Divina Commedia (Kanit Balid)

From Wikisource
Jump to navigation Jump to search
LA DIVINA COMMEDIA
fa Dante Alighieri
Höl


KANIT BALID


Du äbinob in laf lifavega
ätuvobok inü lefot dagik,
bi ya vegi stedik ipölüdob.
Ag! liedik binos vo bepenön
foti at foetik, lesolüdik
kel denuom obe in tik dledi.
Biedikum binon töbo Deil!
Ab, al sagön beni us petuvöl,
dö dins us pelogöl nu osagob.
No vo nolob liko inigolob,
bi äbinob slipafulik somo
das älüvob vegi levelatik.
Ab, nag erivön smabela futi,
us kö älabom fini nebel et
kel ipedom dledo ladi oba,
logedöl äl l"p, älogob jotis
bela pelitöl fa stals planeta
kel valikis dugom da veg alik.
Tän äbinom stilik boso ledled
kel idulom in lak lada obik
du neit so tomo pedugolöl.
E äs ut kel ko natem sänämik
esegolöl se mel, su jol flekom
oki äl vat jekik e logedom;
so lan oba, fugöl nog demü dled,
äflekomok al logedön vegi
da kel liföl nonik äsegolom.


Roma (Täl).



Se Volapükabled Tälik 1888, Nüm: 11, Pad: 87.
Petradutöl fa jiel Maria Cattabeni.