Dö tum Eiffel
Tüm Eiffel, makab Setopama parisik de 1889, labom nu güli de mets 260 e orivom suno uti de mets 300, segun ployeg lautela okik.
Gaseds vola lölik epüboms laltügis tefü Tüm e bleds maegik mödik ejonoms liladeles okik demagi vobada nügenela flentik. Dido, gian lelik jinom leitik e jönik, e nek, logöl omi äniludomöv väti omik (miglams za 9,000,000).
Pesagos das feilel sembal, kel ivisitom Glezifa[1] du dels anik, päsäkom tefü Tüm fa kolödels paga okik sosus igetävom lomo.
Ägesagom: Espatob ofeno in zümöps Setopama, eblüfob dalogön Tümi Eiffel, ab eplöpob nevelo: ekanob logön te skafis!
Vo, bems pekluziföl kels fomoms Tümi sümoms skafemi gianik.
Sevon das Tüm Eiffel stanom su lekölüms klivik fol, kels paköyumoms al fomön stöki balid. (Mets 57,63). In lekölüms lefüdik e vesüdik, slebs stedik sibinoms, laböl vidi de met bal, kels pogeboms al rivön nefikuliko stöki balid, kö, in galif penuföl, visitels okanoms jüitön dalogami de Paris. Zu, säls fol, kels, (alim), okanoms ninön pösodis jultum u mältum, pogeboms as stauds, kaföps u bilöps: balid obinom “bar” nelijik-melopik; telid, bilöp flanänik; kilid, staud rusänik, e folid, staud flentik.
Zenodü stök balid spad vagik sibinom laböl metis kilsevel (37) su flan alik, pezümöl fa bakuns plo spatam. Pösods kels äxänoms ya Tümi sagoms das binos jekik logedön se bakuns at dono.
Bevü stöks balid (Mets 57,63) e telid (115,73), slebs tel pogeboms plo xaned visitelas e slebs tel plo dexäned otas. Su stök telid, spatöp penuföl sibinom i Velul 14id 1888, pötü Zal Natik, filavobad sembal pejutom su stök at kel ya päbumom.
Sis stök telid jü kilid [Mets 273,13], sleb virik laböl geili de mets 160 pogebom te plo dün Tüma; visitels oxänoms me xänönacins. Stök kilid ofomom säli gletik kel olabom metis 18 su flan alik e kel pozümom me glätaplats; se säl at okanom loegön, nen dled vienas e tepas, lenlogi magifik. Suso, loegöps postitoms, e zenodo, slebi virik popladom dugöl al far lektinik [Mets 300]] kel oledalitom vendelo bumotis veütikün de Paris.
Plä slebs dö kels epükob ya, visitels kels no oviloms xänön slepis 1700 okanoms gebön xänönacinis. Bevü glun e stök balid, xänönacin fol [segun sit Roux, Combaluzier e Lepape], osutovoms visitels; cins sümik tel [sit Otis, de New-York] pogeboms al rivön stöki telid e xänönacin bal [sit Edoux] odugom al stök kilid.
Mens länas valik, pavüdöl fa Flentän, pötü Setopam bevünetik, omilagoms bumoti at magifik, pebumom fa Nolav, stimü Mostep e Kapäl menik.
NOETS. (Vükifonät)
- ↑ Jiniko bükapök; pla: Glezifi.
Se Volapük: Gasedil mulik püka bevünetik 1889, Nüm: 11, Pads: 97-98.