Bydło zrudoby

nadpis	Bydło zrudoby
awtor	Michał Bjedrich Wjeleměr
lěto	1885
žórło	http://texty.citanka.cz/
licenca	public domain
nota	stary prawopis

    Hdźež słónčko jasne zrědka
    Tu ćěmnosć předrěje,
    Hdźež měsačk jeno zćežka
    Přes hał'zy zhladuje;

    Hdźež wokoł šěrych skałow
    So jiwa rozpleta,
    Hdźež zrudnych ćěmnych hatow
    Wětr rohodź přešumja;

    Hdźež kurjawa přec wobda
    Wšě keŕki nazymske,
    Hdźež z hrózbnym hłosom sowa
    Sej wutle zanjese;

    Hdźeš w ćěmnych horow dołach
    Přec šumi wodopad,
    Hdźež zahrawa na rowach
    Wětr z lisćom wječorny:

    Tam město wuzwolene
    Je twoje, zrudoba,
    Tam čeŕpjaceho ćehnje
    Zrudźena wutroba;

    Tam wot tych błaznow khodźi
    Wón swětnych zdaleny,
    Tam horjow wuswobodźi
    So twój wuzwoleny;

    Tam połoži so duša,
    Ta ćežcy čwilena,
    Tam roztaje ta skora
    Tež horja lodowa;

    Tam liješ balzam swjaty
    Ty sama do ranow,
    Tam skićiš tróšt ty rjany -
    Wšě rany zažija.