Düa Kewraêni
Na pele de terefê Memê Jêle ra yew duay kewrayêni ameya nuştene.
Memê Jêle
[edit]İtıqatê qomê ma de sunetkerdena domonu rê vanê "kewraêni". Roza kewraêni de wairê domonu ’ve kewraê domonu ra iqrar danê zumıni. Na iqrari gere riyê dina de coru zumıni ca meverdê, zumıni rê xainiye mekerê. Vanê ke, ao ke iqrarê horê xainiye bıkero, itıqatê made derdê deyrê derman çino.
Düa
[edit]Hala hala, hala hala, hala hala
Mınete qomi ra himet Oli ra
Xızır perru rake na domonu sera
Comerd ma morım meke sıtara xora
Wayir ma isla mekero pê derd u bela
Na torê no ro İvraim Pêxamberi
Ma rê kerdo mıqerem pir u rayveri
Coru sıst mekerê bendê iqrari
İqrari ra dot dina bena ve tari
İqrari rê hurmet iqrarirê sedaqet
Hirê Se u Şêşt u Ses Pêxamberu rê selawat.
Ma verê ho çarna ’ra Oli Diwa
Eve zerrevêsaiye Diwa ro veng da
Çewres Osporê Qelxeru vengê ma hesna
Sıkır ma rê na az bırna ra rusna
İqrari rê hurmet iqrari rê sedaqet
Çewres Osporê Qelxeru rê selawat
Diwa ra ma rê amê sawda Ramani
Vake heq bızonê der u cirani
Heqi ra avê yena heqa cirani
Eve tada medaznê cande u cani
Candey rê meremet cani rê sedaqet
Pêdakerdoğê cande u cihani rê selawat
Wayiri pêdakerdo cihan adır ra
Can do cı uwe ra cemal ki hora
Mezgê isoni dera kıramete u bera
Her cani rê ferzo iqrar u kêwra
İqrari rê hurmet iqrari rê sedaqet
Des u Dıinê u Uşênir rê salawat
Qılauzê Wayiri Morê Sur u Şiai
Xızıro Khal Saê Ko u Deryai
Des u Dı Uzaği mekan u ewliyai
Emegê na qomi meberê zai
İqrari rê hurmet iqrari rê sedaqet
Wayirê Mekan u Hewsu rê selawat
İqrarê tolıvi ame Khalmemê Sıri
Mekanê piri da ve Khuresê Khuri
Destê serê deşti da Bava Mansuri
Wayiri hazıru ra mekuyê duri
İqrari rê hurmet iqrari rê sedaqet
Khalmemi rê Khureşi rê Mansuri rê Selawat
Oli hard u Osmen kerdo ve sama
Qomê ma pê na sama biyo sa
Ma xonça iqrari arda na meyda
Pêxamber u ewliyay bêrê hewarê ma
İqrari rê hurmet iqrari rê sedaqet
Wayirê Hard u Osmeni Oli rê selawat
Mansur ustra verva Khureşi şi
Nia da ke bımbarek nişto ’ro heşi
Mansuri veng kerd ’ro vıraste dêşi
Dês bi ’ra rast şi verva Khureşi
Tolıvêni rê hurmet iqrari rê hurmet
Rayveri rê piri rê mısuri rê selawat
Vengê piri rozşiwar de reseno Şêvazi
Gulvang cêr erzeno kaleka Meraşi
Xam nêcêno hardê Meladia Xarpêti
Çewlig Vorto Gola Xamırpêti
Erzıngan Erzurum u Bağıre de kırameti
Kırameta Jiar u Dewresu rê selawat
Wayirê bereketi Xaskare Buyere u Jêle
Cırê mınete bıkerê qomi rê bıwazê xêre
Welatê Dêrsımi de serberê seri
Sultan Bava Muzır u Duzgınê Kemeri
Teviat u cani candi rê hurmet
Jiarunê welati u Duzgıni rê selawat
Coru medaznê teviat u cani, bêrê comerdiye hews u mekani.
Heq bızonê der u cirani. Sımarê perjê vê niaz u qırvani.
Fek mara nefes Wayirê Dina u hews u mekanu ra, hala hala, hala. hala.