Eliot Indian Bible (1663)/Genesis

by John Eliot

Eliot Indian Bible (1663) by John Eliot Genesis

Exodus→

NEGONNE OOSUKKUHWHONK MOSES,

Ne asoweetamuk

GENESIS.

CHAP. I.

a Psal. 33. 6.
& 136. 5.
Act. 14. 15.
& 17. 24.
Hebr. 11. 3.

b 2 Cor. 4. 6.WEske kutchissik a ayum God Kesuk kah Ohke.
² Kah Ohke mô matta kuhkenauunneunkquttinnꝏ kah monteagunninno, kah pohkenum woskeche mꝏnôi, kah Nashauanit popomshau woskeche nippekontu.
³ Onk nꝏwau God b wequaiaj, káh mô wequái.
⁴ Kah wunnaumun God wequai ne en wunnegen: Kah wutchadchaúbe-ponumun God noeu wequai kah noeu pohkenum.
⁵ Kah wutussowétamun God wequai Kesukod, kah pohkenum wutussoweetamun Nukon: kah mô wunnonkꝏꝏk kah mo mohtompog negonne kesuk.
c Psal. 136. 5.
Jer. 10. 12.
& 51. 15.⁶ Kah nꝏwau God c sepakehtamꝏudj nôeu nippekontu, kah chadchapemꝏudj nashauweit nippe wutch nippekontu.
⁷ Kah ayimup God sepakehtamóonk, kah wutchadchabeponumunnap nashàueu nippe agwu, uttiyeu agwu sepakehtamóonk, kah nashaueu nippekontu uttiyeu ongkouwe sepakehtamóonk, kah mônkô n nih.
d Jer. 51. 15.⁸ Kah wuttissoweétamun God d sèpakehtamóonk Kesukquash, kah mô wunnonkꝏꝏk, kah mô mohtompog nahohtôeu kesukok.
e Psal. 33. 7.
& 136. 5.
Job 38. 8.⁹ Kah nꝏwau God moémꝏidj e nippe ut agwu kesukquash kah pasukqunnu, kah pahkemoidj nanabpeu, kah mônkô n nih.
¹⁰ Kah wuttissoweétamun God nanabpi ohke, kah môeémꝏ nippe wuttissowetamun Kehtoh, & wunnaumun God ne en wunnegen.
¹¹ Kah nꝏwau God dtanuékej ohke moskeht, moskeht skannémunúꝏk skannémunash, & meechummue mahtugquash meechummúꝏk meechummuonk nish noh pasuk neane wuttinnussuonk, ubbùhkumminùꝏk et woskeche ohke, kah mônkô n nih.
¹² Kah ohke dtannegenup mosket, kah mosket skannemennùꝏk skannemunash, nish noh pasuk neane wuttinnussuonk, kah mahtug meechummùꝏk, ubbuhkumminnꝏꝏk wuhhogkut nish noh pasuk neane wuttinnussuonk, kah wunnaumun God ne en wunnegen.
¹³ Kah mo wunnonkꝏꝏk, kah mo mohtompog shwekesukod.
f Deut. 4. 19.
Psal. 136. 7.¹⁴ Kah nꝏwau God, f Wequanantéginùohettich ut wussepakehtamꝏonganit kesukquash, & pohshehettich ut nashauwe kesukod, kah ut nashauwe nukkonut, kah kukkineasuonganúhhettich, kah uttꝏcheyeùhettich, kah kesukodtuꝏwuhhettich, kah kodtummꝏowuhhettich.
¹⁵ Kah n nag wequanantéganuóhettich ut sépakehtamꝏwonganit wequasumóhettich ohke, onk mô n nih.
¹⁶ Kah ayum God neesunash missiyeuash wequanantéganash, wequananteg móhsag nanánumꝏmꝏ kesukod, wequananteg peasik nananumꝏmꝏ nukon, kah anogqsog.
¹⁷ Kah uppónuh God wussepakehtamꝏonganit kesukquash, woh wequohsumwog ohke.
g Jer. 31. 35.¹⁸ Onk woh g wunnananumunneau kesukod kah nákon, kah pohshémꝏ nashaueu wequai, kah nashaueu pohkénum, kah wunnaumun God ne en wunnegen.
¹⁹ Kah mô wunnonkꝏꝏk ok kah mo mohtompog yaou quinukok.
²⁰ Kah nꝏwau God, mꝏnahettich nippekóntu pomómutcheg pomantamwae, kah puppinshaúussog pumunahettich ongkouwe ohket woskeche wussépahkehtamꝏonganit kesukquash.
²¹ Kah kezheau God matikkenunutcheh Pꝏtâopoh, kah nish noh pomantamoe óâas noh pompâmayit uttiyeug mꝏnacheg nippekontu, nish noh pasuk neane wuttinnussuonk, kah nish noh ꝏnuppohwhunin puppinshaash, nish noh pasuk neane wuttinnussuonk, kah wunnaumun God ne en wunnegen.
h Gen. 8. 17.
& 9. 1.²² Kah ꝏnanumoh nahhog God nꝏwau, Mshéneetuónittegk, h kah muttaanꝏk, kah numwapegk nippe ut kehtohhannit, kah puppin shasog muttâanhettich ohket.
²³ Kah mo wunonkꝏꝏk kah mo mohtompog napanna audtahshikquinukok.
²⁴ Kah nꝏwau God, Pasꝏwaheonch ohke oâas pomantamwaeu, nish noh pasuk neane wuttinnussin, neetassuog, pamayécheg kah puppinashimwog ohkekontu, nish noh pasuk neane wuttinnussin kah monko n nih.
²⁵ Kah áoùau God puppinnàshimwoh ohkekontu neane wuttinnussuonganꝏ, kah neetasu neane wuttinuussuonganꝏ, kah nish noh paumayit woskeche ohkekontu neane wuttinnussuonganꝏ, kah wunnaumun God ne en wunnegen.
i Gen. 5. 1.
& 9. 6.
1 Cor. 11. 7.
Eph. 4. 24.
Col. 3. 10.²⁶ Kah nꝏwau God, ayéuontuh i wosketomp neanséog & kutogqunneunkqussuonkanunnónut, kah nanawunonch namehsog kehtohhannet kah puppinshaussog kesukqut, kah puppinashimwussog, kah wame ohke, kah nish noh óáas pomompagit woskeche ohket.
k Matt. 19. 4.²⁷ Kah kézheau God woskeetompuh ut nehenwonche wuttinnussuonganit, wuttinnussuonganit God wuttinne kezheuh nahoh, k wosketomp kah mittamwossis ukkezheuh nàhog.
²⁸ Onk ꝏnanumuh nahog God, kah wuttinuh nahog God, Mshéneetuonitteg, monagk, kah muttaanꝏgk ohke, kah mꝏsteoꝏgk, kah nanaaunꝏk namohsog kehtohhannit kah puppinshaussog mamahchekesukqut, kah wam puppinashimwussog paumayitcheg et woskeche ohket.
²⁹ Kah nꝏwau God, Kusseh kittinnummaunumwꝏ nish noh mosket skannemunnuꝏk skannemunash uttiyeu woskeche wame ohket, kah nish noh matug dtannegkuk l Gen. 2. 9. meechum úbbuhkuminꝏꝏk ubbuhkuminash, woh kummeechumwꝏ.
³⁰ Onk wame puppinnashimwog ohkekontu, kah wame puppinshaas mamahchekesukqut, kah nish noh uppumompagen pomantog ohket woh meechwog nish noh oshquashqui moskeht, kah mônkô n nih.
³¹ Kah wunnaumun God nish noh teaug mahche kezteunk, kah kusseh mo ahche wunnegen, kah mo wanonkꝏꝏk & mo mohtompog nequtta audtashikquinukok.

CHAP. II.

YEu ne kesteounah kesukquash kah ohke, kah wame ne adtahsehettit.
a Exod. 20. 11.
& 31. 17.
Deut. 5. 14.
Heb. 4. 4.² Kah a nesausuk audtashikquinukok pakodjteau God wutanakausuonk ne ayik, kah anwôsin nesausuk audtashikquinukok, wutch wame wutanakausuwònganit ne kesteunk.
³ Kah God onanetam nesausuk audtashikquinukok kah ꝏtꝏwóntamun: newutch neit anwosin wutch wame watunakausuwonganit, ne God kesteunkupa kah ayikup.
⁴ Yeush wntontseongash kesukquash kâh ohke, nag kesteomuk: ne kesukok Jehovah Manit kesteunk ohke kah kesukquash.
⁵ Kah nish noh ohketeámuk ut ohteakonit negonne asquam ahkénug; kah nish noh mosket ut ohteakonit ásq neekinninꝏg: newutche Jehovah Manit asq sokanonukkontamꝏg ohke, kah matta mo wosketompáino woh wánteunk ohke.
⁶ Qut ouwan waápu wutch ohkekontu, kah wutadtipp dto wame woskeche ohkeit.
b 1 Cor. 15. 47.
c 1 Cor. 15. 45.⁷ Kah Jehovah Manit kenaiheau wosketompuh wutch b nunnobúhteaóuut, kah uppꝏtâmou ut wutchánut pomantamóe nasháuonk, kah wosketomp mo pomantamwáe c keteahogkôunnu.
⁸ Kah Jehovah Manit ohkehteau tanohketeaónk ut Eden wutchepwâou: kah ne upponun wosketompuh neh kahkenáiheaumpoh.
⁹ Kah Jehovah Manit wunnéketeauun wutch ohkekontu nish noh mahtug ne wanompámukquok, kah wunnegen meechinat: kah mahtug pomantamôe ut nôeu adtanohketeámuk, kah mahtug nashpe woh wahteómuk wanegik kah machuk.
¹⁰ Kah seip wutchishau Eden wadtattippattunk tanohketeaonk, kah na wutch pohpohchohshau yauóntupái.
¹¹ Neg nohtag hettamun Pison, ne quanunishunk wame ohkeit Havilah, na ohtag gold.
¹² Kah ne ohkit wunnegen, ne ohteau Bdellium kah Onyx qussuk.
¹³ Onk nahohtôe seip ussowétamun Gihon ne quanupishunk wame ohke Kush.
¹⁴ Nashwinnúꝏk seip hettamun Hiddekel, ne aushunk wutchepwáou Assyria, kah yanunnúꝏk seip Euphrates.
¹⁵ Onk Jehovah Manit neemunau Adam, kah upponuh tanohketeonganit Eden, ꝏnteaúunat, kah wunnânauwéhteauunat.
¹⁶ Kah Jehovah Manit unnanꝏnau wosketompuh, nꝏwau, Nish noh mahtug yeu tanohketeaonganit, woh meechꝏan kummeechin.
¹⁷ Qut ne mahtug nashpe woh wahteómuk wanégik kah machuk, matta woh kummeechꝏun, newutche ne kesukok meechꝏan nuppꝏe pish kenup.
¹⁸ Onk Jehovah Manit nꝏwau, Matta wunnegenninno wosketomp wunnonshin, nutayimau aninnohsúaènuh nagum ut anaquabit.
¹⁹ Onk wutche ohkekontu Jehovah Manit kenáiheau nish noh pasuk puppinashimwoh ut ohteakonit, kah nish noh puppinsháus mamahchekesukqut, kah nag uppaudtaóunuh Adam, kodnaum uttôh ahunont, kah Adam uttoh anont nish noh ôâas uppomantamun, ne wuttissowésin.