Civilisation e lingua universal/Secunde Parte/Capitulo 6
| ←Cap. 5: Le civilisation de Syria e Palestina | Civilisation e lingua universal by |
Cap. 7: Le civilisation de Creta e de Grecia→ |
6. LE MEDO-PERSIAN STATO UNIVERSAL[edit]
Como le STEPPA ARABE in sud era patria original del nomades SEMITIC: (akkadianos, amoritas, assyrios, caldeanos, fenicios, canaanitas, arameos, hebreos), assì le STEPPAS DEL NORD (ab le basse Danubio fin al Mar Nigre et al Caspio) hospitava populationes nomade, le "INDO-EUROPEOS".
Este Indo-Europeos comencia a migrar (ca. 2500 a.Cr.) verso INDIA e verso le CRESCENTE FERTILE e verso EUROPA fin al Atlantico.
Grande parte del historia del mundo antique es le lucta inter le nomades del sud e le nomades del nord - e de lor descendentes civilisate. Le resultato del lucta es le victoria del nord.
Le INDO-EUROPEOS DEL EST son nominate "ARYANOS" (nomine que indica 'de origine de Iran'. Le uso del nomine ARYAN pro Europeos es incorrecte, proque le aryanos son solmente cosinos distante, ma non ancestres del europeos.
Le aryanos non ha scriptura e non possede documentos. Circa 1800 a.Cr. le aryanos divide se in DUE GRUPPOS. Un gruppo migra verso INDIA e crea un civilisation con profunde valores spiritual e religiose. Le 'VEDAS', "libros sacre', son scripte in Sanscrito, contine allusiones al epoca del origine et unitate del aryanos. Le altere gruppo del aryanos migra verso le montanias adjacente al Crescente Fertile, al Iran, e consiste de due populos potente: le MEDES e le PERSAS.
Le Iranianos possede un RELIGION proprie, fundate per ZOROASTRE, circa 1000 a.Cr.
Le inspiration de Zoroastre es que "le vita del mundo es un lucta inter le spirito del ben e le spirito del mal. Le religion de Zoroastre impone le selection inter ben e mal, e le responsibilitate moral pro le selection; nam le homine debe expectar un judicio post le morte. ZOROASTRISMO deveni le religion preponderante del MEDES e del PERSIANOS antique.
Post le liquidation del Assyrios e le decadentia del Caldeanos, KYROS, rege del PERSIANOS, con su armea medo-persian, conquire non solo le Crescente Fertile ma tamben le resto de West-Asia. Kyros funda le Stato Universal Medo-Persian, circa 530 a.Cr. con Babylon como Centro, et entra conscientemente in le politic e cultural hereditage del Sumer-Akkadian Stato Universal. Le successores de Kyros allarga le Stato Universal, conquire Egypto et ulterior partes de Asia fin al Indus. Finite le conquestas, le immense Stato Universal gaude ducento annos de pace e prosperitate.
'Pace universal' seque secundo le testimonio del historia regularmente le fundation de un Stato Universal (como le 'pace de Augusto' seque le fundation del Stato Universal Roman per Augusto.)
BABYLON developpa se e deveni le plus grande centro commercial e cultural del Oriente. Le administration de este colossal Stato Universal, le commercio etc. require un lingua universal; post ineffective experientias con le persiano e le akkadiano decadente (como nos va vider in le tertie parte del studio presente), on adopta le lingua franc currente del epoca, le aramaico, tanto simile al akkadiano, que on pote considerar le aramaico como le 'secunde edition' del akkadiano.
In le Medo-Persian Stato Universal omne civilisationes anterior del paises unite coalesce, id es deveni un unitate cultural. On introduce le calendario solar ex Egypto. On promove le progresso scientific. On funda, in le parte de Egypto, le prime scola medical e le prime fundation scientific del historia. On construe stratas excellente e un grande flotta.
On reconstrue le canal inter le Mar Rubie e le Nilo (Suez II).
Le historicos grec representa le medo-persian imperatores como cruel tyrannos. Nonobstante, le documentos collecte per le historicos moderne demonstra, que este imperatores habeva un profunde senso de obligation pro governar justemente. Illes era human et intelligente. Lor Stato Universal gaudeva de un governamento plus juste e plus human que le altere oriental imperios precedente. Le defecto del Stato Universal non era le tyrannia, ma le structura economic. Le terra era divise in vaste dominios de potentissime nobiles. Parve proprietarios era multo rar. Tamben mancava parve interprenditores. Ora, le historia insenia nos, que un numerose classe de parve agricultores e interprenditores es le vertebra del Stato: ubi illes manca, le structura del Stato es debile. Ric proprietarios e interprendentes produce relativemente poco, e, vivente in luxuria, consume multo. Tamben le imperatores, qui seque al dur et auster fundatores, cade in luxuria e lassa le governamento al officiales corrupte e impotente. - Le resultato era un crescente debilitat e declino del Medo-Persian Stato Universal, con le qual tamben decade le "Pace medo-persian" e deveni victima de Alexandro le Grande.