Donuk bakış

Todur Zanet
Donuk bakış

Atıştırardı...
Salt bir Allah bilärdi
Sevdaylan ne oldu.
Onnar ayırılıp,
Adım - adım yollandılar
İki da tarafa
Göktänsa kaar
Atıştırardı.

May iztemäz lüzgär esärdi
Er üzündä
Kaarı o saurardı,
Silip bu izleri
Ölä da birisi
Hiç baarmadı:
Dönsänä sän geeri...

Salt göklerdän
Donuk bakışlar
Yıldızlar bakardı

Aydınnıklan karanlık
İçerlerdä koolaşer
Canımdan bülbül artık
Yıldızlara kapuşer.

Simanın kımıldası
Bakışı esir aler
Solumak esintisi
Heptän akıldan bozer

Kendi elinnän sän kırdın
Onu ne vardı.
Da sora bekledin yardım
Kimdän hem näändaan?