El pajsan stemegnon
Ferdinando Fontana (1850-1901)
El pajsan stemegnon
Per vorè tropp guadagnà su on cappon,
a on pajsan stemegnon
el ghè restaa in del gœubb, e dal mercaa
el tornava a cà soa tutt smorfïaa,
quand l'ha incontraa on birbon
ch'el gà ditt: "Ven cont mi dal spezïee,
che ghè lì sul canton,
e mi tel faroo vend!... Te vedaree!..."
E el pajsan figurass se el ghè andaa adree!
Rivaa in la farmacia, el nost birbon
el va a parlaggh in l'oreggia al padron,
e pœu el se volta dal pajsan per dì:
"Affare faa!... El cappon démmel a mi!"
E, brancada la bestia,
el ghe ne dà ona fetta.
El pajnagh el se setta
specciand i sò danee;
ma, dopo on poo, el speziee
el le menna cont lu in d'ona stanzetta
dedree al banch; e, tutt seri,
el ghe presenta, preparaa, on clisteri,
disendegh: "Hin duu liter, minga men...
Vedarii, dopo, come starii ben!"
"Ma che clisteri!... Vœuri i mè danee!
I danee del cappon!.." l'alter el sbraggia.
"Ma che danee!.." el ribatt el spezïee,
"Cont quell scior, che cont vu l'è vegnuu dent,
serom intes, in modo positiv,
de pagavv el cappon
cont on bon lavativ!2
Allora s'è capii, naturalment,
cossa l'era el misteri!...
Ma el Stemegnon, pur de no perd tuscoss
in causa del baloss,
l'ha propost de tœu sù anca el clistéri
se el costava nagott!... E el spezïee,
che l'avariss dovuu trall via l'istess,
el gà refilaa in corp tutt el mestee,
disend: "Bravo! inscì, adess,
tornarii dal mercaa
minga ona volta, ma dò volt sgonfiaa!"