El Petrarca
Gioann Ventura (1801-1869)
El Petrarca
Mì con madonna Laura ghe l'hoo su,
perchè me par, dai vers del sò pöetta
che 'l fuss inamoraa lù de per lù,
e lee no la fudess che ona scumetta.
Me par che ghe piasess a tegnill su
per avègh, dent per dent, la canzonetta,
o 'l sonett in onor di sò virtù
e de la soa bellezza arziperfetta.
L'è vera che, anca lù, el fava i fatt sœu,
segond ne disen i epitafi e i crònegh,
come tanti moros del dì d'incœu;
chè, predicand el bell'amor platònegh,
l'era papà in secrett de duu fiœu...
ma lù, a la fin di fatt, l'era on canònegh!