El mè ritratt moral
Jump to navigation
Jump to search
Gaitan Cresp Legorin (1852-1913)
El mè ritratt moral
Mincion de cred che al mond hin tutt onest;
amis de tucc e amis in la disgrazia,
guaj che mi en toeuja a quell che per dann a quest;
domandi anca el fatt mè cont bonna grazia!
Tegni, cont el tasè, la lengua in senst:
foo minga cas se vun no 'l me ringrazia,
ma, se, in sbali, m'en dan de pu, doo el rest!
No careghi la panscia quand l'è sazia!
Polìtega en foo nò, tendi a cà mia;
l'imbroj, sott al mè tecc, no el ten la banca;
ciappi tuttcoss con grand filosofia;
me pias la veritaa e la disi franca;
e col fà minga rosc con chissessia
mi sont, come se dis, bandera bianca!