa facer entidaes que dean puxu a la plena ocupación y esporpolle económicu y social, dientro les sos competencies. De la mesma manera podrá facer empreses públiques como mediu d’execución de les funciones que seyan de la so competencia, según s’afita nesti Estatutu.

Artículu 50 1. El Principáu d’Asturies promoverá los oxetivos afitaos nos artículos 129.2 y 130.1 de la Constitución.

Artículu 51 El Principáu d’Asturies tendrá’l tratamientu fiscal que la llei afite pal Estáu.

Artículu 51.bis. Correspuende al Principáu d’Asturies el cuidáu financieru de les Corporaciones Llocales ensin perxuiciu de l’autonomía que-yos da l’artículu 140 de la Constitución y dientro de lo que s’inxer nos artículos 142 y 149.1.18ª de la mesma.

TÍTULU V DEL CONTROL SOBRE L’ACTIVIDÁ DE LOS MUÉRGANOS DEL PRINCIPÁU

Artículu 52 Les Lleis del Principáu someteránse namái al control de constitucionalidá qu’exerce’l Tribunal Constitucional.

Artículu 53 Desaniciáu.

Artículu 54 Los actos y disposiciones de l’Alministración del Principáu namái se someterán al control de la xurisdicción contencioso-alministrativa.

Artículu 55 1. El control económicu y presupuestariu del Principáu exerceráse pola Sindicatura de Cuentes del Principáu, ensin perxuiciu de les funciones del Tribunal de Cuentes del Reinu. 2. L’informe de la Sindicatura de Cuentes del Principáu unviaráse a la Xunta Xeneral pa la so tramitación acordies colo que prevea’l Reglamentu de la Cámara.

TÍTULU VI DE LA IGUA DEL ESTATUTU

Artículu 56 La igua d’esti Estatutu fadráse asina: 1. Correspuende aniciala a un cuartu de los miembros de la Xunta Xeneral, a dos tercios de los conceyos asturianos o al Conseyu de Gobiernu, asina como al Gobiernu y a les Cortes Xenerales del Estáu. 2. El proyectu d’igua aprobarálu la Xunta Xeneral del Principáu per mayoría de tres quintos de los sos miembros, y someteráse llueu a l’aprobación de les Cortes Xenerales como Llei Orgánica.

Artículu 56.bis. Cuando la reforma d’esti Estatutu namái tenga por oxetu l’ampliación de competencies en materies que nun tean constitucionalmente reservaes al Estáu, la iniciativa sedrá la que s’afita nel artículu anterior, y el proyectu de reforma tendrá que s’aprobar per mayoría absoluta de los miembros de la Xunta Xeneral, enantes de la so posterior aprobación poles Cortes Xenerales como Llei Orgánica.

DISPOSICIÓN AMESTADA

1. Cédese a la Comunidá Autónoma del Principáu d’Asturies, el rindimientu de los tributos que siguen darréu: a) Impuestu sobre la Renta de les Persones Físiques, con calter parcial, cola llende del 33 por 100. b) Impuestu sobre’l Patrimoniu. c) Impuestu sobre Socesiones y Donaciones. d) Impuestu sobre Tresmisiones Patrimoniales y Actos Xurídicos Documentaos. e) Tributos sobre’l Xuegu. f) Impuestu sobre’l Valor Añadíu, con calter parcial, cola llende nel 35 por 100. g) Impuestu Especial sobre la Cerveza, con calter parcial, cola llende nel 40 por 100. h) Impuestu Especial sobre’l Vinu y Bebíes Formentaes, con calter parcial, cola llende nel 40 por 100. i) Impuestu Especial sobre Productos Intermedios, con calter parcial, cola llende nel 40 por 100. j) Impuestu sobre l’Alcohol y Bebíes Derivaes, con calter parcial, cola llende nel 40 por 100.

k) Impuestu Especial sobre Hidrocarburos, con calter parcial, cola llende nel 40 por 100.
l) Impuestu Especial sobre Llabores del Tabacu, con calter parcial, cola llende nel 40 por 100.
m) Impuestu Especial sobre la Electricidá 
n) Impuestu Especial sobre determinaos Medios de Tresporte.
ñ) Impuestu sobre les Ventes Minoristes de determinaos Hidrocarburos.

L’eventual desaniciu y cambéu pol Estáu de dalguna de les contribuciones enantes mentaes llevará darréu’l desaniciu y cambéu de la cesión. 2. El conteníu d’esta disposición podrá camudase per acuerdu del Gobiernu cola Comunidá Autónoma, tramitándolo’l Gobiernu como proyectu de llei ordinaria. 3. El llargor y condiciones de la cesión fadránse pola Comisión Mista a que se refier la disposición transitoria cuarta, según los criterios afitaos nel artículu 10.4 de la Llei Orgánica 8/1980, de 22 de setiembre, de Financiación de les Comunidaes Autónomes. El Gobiernu tramitará l’acuerdu de la Comisión como proyectu de llei dientro los seis meses acabante constituise la primer Xunta Xeneral del Principáu.

DISPOSICIONES TRANSITORIES

Primera Desaniciada.

Segunda. Desaniciada.

Tercera Desaniciada.

Cuarta El trespasu de los servicios inxeríos nes competencies que según esti Estatutu correspuenden al Principáu, fadránse acordies coles bases que siguen darréu: l. A más tardar dientro un mes dende que’l Presidente fora nomáu pol Rei, nomaránse los vocales d’una Comisión Mista con encargu d’inventariar los bienes y derechos del Estáu que deban trespasase al Principáu, d’iguar los servicios y funcionarios que deban trespasase y entamar l’adaptación, si fai falta, de los que pasen a la competencia del Principáu. 2. La Comisión Mista fáenla, a la par, vocales escoyíos pol Gobiernu de la Nación y pol Conseyu de Gobiernu y ellaborará ella mesma les normes del so funcionamientu. Los acuerdos de la Comisión Mista tomarán la forma de propuesta al Gobiernu de la Nación, que los aprobará per decretu, conseñando aquéllos como amestaos al mesmu y asoleyaránse al empar nel Boletín Oficial del Estáu y nel Boletín Oficial del Principáu d’Asturies, teniendo puxu acabante asoleyase. 3. La Comisión Mista fadrá los calendarios y plazos pal trespasu de caún de los servicios. En tou casu, dicha Xunta dexará afitao nun plazu de dos años, dende que la fixeren, al términu en qu’habrán acabase tolos trespasos de servicios que correspuende al Principáu, según esti Estatutu. 4. Pa iguar los trespasos y pa verificalos per bloques orgánicos de naturaleza homoxénea, a la Comisión Mista de tresferencies ayudaránla xuntes sectoriales d’ámbitu nacional, agrupaes per materies, y con enfotu fondu d’iguar colos representantes de l’Alministración del Estáu los trespasos de medios personales, financieros y materia­les que deba recibir la Comunidá Autónoma. Les Xuntes sectoriales treslladarán les sos propuestes acordies cola Comisión Mista, que les fadrá perafitará. 5. Será títulu abondo pa escribir nel Rexistru de la Propiedá del tres­pasu de bienes inmuebles del Estáu al Principáu, la certificación pola Comisión Mista de los acuerdos gubernamentales promulgaos de mou afayadizu. Esta certificación deberá inxerir los requisitos esixíos pola Llei Hipotecaria. El cambéu de titularidá nos contratos d’arriendu de llocales pa oficines públiques de los servicios que se tresfieran nun da derechu al arrendador a desaniciar o renovar el contratu. 6. El Principáu asumirá con carácter definitivu y automáticu y ensin solución de continuidá, los servicios que se trespasaran al Conseyu Rexonal d’Asturies. Nes competencies pa les que’l tres­pasu tuviera en cursu d’execución siguirá tramitándose según s’afite nel correspondiente decretu de trespasu. Lo mesmo nun casu como n’otru les tresferencies feches adaptaránse, si fai falta, a lo que se diz nesti Estatutu. 7. Desaniciáu. Quinta Mentanto nun se dean les disposiciones que dexen la financiación de los servicios tresferíos correspondientes a competencies propies del Principáu, l’Estáu contribuirá al so caltenimientu partiendo d’una cantidá igual al coste efectivu del serviciu nel momentu de la tresferencia, poniéndola al día acordies coles circunstancies. Pa dar seguranza d’esta financiación, la Comisión Mista fecha al empar pol Estáu y el Principáu afitará en cada momentu’l so algame.

Sesta Respetaránse tolos derechos algamaos de toa triba y naturaleza que nos momentos de les diferentes tresferencies tengan los funcionarios y personal inxeríos nos servicios estatales o nos d’otres instituciones públiques oxetu de les mentaes tresferencies.

Séptima Mentanto nun se promulgue la llexislación del Estáu a que se refier l’artículu 19.1 d’esti Estatutu, el Principáu d’Asturies propondrá d’ente les persones perafayadices pal cargu, trés de los miembros de caún de los Conseyos d’Alministración de la Empresa Públixa ‘Hunosa’. Esta propuesta formularála la Xunta Xeneral del Principáu dientro los trenta díes acabante facese. Caún de los miembros d’ésta podrá votar non más de dos candidatos propuestos. Octava Desaniciada.

Novena Desaniciada.