Ced söla Champ-Rigot dö Vp.

From Wikisource
Jump to navigation Jump to search
St. Maurice, Fransän,
1ul 17id 1896.


S.l.,


Begob oli lensumön danis känüdikün oba plo pubam lusaga Golüdadlak in “Kosmopolan,” e pato plo lovepolot nelijapükik so vemo kulädik e gudik.


Binos vo lestunik das, labedöl stumi so legudik, so nefikulik al gebön, stumi me kel kanoms mekön lovepolotis so kulädik, volapükans anik, volapükans, ag! tu mödik, vipoms distukön vobädi so jönik!


Kikod sükön väpüki votik?


Kikod steifön deblekön in nams okik med at milagik melaka, spodik e pükik?


Sis Schleyer edatuvom Volapüki, kel binom vo datuv gletikün yelatuma obsik, sis Väpük sibinom, jinos das datuvels luväpükas eglofoms in läns valik. E, dinäd selednikün! valikans geboms Volapüki it al seplänön tikis oksik, vipöl pladalön püki pekapalöl fa mödanum väpükaflenas me pük pedatuvöl e pekapälöl te fa oms it.


Dido, Volapük no binom lefulik; äs datuvs valik menas, labom defis okik, ab defs at kanoms pamenodön pianiko e binos vemo pidigik das, lukodü menodam, fablüdels sitas e glamatas nulik geboms Volapüki, om it, no al pakön, ab al befeitön omi.


Blibobsöd volapükaflens! Vobobsöd al pakön büfü menodön! Steifobsöd al blöfön kolänanes obsik das blinobs omes väpüki kleilik, balik, nefikulikün tefü glamat e sepük, püki kanik no desänöl pladalön pükis netik, ab vipöl te yufön utis kels no laboms livüpis sätik al lenadön pükis selänik.


Ko glids ladlikün, blibob,
D.o.d.,
PAUL CHAMP-RIGOT.



Se Kosmopolan 1896, Nüm: 28, Pad: 274.