Dö vindit
VINDIT binom bid cöda foetik, keli, a segun nat menik glofom alos, lon sötom sevulön; bi tefü negit balid, at te nofom loni, ab vinditön negiti at säcälos loni.
Fe, dub vindit men te leigom neflene oka, ab dub lületam lovom omi, bi fögivön lepötos pline. E Solomon, fösefob obi, sagom: "Binos glol mena lületön negiti."
Dins etimik efegoloms e no kanon gevokön omis, e sapels jäfoms säto dinis nuik e füdik; kludo ats te tölatoms okis vanotiko kels voboms tefü dins efegolöl.
Nek sibinom kel dunom negiti demü negit it, ab al lemön däs pöfüdi, u plidi, u stimi, u sümikosi. Kludo, kikod ozunob tefü men bi löfom oki umo ka obi? Ed if men sembal odunom negiti te kodü meug badik, efe, binos deno te äs spinabujad u stigabujad, kels spinoms e kratoms bi no kanoms dunön votiko.
Bid lületikün vindita tefom negits at, kelis lon nonik sibinöl odeyufom; ab men kautomöd täno, das vindit binom somik das lon nonik sibinom al pönön dös, voto neflen mena stadom nog fö, e sibinos tel pla bal.
Anikans, ven duinoms vinditi, desidoms das pösod tefik onolom kiopa at kömom. Atos binos nobälikum, bi jinos das plid at jenom luumo kodü duinön negiti it ka kodü mütön pösodi pönitön; ab temipäbs badik e käfik sümoms sagite kel flitom in daeg.
Kosmos, dük zifa Firenze, egebom pükedi devik ta flens tlätik u luletik, äsif negits at äbinoms nefögivik. "Kanon lilädön," sagom, "das pabüdobs fögivön neflenis obsik, ab lilädon nevelo das pabüdobs fögivön flenis obsik." Ab tikäl ela Job äbinom deno benotonikum. "Li sötobs," sagom, "lasumön gudikosi de nams Goda, e no kotenön i lasumön badikosi?" E leigo dö flens, dinamafo.
Atos binos zelädik, das men kel studom dö vindit plesefom vunis okik lüedik, kels päsanomsöv ed äplöbomsöv voto.
Mödiküno, vindits publügik plöboms läbiko; äs at kodü deil de Cæsar, kodü deil de Pertinax, kodü deil de Henry el kilid Fransäna, e votiks mödik. Ab tefü vindits plivadik no jenos somo; tadilo, pösods vinditik lifoms ofenumo lifi jidevelas, kels, äsliko binoms badugik so vedoms fino neläbik.
Se Kosmopolan 1893, Nüm: 10, Pad: 132.