Civilisation e lingua universal/Secunde Parte/Capitulo 9

From Wikisource
Jump to navigation Jump to search
Civilisation e lingua universal
by Stefano Bakonyi

9. LE STATO UNIVERSAL HELLENIC DE ALEXANDRO[edit]

In le nord, ultra le frontieras de Grecia, habitava un populo de paisanos semi-civilisate, le Tracianos, parlante un lingua indo-european, parente al greco. Le parte plus civilisate era MACEDONIA. Filippo, rege de Macedonia habeva recipet un education grec. Ille comprende le debilitate del grec statos-citate disunite e decide facer se maestro de Grecia. Filippo adopta le civilisation grec, tamben le lingua franc grec del epoca, le koiné, como lingua de su administration e del armea.

Soldato capacissime, Filippo crea un armea professional permanente, unite per le lingua commun de commando: le koiné. Filippo conquire le nord fin al Danubio e al est usque al Dardanellos. Il propone le UNION de omne statos citate grec, con su predominantia. Isocrates, le successor de Pericles, pronuncia se pro Filippo, vidente que solmente un mano forte pote unir Grecia. Ma le famose orator del epoca, Demosthenes, denuncia Filippo como tiranno aggressive. (Ancor hodie un attacco extrememente aggressive es un 'filippica') e prevale. In le sequente conflicto Filippo vince e uni tote Grecia, Macedonia e le regiones annexe, in un corpore politic commun, con un commun lingua franc (koine), Filippo mori in 336 a.Cr. e lassa le trono a su filio Alexandro, qui ha solmente vinti annos.

ALEXANDRO (nominate le GRANDE) educate per le grande filosofo grec Aristoteles, vive completemente in le civilisation grec. Ja Filippo recognosceva le debilitate decadente del Medo-Persian Stato Universal. Alexandro decide conquirer lo. In un campania unic in le historia militar del mundo, Alexandro conquire Asia usque al Ganges e descende al Oceano Indian; pois ille conquire tamben Egypto. - In omne punctos importante ille funda citates grec, institue administration in koine. Este citates deveni centros del cultural influentia grec. Durante le dece-due annos de su campania, Alexandro porta le civilisation grec fin a India, ubi le civilisation grec supervive ancor hodie. De plus, elementos del cultura grec, ex India, entra in China e contribue al civilisationes de China e de Japon. Dunque le campania de Alexandro deveni le prime grande interpenetration del West e del Est. Alexandro face venir scientistas ex Grecia pro explorationes in le paises conquisite, e invia centos de specimenes, monstras, a su vetere maestro Aristoteles. Con passion e talento Alexandro dedica se al organisation de su vastissime conquestas. Il crede in le superioritate del civilisation grec, desira hellenisar le mundo e unir Europa con Asia politica- e racialmente: Alexandro sposa Roxana, un princessa asiatic; il suggere a su officieros et amicos sposar filias de nobiles asiatic, con le resultato, que milles seque su exemplo.

Koiné grec deveni ora le lingua universal official del vaste Stato universal de Alexandro, que include le tote mundo accessibile e civilisate. - Per disgratia Alexandro committe un error fatal pro le mundo occidental. Volente organisar e hellenisar su conquestas disperse in le immense vastitate del spatio asiatic, ille non ha tempore pro conquirer, unir e hellenisar le paises circa le Mediterraneo. Alexandro non comprende que le paises circa le Mediterraneo debe haber le prioritat absolute, pro que illo constitue un gruppo homogen natural: geografic, economic, geopolitic, que pote esser unificate, organisate e hellenisate multo plus facilemente que le remotissime paises del Oriente.

Un Stato Universal mediterran haberea cambiate le historia del mundo, remanite multo stabile. Al contrario, le imperio oriental de Alexandro era un conglomerato troppo heterogen e ha monstrate se multo instabile. Assi, le Occidente non conqueste remane disunite e disorganisate, - preda de incessante guerras interior: in vice de devenir un Stato Universal stabile e florante pro seculos. Alexandro possedeva le capacitate de facer lo, ma il ha perdite se in Asia.

Le immense fatiga de su campanias e le gigantesc effortio organisatori attaccava le nervos de Alexandro. Ille perde su autocontrolo: comendia a biber vino sin mesura, deveni malade e mori in le etate de 33 annos 323 a.Cr. Su disparition prematur es un grande calamitate historic. Ille era capace de unificar le mundo, animate per le civilisation grec e parlante un lingua universal del mundo, ma non lassa successores capace a executar su grande planos pro le conquesta del west - planos trovate inter su documentos lassate in hereditate.

Ora, le generales de Alexandro face guerras inter se pro le predominantia. Pois illes divide le Stato Universal in tres partes:

Le asiatic territorios del ex-Stato Universal Medo-Persian veni sub le regno del general Seleuco e deveni, sub le dinastia del seleucides, le successor del Stato Universal Medo-Persian, con koiné como lingua universal (in vide del arameico).

Syria, Palestina et Egypto veni al general Ptolomeo tamben con koiné como lingua universal. Le territorios de Macedonia e Grecia veni subjecte a Antigono, nepote del plus grande general de Alexandro.

Assì, ben que governate separatemente, le Stato Universal de Alexandro remane unite in le civilisation hellenic e in le lingua universal koiné.

SELEUCO e su successores funda lor citate residential in Antiochia (Syria) e cerca hellenisar lor immense imperio asiatic. Le Seleucides funda dozenas de grec citates in Asia Minor, in Syria, in le pais del Tigris e Eufrate, in Persia - usque ultra le frontieras de India. Le citates recipe autonomia pro lor local affares. Assi le civilisation grec prende profundissime radices in Asia.

In Egypto, PTOLOMEO funda le dinastia ptolomaic. Ille reside in ALEXANDRIA, fundate per Alexandro mesme. Le dinastia ptolomeic succede unir le civilisation grec con le civilisation egyptian e facer Alexandria un splendide centro de cultura.

In Macedonia e Grecia le lucta pro hegemonia continua e le prosperitate declina. Le imperios seleucide e ptolomaic - libere de luctas interior - con lor hinterland (retroterra) immense, es multo plus favorabile pro industria e commercio. Multe grecos emigra ex Europa al nove urbes: Antiochia, Alexandria, Rhodos, Ephesos etc., reinfortia le civilisation hellenic in Asia et Africa. Athenas sol conserva su prestigio immense, nonobstante su debilitate politic, e remane le centro del civilisation hellenic.