Edeilom: Söl D. Francisco Calvo e Garrido
In dels lätik äyela, ven äpenobs blufanümi Gaseda plo 1888, fezogöl jüs gased ävedom-la labi soga obsik, mekön lobi flena löfik obsa plo nenited givik oma, ädledobs levemo, ed esagobs atosi kamadeles anik, das laltüg keli ätikobs penön in dät at, äbinom-la deilalaltüg.
Efe, no elabobs ti timi al pladön in nams pübela de Volapük penodi in kel sog Ateneo Caracense e Centro Volapükista Español ädanob detlidi givik pemeköl gönü sog de gased peipüböl fa man at du yels tel, pelöl togo pübami Glamata e tanadi balid Vödasbuka, äs ätikom pelön telidi. Lepöfüdi nonik elabom de vobads at.
Lepöfüdi vemo smalik ulabom, if elabom bosi, de vobads mödik pakama katolik pebüköl fa om. Lab e lif valik oma, pedelidoms in ats, äs äsagobs söle Schleyer, dels anik büfü deil.
Atos mekos lobi klerela at vobik, pakamel nefenik volapüka; in dom oma äkokömoms volapükels madridik e pämekoms tidüpis e pükatis; valikos kelosi älabom ädunom pakami. Kludo, at epölüdom in Spän yüfi bal fümikünas, e volapükels opidobs teliko fleni e koblodi.
Pimotom in Taracema, pag lä Guadalajara; älödom sis yels anik in Madrid, äsufom sis tim lonedik maladipi lejeköfik, e ven äbinom nu yunel, bäledik de yels 42, in neit de lulid balula, elogobs omi deilöl in deil molikün e takedikün.
Begobs Gode lasumön lani oma givik in sül, e sagobs famüle oma noelami lieda keli obs valik dilidobs.
Se Volapük: Gased bevünetik tedelik, nolik, literatik e gälodik 1888, Nüm: 1, Pads: 1-2.