El regista

From Wikisource
Jump to navigation Jump to search

El regista[edit]

On rondenin, nassùu de dùu o trii dì,
guardand foeura del nîd, l’è restaa lì
in del vedè el sô, on bell sô de magg,
a fà sberlusì el mâr cont i sò ragg.
El rondenin l’ha tiraa sù ’l crappin
maravigliaa: de bass gh’era on giardin
tutt pien de roeus, de fiôr d’ogni colôr,
insomma, depertutt l’era on splendôr
quella mattina, e on ciêl strasordinari
el faséva al spettacol de scenàri. –
«Oh, mamma, che bellezza!... – el s’è voltaa
a diggh el rondenin, tutt incantaa –.
Guarda chì, guarda là, oh che bellee!...»
«On moment, on moment – l’ha fermaa lee ;
fà nò l’impazïent; l’è n’anmò ôra,
te vedet nò el Battista ch’el lavôra?...»
E l’ha fa sègn a on omm che col fregôn
l’era adree a lustrà i lanz de lottôn
del restel del giardin. – Quand l’ha guardaa,
el rondenin, curiôs, l’ha domandaa:
«Ma in fin di cunt, chi l’è sto sùr Battista?...»
La gh’ha rispost la mamma: «L’è el Regista!»