Civilisation e lingua universal/Secunde Parte/Capitulo 15
| ←Cap. 14: Le civilisation del Islam | Civilisation e lingua universal by |
Cap. 1: Origine del lingua e del Babal de linguas→ |
15. LE SEMINE DEL DRACON[edit]
Concurrentia e disunitate es causa de nationalismo e de guerra.
Le homine primitive nutri se per collection de fructos, fungos, tuberes, musculos etc. per chassa e pisca. Collectores e chassatores risca morir de fame, si illes non dispersa se in bandas separate, de maniera que le humanitate vive in structura fracturate. Este societate disunite es responsabile del nascimento de numerosissime linguas e dialectos.
Es un facto que le homine senti plus grande simpatia pro le membros del proprie banda, parlante su lingua, que pro altere homines 'estranier', qui parla linguas differente. Secundo le evidentia archeologic le humanitate viveva un million annos in le economia de collection e chassa. Le sentimento de alienation contra le membros de altere bandas deveniva un habitude tanto forte, que permaneva ancora post le passage del economia collection/chassa al economia del agricultura. De facto, il es difficile eliminar un habitude inveterate, tamben quando le necessitate economic ha cessate.
RELIGION del primitivos: Homines vivente per collection/chassa venera le natura, que provide les del viveres necessari. In consequentia non existe essential differentia inter le religiones del numerosissime bandas de collectores-chassatores; e, como le religion es le parte nucleari del psiche, le sentimento de alienation non causa grave conflictos inter le bandas. Le population del terra era ancora tenue; bastava dispersar, distantiar se un poco plus pro evitar collisiones.
Quando veniva practicate le AGRICULTURA, le population augmentava; ma pro le homine agricole - ante le apparition del civilisation (epoca neolitic) il era ancora facile trovar nove terras cultivabile. Le evidentia archeologic demonstra, que grave conflictos non existeva inter villages agricole, ni inter agricultores e bandas de collectores-chassatores. Le primitive agricultores, migrante ex Asia verso Europa pro cercar nove terras cultivabile, non era guerreros. Al contrario, le transition del epoca neolitic al epoca del civilisation augmenta le tension inter le communitates agricole a un nivello si alte, que le eruption de guerras deveni inevitabile.
Le prime causa del tension es, que le homine civilisate deveni consciente, que su poter collective succede vincer le natura, del qual ille dependeva; le poter-collective ha transformate le paludes e junglas impenetrabile e periculose in campos irrigate per canales e dicas, obediente a su voluntate. Assi, le homine civilisate perde su reverentia - e veneration del natura e veni admirar su poter collective.
Ja durante le apparition del civilisation sumerian, le RELIGION CAMBIA ESSENTIALMENTE: Le antique deos natura representantes de fortias natural, deveni nunc tamben representantes de communitates economic e politic. In Sumeria, Enlil, le deo del vento, deveni le deification del citate-stato Nippur; Nanna, deo del Luna, deveni le deification del citate-stato Ur, patria de Abraham. Quando le civilisation de Canaan emerge, Baal, deo del vegetation, deveni le deification del vulcano e del tonitro, deveni le deification del statos Israel e Juda. Durante le emergentia del civilisation grec, Athena, dea del oliva, deveni le deification del citate-stato Athenas; Poseidon, deo del aqua, deveni le deification del citate-stato Corintho. - Assi le local communitates deveni divinitates superior al deos-natura. Este cambiamento del divinitates infunde devotion religiose al patriotismo local, si que le nationalismo appassionate nasce et emerge in le citate-statos civilisate.
Le secunde causa del nationalismo es le sequente: On pote trovar fructos, fungos, tuberes etc., e on pote chassar in quasi omne partes. Tamben, on trova sufficiente terras cultivabile pro le agricultura precivilisate. Ancora plus facilmente on trova pasturas pro bestial. - Terras in contrario, que pote esser ameliorate, bonificate per irrigation sistematic con canales e dicas, terras ric in humus alluvional, es rar e lor extension es limitate. Quando le statos local ha occupate le terras bonificabile, on non pote plus trovar altere terras de valor comparabile. Le sol possibilitate es expander se al costo del vicinos. Le archeologia demonstra le eruption de cruel guerras in le epocas post le prime grande successos del melioration. Nos cognosce sculpturas de este epocas, que representa le massacro del vicinos con vultures, aves ferroce, que devora le cadaveres. Le sol medio pro terminar le guerras fratricida era le subordination del local statos deificate ad un plus potente governamento "imperial", como il es facte prime vece historic per le creation del Sumerio-Akkadian Stato Universal; tamben postea in le mundo hellenic per le Stato Universal de Alexandro.
Studiante le historia del civilisationes, nos non pote supprimer le sentimento de melancolia, quando nos vide, como tante civilisationes splendide nasce, cresce, culmina - e pois decade e mori. Intertanto nos constata sempre de nove, que le causa del decadentia es le disunitate politic, le egoismo cellective, le incapacitate de resolver in pace le problemas interior et exterior.
Assi nonobstante su brilliante realisation in le campos del lingua, scriptura, tecnologia, economia etc., le civilisation sumerian habeva le terribile defecto de esser disunite, fracturate in citates soveran, le population del quales viveva ancor in le attitude de sentimental separation del epoca de collection-chassa. - Le repercussion de este mentalitat es fatal, proque altere populos admira et imita le civilisation sumerian. Hic et ibi le bon semine del civilisation deveni infeste per le semine del dracon, le disunitate politic. Le fenomeno 'semine del draco' se ha manifestate in omne civilisationes subsequente - e vive ancora con nos hodie.
Il es ver que Statos Universal ha unite le humanitate civilisate in politica e lingua durante periodos considerabile. Ma le semine del dracon
es sempre latente e recoperi le scena, luxuriante. Quando le fortia moral e matierial del Stato Universal deveni insufficiente, non solo le Stato Universal decade in soveran statos fractional, le lingua universal tamben disintegra se in linguas regional - benque multo plus tarde, post seculos. Fenomeno general: le developpamento lingual es multo plus lente que evolutiones e revolutiones politic.
Hodie nos vide que nostre civilisation ha ja realisate un satis bon unitate in scientia, tecnologia, indutria, commercio, communication, arte, teatro, cinema, television, sport etc. - ma le Statos Universal correspondente es ancor in un penibile stato de nascentia. Le historia monstra nos de plus, como le quatro Statos Universal historic (Sumerio-Akkadian, Medo-Persian, Hellenic de Alexandro e Roman) representa un clar progresso. Le unitate deveni sempre plus extense del prim al sequente Stato Universal: geograficamente, cultural- e lingualmente. Hodie on pote previder: Solmente quando le disunitate politic essera totalmente superate, nos va haberle Stato universal pro le tote terra e tamben, con un certe retardo, anque le lingua universal:
In Sumer, le initial diversitate politic fu superate solo plus tarde, al costo de un serie de guerras, plus e plus frequente e semper plus devastatori. Omne civilìsationes nate post le sumerian, e que habeva multiple structura politic, ha presentate le mesme curriculo: In omne casos le unitate final es realisate per medio de conquesta militar. Totevia le historia demonstra, que omne situationes create per violentia nunca era durabile. Le violentia conquire le corpore, ma aliena le anima - e le animas alienate conspira contra le violentia, fin que illes deveni bastante forte pro liquidar le victor. Nonobstante, in nostre epoca le guerra non pote esser efficiente como medio de unification, proque in un guerra nuclear necuno es victor. Ergo - in le bon interesse del humanitate, le potentias cerca solutiones pacific.
Le historia del lingua universal demonstra, que tamben le imposition pacific de un institution (como le lingua universal) es possibile. Il es ver, que le linguas universal era introducte, imposte, per le Stato Universal, ma le imposition nunca era violente. In omne casos historic le imposition era solmente le officialisation pacific de un lingua franc, ja generalmente usate per le populos como nos va vider in detalio in le tertie parte del presente studio. In tanto que le lingua universal non es imposte per le spada, le lingua universal non dispare con le collapso del Stato Universal, ma supervive lo durante seculos, como linqua commun del statos successori.
Altere mal herba ex le semine del dracon es le disunitate del RELIGIONES, mesmo del si-nominate religiones superior. Son illes que insenia, que le homines e tote le universo es create per, e depende de un Transhuman Realitate Spiritual. Un religion merita le nomine 'superior' per su tentativa de portar le anima human in contacto directe con le Transhuman Realitate Spiritual, que immane in le fenomenos del universo e transcende los. Le apparition del religiones superior, durante le ultime 2500 annos, es le evento le plus importante e maxime revolutionari desde le primordial mutation del ente pre-human in un tal human. In tanto que le religion superior succede poner un anima human in contacto directe con le Transhuman Presentia Spiritual, le religion libera le anima del servitude al communitate, al qual le homine appertine.
Finora le communitate venerante le collective poter human exigeva total loyalitate de su membros. Ora le individuo es libere a obedir a Deo plus tosto que al homine, si le individuo crede, que le voce de Deo in su conscientia es in conflicto con le demandas del communitate. Este libertate spiritual, este libertate de selection, es le fonte de omne altere libertate, in omne altere sectiones del vita practic. Le religiones superior ha complite le acto de liberation. Le diverse religiones superior ha accomplite este acto de liberation secundo differente stratas, ben que le scopo final es le mesme. Le coexistentia de plure religiones superior, preste a conquerir le mundo, es un testimonio impressive de divergentia ancora vive in le spirito human.
In le tertie seculo a.Cr. le imperator ASHOKA de India, membro del Sanga (Ecclesia Universal Buddhista), diceva: "Omne homines es mi infantes. Como io cerca le benesser e le felicitate pro mi filios, in le mundo presente et in le altere mundo, assi io cerca le mesme cosa pro omne homines." Ben que solo poc adherentes del Ecclesia Universal attinge le statura spiritual de Ashoka, un grande parte es liberate del influentia de lor banda, de lor clan, de lor tribo e del alienation ab le estranieros. Le Statos Universal exerceva un influentia simile a lor citatanos, si illes arriva a sentir que pace et ordine introducte per le Stato Universal es multo supetior al guerra e disordine causate per le statos regional. In consequentia, le cives arriva al conviction que le Stato Universal es un plus alte tipo de association human que le statos regional. - Le successos del Ecclesias e Statos Universal demonstra que le habitude de alienation ab le 'estranieros' pote esser substituite, poco a poco, per un mentalitate tolerante plus universal. Le lingua universal es un medio efficiente pro producer tal mentalitate.
Per disgratia tamben le fanaticos religiose pote stimular le nationalismo guerrier. Le cristianos combatte le judeos e le moslemes. Assi le antisemitismo es un fructo del fanatismo religiose o ideologic. Et in le Reformation dividet se le Ecclesia, e le guerras inter Cristianos produceva tante odio, malitia e crudelitate, que le spiritos human e liberal devenit alienate ab le religion.
Totevia, le religion es un ingrediente stabile del natura human - e le natura non tolera vacuo. Cordes e mentes que ha abandonate le religion, cerca e trova substitutos in le post-christian ideologias: nationalismo, fascismo, communismo. Le experientia demonstra, que NATIONALISMO prevale super altere ideologias; si le ideologia veni in conflicto, un grande parte del devotion perdite per le cristianismo es infuse in le nationalismo: ideologia contrari al universalismo, contrari tamben al lingua universal. Nonobstante, le nationalismo non va prevaler. Nos non debe dismemorar que le divergentia es tanto antique quanto le humanitate mesme: un million de annos - contra le convergentia in Statos Universal, comenciante solo ante 4000 annos, et in Ecclesias Universal solo ante 2500 annos. Le comenciamento era multo lente, per que le medios de communication era lente. Ora, desde ducento annos, plure medios rapide de commmunication son a disposition. Le communication es intensive e rapidissime; le convergentia pote progressar plus veloce. Como le convergentia dura solo desde ducento annos, le progresso non pote esser arrivate al unification del mundo, ben que nos ja ha trovate un base del unification: un lingua franc mundial in state de nascentia, in tanto que nos habe detecte circa 27 000 parolas international, collecte per le linguistas del IALA e publicate in le Interlingua-English Dictionary per Alexandro GODE. Nos va vider que le apparition de un lingua franc, diffuse in omne partes del mundo civilisate, es un signo premonitori del advento del Stato Universal.