Car el mè Cardanella

by Giovanni Bertacchi

Car el mè Cardanella by Giovanni Bertacchi

Gioann Bertacch (1869-1942)

Car el mè Cardanella (1933)

Car el mè Cardanella,
ti che t'heet faa el gudazz del mè batesim
quand son entraa in la compagnia del CAL
te preghi de scusamm press al medesim,
se, trategnuu tra i sass de la mia vall,
rinuncia, cont on cruzzi de no dì,
a la paciada de 'sto martedì.

Pensi, però, del rest, che i avocatt
i enn tutt pien de risors a 'sto riguard,
e, come i sann esaurì i sò att
anca in l'assenza de la propria part
se pur manca el profil de la mia facia
me vedarann a bev... in contumacia.

Quanto a mì, sta' pur cert che, anca lontan,
me sentiroo present a la gran tavola
e, denanz al vinett di nost paisan,
sventolando ona fetta de brisavola,
saludaroo la cara societaa.
Lega Lombarda de la nostra etaa.