Codex diplomaticus Anhaltinus/196

From Wikisource
Jump to navigation Jump to search
<-- 195 Codex diplomaticus Anhaltinus 217 -->

1309. Juli 13. Mühlberg. Markgraf Waldemar von Brandenburg unterwirft sich im Voraus dem von dem  Grafen Albrecht I von Anhalt bezüglich seiner Streitigkeiten mit dem Markgrafen Friedrich von Meissen zu fällenden Oberschiedsrichterspruche.


     Wye Woldemar van der gnaden Godes marcgreve tu Brandemburch, tu Landisberch unde tu Lusiz bekennen in dissem iegenwerdigen brieve, dat wie hebben eyne rechte sune gedan mit unsem lieven vedderen marcgreven Vredericke van Mysne umme alle die twydracht, die wantehertu gewesen heft twischen den vorbenuͤmenden marcgreven Vredericke af eyn sit unde uns unde unsen swager marcgreven Johann af ander sit, aldus bescheydelick. Unse lieve swager greve Albrecht van Anhalt die scal spreken eyn recht twischen hir unde sunte Martyns dage oder in demeselven dage sunte Martyns, die nuͤ tu kuͤmt, twischen deme rechte, dat unse trewe man gesproken hebben her Apeke van Barboy, Bode van Yleburch, Cunrat van Reder, Ludeke van Wedele unde Bernart van Plozzeck, unde twischen deme rechte, dat gesproken hebben unses veddern man, marcgreven Vrederickes van Mysne, her Albrecht Knuͤt, Hartmuͤt van Buelewitz, Jencke van Gelnowe, Tamme van Haltecke unde Heinrick van Kokeriz, unde wat hie sprickt, dat schole wie dun unde scholen dat stede halten unde vullenbringen binnen viere weken darna, alse hie dat recht gesprocken heft. Dit hebbe wye unde unse swager greve Albrecht van Anhalt en trewen gelovet mit unsen riddern, die hirna gescreven stan: mit Bernard und Hannes van Tzrele, Wedegen van Kamenz, Boden van Yleburch, Vredericke van Torgowe, Kerstian van Gherardesdorp, Luthen van Scrivesdorppe, Vredericke van Ecgstede unde mit Henninge van Benz. Dede wie des nicht binnen den vier weken, also hirvor bescreven steit, so schole wie tuhant, also die viere weken ummekomen sin, inriden in der stat tun Berlyn mit unsem swager greven Albrechten van Anhalt und mit den negen ridderen, die hirvor bescreven stan, unde darute nicht komen, wie en hebben dat vul dan. Uppe dat dit vast unde stede blive, so hebbe wie dissen brief gegeven besegelet mite unsem insegele.
     Disse brief is gescreven unde gegeven in der stat tu Mulberch, na Godes boͤrt dusent iar driehundert iar in deme negenden iare, in sunte Margareten dagen der hilgen iuͤncvruwen.

Aus dem Original im Hauptstaatsarchive zu Dresden gedr: Riedel cod. dipl. Brand. II. 1. 282.