Contrizion

From Wikisource
Jump to navigation Jump to search

Speri Della Chiesa Jemoli (1865-1946)

Contrizion

Prima de andà denanz a Belzebù
vuj fa la contrizion de duu peccaa
che me i senti a pesà sul consolaa
e poss minga creppà senza dij su:

el primm l'è d'avenn minga faa de pu,
se quai volta m'è occors de fa del maa;
l'alter l'è d'avè ditt la veritaa:
anben che quest el para ona virtù.

Chè al di d'incoeu del ben se quista nò
se non se và a inchinass de chì e de lì,
dândegh l'incens magàri a di gogò!...

Se poeu ho ditt mal del prossim, ve poss dì
che a dinn el doppi en calariss anmò,
del mal che i alter avran ditt de mi...