Chunta wachumanta ñawpa willakuy

From Wikisource
Jump to navigation Jump to search

Chunta wachumanta ñawpa willakuy

Chunta Wachuqa inkapa allin kaq kamachikuqninmi karqan, paypa qulla runakuwan maqanakuqsi kaq. Allin qhari kaspa qullakunataqa atipasqa.

Chunta Wachuqa Walla Walla rit'i urqutapas chakillapi puriqsi. Chimu runakunawanpas maqanakuqsi kasqa. Llapankus allin qhari qhari kawsaynintaqa yachasqaku. Chanka runakuna hatarisqanku ukhupipas Chunta Wachuqa aswan manchakunapaqhinas kaq.

Huk p'unchawsi Apu Inkaqa Chunta Wachuta nisqa: - "Qammi llapan awqaykunamantaqa aswan hatun kanki, ñuqapa ancha khuyasqay, chayraykun Anti runakuna atipamunaykipaq qamta akllayki, paykunaqa sach'a sach'api pakakuspankum mana unanchasqayta riqsinkuchu".

Chunta Wachuqa antikunaman yaykunanpaqsi allin umanwan qhawarispa kamarin. Runakunanmansi allin kanankupaq imaymanata quspa kamachin. Qusqu llaqtamanta puririchkaptinsi hanaq pachata yana phuyu muyurqamun.Chunta Wachuqa manas manchakunchu. Apu Awsanqatimanta, Apu Pachatusanmanta imas mañarikun, chaysi "ñuqaqa llalliqmi richkani, llallispan kutimusaq" nispa apukunata nin.

Apu Inkapas llaqtapa hawankamas pusan, chaypis, allin awqa kasqanrayku qurimanta sumaq llikllata quykun.

Chunta Wachuqa mana samarispas, mana sayk'uyta riqsispas, antikunata maskan. Yunka ukhuman yaykuspa, anti runakunapa tiyasqan ukhuman yaykuspa lliw sallqa uywakunata sipisqaku, anti ayllukunatapas lliw atipasqaku.

Huk p'unchawsi runakunaqa Chunta Wachuta nisqaku: - "Wiraqucha, manañam mikhunanchis kanñachu, kay yunka unquykunapas lliw wañuchipuwachkanchis" nispa. Chayta uyarispas Chunta Wachuqa samarinankupaq runankunata kamachin, kikintaq mikhunakunata, hampikunatapas maskaq rin.

Ñas achka p'unchawña purichkan, killapas muyusqanpi t'ikramunña, intipas sinchita rupaykamuchkan, ichaqa Chunta Wachu mana kutimunchu. Runankunataq suyasqankupi ch'ulla ch'ullamanta wañupuchkanku, tiyasqankupas ch'usaqña, mana runayuqña tukuchkan.

Chunta Wachumantaqa kayhinata willarikunku: Sallqa uywakunas phawaykunku, pikaq mach'aqwaykunas phawaykunku, uturunkukunas, wañuchiq pillpintukunapas, wañuchiq arañakunapas, imaymana uywakunas hap'iyta munasqaku.

Chay uywakunamantaqa allintas amachakusqa, llapantas llallispas sipisqa. Qipallatañas, Chunta Wachu puñuchkaptin, huk phiña sallqa Yaku mama phawaykusqa. Chay mach'aqwayqa hatunkaray raprayuqsi kasqa.

Chayta rikuspas Chunta Wachuqa kallpachakuspa chakinwan allpa ukhupi saphichakuspas sach'aman tukupusqa. Yaku mama sapa kuti phawaykuptinsi Chunta Wachuqa aswan k'ulluhina ch'uchuman tukupusqa. Mana llalliyta atispas Yaku mamaqa sayk'urqapun.

Chaymantapachas Yaku mamaqa mayuman tukupusqa, Chunta Wachutaq chunta sach'aman tukupullasqataq. Mayuqa phiñakuytas sunqunpi apan, sach'ataq sinchi kayta, mana p'akikuq kayta apallantaq.