Dan Kihote
Chapta I: We diil wid di kiarakta ah parangglz a di fiemos jengklman Dan Kihote de la Mancha[edit]
Ina wah vilij a La Mancha, di niem we mi no ab no dizaya fi kaal tu main, wan a demde jengklman lib de no tuu lang sens we kip lans ina di lans-rak, wah uol bokla, wah liin ak, ah wah grie'oun fi kuosin. Wah oya a reda muo biif dah motn, salad pah muos nait, krapsiz pah Satidedie, lentl Fraidedie ah pijin ar so exchra Sondedie, tek we chrii-kwaata a ih ingkom. Di res a it pen pah doblit a fain klaat ah velvit brichiz ah shuuz fi mach fi alidie, wails pah wiik-die ih kot a niangga figa ina ih bes aznaboerg. Ih eh-ab a ih yaad wah ouskipa uoba faati, wah niis anda tuenti, ah wah bwai fi sen go a grong ah maakit, uu yuus fi saglup di ak azwel anggl di bil. Di iej a dis fiwi sed jengklman ena-baada pah fifti; ih eh-kip soun abit, ih maaga, wid fies jraadong, ih gitop suun-suun a maanin ah ena griet spuotsman. Deh wi abi se ih soerniem ena Kihaada ar Kesaada (far yaso a soh difrans a opinian mongx di aatadem uu rait pah di sobjek), alduo frah riiznebl kanjekcha isiim plien se ih kaal Kehana. Dis, ousomeba, no so impuotant fi fiwi tuori; iwi sofishant anof no fi strie wan ier bret frah di chuut ina di telin a it.