Che fadiga!..

by Carlo Foldi

All'amis Benedett Cairoli per el sò ministeri.

Marzo 1878.

Che fadiga!... Che lavor,
   ghè voruu per partorì!

   In tresent trentases or
   se stantaa per rëussì!
Ma vareven quij sudor,
   ch'hin duraa quattordes dì,
   sti rachitich, che i dottor
   hin no bon de fa guarì?
Mi me par che l'era mèj,
   Benedett, lavass i man
   che impicciass cont di... fradej
che g'han minga de... diman!...
   Mi me par già de vedej
   squasi tucc diventà... nan!

II

Sì, l'è cert per Zanardell,
   sì, l'è cert anca per ti,
   che, se andass tutt a bordell
   l'edifizi de sti dì.
el vost nomm l'è semper quell
   de durà per l'avvegnì!...
..................
Ma... prevedi che visin
   sii puttost al tomborlon
   che del fa ona bona fin...
Sicchè disi, cont reson:
   «El tò part l'è piscinin
   tropp, per fa quaicoss de bon!»