El mè mes
Azaria Molina (1838-1907)
El mè mes
Quand ven el mes de magg
e cascia la verdura,
e el sô, cont i sò ragg,
l'indora la natura;
mì senti dent de mì
on certo nonsoché
che cerca famm capì
che 'l mes de magg l'è 'l mè!
E mì, con tant quant fiaa
g'hoo in corp, prœucvi a cantà...
ma no me riess de fà
che ih-ah! ih-ah!
Quand vedi, a rosc, rivà
quei cari rondinell,
e i senti a cipilà
in tra de lor bell bell;
me par squas de sentì
anmò quell nonsoché
che vœur damm de capì
che 'l mes de magg l'è 'l mè!
Alora ciapi fiaa...
e prœuvi a cipilà!
Ma no me riess de fà
che ih-ah! ih-ah! ih-ah!
Quand, pœu, senti a cantà
e merli e rossignœu
voland de chì e de là,
o fermi sui broccœu,
me senti vegnì adoss
anmò quell nonsoché
che 'l mes de magg l'è 'l mè!
E mì, con tutt el fiaa
i tenti de imità...
ma no me riess de fà
che ih-ah! ih-ah! ih-ah!
Se 'l mes de magg l'è 'l mè,
ognun pò ben capì
el geni che pò avè
on poetta come mì!
Che g'hoo tanto coragg
de scriv 'sti canzonett,
ris'ciand famm mett el sbagg
de l'asen pu perfett...
perchè son tant sfaciaa
de mettem a cantà...
savend che no soo fà
che: ih-ah! ih-ah! ih-ah!