El stomegh di padron de cà
Ambrogio Alberti (XIX sec.)
El stomegh di padron de cà
Quanti bej cà se fabbrica in Milan!
Vègnen su comè i fonsc, sarav per dì!
In loeugh de vun, se ved trii, quatter pian!
Quij brutt casasc van tucc a scomparì.
N'han però mai assee de scompartì
in bus, busitt, che, asca a vess malsan,
riven, in fin di facc, a fà capì
che g'han di idej ben piccol i nostran.
Ma, el sarà almanca in proporzion el ficc!
E i stanzett omeopatich costaran
men de quij generos di noster vicc?
No!... On'altra proporzion besogna fà!
Quanto pù cress i stanz, tanto pù 'l cress
el pel sul stomegh di padron de cà.