Calepin sora el mangià
Carl'Antoni Tanz (1710-1762)
Calepin sora el mangià
Nœuva bosinaa
su l'argoment del carnevaa
dove se ved che i Buseccon,
perchè ghe pias i bon boccon
no derven bocca per parlà
se no ghe mes'cen el mangià,
bosinaa stampaa in Milan
del stampador Carla Bolzan.
In sti sir de Denadaa
stand setæ giò al fogoraa,
in dà del patron de cà,
dove sont solent a andà
stæva lì comè on sognan,
come on locch, cont el coo in man,
componend inscì a memoria
quatter vers sora l'istoria
del bizzarro marendin
ch'hemm goduu sul baltreschin
del Vaimans fin st'ann passæ
mì e di olter Trasformæ.
Quatter vers de rezità
par incoeù sora el mangià.
Quand me senti lì de dree
messee Steven legnamee
a descorela e a dì sù
cont on bæsger come lù
par spiegass cert mœud da dì
che tutt quant vann a fornì
in de quella sort de coss
che ne va sgiò par el goss:
ve segur che gh'hoo avuu spass:
ie drovæva par spiegass
ma el pariva a dægh a trà
che 'l parlass sora el mangià.
[...]