Buks fol dö Züp Kristusa/Buk kilid

Buk kilid. Dö trodam linedälik.

Kapied 1. Dö pükot linedälik Kristusa ko lan fiedik.

1. Lan fiedik. — Vilob lilön, kelosi Sölal God pükom in ob. Leläbik binom lan, kel lilom in ok püköni Sölala, e getom vödi troda se mud oma. Leläbiks lils, kel senidoms ninpükotis lovik Goda, e no loigoms ninpükotis vola. Vo leläbiks lils, kel, no lielöls tefü vög toenöl senedoa, lieloms linedälo tefü verat tidöl. Leläbiks binoms logs, kel, pekiköls senedikose, binoms ye senidik tefü linedälikos. Leläbans uts, kel duvestigoms dinis linedälik, e me plägams vädelsik steifoms, vedön aiskilikum, al kapälön klänis sülik. Leläbans, kel, fredöls jäfön Godi, livomsok de neleads alik vola. Konsidolöz atosis, o lan oba! e kikolöd yanis sienas, dat kanolös lilön, kelosis Sölal God ola pükom in ol!

2. Kristus. — Pelöfan ola pükom atosis: »Ob binob salud ola, püd olik, e lif ola. Luyümolödok len obi! ed otuvol püdi. Lüvolöd golenikosis valik, sükolöd tenüpikosis! Valiks dins timlik binoms kios, ifno bos ludugöl? E jafots valik frutoms kisis, if ubinol palüvol fa Jafal? Sikod, uklemöl valikosis, omekolöd oli plidik e fiediki Jafale, dat kanolös, getön beati veratik!

Kapied 2. Verat pükom linedälo nen toùn vödas.

1. Dünel. — Pükolöd, o Sölal! ibo dünel olik lilom! Binob dünel ola, givolöd obe kapälübi, dat sevobös noelüdis ola! Flekolöd oba ladi al vödis muda olik! pükat ola doniflumomöd, äso töf! Sons Yisraela epükoms vöno Mosede: »Ol pükolöd obes, ed olilobs! Sölal no pükomöd obes, dat ba no deulobs!« — No somo, o Sölal! no pükob somo. Ko profedal Samuèl bufumo leplekob miugik ä levipiko: »Pükolöd, o Sölal! ibo dünel ola lilom!« No Mosed, u votan profedalas pükomös obe! sod Ol it, o Sölal, nin’gival ä dalitölal profedas valik pükolöd! ibo soelik nen ots kanol, lefulo betidön obi; ab ets nen Ol kanoms nosi.

2. Kanoms dido, sagön vödis toenöl; abu no givoms tikäli. Pükatoms jöniko; abu no flämoms ladäli, if Ol seilol. Loveblünoms tonabiris; yed Ol manifol siämi. Nünoms klänis; ab Ol plänol ninäli malas. Notoms büdis; ab Ol yufol, fölön otis. Jonoms vegi; yed Ol stenüdol, al tägön oti. Ets dunoms te senedikosis; ab Ol betidol e dalitol ladälis. Ets begifoms senedoa; yed Ol legivol flukäli. Ets luvokoms vödis; ab Ol bevobädol, das lilölan kapälom otis.

3. Demüs no Mosed, sod Ol, o Sölal God oba, verat tenüpik! pükolöd obe, dat ba no deilobös, e dat no blibobös neflukälik, if ubinoböv pamonedöl te senedoa, e no paflämöl linedälo! Gevolöd, dat al oba kodemübi no tienomös vöd pelilöl, abu no pafölöl, pesevöl, ye no pelöföl; pekredöl, abu no patönöl! Sikodo pükolös, o Sölal! bi dünel olik lilom! ibo labol vödis lifa tenüpik. Obe pükolöd al trodi anik obika lanäla, ed al gudumami lifa lölik oba! yed Ole tienosös ali laiks lob, glor e stim!

Kapied 3. Vöds Goda binoms pölilöl miugo; ye mödikans no divoms otis.

1. Sölal. — Lilolöd, o son; vödis oba, vödis svidikün, vükodölis nolügi valikas filosopanas e sapalas vola ät! Vöds oba binoms tikäl e lif, e no pövätöls segunü suemods menik. No dalon, en sükön plidi vanik; sod muton, lilön otis stilo, e lensumön in miug lefulnik e me desid gretik.

2. Dünel. — En epükob: »Beatik binom men, keli Ol, o Sölal! ubetidol, e kele utidol oka loni, dat müdolös ome delis badlik, e dat no vedomös netrodik su Tal!«

3. Sölal. — Ob (Sölal pükom) etidob profedalis sis begin, e jünu no finob, püköni valikanes; ye mödikans binoms sudik e neseniks tefü vög oba. Mödumans liloms vilikumo voli, ka Godi; sukoms löbikum desides mida, ka plide Goda. Vol siagom dinis timlik ä smalikis, e dünon ate me desid gretik; siagob gretikünosi ä tenüpikosi; ye ladäls deilikanas bliboms nemufik. Kim Obe dünom e lobedom also kudöfo, äs dünon vole e söles ota? — »Jemolöd, o Sion!« mel pükom; »ed, üf vilol, en nolön kodi, lilolöd!: Gonon vegi lonedik, al getön cäli smalik; dem aidulik lif futap ti no patovom balna de tal fa mödikans. Sükon fruti pöflik; demü baledab bal feiton jemodik sotimo. No dredon, detöbönok in del e neito demü din vanik u siagod smalik.

4. Ye jemodö! binon tu nedutlik, al töbön sägo te nemödo demü guèd nevotlik, demü mesed nedüvik, demü stimün e glor no finöl. Sikodo jemolöd, o dünel nedutlik e plonöl! ibo ets binoms löbikum deilöne, ka ol binol löbik, lifön. Ets fredoms um in van, ka ol in verat. Ets zu pacütoms sotimo tefü spel oksis; abu siagod oba citom neki, ed Obe konfidölani no dismidom vagiki. Vilob givön, kelosis esiagob, e fölön, kelosis epükob, üf ek ublibom jüi fin in löf Oba. Binob mesedal fiedanas alik, e xamal jalopik devodanas valik.

5. Penolöd oba vödis in oka ladi, e betikolöd dutlik otis! ibo obinoms lezesüdik in tim patentadöna. Kelosis no suemol lilädölo: atosis osuemol in del visida. Laidunob, visidön teliko pesevälanis obik, os binos: me tentad e trod. Vädelso givob otes komlilädamis tel: bali, kelo leblamob pökis otas; votiki, me kel monedob al fästepi tefü tugs. Kel men nolom vödis obik, ed unestümom: otuvom eki, ocödöföl in del lätikün omi.

Plek, al getön beni devoda.

6. O Solal, God obik! binol oba guèd valik. E kim binob, das venüdob, pükön Ole? Binob ola dünelil pöfikün, e vumil nestümik. Binob mödo pöfikum e nestümikum, ka nolob e venüdob, sagön. Ga memolöd, o Sölal! das binob nos, das labob nosi, e das kanob nosi! Soelik binol Gudal, cödik e saludik; kanol valikosi, givol valikosis, fölol valikosi; te sineli dismidol vagiki. Memolöd misaladamis Olik, e fulolös oba ladi me ben olik! ibo no vilol, das jafots Ola binomsös vagik.

7. Liko kanob, sufönok in lif misalöfik at, ifno misalad e ben Ola stenüdoms obi? — No moflekolöd oliki loapi de ob, no fözogolös Oka visidi, no mosumolöd Ola trodi, dat logsü Ol lan oba no vedomös, äso glun no pebevatöl! O Sölal! tidolöd obi, dunön Ola vili; tidolöd obi, tägön digik e miugo komü Ol! ibo sap oba binol, kel verato nolol, ed enolol obi bü vedam vola, e büfä ebinob pemotöl vole.

Kapied 4. Muton, tägön in verat e miugo komü God.

1. Sölal. — O son tägolöd in verat komü Ob, ed aisükolös Obi in balikäl lada! Kel men tägom in verat komü Ob: pojelom ta lägleipis neflena, e verat olibom oti de ludugels e slänams badikanas. If verat ulibom oli: obinol vo libik e kudalivik tefü lupükots menas.

2. Dünel. — O Sölal! binos veratik, kelosi sagol. Pesagölos, begob, jenosöd obe! Verat Ola tidomöd obi, jelomös ä konsefomöd obi jü fini saludik! Verat libomös obi de valik slopäl badik e löf neleodik, ed otägob ke Ol in lib gretik ladäla!

3. Sölal. — Ob (verat pükom) otidob ole, kelos binos gitik e plidöl logsü Ob. Sinis ola memolöd, labölo gretikis miplidi e glumi, e niludolös nevelo, das binòl-la bos gretik demü vobäds oka! Binol vo sinel, padisojedöl liedodes mödik, e pakopligöl niso. Se ol aislopälol al nosi; pökol lesuno, pabevikodol lesun, pakofudol lesuno, vedol lesun nestönik. No labol bosi, viokodo kanolöv famönok; abu labol mödikosis, viokodo mutol, smadüvokön; ino binol mödo pülikum, ka suemön kanol.

4. Demüs nonik dinas alik, kelis dunol, jinomöd gretik ole! Nos jinosös gretik, kostikos, milägadigik, stümadigöl! ibo nos binos subimik, vo lobadigöl e viplik, plä kelos binos tenüpik. Bu valikos verat tenüpik plidomöd, e legretik pülöf olik aimiplidomöz ole! Dredolöd, blamolöz, e fugolöd nosi so mödo, äso klimis e sinis ola, kel mutoms, miplidön umo, ka timlik däm alik! Ans no tägoms känüdo komü Ob, sod, pedugöls dub semiks nudäl e rogam, viloms, nolön klänis Oba, e, luleadölsok ed okas saludi, viloms, sevön desänälis geilik Goda. Ats, demü pleitäl e nudäl okas, faloms mödna in tentadis gretik e sinis; ibo tadunob otes.

5. Dredolöd cödätis Goda, dremolös demü zun Vävalüdala! No venüdolöd, dakodön vobädis Geilikünala, sod davestigolöz klimadunotis oka! xämolöd, vio-suvo esinol, ed eluleadol gudikosis viomödik! Ans pladoms okas devodi in bukis te, votikans in magis, nogo votans in malis e zeremifis senedik. Ans loboms obi me mud, abu nemödo me lad. Votikans, pedalitöl in kapäl, e peklinöls de slopäls, aiseifoms al guedis tenüpik; binos plönik otes, lilön dinis talik; dünoms dolo zesüdöfes nata, ed ats senoms, kelosi tikäl verata pükom in oms. Ibo tidom otes, nestümöni talikosis, löfi sülikosa, klemön voli, e levipön dü del lölik e neito süli.

Kapied 5. Dö vobädam milagik löfa godik.

1. Dünel. — Pliedob Oli, o Fat sülik, Fat Sölala obik, ela Yesus Kristus! bi edonleadolok, memön obi pöfik. O Fat misaladas ä God troda valik! danob Ole, bi klietol sotimo dub oka trods obi nedigöl trodi alik. Aipliedob äd aiglorob vätenüpoi Oli ko Son balpemotöl Olik e ko Salutikäl. Eyö! o Sölal God, löfal saludik oba! üf ukömol in oba ladi, linedikos valik oba oyubos. Binol glor obik e fred obika ladäla. Binol spel obik, ed oba lefug in dels gluma obik.

2. Ye, bi binob nogo fibik al löfön, e nelefulik tefü tug: demüs pastenüdobök, e patrodobök fa Ol; sikodo visidolöd obi suvo, e betidolös tefü lon saludik! Livolöd obi de liedods badik, e sanolös oba ladäli de neleodiks slopäls valik, dat, linedälo pesanoböl, ä lefulno paklinöl, vedobös pötöflik löföne, stenüdik al liedön, stanälik in ledulön!

3. Sölal. — Löf binom bos gretik, gued vo legretik, kel soelik mekom böladi alik aso leitiki, e sufom leiladälo täöfis valik. Ibo nenü bölad polom böladi, e biedikosi valik mekom svidiki ä smeknik. Löf kol Yesusi binom nobälik, stigöl al dunön gretikosis, e flämom levipi al dinis ailefulikum. Löf aisteifom löpoi, e no vilom, pagekipön dubü dins bapik. Löf vilom, binön libik ä palivöl de volik slopäl alik, dat no paneleadomös tefü fekäl linedik, dat no pakopligomös in frut timlik, u pabevikodomös dubü däm. Nos binos svidikum, ka löf; nos binos stenüdikum, geilikum, umo vidik, umo lesumik, fulikum e gudikum in sül e su Tal; ibo se God löf licinälom, e, subimik ove jafot alik, no kanom, tuvön takedi, plä in God.

4. Löfel flitom, gonom, e fredom; binom libik, e no kanom, patönön. Givom valikosis plo valikos, e labom valikosis in valikos, bi takedom in gued bal gretikün te, se kel flumom e dekömom gued alik. No konsidom legivotis, sod ovi guedis alik datovomok al legivali. Löf mödna no sevom mafi, sod lekugom ovü mafi alik. Löf no senom böladi, no loigom töbis; desidom, dunön mödikumosis, ka kanom: no lukodlom nemögöfi, bi kredo, das kanom valikosis, e das valikos binos pedälik ome. Demüs binom pötöflik valikosed; dunom mödikosis, e lefulom osis, kö votan no löföl vedom fiban, e pabevikodom.

5. Löf galom, e slipöl no slipom, padetöböl no binom fenik, panüstöböl no binom panaböl, pajeiköl no pakofudom; sod, äso flam liflik e flamot filedöl, lekulomok löpoì, e dudranom sefiko. Aikel löfom: nolom, kelosi vög löfa vokom. Luvok valüdik in lils Goda binom slopäl filedöl lana, kel pükom: »O God obik, o löf oba! Ol lölik binol obikan, e lölik ob olikan!«

6. Dünel. — Veitolöd oba löfi, dat lenadobös, gütön me mud linedälik lana, vio svidik binos: löfön, smetön kodü löf, e svimön niso. Padasumobös fa löf, dat dub vemiks ladälafil e stun datovobösok ovü obi! Kanidobös hümi löfa! sukobös ini geil Ole, pelöfane obik! oba lan, yuböl kodü löf konsumomösok dubü pliedön oli! Löfumobös oli, ka obi, ed obi no löfobös plä dem Ol! e löfoböd dem Ol valikanis vo löföl Oli, äso büdom löfa lon stalöl se Ol!

7. Sölal. — Löf binom spidik, känüdik, devodöl, lesumik e löflik; stenüdik, sufädöl, fiedöl, visedik, lonedälik, manik, e nevelo sükölok it. Ibo, sosus men sükom iti ok: perom löfi. Löf binom kautöl, miugik ä stedik; no müedlik, no leitälik, e no jäföl dinìs vanik; binom cunälik, puedik, stanälik, takedik ä galöl tefü sièns valik. Löf binom nödik ä lobedöl löpanes, pülik ä nestümik oke it, divodöl ä danik Gode, aikonfidöl ote, äd aispelöl in oti, i tän, if God no smekom ote; ibo no lifon nenü dol in löf.

8. Löfel panemön, no digom ut, kel no binom löbik, liedön valikosis, e dunön ma vil pelöfana. Löfan mutom, demü pelöfan lensumön viliko valikosis düfik e biedikis, e nevelo pamoflekön de ot sukü zids taìk.

Kapied 6. Vio löfan veratik paxamom.

1. Sölal. — O son! no nogo binol löfan stenüdik ä visedik.

2. Dünel. — Kikod, o Sölal!?

3. Sölal. — Bi demü täöf smalik no lefulol vobädis pabeginöl, e sükol tu desidiko trodi. Löfan stenüdik stadom nepemuföl in tentads, e no kredom ninpükotes käfik neflena. Äs ome plidob in läb, id also no miplidob in täöfs.

4. Löfel visedik no konsidom so mödo legivoti löfana, äso löfi givala; konsidom umo vili gudik, ka völadi legivota, e pelöfan binom lesumikum ote, ka legivots valik. Löfan nobälik no takedom in legivot, sod um in Ob, ka in legivots alik.

5. Sikodo valikos no binos foviko paperöl, if tefü Ob u saludals labol sotimo fekälis lu gudikis, ka vipolöv. Fekäl gudik ä svidik et, keli senol sotimo: binom vobädot bena komik, e bido bisegut lomäna sülik; no dalol, en lekonfidön tuiko; ibo fekäl golom e kömom. Ye, komipön ta vedölis mufis badik lana, e nestümön ninpükotis diabana: atos binos mal sikik tuga, e din lemelidöl.

6. Klu oli no kofudomsös fänots vädik, tefü din aikelik binòms-lá. Stenüdo konsefolöd desini, e desäni pelüodöl al Godi! I no binos cit, if, sotimo pafäslütol süpido ali God, e foviko gekömol al vanotis kustöfik lada. Ibo plönol omis umo ta vili, kas dunol otis; ed, ünä miplidoms, e tadunol otes: tienoms al melidi, e no al rübi.

7. Nololöd, das neflen vönik steifom vämodo, neleadön ola desidöni gudikosis, ed al dezugön oli de devodiks plägams valik, os binos, de grestim saludalas, de medidam relik lieda oba, de mem frutöl sinas, de galug tefü lad lönik, e de slud fimik fästepöna tugso. Nin’givom tikis badik mödikis, dat ole ningifomös naudi e tavili, dat deflekomös oli de plek e lilädam saludik. Lekoèf miugik miplidom ote, ed üf kanomöv: dezugomöv oli lefulno de komünet saludik. No kredolös ome, ed i no loigolös oti, do pladom mödna träpis, al citön oli. Ome lücödätolöd kodi tikas badik e nepuedikas! Sagolöd ome: »Yilolöz, o tikäl neklinik! daredolöz, o misalöfünan! binol lemiotik, bi ninpükol somikosi liles oba. Mofö de ob, o ludugel badikün! otuvol dili nonik in ob; sod Yesus, aso komipal stenüdik, obinom ke ob, ed ostanol pabejemöl. Vilob bufumo deilöni, e liedöni pönis valik, ka sisagön ole. Seilolöd, e muedolöz! neovo olenlilob oli, üfi lendunolöv böladamis nenumik obe. Sölal binom litäl e salud oba; dredoböv kimi? — If lemiliters stanomsöv ta obi: lad oba no dredomöv. Sölal binom yufal e dalival obik.«

8. Komipolöd, äso soldater brafik! ed, if pökol sotimo sukü fiböf: konleadolöd nämis stenüdikum, ka jünuikis, e konfidolös bene gretikum Oba! Kautolöd mödo tefü vanik iteplid e pleitäl! Kodü ats mödikans padukoms in pölubi, e faloms sotim in bleinäli nesanamik ti. Deùl at pleitälanas, konfidöl okes stupiko, binomöd ole kaütam ä moned al miugi laìk!

Kapied 7. Muton, sävön beni disü jel miuga.

1. Sölal. — O son! frutölum ä sefikum binos ole: sävön beni devoda, no vedön pleidik, no pükön mödikosis dö ben, e no luglorön; sod iti nestümönok, e dredön, das ba pegivom-la nedigane. No dalom, lenlagön tu fimiko fekäle at, bi kanom, vifo pavotön in tadili. If binol in ben: tikolöd, vio misalöfik e pöflik laidunol, binön nenü ben! — Fästep tikälnik no siudom in atos te, das labol beni troda, sod id atoso, das bena mosumi sufolös miugik, fenonamo, e sufädo: os binos, das tän no vedolös lavik tefü zil pleköna, e das no luleadolös lefulno vobädis votik, kelis elaidunol mekön; sod das ma näms e kapälüb dunolös viliko, kelosi kanol, e das no luleadolösok lefulno kodü neluimäl e trepöf ladäla.

2. Ye mödikans binoms, kel foviko vedoms nesufädöl u nedutliks, if bos no plöpos ma vip. Ibo veg mena no binom vätimo in mekäd oma, sod binos git Goda, givön benis e trodis, kü vilom, viomödo vilom, e kele vilom, ma plid Oma, e no votiko. Ans nekautik edeülomsok it sukü ben devoda, bi eviloms, dunön mödikumosis, ka ekanoms, no vätöls mafi näma okas, sod sukölso umo zile lada, ka cödäte lisäla. E, bi evenüdoms dinis gretikum, ka eplidos Gode: demüs eperoms lesuno beni. Kels epladoms niemi okas ini sül: evedoms dalebik e pegeleadöls in pöflöf, dat, pemiugöls e pemeköls pöfik, lenadomsös flitön, no me flitäds okas, sod lekonfidön flitapenes Oba. Kels nogo binoms nuläbs, e nen plak tefü veg Sölala: ats kanoms nefikulo, pacitön e sturön, if no dunoms segunü konsäl manas kautik.

3. If viloms, sukön um oka tikäde, ka kredön votanes eplaköl: fin okas obinom risköfik, üf no leadomsok, dezugön de lenilud lönik. Seledo zidos, das uts, kel cedomsok aso sapikis, leadomsok miugo, dugön fa votans. Sap zenomafik ko miug e sev smalik binoms gudikum, ka divs gretik nolügas ko plid vanik. Binos gudikum ole, labön elosi lu, ka labön mödikosi, kelo kanolöv, pleidön. No dunom süenik saido, kel lügivomok lölik frede, e fögedom oka pöfi vönik e godidredi puedik, dredöli, perön beni pagetöl. I no kondidom tugik e sapo, kel timü täöf e plönöf alik temipom tuiko, e tikom ä konfidom lu tefü Ob, ka södomöv.

4. Kel men vilom, binön sefik tuvemo in tim püda: potuvom mödna tu säkurajöfik ä temipöl timü komip. If nololöv, aiblibön miugan ä mükik in ok, ed aigudiko mafükön, ä dugön oka tikäli: no falolöv also vifo ini risköf e sin. Binos konsäl gudik, das, üf tikäl ola binom paflämöl dubü zil saludik: betikolös, kelos ojenos, üf litäl at umogolom. Ed, if litäl uyilom: betikolöd, das okanom denukömön litäl, keli jü timi anik emosumob, al kaütön oli, e mödön Oba stimi.

5. Xam somik binom mödna frutikum, ka if ailabolöv läbikosi ma vil ola. Ibo melidots no binoms pövätöl segun atos, va ek labom mödikis dalitälamis u trodis, va binom eplaköl tefü bib, u pepladöl su stimalüeni geilikum: sod melidots binoms pövätöl segun atos, va ek binom pestaböl in miug veratik, e pedafulöl me godilöf; va sükom vätimo stimi Goda in desän klinik ä lefulik, va cedomok aso nosi, ä vo nestümom iti ok, e va fredom umo, panestümön e pamiugön fa votans, ka pastimön fa ots.

Kapied 8. Smadüvolödok iti loü God !

1. Dünel. — Kel binob püfin ä zenin, venüdoböx-lí, pükön Sölale? If düvobok aso gudikumi: ekö! datovolok ta obi: i sins oba givoms noelüdi veratik, kele no kanob, tapükön. Yed, if unestümob äd unosob obi, if ulivobok de lönik geidüv alik, ed ucedobok, äso binob, as püfini: täno ben ola pogivom obe, e litäl Ola binom nilik oba lade; tän i geidüv alik, sägo smalikün, podiesom in ledibi nonöfa oba, ed odeulom tenüpoì. Uso jonol obi obe; jonol, kelos binob, kelos obinob, e kelöpi ekömob; ibo binob nos, e no enolob osi. Üf paloveleadob oke it: ekö! täno binob nos e fiböf lölik; ab, if süpido lenlogedol obi: foviko vedob stenüdik, e padafulob me fred nulik. Vo, binos milagik vemo, das fa Ol patovob süpido, e palamob also beniko, kel paizugob disoì dubü bölad lönik.

2. Atosi dunom löf ola, kel, no pamelidöl fa ob, fokömom obe, yufom in neods lemödik obe, jelom obi ta risköfis gretik, ed, al pükön verati, savom obi se neläbs nenumik. Ibo, elöfobölok neleodo, edeülobok; abu süköl klinugo, e löföl Oli soelik, etuvob tog Oli ed obi, e sukü löf ediesobok dibumo in nonöfi. Ibo Ol, o svidikün! tölatol obi vem gudikumo, ka melidob, ä venüdoböv, spelön e begön.

3. Binolöd papliedöl, o God oba! bi, do digob nosi, Ola greladäl e gud nefinik zedoms nevelo, benodön menes, i nedanikes e pemofleköles veito de Ol! Levotälolöd obis al Oli, dat binobsös danik, miugans ä devodöl! ibo Ol binol salud, näm ä stenüd obas.

Kapied 9. Valikos binos pögeduköl ali God, as in zeili lätikün.

1. Sölal. — O son! mutob, aibinön ola zeìl geilikün ä lätikün, if levipol vo, binön beatik. Dubü desän at paklinom fek alik, kel suvo slopälom neleodik al oli ed al jafotis. Ibo, if sükolok it in sembalos: palunol ä sigälol foviko. Demüs gedukolös gledino valikosis al Obi, bi Ob binob ut, kel egivom valikosis! Cedolöd dinis dabalik, aso dekömölis se guedün! e klu valikos binos pögeduköl al Obi, as ini rig oka.

2. Smalikan e gretan, pöfikan e liegan kupoms vati lifik se Ob, aso se fonäl lifik; e, kels Obe dünoms libik ä viliko: ogetoms benis e denu benis. Ab, aikel vilomöv, famokön u fredön plä Ob in guèd sembal patik: at no pofimom in fred veratik, ladäl oka no poveitom, sod poneleadom e ponabom valniko. Dem atos mutol, lücödätön gudikosi nonik ole, e no läsevön valüde mena sembal; sod lücödätolöz valikosis Gode, nen kel men labom nosi! Ob egivob valikosis: vilob, gegetön valikosis, e flagob jalopüno danis.

3. Atos binos verat, dubü kel pafemofom glor vanik. Kö ben sülik e löf veratik unin’goloms: uso sembals glöt, nabam ladäla e lönilöf olödoms no. Ibo godilöf bevikodom valikosis, e veitom nämis valik lana. If binol vo sapik: ofredol in Ob soelik, ospelol tefü Ob soelik. Ibo nek binom gudik plä God soelik, kel mutom, palobön umo, ka valikos, e papliedön in valikos.

Kapied 10. Binos svidik, dünön Gode, nag enestümon voli.

1. Dünel. — Nu vilob, denu pükön, o Sölal! e no seilön. Vilob, pükön liles obika Goda, Sölala obik, ed obika regala, kel binom in sül. O Sölal! kio gretik binom möd olika svida, keli elesävol dredölanes Oli! Ye kis binol löfölanes Oli! kios dünölanes me lad lölik Ole! Vo nesepükik binom svid olika lenlogedäla, keli legivol löfölanes Oli! Ejonol üno svidi löfa olik obe dub atos, das obi, kel no äbinob, elemekol; das, ven epölob fagik de Ol, egedukol obi, al dünön Ole; e das edüdol obe, löfön Oli.

2. O fonäl löfa tenüpik! kisi sagoböd ole? Liko kanoböv, fögedön Oli, kel donleadolok, memön obi, sägo, nag edeiläfob ed edeulob? — Edunol dünele olik misaladi gretikum, ka espelom, ed egevol ote gretikumis beni e flenügi, ka emelidom. Okanoböv, bläfön Ole kiosi demü ben at? — Ibo no binos pagevöl valikanes, das, elüvöls valikosi, klemoms voli, e väloms lifi kleudik. Binos gretikos-li, das dünob Ole, kele dünön, jafot alik binom pabligöl? Dünön Ole, no dalos; jinön bos gretik obe; sod bufumo jinosöz gretik e milagik obe, das donleadolok, aso düneli lensumön obi so pöfik ä nedigiki, ed obi lasumön in numi dünelas pelöfik Ola.

3. Ekö! lönos ole valikos, kelosi labob, e kelo dünob Ole. Yed Ol votafleko dünol um obe, ka ob Ole. Ekö! sil e tal, kelis elemekol, al frutön mene: binoms löbik, e dunoms vädelso valikosis, aikelosis ebüdol. Yed atos binos nemödik; sägo lanales ebüdol, dünön menes. Abu valikos at pavükodos dubü jen, das it edonleadolok, dünön mene, ed esiagol, ogivönok it ome.

4. Kiosi givoböd Ole demü guèds valik mils at? Dasö kanobös, dünön Ole dü dels valik lifa obik! — Dasö binobös fägik, dünön digik Ole dü del bal luüno! Ibo digol vo düni valik, stimi alik, e lobi tenüpik. Binol vo Sölal obik, e binob Ola dünel pöfik, kel binob pabligöl, dünön Ole me näms valik, e dalob nevelo, vedön favik tefü lobön Oli. Vilob also, vipob also, e donleadolödok güvön, kelos defos obe.

5. Stim gretik, glor gretik binos, dünön Ole, ä nestümön valikosis dem Ol. Ibo beni gretik ogetoms, kel udisojedomsok viliko düne saludikün Ola. Uts otuvoms trodis svidikün Salutikäla, kels se löf al Oli uklemoms fredi midälik aliki. Otuvoms libi gretik tikäla, kels demü nem Ola ubetridoms vegi nabik, ed ulüvoms kudis volik alikis.

6. O Goda dünelüg lesumik ä freidöl, dubü kel men vedom vo libik ä saludik! O cala kleudika dün saludik, kel meni mekom leigiki lanales, plidöli Gode, jekiki diabanes e pökomedöli kredanes valik! O dün, digik palensumöna e paivipöna, dubü kel guedün pamelidom, e fred aibliböl pavöbom!

Kapied 11. Desids lada mutoms, paxamön e pamafükön.

1. Sölal. — O son! mutol, nogo lenadön mödikosis, kelosis no nog elenadol gudiko.

2. Dünel. — O Sölal, kiosi?

3. Sölal. — Ola desidi leodolös löliko segunü plid oba! no binolöz lönilöfik, sod zilolöd desidiko, fölön Oba vili. Desids suvo flämoms e stigoms levem oli; ye xamolöd, va pastigol demü stim obik, ud bufumo demü frut olik! If binob dunakod: obinol löliko kotenugik, aivio ulenleodob bosi; yed, üf bos olika levipa binos ino pesävöl: atos, ekö! binos kod, kel neleadom ä vetom oli.

4. Sikodo kautolöd, lenlagön tuiko deside lucödätik, nes ulilön oba konsäli, dat atosi latumo ba no bönidolös, u dat utos no miplidosös ole, kelos eplidos büo, e tefü kelos ezilol, äsif ebinosöv elos gudikum! Ibo no dalon, foviko sukön alike mofäle, kel jinom gudik; ab i no, deimön nekonsido fekäli alik tabinöli. Binos gudik, lejäinilön i gudikis steifamis e desidis, dat sukü tepäl no falonös in disipäli lada, dat no skanonös votikanis dubü täg neleodik, u dat no pakofudonös, e pasäkurajonös süpido dubü tadun votanas.

5. Ye muton, sotimo gebön mekädi, e tadunön manik deside sienlik; muton, no konsidön, kelosi midäl vilom, ud no vilom; sod muton, steifön bufum atosi, das mid, i tadunöl, binomös pedisojedöl tikäle! E mid mutom, papudön so lonedo, e pamüton in lenödöfi, jüs obinom löbik ali valikos, ed ulenadom, kotenugön me nemödikos, löföni balikosis, e no murön demü taikos.

Kapied 12. Dö sufäd e komip ta desidis badik.

1. Dünel. — O Sölal God! sufäd lezesüdom obe, äs logob; ibo dins taìk mödiks zidoms obe in lif at. Ibo, aivio sükob püdi: lif oba no kanom, binön nen komip e dol.

2. Sölal. — Also binos, o son! Ye vilob, das no sükolös püdi somik, kel no labom tentadis, u no senom täöfis; sod kredolöd, das i tän etuvol püdi, if ubinol paplägöl dubü glums valnik, e pabluföl me täöfs mödik! If sagol, das no kanol, liedön mödikosis: liko tän osufol fili klinamöpa? — De dins badik tel muton, välön egelo eli smalikün. Kluo, dat negetolös pönis tenüpik: steifolöd, demü God ledulön sufädo dinis badlik komikis! Li-niludòl, das mens volälik liedoms nosi, u nemödikosis? — Atosis otuvol no, ifi säkolöv stadölis läbiküno.

3. Ye laboms, pükol, yofis mödik, e dunoms ma vil lönik; demüs senoms nemödo glumis.

4. Ludas laboms valikosi pavipöl: abu lio lonedo, liko kredol, odulos? Ekö! bundemans in vol odepuboms, äso smok, e mem nonik fredas egegolöl oblibom. E sägo dü lifatim no juitoms takedik otis nen bied, fav e dred. Ibo se din öt, me kel mökoms okes fredodi: pön dola vedom otes no seledo. Git jenom otes, das no juitoms nen kofudam e bied fredodis, kelis sükoms neleodiko, e keles sukoms. Fredods valik at binoms kio blefik e doböls, ki-neleodik e jemodiks! Ye volälans no kapäloms atosi sukü yofanirod e bleinäl; äso nimafs nelisälik kosgonoms deile lana kodü fredod smalik lifa golenik. Sikod ol, o son! no posgonolöz desides olik, e klemolöd vili lönik! Fredolöd in Sölal, ed ofölom ole vipis olika lada!

5. Ibo, if vilol, vo pafreidön, e patrodön liegliko fa Ob: ekö! in nestüm volikosa valik, ed in klemön fredodis bapik alikis obinom läbäd olik, e trod bundemik pogivom ole. E plu fagolok de trod alik jafotas: pluo trodis svidikum ä stenüdikumis otuvol in Ob. Yed omis begino no orivol nen lüg sembal e töb komipöna. Kustöf ninvulik tadunom; ye pobevikodom dubü kustöf gudikum. Mid omurom; abu polejäinilom dubü zil tikäla. Serpentaf vönik ovenudom oli, ed omökom biedis ole; ye pomofom in fugi me plek; alos gleningol pakearom ote dubü vob frutöl.

Kapied 13. Aso nödan miugik, lobedolöd segunü sam ela Yesus Kristus !

1. Sölal. — O son! men vilöl, seyilön lobede, seyilom bene; e, kel sükom oke patikosi: perom valemikosi. If ek no disojedomok libaviliko löpane oka: jonom, das midäl oka no nog lobedom ome lefulno, sod das mid tadunom e gemurom mödna. Demüs lenadolöd, disojedönok vifik ola löpane, if vipol, disoyokön midi lönik! Ibo neflen senedik pabevikodom vifumo, üf men linedälik no binom palerüböl. Lane no binom neflen plönikum e badikum, ka ol it, if no baivögol ko tikäl. Zesüdos nestipo, das nestümolok iti veratiko, if vilol, bemasanön midi e bludi. Bi löfolok nog tu neleodiko: demüs tasteifol, loveleadokön lefulno vile votanas.

2. Ye, dunol kisi gretik, if ol, binöl püfin ed un nos, disojedolok demü God mene, du Ob, Vävalüdal ä Geilünal, kel elemekob valikosis se nos, edisojedobok miugik mene dem ol. Evedob El miugikün e disikün valikanas, dat bevikodolös pleitäli ola dubü miug oba. O püfin, lenadolöz lobedöni! O talin ä tain, lenadolöd miugokön, e blegönoki disü futis valikanas! Lenadolöd, blekön oka vili, e binön löbik lenödöfe alik!

3. Zilolöz ta oki, e no dälolöd pleitäle, lifön in ol; sod oki mekolös sovemo nödiki ä smaliki, das valikans kanoms, nidesgolön su oli, ed oli ditridön, äso miotini sütas! Demü kios plonol, o men nosik? Liko kanol, o sinel mitoik! tapükön slanölanes oli, kel enofol lemödna Godi, ed emelidol lesuvo höli? — Ye, bi lanäl olik ebinom kostik Obe: logäl obik espalom oli, dat lesevolös löfi Obik, ed aiblibolös danik demü benods Oba, dat kösekolösok lefulno lenödöfe veratik e miuge, e dat sufolös sufädo panestümöni ola.

Kapied 14. Medidobsöd cödätis klänik Goda, dat no vedobsös pleitälik demü gudikos!

1. Dünel. — O Sölal! tötol me cödäts olik ove ob, e dalemufol lögapis valik oba dubü dred e drem, e lan oba pajeikom vemo. Stadob lestunik, e betikob, das süls no binoms klinik in logäls ola. Bi, etuvöl in lanals badi, no espalol omis: kios ojenos obe? Steläls efaloms de sül; ed ob püfin rogob kisi? — Uts, kelas vobäds ejinoms lobadigik: esrutoms in ledibi; ed äfidölis bodi lanalas elogob klietölisok me trebuks doma’svinas.

2. Sikodo saludugäl nonik binom, if Ol, o Sölal! gezugol Oka nami. Sap nonik frutom, üf zedol dugöni. Stenüd leno yufom, if finol, konsefön oti. Pued nonik binom sefik nen jel Ola. Lönik galöf leno frutom nen galug saludik Ola. Ibo, sosus palüvobs: disobs e deulobs; ab, if visidol obis: täno pasusilüodobs, e lifobs. Binobs dido nelaidöfik, ye pafimobs fa Ol; binobs lavik, ye paflämobs fa Ol.

3. O! mutob, tikön kio miugik e nestümo dö ob! Aso kio pülikosi mutob, cedön gudikosi, keli jinob labön! O! ki-dibiko mutob, disojedönok nödü cödätis Ola nedakodikis, in kels no tuvob votikosi bos tefü ob, kas binob nos e denu nos. O bölad nemaflik! o mel, kel no kanom, padusvimön, ed in kel no tuvob bosi votik dö ob, pläs binob lefulno nos! Kiöp nu plad glore? Konfid pepladöl in oba tugi binom kiplad? — Vanik fam alik binom pafeslugöl in ledibi cödätas Ola tefü ob.

4. Mid valik binom kis logsü Ol? Taimin odatovomok-li ta fomeli oka? Men, kela lad binom vo padisojedöl Gode: liko kanom, pleidön me lupükot vanik? — Lölik vol pleidiki no mekom uti, keli verat edisojedom oke; e men, estaböl speli lölik oka in Godi, no pomufälom dubü mud lobelas valik. Ibo lobölans it, ekö, binoms nos! Odepuboms ko tonod vödas; abu Sölala verat oblibom tenüpoì. —

Kapied 15. Vio muton, kondidön tefü din padesidöl alik.

1. Sölal. — O son! tefü din alik pükolöz also: »O sölal! if Ole plidos: atos jenosöd also! O Sölal! üf tienos al stimi Ola: jenosöd in nem olik! O Sölal! if logol, das veilos obe, e lesevol, das frutos: täno dälolös obe, gebön dini at stimü Ol. Yed, if nolol, das binom dämik obe, e no frutöl salude lana oba: mosumolöd desidi somik de ob!« Ibo no desid alik kömom de Salutikäl, ifi jinomöv gitik e gudik mene. Binos fikulik, cödätön veratiko, va tikäl gudik, ud votik stigom oli, desidön atosis ud etosis, ud i va pamofol fa tikäl lönik. Mödikans ebinoms pecütöl fino, kels begino ejinoms pastigöl fa tikäl gudik.

2. Sikodo levipolöd, e desidolös egelo in Godidred e ladamiug utosi, aikelos plösenosok, aso dini desidigik tikäle! Mutol pato, ko fenonam vila lönik, lekonfidön Obe valikosis, e pükön: »O Sölal! nolol, vio binos gudikum; atos ud etos jenosöd, äso vilol! Givolös, kelosi vilol, vio mödikosi vilol, e kü vilol! Dunolöd ke ob ma ced olik, ed also, äs plidos ole mödumo, ä stim ola vedom gretikum! Pladolöd obi, köi vilol, e bitolös libik ke ob tefü valikos! Binob in nam Ola: zitulolöd e flekolöd obi! Binob Ola dünel, löbik valikoses. Ibo no desidob, lifön obe, sod Ole; dasö dunobös digik e lefulo atosi!«

Plek, dat kanonös, befulön vili Goda.

3. Gevolöd obe, o Yesus gudlikün, beni Ola! Binomös ke ob, vobomös ke ob, e blibomös ke ob jü fin! Givolöd, das ailevipobös, ed aivilobös utosi, kel binos lesumikün e plidikünos Ole! Vil Olik aibinomöd vil obik, e vil obik aisukomös olike, ä baivögomös lefuliko ke ot! Elos vilön e no vilön oba binosöd os-bal ko vil Ola! Dasö kanobös, vilön e no vilön nosi votik, ka Ol vilol e no vilol!

4. Gevolöd obe dedeilöni valikose, kel binos in vol, dat dem Ol löfobös panestümöni, e bliböni nebesevik in vol! Givolöd, das takedobös um in Ol, ka in valikos votik, kelosi kanob desidön, e das oba ladäl tuvomös in Ol püdi! Binol püd veratik lada, Ol soelik binol taked. Plä Ol, valikos binos plönik e muifik. Ebo in püd at, os binos, in Ol, el soelik gued geilikün ä tenüpik, vilob nüslipön, e takedön. Jenosöd!

Kapied 16. Muton, sükön trodi veratik te in God.

1. Dünel. — Aikelosis kanob, fliagön e tikön al oba trodi: atosis valik no valädob iso, sod in olif. Ifi laboböv soelik trodis alik vola, e kanoböv, juitön fredis valik: zelädö, no kanomsöv, dulön lonedo. Demüs, o lan oba! no kanol, patrodön lefulno, e paklietön lefuliko, plä in God, kel trodom pöfikanis, e lasumom miuganis. Varolöd dü tim nemödik, o lan oba! varolöd befulami siaga godik!: ed olabol bundemo in sül guedis valik. If steifol tu neleodo guedis komik: operol tenüpikis ä sülikis. Gebolöd timlikosis; abu steifolöd tenüpikosis! No kanol, pasatön dubü gued timlik sembal; ibo no binol palemeköl, al juitön otis.

2. Ifi labolöv guedis palemeköl valikis: no kanolöv, binön läbik e beatan; ibo in God, elemeköl valikosis, löliks läb e beat ola siudoms. No binoms somik, kelis löfans stupik vola niludoms ä loboms; sod binoms somik, kelis kredans fiedöl Kristusa valädoms, e tefü kels biseguti laboms sotimo kredans tikälnik ä ladakliniks, kelas täg binom sülik. Trod alik menas binom vanik ä blefik. Trod ut binom beatöl ä veratik, kel pagetom linedälo dubü verat. Men devodöl polom vätopo ke ok trodali oka, Yesusi, e pükom Ote: »Yufolöd, o Sölal Yesus! obe vätopo, ed aì! Atos binosöd trod obe, das vilob, klemön viliko trodi alik menas! Ed, üf Ola trod udefom obe: cödiks vil e xam ola binomsöd trodün oba! Ibo, no ozunol laiko, ed id otädol no tenüpoi.« —

Kapied 17. Kud alik binom pöloveleadöl Gode.

1. Sölal. — O son! leadolöd obi, dunön ke ol, kelosi vilob! Nolob, kelos ole veilos. Tikol, aso men, cödätol in mödikos, äso slopäl menik büvödom.

2. Dünel. — O Sölal! binos veratik, kelosi pükol. Kud Ola ple ob binom gretikum, ka kud valik, keli kanob, it gebön ple Ob. Ibo men, kel no loveleadom oka kudi valik Ole: stadom nesefik vem. O Sölal! bitolöd ke ob, ailiko uplidos Ole, bisä vil obik aiblibom fimo palüodöl al Oli! Ibo valikós, kelosis udunol ke ob: kanos, binön te gudik. If vilol, das binobös in daegäls: binolöd papliedöl! Ef üf vilol, das binobös in litäl: denu binolöd papliedöl! — If donleadolok, trodön obi: binolöd papliedöl! Ed, üf vilol, das liedob glumis: leigo binolöz papliedöl!

3. Sölal. — O son! if vilol, tägön ke Ob: mutol, kondidön also: mutol, binön sövemo löbik liedöne, ka fredöne; mutol, söviliko binön dalebik e pöfan, ka bundemöl e liegan.

4. Dünel. — O Sölal! vilob, liedön viliko dem Ol, aikelosi vilol, das zitosös obe. De nam Ola vilob, lensumön lindifo gudikosis e badlikosis, elosis svidik e biedik, yöfölosis e glumölosis, e danön plo valikos uzidöl obe. Plesefolöd obi ta sini valik: ed odredob ni deili, ni höli! — Bisäs obi no fejokol tenüpoi, ed i no nösol de buk lifa: täno din nonik odämom obe, aikelos gluma udrefosöv obi.

Kapied 18. Segunü sam Kristusa muton, sufön leiladälo pöflöfis timlik.

1. Sölal. — O son! edonixänob de sül demü salud ola; pöflöfis olik elensumob, pemoföl no dub müt, sod sukü löf, dat lenadolös sufädugi, e sufolös pöflöfis timlik, nes zunön. Ibo lieds pösuföl no edefoms Obe des düp obika motöfa jü deili len kruzöm. Eliedob defi gretik tefü gueds timlik; elilob suvo kusadis mödik ta Obi; esufob gudälik lejemodi e kofi; egetob nedani demü benods, slanis plo milags, leblamis demü tidams.

2. Dünel. — O Sölal! bi ebinol sufädik dü lifatim Ola, fölolöl pato dub atos büdi Fata Ola: binos gidik, das ob, sinel misalöfik, sufädob ma vil Olik, e das demü salud oba polob, ünä vilol, böladi lifa deilik. Ibo, do lif komunik binom böladik: evedom deno lemelidöl dubü ben Olik; evedom obes fibik i mödo suflikum ä klülikum, dubü sam Olik e futavegeds saludalas. Binom i mödo trodikum, ka lif timü lon vönik, kü yan süla eibinom pekiköl, e veg ali sül ejinom i dagikum, sosä nemödikans esteifoms monargäni süla. Yed id uts, kel ebinoms tiemo cödik e pösavöls: no ekanoms, nin’golön in monargäni süla, bü lied e saisunam dub deil saludik Ola.

3. O! debob danis ki-gretik Ole, das edonleadolok, jonön obe, e kredanes valik, vegi stedik ä sefiki al monargäni tenüpik Ola! Ibo lif Ola binom veg obas, e dubü sufäd saludik tägobs al Oli, kel binol kron obas. Ifno ebigololöv, äd etidolöv obes vegi: kim steifomöv, sukön ote? — Agö! kio mödikans blibomsöv fagik e bäkivedo, ifno logomsöv Ola samis sikik! Ekö! nestü milags e tids pelilöl so mödiks, binobs deno lavik. Kis jenosöv, ifno labobsöv litäli so gretiki, al sukön Ole? —

Kapied 19. Dö sufam negita, e dö sevamals sufädana veratik.

1. Sölal. — O son! pükol kiosi? Medidolöd liedis obik e saludalas oba, e finolöd plonöni! No nog etadunol jü spilami bluda. Liedol nemödikosis feleigü uts, kel eliedoms so mödikosis, kel petentadoms e päbepedoms so vemo, kel ebinoms pevexadöl e paplägöls also mödliko. Demüs mutol, memön liedis vätikum votanas, dat sufolös leitumo liedis pülikum oka. — Ed, if jinoms no püliks ole: xämolöd, va nesufäd ola no binom en kod! Ye steifolöd, ledulön sufädugo valikosis, va binos-la pülik, ud vetikos!

2. Pluo binol löbikum, al liedön: pluo dunol sapumo, e melidol mödikumosis. Oledulol i nefikulumo, üf ubinol paprepadöl me lad vilik e plägams dutlik. No pükolöd!: »No kanob, sufön atosis fa men somik, e no dalob, sufön somikosis! ibo emekom dämi gretik obe, e leblamom obe dinis, kelis etikob nevelo; ye sufoböv vilik atosi fa votan, e soìn lesevoböv, das kanos pasufön.« — Meùg at binom nesapik, bi konsidom ni tugi sufäda, ni pösodali okronöl sufädugi; sod loigom bufumo pösodis noföl, e nofis pedaliedöl.

3. Ut no binom sufädan veratik, kel vilom, liedön te utosi, kelos ome plidos, e fa kel plidos ome. Sufädan veratik no konsidom, fa kel men pavexadom: va jenòs-lá fa löpan, ud leigan, ud pülikuman; va fa men gudik ä saludik, ud fa vädan ä nedigikan. Binos bufumo lindifik ote, täöfs vio gretiks, e vio mödna zidoms ome fa jafot semkimik; lensumom dano valikosis at de nam Goda, ed osis cedom, aso fruti legretik. Ibo lä God nos, nena elos pülikün, jenos nen melid, if liedon osi vo demü God.

4. Sikodo binolöd paplepadöl ali komip, if vilol, getön vikodi! Nen komip no orivol kroni sufäduga. If nevilol liedis: nevilol kroni. Yed, if vilol pakronön: komipolöd stenüdälik, ledulolös sufädo! — No orivon nen töb takedi, e no geton nen komip vikodi.

5. Dünel. — O Sölal! vedosöd mögik obe dubü ben, kelos obe jinos nemögik me näms natik! Nolol, das kanob, liedön te nemödikosis, e das pasäkurajob foviko, if täöf smalik kömom. Dasö xam alik me glum obe vedomös löfik ä viplik demü nem Olik! Ibo liedön, e pavexadön dem Ol: binos lesaludlik lanäle oba.

Kapied 20. Koefolöd fibi lönik, e misalöfis ata lifa !

1. Dünel. — Vilob ta obi koefön oba necödi; vilob besevamön fibi obik Ole. Bos pülik säkurajos, e glumos obi suvo. Desänob dido, blibön stenüdik; ye pababob vem, if tentad te zenomafik kömom. Binom sotimo din lepülik, dubü kel tentad gretik pakodom. E du niludob, binön ze sefik, bi no senob tentadi: tuvobok sotimo ti pabevikodöli dubü bläd leitik.

2. Demüs, o Sölal! loegolöd oba miugi e fibi, besevik Ole väflanso! Misaladolös, e desezugolös obi de släm, dat no blibobös niso stegöl, e no binobös pabäjedöl vätimoì! Das binob also döfik e fibik, al tadunön liedodes: atos obi vexados mödna, e bejemos logsü Ol. E, do no sisagob lefulno: deno vexad otas binom böladik ä plönik obe, ä binos vemo favik, somo lifön in feìt vädelso. Lesevob oba fibi se atos, das bitopäls ainaudikün lägleipoms obi mödo nefikulumo, kas yiloms.

3. O God västenüdik Yisraela, zilal lanas fiedik! loegolös töbi e doli dünela olik, e yufolös ome tefü valikós, kelosis ubeginom! Stenüdolös obi me näms sülik, dat sölügi no getomös men vönik, o. b. mid misalöfik, no nog padisojedöl lefulno tikäle, ta keli midi muton komipön, ünä natemon in lif misalöfikün at. Agö! kios binom lif at, in kel glums e misalöfs no defoms, e kö valikos binos fulik lesnalas ä neflenas?! Ibo, if bal lièd u tentad yilom: votik nakömom. Sägo, du komip balid dulom nogo: lieds e tentads mödumik votiks lükömoms, e süpido.

4. E liko kanom, palöfön lif, laböl liedis also mödikis, un lif, padisojedöl so mödikes yames e misalöfes? Liko kanon, lifi nemön utosi, kel pälos also mödnikis deilis e glupakis? — E deno palöfom, e mödikans sükoms, en fredön. Lublamon suvo voli, das binom-la cütöl ä vanik: e deno palüvom no nefikulo, bi desids mida söloms tu vemo. Binoms dins, kel mufäloms al volilöfi; yed i votiks, stigöl al nestümön voli. Al volilöfi zugoms desid mida, desid logas, e pleitäl lifa; abu pöns e misalöfs, cödo kömöls poso, päloms heti ä naudi tefü vol.

5. Ye, liedö! lanäl divodik vole pabevikodom dubü fred badik, e niludom, tuvön fredodis bevü spins, bi ni elogom, ni esmeikom svidi Goda, e lesumöfi linedik tuga. Ab uts, kel nestümoms lefuliko voli, ä steifoms, Gode lifön nödü pud saludik: ats sevoms svidi godik, pesiagöli utes, kel uklemoms känüdik voli. Logoms i klülumo, vio mödiko volef pölom, e vio pacütom valniko.

Kapied 21. Muton, bu valiks gueds e legivots, sükön takedi in God soelik.

1. Dünel. — O lanäl oba! bu valikos ed in valikos aitakedolöd in God, bi Ot binom taked tenüpik saludalas! O Yesus svidikün ä löfikün! gevolöd, das takedobös in Ol umo, ka in jafot alik! umo, ka in valiks saùn e jön, in aliks glor e stim, in valiks valüd e dinid, in aliks nolüg e tipäl, in valiks liègs e kanävs, in aliks fred e yof, in valiks fam e lob, in aliks svid e trod, in valiks spel e siagod, in aliks melidot e levip, in valiks givots e legivots, kelis kanol, gevön e nin’gifön; umo, ka in valiks lefred e yub, kelis ladäl kanom, dasumön e senön; fino, in Ol umo, ka in lanals e lelanals ä letrupef lölik süla, in valiks logikos e nelogikos, ed umo, ka in valikos, kelos Ol no binol, o God oba!

2. Ibo Ol, o Sölal, God oba! binol El gudikün bu valikos; binol soelik Geilikünal, soelik Valüdikünal, soelik Saidünal ä Lefulünal, soelik El svidikün ä trodikün, soelik Jönikünal ä Loflikünal, soelik Nobälünal ä Glorikünal bu valikos. In Ol guèds alik binoms leigüpo e lefuliks, eibinoms ed oibinoms. E sikodo valikos binos tu pülik ä nesaidölos, aikelosi plä Ol it legivol obe, u manifamol tefü Ok, u siagol, ifno logob, e labedob Oli lefulno. Ibo ladäl oba no kanom, takedön veratiko, i no kotenugön lölik, ifno takedom in Ol, e datovomok ovü valikis legivotis e jafotis.

3. O gamal löfikün oba, Yesus Kristus, löfal klinikün, Sölal jafotas valik! Kim ogivom flitädis liba veratik obe, dat äl Oli flitobös, ed in Ol takedobös! O! kiüp pogönos lefulnik obe, kosadön ke Ol, e smeikön, vio svidik binol, o Sölal, God oba!? Kitim okonleadobok also lefulniko in Ol, das sukü löf al Oli no senob obi, sod Oli te soeliki senob in mod, vükodöl valikis senami e mafi, keli modi no valikans sevom. Ab nu seifob suvo, e polob dolik neläbi oba, bi badliks dins mödik zitoms obe in nebel at yama, kels obi mödna kofudoms, glumoms e züdagoms; kels obi suvo neleadoms e disipoms, bätoms e fanoms, dat no labobös lügolami libik al Oli, e no juitobös lamamis lesumik, kelis aidälol tikäles beatik. Mufälomsös Oli seìf obik e netrod mödnik su Tal!

4. O Yesus, nid glora tenüpik, trod lana pexilöl! komü Ol mud oba binom nen vög, e seilön oba pükos Ole. Sölal oba lio lonediko zogom, kömön? — Kömomös al obi, pöfikani oka, e freidomös obi! Setenomöd Oka nami, e desezugomöd obi misalöfik se trep alik! — Kömolöd! kömolöd! bi noniks del u düp obinoms fredik nen Ol. Ibo binol fred obik, e nen Ol tab oba binom vagik. Binob misalöfik, e bido pefanüböl, e pelodöl me futajäns, jüs uklietol obi me lit olika koma, ed ulibol obi, ed ujonol loapi flenik obe.

5. Votans sükomsös votikosi pla Ol, aikelos omes plidos! Yed obe bos votik no plidos, e no oplidos plä Ol, o God oba, spel obik, salud tenüpik oba! Oseilob no, ed ofinob no begöni, jüs ben olik ugekömom, ed upükol obe linedälo.

6. Sölal. — Ekö! akömob! Ekö! ekömob, bi evokol Obi. Drens ola, e levip lana olik, oliks miugam e lebönid lada emufäloms Obi, ed elüdukoms al oli.

7. Dünel. — Ed epükob: »O Sölal! evokob Oli, ed elevipob, juitön Oli. Binob löbik, mojedön valikosis dem Ol; ibo balüdo Ol estigälol obi, al sükön Oli. Sikodo binolöd papliedöl, o Sölal! kel eblöfol, segunü möd olika misalada, gudi at dünele Oka! Dünel Ola kanom fovoì, pükön kisi komü Ol, pläs om, aimemik lönikas badöfa e nonöfa, miugomok vemo komü Ol? — Ibo bevü milagiks dins valik süla e tala, nonik binom leigik Ole. Vobäds Ola binoms legudik; cödäts Ola binoms veratik, e dins alik pairegoms dub Ola bülogam. Demüs ole, o Sap Fata! binomös lob ä stim! Oli lobomsöz mud oba, lan obik, e jafots valik leigüpo!«

Kapied 22. Memolöd benodis mödlik Goda !

1. Dünel. — O Sölal! manifolöd oba ladäli lone olik, e tidolös obi, tägön segun büds Ola! Gevolöd obe, das lesevobös Ola vili, e medidobös ko legrestim ä senid dutlik benodis Olik, ä valemo, ä pato, dat täno kanobös, danön digik plös Ole! Ye nolob e koefob, das no kanob, givön debikis lobi e dani, nena plo benod smalikün. Binob tu pülik feleigü gudikos valik peblöfölos obe. Ed, if loegob Ola nobäli: tikäl oba pakofudom demü gret ata nobäla.

2. Dins valik, kelis labobs in lan ed in koap, kelis labedobs senedo ud linedälo, nato ud lovünatiko: binoms Ola benods, ed Oli famoms, aso benodali, meilädali ä gudali, fa kel egetobs gudikosis valik. Do balan egetom plui, e votan elosi lu: deno valikos lönos Ole, e nen Ol ek nena kanom, labön dini smalikün. Ut, kel ugetom mödikumosis: no kanom, famokön, das melidom osis; i no dalom, datovälönok ovi votanis, e nestümön pülumanis. Ibo ut binom gretikum ä guduman, kel lücödätom luni oke it, e binom miugikum ä devodölum in danisagön. Ed, aikel cedomok, as eli negretikün ä nedigiküni valikanas: at binom fagikum^[1] getöne benodis gretikum.

3. Ab if ek egetom lui: no dalom, vedön lügik, ni zunön, ni glötön utis, kel egetoms plui; sod södom bufumo, konsidön Oli, e lobön levemüno gudi gretik Ola, kel legivotis Ola seidilol so bundemo, so glato e viliko, nes konsidön pösodanis. Valikos kömos de Ol, e demüs binol pöiloböl in valikos. Nolol, givot kiomik veilom alikane; ed elos becödätön kodis, demü kels at egetom plui, e votan lui: no binos git obas, sod Ola, lä kel melidods dabalikanas binoms pelonöl.

4. Demüs, o Sölal, God! i cedob as benodi gretik, if ek no labom mödikosi, nidöl senedo, e blinölosi lobi e stimi lä mens. Sikodo men, loegöl pöfi e bapi pösoda oka, senomös dem ats ni plöni, ni lügi, ni smakurajöfi; sod bufumo gretikis trodi e fredi, bi Ol, o God! aso flenis e domakopanalis edavälol Ole pöfikanis, miuganis ed panestümölis logsü volef! Noelans plös binoms postals it, kelis emekol plinis vola lölik. Etägoms in vol, nes plonön; ebinoms so miugik e balikäliks, nen aliks badnöf e käf, sos edredoms sägo, liedön lejemodi demü nem Olik; e kelosis volef naudom: atosis elensumoms me ladäl fredik.

5. Sikodo nos freidosöz sovemo meni löföl Oli, e sevomöli benodis Ola, äs jen, das vil olik, e plid lenleodama tenüpik Ola paföloms in om. Tefü lenleodam at mutom, binön sovemo kotenugik ä patrodöl, das vilom, binön also viliko pülikün, äso votan vipom, binön gretikün; das binom so takedik ä kotenugöl su plad disikün, äso su löpikün; mutom, binön so viliko nestümik ä pafejoköl, i nebesevik ä nefamik, äso votan vipom, in vol binön pastimölum e gretikum, ka votans. Ibo vil olik, e löf ali stim Ola mutoms, vükodön valikosis, plu trodön oti, ed ote plidön plu, ka valiks benods pegivöl, ud pögivöls ote.

Kapied 23. Dins fol blinoms püdi gretik.

1. Sölal. — O son! nu vilob, tidön ole vegi püda e liba veratik.

2. Dünel. — Dunolöd, o Sölal, kelosi sagol! ibo binos lesumik obe, lilön atosi.

3. Sölal. — Steifolöd, o son! dunön bufumo vili votana, ka oliki! Välolöd egelo, labön bufum elosi lu, ka oliki! Välolöd egelo, labön bufum elosi lu, ka mödikumosis! Sükolöz egelo pladi disikün, e binöni nödik valikanes! Aivipolöz e plekolöd, das vil Goda padunomös lefulno in ol! Ekö! men somik nütridom in stükäli püda e takeda.

4. Dünel. — O Sölal! pükat blefik at Ola ninom lefuläli gretik. Binom blefik vödso, abu fulik siäma, e liegik flukälso. Ibo, if kanomöv, pafölön fiediko fa ob: kofudam mutomöv, zidön no also nefikulo in ob. Ibo, alif stadob muifik e plönik: tuvob, das edeyilob de tidam at. Yed Ol, kel kanol valikosis, ed ailöfol fästepi lana: givolöd beni gretikum, dat kanobös, befulön vödis Ola, e bevobädön oba saludi!

Plek ta tikis badik.

5. Dünel. — O Sölal, God obik! no fagolösok de ob! O God oba! spidolöd, yufön obe, bi ovedoms in ob tiks valnik e treps gretik, glumöls oba lani! Liko osärönob nepaviodöl? ofemofob omis liko?

6. Sölal. — Vilob, golön bifü ol, e miugön pleitälanis vola. Omanifob yanis fanüba, ed omanifamob ole klänis pesävöl.

7. Dünel. — Dunolöd, o Sölal! äso pükol, e tiks badik valiks ofugoms komü loap Ola! Soeliks spel e trod oba binos: fugön in glum alik al Oli, konfidön Ole, lenvokön se linedälün Oli, e varön sufädugo trodami olik.

Plek, al getön dalitami ladäla.

8. Dalitolöd obi, o Yesus gudik! me klül litäla linedik, e femofolöd daegälis valik de löd obika lada! Viatolös tikis lüxamik mödikis, e moblinolös tentadis, lendunöl obe mekädi! Komipolöd stenüdik ple ob, bemütolöd nimis badik, os binos, desidis ludugöl, dat püd vedomös dubü valüd Ola, e lob bundemik tonomös Ole in tem saludik, o. b., in konsienäl klinik! — Ubüdolöd vienes e lustomes, upükolöd mele: »Takedolöz!« e nolüviene: »no vienolöz!« e stil gretik ovedom.

9. Sedolöd Ola litäli e verati, dat dalitomsös Tali, bi binob also lonedo glun vagik e neflukik, jüs udalitol obi! Gifolöd löpoa beni, dudranolös oba ladäli me töf sülik, seidilolöd devoda vati, al bevatön loapi Tala, dat pälomös flukis gudik e gudikünis! Datovolöd ladäli pepedöl dubü bölad sinas, e tanolöd levipi lölik oba len dinis sülik, dat, gütoböl svidi leläba sülik, senobös naudi, tikön talikosis!

10. Slütolöd obi len Oli, e moslütolös obi de valik trod nedulik jafotas! ibo din nonik palemeköl kanom, stilön e trodön lefulno levipi oba. Fetanolöd obi ke Ol dubü tan nedesnobik löfa, bi soelik saidol löfölane, e, plä Ol, valikos binos vanik e nosikos.

Kapied 24. Vitolöd, sevestigön nudäliko lifatägi votanas !

1. Sölal. — O son! no vilolöd, binön nudälik, e jäfön kudis nezesüdik! Atos ud etos oli tefos in kios? — Sukolöd Obe! Kioso tefos oli, at va binom-la somik ud votik, va et dunom e pükom somo, ud votiko? — No cötifolök plo votans, sod okalügol ple ol ot. Klu, küdol kikodo? Ekö! sevob valikanis, e logob valikosis, jenöl disü Sol. Nolob tefü alikan, vio stadom, kelosi tikom, kelosis vilom, e kelöpi desänäl oka zeilom. Demüs valikos binos pöloveleadöl Obe; ab ol, konsefolöd oke püdi veratik, e leadolös nejötikani jäfön, viomödikosis vilom! Ocötifomok tefü valikós, kelosis umekom ud upükom; ibo nek kanom, cütön Obi.

2. No kudolöd tefü nem gretik, kel binom te jad, ni tefü flenüg ko mödikans, ni tefü löf patik menas! Dins at päloms disipälis, e daegis gretik in lan. Viloböv, pükön vilik ole vödis Oba, e manifamön dinis pesävik, if vilolöv, senidön oba nakömi, e manifön Obe yani ladäla olik. Kautolöd, galolös in pleks, e miugolödok in valikos!

Kapied 25. Püd fümik lada, e fästep veratik in gudikos binoms in kios?

1. Sölal. — O son! esagob: »Geleadob oles püdi, givob oles püdi; ab oti no givob, äso vol givom.« — Valikans levipoms püdi; ye no valikans befuloms, kelos pafliagos, al getön püdi veratik. Püd Oba lönom menes, binöl lado miugiks ä sofiks. Püd ola potuvom in sufäd gretik. Üf ulenlilol Obi, ed usukol Oba vöge: okanol, juitön püdi gretik.

2. Dünel. — Kiosi mutob ibö, dunön?

3. Sölal. — In dins valik kautolöd tefü utos, kelosi dunol e pükol, e lüodolös ola desänälis valik al diseini, plidön Obe soelik, e vipön, u süköna nosi plä Ob. Ab i tefü pükots e dunots votanas no cödätolöd leitälik, e no kopligolödok in dinis no pakomidöl ole! e somo kanos jenön, das pakofudol nemödiko e seledo. Ye senön nevelo plöni sembal ladäla u koapa: no lälönos stade tima komik, sod stade takeda tenüpik. — Sikodo no kredolös!: das etuvol püdi veratik, if senol plöni nonik; das stadol gudik, if no labol nefleni; das binol lefulik, if valikos jenos segunü vip ola! I no cedolös, das binol bos gretik, u das palöfol pato, if senol gretikis devodi e svidi! Ibo löfölan veratik tuga no pasevom dub atos; i fästep e lefuläl mena no siudoms atoso.

4. Dünel. — In kios ibö? o Sölal!

5. Sölal. — In atos, das lovegivolok se ladäl lölik vile godik, das sükol olikosis in dins ni smalik, ni gretiks, ni in kom, ni in tenüp, sosä me loap leigik danisagol in zids läbik e taiks, e vätol valikosis su vätiel cödik. If binol also stenüdik ä ledulöl in spel, das, posü mosumam alika troda linedik, prepadol oka ladi, al sufön dinis sägo plönikumis, e das i no giatolok, äsif no debolöv, liedön atosis ed also mödikosis, sod Obi läsevol, aso cödiki tefü lenleodams valik, e pliedol Obi aso saludiki: täno tägol in veg veratik ä stedik püda, e kanol spelön nedoto, das odenulogol yubik Oba loapi. If urivol nestümi lefulnik oka it: nololöd, das tän ojuitol bundemi püda, soin mögos dü tevüp ola talo.

Kapied 26. Dö bizugöf ladäla libik, keli plek miugik melidom umo, ka lilädam dutlìk.

1. Dünel. — O Sölal! binos vobäd mana lefulik, das nevelo deflekom ladäli de steifön dinis sülik, e das bevü kuds mödik dugolom nekudlik bido, no sukü nesenöf, sod kodü bizug semik ladäla libik, lenlagöla jafote nonik me fekäl nepaleodöl.

2. Lebegob Oli, o God gudlikün oba! plesefolöd obi ta kudis lifa ät, dat no pakopligobös tuiko, ta neodis mödik koapa, dat no padagleipobös dubü midäl, ta neleadübis valik lana, dat no pabäjedobös pesäkurajöl dubü plön! No fliagob te, plesefolös obi ta dinis pasteiföl fekälüno fa volälans pleitik, sod obi plesefolös i ta misalöfis ut, kels, ma neläbäd valemik plo deilikans, vetoms e gekipoms pönölso lani dünela olik, sosä no kanom, nin’golön in libi tikäla, alif uplidos ome.

3. O God oba, svid nesepükik! in biedi ceinolöd obe trodi valik midäliki, kel dezugom obi de löfön tenüpikosis, ed obi bätom, liedö, al oki dubü bijonam sembala gueda komik yöföla! Mid e blud no bevikodomsös, o God oba! no bevikodomsöd obi! Vol e glor blefik oma no citomsöd obi! Diaban e lekäf oma no ludugomöd obi! Givolös obe stenüdi tadunöna, sufädi al liedön, laidugi al ledulön! Pla trodis valik vola, givolöd obe leüledami svidikün olika tikäla, e, pla löfi midälik, nin’gifolös obe löfi al Oka nemi!

4. Ekö! zibet, drinet, kleotot e dins lemänik, teföls kosidi koapa, binoms bölad tikäle zilik. Mekolöd, das gebobös mafugo medis somik, e das läì no lenlägobösok in desid tuvemik. No kanon, mojedön valikosis, bi nat mutom payüfön; ye lon saludik nedälom, steifön dinis nezesüdik, e somikis, kel yöfoms bizugo sienis; voto mid datovomövok ta tikäli. In atos regolöd obi dubü nam olik, e betidolöd obi, dat no lovetridobös miedi verätik!

Kapied 27. Lönilöf mokipom obis vemüno de guedün.

1. Sölal. — O son! al getön valikosis, mutol givön valikosis, e nos ola dalos blibön in ol. Nololöd, das lönilöf ole dämom umo, ka din sembal vola! Ma löf e fekäl, kelis labol dine, din at ole lenlagom umulu. If löf ola binom paklinöl, balik ä benoleodik: obinol slafan dina nonik. No vilolöd desidön, kelosi labön, no binos pedälik! No vilolös labedön dini, kel kanom, neleadön oli, e ravön libi linedik ole! Binos selednik, das se ladäl lölik Obe no lovegivolok sa valikosis, kelosi kanol, desidön u labön.

2. Kikodo pakonsumol dub lüg nefrutik? Kikod fenolok me kuds nezesüdik? — Loveleadolöd oli plide Oba, ed oliedol dämi nonik! If sükol atosis ud etosis; if vilol binön is ud us, al frutön um ole it, e sukön ola plide: tän obinol nevelo takedik, i no libik de kuds; bi def sembal patuvom in din alik, ed in top alik obinom ek tadunöl.

3. Sikodo noniks lab e mödam dinas senedik frutoms ole; sod frutos um, enestimön, ed eseslütön se lad otis ko vul. Konsidolöd atosis, noè tefü mon e liegs, soi tefü steifön stimis e levip loba vanik, kels valik fegoloms ke vol! Top jelom nemödo, if tikäl zila defom; e püd pasüköl senedo no dulom lonedo, if stab veratik defom stade lana olik, os binos, if no binol pestaböl in Ob. Okanol, cenön steböpi oka, nes gudomokön. Ibo, sosus ulensumol pöti pagivöl: otuvol kelosis efugol, ed otuvol sägo badlikumosis.

Plek, al getön klinami lada e sapi sülik.

4. Fimolöd obi, o Sölal! dubü ben Salutikäla! Givolös obe nämi, al pastenüdön tefü men linedälik, ed al vagön oba ladi de aliks kud nezesüdik e trep! Givolöd nämi, dat dubü desids valnik no palüslütobös al dini sembal, va binòm-la pülik, ud kostik! sod mekolöd, das dinis valik cedob, aso goleniks, ed iti ob, as ofegolöli leimodo ke ots! Ibo nos, binöl disü Sol, oblibos, kö valikos binos van e vexad tikäla. O kio sapik binom men, kel cödätom somo! —

5. Gevolöd obe, o Sölal! sapi sülik, dat lenadobös, Oli sükön e tuvön plu, ka valikosi, Oli gütön e löfön umo, ka valikosis, e becödätön dinis valik ma völad, keli laboms segunü lenleodam olika sapa! Givolöd, das seivegob visedik flätane, e sufob sufädugo tapükeli. Ibo binos sap gretik, das no pamufon dubü vien alik vödas, e das i no lenlilon tentadi flätöl käföfo; te somo fästepon sefik su veg pabeginöl.

Kapied 28. Ta linegis slänelas.

1. Sölal. — O son! no vedolöd favik, if ans tikoms badikosi dö ol, e pükoms, kelosi no lilol viliko! Mutol, tikön nogo badikumosis dö ok, e neki cedön fibikumi, ka oli. If dukol lifatägi linedik: no olägivol veüti gretik vödes fegolöl. Binos visedug no smalik, seilön timü täöf, e linedälo flekönok al Obi, e no pamuifön dubü cödät menas.

2. Püd ola no dalom, deslopön de mud menas; ibo, va seplänom ola dunis, aso gudikis, ud badikis: dem atos no binol men votik. Püd veratik e glor veratik binoms kiöp? — No in Ob-lì? Aikel no vipom plidöni menes, e no dredom, miplidön otes: at ojuitom püdi gretik. Ladäla muif alik, e disipam sienas licinoms se löf nepaleodöl e dred stupik.

Kapied 29. Vio muton, lenvokön e lobön Godi timü glum.

1. Dünel. — Nem Ola binomöd paloböl tenüpoì, o Sölal! kel evilol, das ats tentad e glum kömomsös obe! No kanob, säfugön glume, sod lefugobök al Oli, dat yufolös obi, ed oti flekolös obe al gudikosi. O Sölal! abinob in glum, e lad oba no stadom gudik; pavexadob mödo dubü lièd komik. E nu, o Fat löfik! pükön södob kiosi? — Binob palägleipöl väflansoa dubü treps. Savolöd obi se düp at! E demüs ekömob in düpi at, dat paglorolös, na, pamiugoböl vemiko, pulibob fa Ol. O Sölal! plidosös Ole, savön obi! ibo kiosi kanob dunön, ob misalöflikan, e kipladi kanob golön nen Ol? — Givolöd sufädugi, o Sölal, id atna! Yufolöd obe, o God obik! e tän odredob no, vio mödiko pubedränoböv!

2. E nu, in dinäds at sagoböd kisi? — O Sölal! vil Ola jenomöz! Emelidob vemo, paglumön e liedöni. Ledulobök aliko; dasö liedobös sufädo, jüs lustom ufegolom, ed uvedos gudikum! Ye nam vävalüdik Ola binom kanik, mosumön de ob id ati tentadi, e lunön ota mekädi, dat no pabevikodobös lefulno; ibo edunol büo mödna somo ke ob, o God obik, misalad oba! Lied plu plönikum binom obe: plu binos nefikulikum name Geilikünala, mekön votami.

Kapied 30. Dabegolöd yufi Goda, e konfidolös, das odenugetol beni!

1. Sölal. — O son! binob Sölal, stenüdöl delü glum. Okömolöd al obi, if ustadol no gudik! Lefugol tu lato al pleki, ed atoso trod sülik paneleadom levemüno. Ibo, büfä begol dranik Obi: sükol bevüno trodis mödik, e nänol me dins senedik. Atoso jenos, das valikos frutos nemödo, jüs ulesevol, das Ob binob ut, kel savob spelanis in Obi. Plä Ob no binom yuf stenüdik, no konsäl frutöl, ed i no savemed dulik. Yed, edenugetöl kurajöfi posü lustom, vedolöd denu nämik dubü lit misaladas Oba! ibo binob nilik ole (Sölal pükom), al gudükön denu valikosis, no te lefulno, sod sägo bundemo e kumiko.

2. Bòs-lí binos ba fikulik Obe? u sümob-li siagele, kel no dunom pesiagölosi? — Kiöp binom kred ola? Stanolös fimik ä ledulölo! Binolöd lonedälik e stenüdan! Trod okömom ole in tim lepötik. Varolöd Obi, varolöd! okömob ed osanob oli. Binom tentad, kel vexadom, e dred vagik, kel jeikom oli. Kudüb tefü fädiks odins blinom kiosi, pläs labol lügi e denu lügi? — Vexad lönik saidom dele alik. Binos vanik ä nefrutikos, paglumön, ud pafreidön demü dins füdik, kel ozidoms ba nevelo.

3. Ye binos menik, pacitön dubü fänots somik; e binos mal ladäla fibik nogo, if ek palüslütom so nefikulo dubü ninpükots neflena. Binos lindifik ate, va citom e cütom eki me dins veratik, ud döbiks; va bevikodom eki dubü löf al dinis komik, u me dred dem füdöls. Sikodo ladäl ola no pamuifomöd, e no dredomöz! Kredolöd in Obi, e konfidolöz Oba misalade! Üf niludol oli fagik de Ob: täno binob suvo vemo nilik. If ti valikosis kredol paperölis: täno kombinom suvo pöt konleadöna melidotis gretikum. Valikos no binos peperöl, if din zidom ta cedi ola. No dalol, cödätön segunü nilud komik; i no dalol, dubü plön sembal, aiköa kömom-la, padagleipön so vem, e cedön oti, as somiki, kelo spel valik pasavöna binom-la pemosumöl.

4. No vilolöd niludön, das binol-la palüvöl lefulno, if usedob ole plöni sembal dü tim anik, ud unegivob trodi pavipöl! ibo somo kömon al monargäni sülas. Ed ole, e düneles lemänik Oba binos nedoto frutölum, paxamön dubü täöfs, ka labön valikosis segunü plid. Sevob tikis pasävöl; e nolob, das veilos mödo salude olik, if paleadol sotimo nen güt tefü devod, dat ba no vedolös pleidik dem fästep gudik, e dat no vilolös, plidön oke demü bos, kelos no binol. Kelosis egivob: atosis kanob mosumön, e denu givön, üf uplidos Obe.

5. If givob bosi: blibos obikos; if gesumob osi: no mosumob olikosi, bi gudik givot alik, e lefulik legivot alik binoms lönub Oba. If usedob ole sembalis plöni u täöfi: no vilolös zunön, e lad ola no vedomöd nekurajöfik! Kanob, yufön foviko, e ceinön böladi lölik in fredi. Ye binob cödik, e ledigik plieda tefü valikos, kelosi dunob len ol.

6. If cödätol sapiko, e lesevol verati: mutol, nevelo lügön so nekurajik dem täöfs, sod bufumo fredön, e danisagön. Mutol sägo, cedön, aso fredi patik, das, glumöl oli me lieds, no spalob oli. »Äso Fat elöfom Obi, also id ob löfob olis,« epükob züpanes löfik Oba; ed omis leno esedob al fredis timlik, sod ali komips gretik; no al stimis, sod al panestümön; no al nosiduni, sod ali vobs, no al takedön, sod al pälön sufädugo fruti mödik. O son Oba, memolöd vödis at!

Kapied 31. Muton, konsidön jafoti nonik, dat kanonös, tuvön Jafali.

1. Dünel. — O Sölal! neodob vo beni nogo gretikum, üf kömoböz usi, kö men nonik e jafot nonik kanom, neleadön obi. Ibo, ünä din sembal ugekipom obi: no kanob, flitälön livik al Oli. Ut evipom, flitön liviko, kel epükom: »Kim ogivom obe flitapis, äso kolumbite, dat flitobös, ed otakedobös?« Kis binos takedikum, ka log balik? e kim binom libikum, ka levipölan nosi talo? — Sikodo muton, datovönok ovü jafotis alik, lefulno lüvön iti ok, e, stadöl in betikälam at ladäla, muton logön, das Ol, o Jafal valikosas! labol nosi sümik jafotes. Ed ek, ifno binom palivöl de jafots valik: no kanom, kösekönok libiko dines godik. Demüs nemödikans patuvoms duköl lifi medidöl, bi te nemödikans noloms, livokön lefulno de dins golenik e de jafots.

2. Al rivön atosis, ben gretik zesüdom, kel tovomök tikäli, e fäslütomök ove iti om. Ed, if men no binom tikälo pedatovöl, libik de jafots valik, e pebalöl lölik Gode: valikos, kelosi nolom, ed i labom: no völados mödikosis. Aikel as gretikosi düvom bosi, plä soelik guèd nemaflik ä tenüpik: at men oiblibom smalik e bäseitsöl. Ibo valikos, no binöl God, binos nos, e mutos pacedön, aso nos. Distinöf gretik binom bevü sap mena pedalitälöl ä devodöla, e nolüg klerana nolelik ä dutlika. Petidöf et, kömöl delöpoa se flun godik, binom mödo subimikum, ka ut, kel pavöbom töbo dubü tikäl menik. —

3. Modikans patuvoms desidöl givodi medidöna; abu no steifoms, dunön, kelos zesüdos, al getön oti. Binos nelead gretik, das blibon stanöl lä mals e dins sienik, e lägivon veüti smalik funälame lefulik. No nolob, kelos atos binos, fa tikäl kimik padukobs, e vio kanobs sekusadönok, das, pacedobsöl aso mens tikälnik, gebobs also gretikis töbi e kudi tefü dins golenik ä püliks, e das tefü stad linedälik tikobs te seledo me ladäl pekonleadöl lefulno.

4. Liedö! posü konleadam blefik spidobs foviko al dinis senedik, e no mekobs xämi jalopik tefü vobäds obas. No loegobs, kelose fekäls obsik lenlagoms, e no bedrenobs, das valikos in obs binos so neklinik. Ibo mid valik irübom oka vegi, e demüs sinatuvat gretik esukom. Klu, bi fekäls linedik lada binoms perüböl vemo: zesüdos, das dun pepälöl fa ots, aso noelan defa tefü näm linedälik, binom parüböl. Se lad klinik kömom flukäl lifa gudik.

5. Säkon, vio mödikosis un men emekom; abu no väton also kurato, kodü tug vio gretik dunom. Vestigon, va ek ebinom bravöfik, liegan, jönik, skilik, lautel gudik, kanidan gudik, vobel gudik. Vio pöfik tikälo, vio sufädöl ä meilädik, vio devodöl ä linedälik binom: tefü dins at paseilos fa mödikans. Nat konsidom senedikosis mena; ben flekomok al linedälikosi. Et mödna pacütom; at (ben) spelom in Godi, dat no pacütomös.

Kapied 32. Tefü itifenonam e funälam alika desida.

1. Sölal. — O son! no kanol, labedön libi lefulik, ifno fenonolok iti löliko. Valikans binoms pejänöl, kel sükoms lönikosis, e löfomsok neleodiko, os binos: ledesidans, nudälikans, zigolölans, ed uts, kel aisükoms koveni, e no, kelosi Yesus Kristus vilom; datikoms e beginoms mödna, kelos odulos no; ibo valikos, no licinöl se God, odeulos. Tönolöd ati peti blefik ä peläsevöli: »Klemolöd valikosis! ed otuvol valikosis; ulüvolöd desidis! ed otuvol takedi!« Süenolöd atosis gudiko! ed if ufölol osis, okapälol valikosis.

2. Dünel. — Atos no binos vob dela bal, ed i no pled cilas. Vö! in tid blefik at binom paninöl lefuläl valik menas tikälnik.

3. O son! no dalol, padeflekön, e no pasäkurajön foviko, if lilol bosi dö veg lefuläla; sod mutol bufumo, pastigön al dinis subimikum, e luüno seifön al omis levipo. Binolös somik, ed erivolös atosi, das, livik de lönilöf, binolös aivilöfik Obe, e fate pegivöl aso löpan ole fa Ob! täno plivolöv vem Obe, e lif ola fegolomöv lölik in fred e püdo. Labol dinis pölüvöl nogo mödikis. Ifno lefulno uloveleadol otis Obe: ogetol no, kelosi fliagol. Konsälob ole, remön lä Ob golüdi peklinöl filo, dat ogetolös liegis, os binos, sapi sülik, tridöli disü futis talikosis valik. Klemolöd sapi volik, e valikis plidi menas e löniki!

4. Esagob: »remolöd ole pülikumosi me dins, kel binoms kostik e bizugiks segunü ced menas!« Ibo veratik sap sülik, kel no cedomok, aso bosi gretik, e no sükom fami su Tal: pacedom, aso pülik ä smalik, e jinom pefögedön lefulno. Mödikans famoms me mud oti; ab in mod liföna baivögoms leno ke ot. Sap at binom deno magäb kostik, pasävöl mödikanes.

Kapied 33. Dö nelaidöf ladäla e ledesänäl pölüodöl al Godi.

1. Sölal. — O son! no vilolöd, konfidön afekäle olik! Sun povotom in votiki. Ünä lifol: obinol padisojedöl, i ta vili oka, votlöfe. Obinol nu fredöl, täno lügik; nu takedik, tän muifik; iso devodöl, uso nedevodöl; nu dutlik, tän nedutöl; nu fefik, täno leitälik. Abu men sapik e tikälno eplaköl stadom nemufik pötü votams at. No konsidom, kelosi senom in ok, u köa vièn nelaidöfa bladom; sod kudom, das desänäl lölik omika tikäla binomös palüodöl al diseini verätik e pevipöli. Ibo somo kanom, aistadön nevotlik ä nepedamuföl, üf log balik desäna gudik pailüodom äl Obi, pötü cenazids also mänifodiks.

2. Pluo klinikum binom log desänäla: plu stanälikumo golon da tepöfis difik. Ye log desäna klinik padagom mödna; loegon lesuno bosi lesumikos, kel kolkömos obes. Ibo seledo patuvom men, livik lefulno de sten taisüka. Somo Yudans ekömoms vöno ali Martha e Maria ini Bethania, no te demü Yesus, sod dat logomsös id eli Lazarud. Klu log desänäla binom pöklinöl, dat vedomös balikälìk ä stedik, e palüodomös al Obi, nestü difiks vüdins alik.

Kapied 34. God smekom plu, ka valikos, ed in valikos löfölane.

1. Dünel. — Ekö! o God obik ä valikos oba! kiosi mödikum vilob; e kanob, fliagön kisi läbikum? — O vöds smeknik ä svidiks! Ye te ute, kel löfom Vödi tenüpik, no voli, ed i no dinis binöl in vol. O God obik ä valikos oba! Vöds at saidoms sevane, e denuam mödnik otas binom lesumik löfölane. Ibo, if kombinol: valikos binos löflik; yed if mobinol: valikos naudos. Ladäli mekol takediki, e blinol püdi gretik ä fredi zälik. Bevobädol, das cödäton veräto tefü valikos, e das lobon in valikos Oli. Nen Ol din nonik kanom, plidön lonedo; yed, if bos södos, binön lesumik e smeknik: zesüdos, das ben Ola kömom, e das papitos me pitäl sapa olik.

2. Kis no smekosöv gudik ute, laböl güti len Ol? e kios kanosöv, binön lesumik ute, kel no labom güti tefü Ol? — Ye sapans vola, e mens löföl midäli deuloms loü sap ola, bi van gretik patuvom lä ets, e deil lä ats. Ab uts, kel me nestümön dinis volik e me funälam mida, sukoms Ole: paläsevoms aso sapans veratik, bi palovedukoms de van al verati, de mid al tikäli. God smekom ates; ed, al pliedön Jafali okas, geboms valikosi, kelos gudik patuvos in jafots. Ye distin gretik, sägo legretik, binom tefü güt len Jafal ud jafots, len tenüp id tim, len lit nepameköl, ud lit pameköl.

3. O lit tenüpik, vükodöl litälis palemeköl alikis! mekolöd lelitön geiloa stali, dudranöl linedi lölik obika ladäla! Klinolöd, freidolöd, leklülolös e belifolös oba tikäli sa näms oma, dat lenlagomös Ole in betikälam yuböl! — O! kiüp ukömom düp läbik ä pevipöl, kü osatol obi me kom Ola, ed obinol valikos in valikos obe! Ünä legivot at udefom: i fred obinom no lefulik. Men vönik, liedö! lifom nog in ob, no binom pakruzöl löliko, no binom edeilöl lefulno. Volutom vem nogo ta tikäli, bevobädom kligis linedälik, e no leadom in taked stükäli lana.

4. Ab Ol, kel sölol mekädi mela, e stilol mufi vatalubelas omik: datovolödok, yufolöd obe! Disipolös popis, kel viloms kligis, dirpedolöd otis me valüd Oka! Jonolös, begob, nämi gretik Ola, e nam Ola pagloromös! ibo ni spel votik, ni lefug binom obe, plä in Ol, o Sölal God oba!

Kapied 35. In lifüp at no binom sef ta tentadi.

1. Sölal. — O son! nevelo binol sefik in lifüp at; sod, ünä lifol, vafs tikälnik aizesüdoms ole. Nidesgolol bevü neflens, e palägleipol detoa e nedetoa. Sikod, üf no ugebol väflanso jildömi sapa: oblibol no lonedo nen vun. Zu, if in Obi no ustabol fimo ladi ola ko slud fümik, liedöna valikosis dem Ob: okanol no, ledulön komipi hitik at, ni rivön pami beatanas. Demüs mutol, dugolön manik da valikosis, e gebön nemi mekädik ta dinis tadunöl. Ibo manaèt pogivom uvikodölane, e misalöf gretik obinom nedutlane.

2. If sükol in lif at takedi, liko tän orivol takedi tenüpik? — No steifolöd takedi gretik, sod binolös löbik al sufädi gretik! Püdi veratik no sükolöd talo, sod in sül; no lä mens, ed i no lä jafots votik, sod in God soelik! Demü godilöf mutol, sufön viliko valikosis, os binos: vobi e dolis, tentadis e vexadis, trepi, misalöfi, fibis, niyurodis, tapükamis, blamis, miugamis, bejemamis, gijonamis e nestümis. Dins at födoms tugi, blufoms julani Kristusa, e mökoms kroni sülik. Ogivob mesedi tenüpik plo vob blefik, e glori nemaflik plo bejemod fegolöl.

3. Niludòl-li, das oilabol trodis tikälnik segunü vil ola? — Saludals oba no eilaboms somikis, sod plönis mödik, tentadis difik, e netrodis gretik. Ab eleduloms sufädugo, ed ekonfidoms umo Gode, ka okes, nolöls, das lieds tima ät no kanoms, pafeleigön ko glor tenüpik, keli melidon dub ots. Lí-òl vilol, labön foviko, kelosi mödikans egetoms töbo posü drens mödik e vobs gretik? — Varolöd Sölali, dunolös maniko, e binolöd stenüdälik! No mikonfidolöz, no geyilolöd, sod koapi e lanäli mekolöd sufölis al glori Goda! Obläfob liegiko; obinob ke ol in glum alik.

Kapied 36. Ta cödätis vanik menas.

1. Sölal. — O son! stabolöd oka ladi in Sölali, e no dredolös cödäti menas, if konsien oli läsevom devodöli ä nedebiki! Binos gudik e beatöl, liedön somo; ed atos obinos no fikulik lade miugik ä konfidöle umo Gode, ka oke it. Mödikans pükoms mödikosis, e dem atos kredonöd otes nemödo! Yed i nemögos, saidön valikanes. Do Paul sl. esteifom, plidön in Sölal valikanes, ed evedom valikos valikanes: deno eloigom lenemödo pacödätöni fa men.

2. Edunom plo dabumälam e salud votanas valikosi, kelose näms okik esaidoms; ye no ekanom viatön, das sotimo pecödätom e penestümom fa votans. Demüs elekonfidom tefü valikos Gode, kel esevom valikosis, e me sufäd ä miug ejelomok ta mudis sagöl badikosis dö om, ta datikels dinas vagik e neveradikas, e pakölis ma plid valnikosis. — Yed egesagom sotimo, dat fibälans no poskanomsös sukü seìl oma.

3. Kim binol, das dredol meni deilik? — Adelo binom, ed odelo no pubom. Dredolöd Godi! e no pojeikol dubü tädams menas. Kiosi men kanom me vöds u fligams ta oli? — Dämom um oke, ka ole; ed, osägonön cödöfe Goda, no kanom, aikel binom-la. Labolöd Godi bifü logäls, e no vilolös, feitön me plonavöds! If jinol nu, pabevikodön, e liedön lejemodi no pamelidöli: no zunolöd demüs, e no lunolöz oka kroni dubü nesufäd, sod süloi logolöd al Obi, kel binob kanik, savön oli de lejemod valik e fligam, e bläfön alikane segunü vobäds oma!

Kapied 37. Dö lovegivam känüdik ä lölik oka, dat getonös libi ladäla.

1. Sölal. — O son! lüvolödok! ed otuvol Obi. Klemolös väli ed aliki lönubi! ed oilabol en fruti. Ibo, sosus lovegivolok Obe, e no ugesumol oli: ben gretikum pogivom ole.

2. Dünel. — O Sölal! lio suvo divodoböz, e tefü kis lüvobözok?

3. Sölal. — Egelo e vädüpso; äso tefü smalikos, id also tefü gretikos. Sesumob nosi, sod vilob oli tuvön nüdiki tefü dins valik. Liko kanolöv voto, binön obikan, ed Ob olikan, if tefü lönavil no binolöv löliko peberavöl linedälo ä senedo? — Plu fovikumo udunol atosi: plu gudumo ostadol; e, plu lefulnikum e känüdumo ujenos: plu mödikumo plidol Obe, ed ogetol frutumi.

4. Ans divodoms Obe, abu ko sesum sembal; ibo no konfidoms lefulno Gode, e demüs sükoms, kudön it ple oks. Id ans suivitimoms begino valikosis; ye täno, pamoföls dubü tentad, gekömoms al lönikosi; dem atos fästepoms leno tefü tug. Ats no orivoms libi veratik lada peklinöl, e beni konfidlöfa lesumik Oba, if büo no udivodoms lölik, ed usuivitimomsok vädelso; nen atos juit klubama ke Ob no kanom jenön, ed ojenom no.

5. Esagob ole lemödna, e nu denusagob: lüvolödok, divodolös! ed ojuitol püdi gretik. Givolöd valikosis plo valikos! sesumolöz nosi, gefliagolöd nosi! lekonfidolös känüdik e nedodiko Obe! ed olabol Obi. Ladäl olik obinom libik, e daegs no ozüdagoms oli. Atosi steifolöd, atosi dabegolöz, atosi levipolöd, dat kanolös, palivön de lönikos valik, sukön pöfik Yesuse pöfik, deilön oke, e lifön Obe tenüpoi! Täno vaniks fänots alik, muifäls badik, e kuds nezesüdöl odepuboms. Tän i dred nemafik oyilom, e löf neleodik odeilom.

Kapied 38. Leodolöd gudiko dinis senedik, ed in risköfs lefugolös äli God!

1. Sölal. — O son! mutol, steifön dutlik atosi, das in aliks top e dun, u jäfam senedik, binolös libik linedälo, e labolös sölügi tefü ok it, das dins valik binomsös nödü ol, ed ol no nödü oms; das dunotas okik binolös söl e masal, no düne e no slafan; sod das binolös bufumo Yisraelan libik ä veratik, erivöl geri ä libi cilas Goda, kels, padatovöl ovi dinis komik, loegoms tenüpikis. Logoms dinis golenik me log nedetik, e sülikis me log detik, e no leadoms, lenzugönok dubü timlikos, al lenlagön ose; sod bufumo geboms osi al diseini gudik, keli labos ma lenleodam Goda, e ma desän Vobädünala, kel eleadom in jafots nosi nepeleodöl.

2. If i tefü zid alik no blibol stanöl lä jin senedik, ed if no xämol me logedäl midälik elosis pelogöl e pelilöli, sod tefü kudadin alik unütridol lesun ko Mosed in saludöpi, al säkön konsäli fa Sölal: tän olilol sotimo gesagi godik, ed osetridol pabetidöl tefü mödiks dins komüpik e füdiks. Ibo Mosed egolom egelo in saludöpi, al cödätön dinis dotik e säkis, ed elefugom egelo al yufi pleka, al deflekön risköfis e badnöfis menas. Also id ol mutol, lefugön in klänöpi lada olik, ed uso lenvokolöz lezilik yufi Goda. Ibo demüs Yosued e cils Yisraela pecitoms fa Gabaonits, bi no ebesäkoms büo mudi Sölala, sod, tu kredniks vödes flätöl Gabaonitas, pecütoms dubü kelied döbik.

Kapied 39. Men no binomöd tepik tefü kudadins.

1. Sölal. — O son! lekonfidolöd Obe kudadini olik! olenleodob gudiko in tim pötik oti. Varolöd oba lenleodami! ed en osenol fruti.

2. Dünel. — O Sölal! lekonfidob vilik Ole dinis valik oba, bi ninlogäl oba kanom, duinön nemödo. Dasö no kudübobös mödo tefü zids füdik, sod vitimobösok nezogöl plide Ola!

3. Sölal. — O son! suvo men jäfom vemo dini, keli levipom; yed, if erivom oti, beginom, cödätön votiko dös, bi slopäls ali din öt aiduloms no, sod bufumo mofoms obis de din bal al votiki. Sikod no binos din pülik, iti lüvönok in dins i smaliküns.

4. Fästep veratik mena siudom in fenonam oka it, e men, efenonöl iti, binom vemo libik ä sefik. Ye neflen vönik, tadunöl gudikose valik, no finom tentadöni, sod mökom bösulamis delo e neitso, dat kanomös, citön nekautani, ed oti kopligön in lesnalis. «Galolsöd e plekolsöd!« Sölal pükom, «dat no falolsös in tentadis!«

Kapied 40. Men labom nosi gudikosa se ok, e no kanom, famokön tefü sembalos.

1. Dünel. — O Sölal! men binom kios, das memol oti, u son mena binom kis, das visidol oti? — Men labom melidotis kiomik, das ote givolös Ola beni? O Sölal! kikod daloböv plonön, if lüvol obi? u kiosi kanob, osmatapükön gito, if no udunol, kelosi fliagob? — Vö! kanob verato, tikön e pükön: »O Sölal, binob nos, kanob nosi, labob gudikosi nonik se ob; sod binob nekanik tefü dins alik, ed aislopälob al nosi. Ed ifno ubinob payüföl e pabetidöl linedälo fa Ol: lölik ovedob lavik ä nepudik.

2. Ab Ol, o Sölal! aibinol ot, ed aiblibol tenüpoi gudik, cödik ä saludik. Valikosis dunol gudiko, cödo ä saludiko; lenleodol sapo valikosis. Yed ob, kel aislopälob umo gestepöne, ka fästepe: no blibob ailedulöl in stad ot, bi tims votomsok dü del velna tefü ob. Ab vedos foviko gudikum, if plidos Ole, e setenol nami yuföl. Ibo soelik kanol, yufön nen dun menik, e stenüdön somo, das stad oba fovoi no pavotom difiko, sod das ladäl oba paflekom äl Oli soelik, ed in Ol takedom.

3. Sikod, if noloböv gudiko, mojedön meniki trodi valik, uf al getön devodi, ud sukü zesüdöf, kelo pamofob, sükön Oli, bi no binom men trodöl obi: täno daloböv, spelön gito beni olik, e yubön demü legivot troda nulik.

4. Danob Ole, de kel gudikos valik licinos, aikelos pegivos obe. Ye binob van e nos loü Ol; binob men nelaidöfik ä fibälan. Sikod kanob, famönok demü kios, u kikod desidob, pastümön? Ba-li demü nos oba? Atos binosöv vanün! — Vö! fam vanik binom lupakam badik ä stupün, bi dezugom de stim veratik e ravom beni süla. Ibo men, üf plidom oke: miplidom Ole; if steifom lobis menik: ravom okè tugis veratik.

5. Abu stim veratik, e fred saludik siudoms in atos, das famonok in Ol, e no in ok; das fredon in nem Ola, no demü näm lönik; e das no sükon blesiri lä jafot sembal, ifno dem Ol. Nem Ola palobomös, obik no! vobäd Ola pagloromös, obik no! nem saludik Ola papliedomös, yed obe nos lobas menik palenlönosös! Binol stim ä fred obika lada. In Ol vilob, famokön ä fredön dü del lölik; tefü ob no vilob, famokön, plä demü fibs oba.

6. Yudans sükomsös stimi, balans fa votans! Ob osükob eli binöl te fa God. Ibo fam alik menas, timlik stim valik, geilug alik vola binoms van ä stup feleigü glor tenüpik Ola. O verat obik ä misalad oba, God oba, Kilbalodal saludik! Ole soelik aibinomöz lob, stim, valüd ä glor daü tenüpi lölik!« —

Kapied 41. Dö nestüms stima timlik alika.

1. Sölal. — O son! no binosöd plönik ole, if logol, das votikans pastimoms e pageiloms, e das ol panestümol e pamiugol! Datovolöd oka ladäli al Obi süloi! e nestüm menas su Tal no oglumom oli.

2. Dünel. — O Sölal! binobs bleinik, e paludukobs foviko dubü van. If xamob kuratik obi: tuvob, das negit obe pedunom nevelo fa jafot sembal, e klu no labob giti plonöna ta Oli. Ye, bi esinob suvo e vätiko ta Oli: jafot alik vafomok gito ta obi. Demüs bejemam e nestüm dütoms obe gito; yed Ole lob, stim e glor. Ed, if no uprepadobok al atosi^[2], das vilob, panestümön e palüvön viliko fa jafot alik, e sägo pacedön aso nos: no okanob, linedälo pastilön e pafimön, ni pa’dalitön tikälno, ni pabalön lefulniko ke Ol.

Kapied 42. Püd no binom pöstaböl su menis.

1. Sölal. — O son! if stabol ola püdi su meni sembal, bi labol oti meugi, e lifol ke om: obinol nelaidöfik e pakofudöl. Yed, if lefugol ali verat ailiföl e nevotliki: deil ud lüvam flena no oglumoms oli. Flenilöf mutom, binön pastaböl in Ob; ed aikel ole jinom tugik e vemo löfik in lifüp at: binom pölöföl dem Ob. Flenüg nen Ob binom nevöladlik e no dulöl; ed i löf, keli Ob no koyumob: no binom veratik e peklinöl. Mutol, edeilön somo slopäles somik al menis pelöföl, das, soin tefos oli, vipol binön nen zilak alik menas. Men, pluo fagomok de talik trod alik: pluo nilom Gode; plu disixänom dibikum in oki, e vedom pülik oke it: plu susixänom i geilumo al Godi.

2. Yed, aikel ulücödätom oke bosi gudik: oneleadom beni Goda, kömön al omi, bi ben Salutikäla aisükom ladi miugik. — If nololöv, nosön oli lefulno, e livönok de löf alik al jafotis: tän Oba ben oflumomöv lieglik ole. If loegol jafotis, lenloged Jafala pomosumom ole. Lenadolöd, bevikodönok demü Jafal in valikos!: tän okanol, lükömön al sevi Goda. Din alik, vio smalik binom-la, if neleodo palöfom e paloegom: mozugom de guedün, e stenom lanäli.

Kapied 43. Ta nolügi vanik e voliki.

1. Sölal. — O son! vödönabids jönik e japäliks menas no mufamomsös oli! Ibo monargän Goda no siudom in vöds, sod in tug. Loigolöd Oba vödis, kel flämoms ladälis e dalitoms kapäli, mekoms lebönidi dagalöl, e nin’gifoms trodi mödnik! Nevelo lilädolöd vödi al diseini, dat kanolös, jinön nol’anikum e sapuman! Steifolöz noesöni klimis, bi atos ofrutos ole umo, ka sev saekas fikulik mödikas.

2. If ulilädol ed usevol mödikosis: aigekömolök al eli Rigi bal. Ob binob, kel tidob nolügi menes, e givob miuganes sevi klülikum, ka kanom, pagivön fa men. Ut, kele upükob: obinom foviko sapik, ed ofästepom mödik tikälo. Paö utes, kel vestigoms fa mens mödikis dinis nudälik, e kudoms nemödo tefü veg, dünön Obe! Tim okömom, kü Masal masanas, os binos, Kristus, Sölal lanalas, opubom, meköl valikanis lukasagön sugivis omsik; os binos: okömom, al xämön alikana konsieni. Täno Yerusalem podusükom me litisävs, ed ovedos manifik, kelos binos pesävik in daegs, e blöfs linegas omuedoms.

3. Ob binob ut, kel timilo datovob somo lani miugik, das suemom mödikumosis dö liköfs verata tenüpik, ka men sembal, estudöl in juls dü yels bals. Tidob nen vöden, nen kofudam tikädas, nen magifod pleidik, nen feit blöfas. Ob binob ut, kel tidob, nestümön talikosis, naudön komikosis, sükön aidulölosi, gütön tenüpikosi, fugön stimis, sufön skanis, pladön speli valik in Obi, vipön nosi plä Ob, e löfön ladälafilik Obi umo, ka valikosis. —

4. Ibo ans, me löfön Obi ladafiliko, elenadoms godikosis mödik, ed enotoms dinis milagik. Efästepoms umo dub lüvön valikosis, ka dubü stud dinas japälik. Ye tidob dinis kustöfik balanes, patikis votanes; manifamobok anes pianiko me mals e mags, abu votanes manifamob me litäl mödik dinis klänik. Vöds bukas binoms öts plo valikans; ye no betidoms leigo valikanis, bi Ob binob ut, kel linedälo tidob verati, duvestigob ladäli, lesevob tikis, födob vobädis; seidilob alikane, maä tuvob gidiko.

Kapied 44. Muton, no slöpälönok len dinis senedik.

1. Sölal. — Binolök nenolik tefü dins mödik, e mutol cedönok, as edeilöli su Tal, ed aso meni, kele vol lölik binom pakruzöl. Mutol i, laböl lilis sudik, beigolön len dins mödik, e tikön umo len utos, kel födos ola püdi. Binos frutikum, deflekön logälis de dins miplidöl, e leadön niludami lönik alikane, ka beginön vödafeiti. If ustadol gudiko ke God, ed uloegol cödätis omik: osufol nefikulumo, das oli cedon pabevikodöli.

2. Dünel. — O Sölal! ekömobs kiöpi? Ekö! drenon demü däm timlik, vobon e gonon demü frut smalik; abu däm tikälnik pafögedom, e ti no pagudükom latumo. Loigon, kelos frutos nemödo u leno; abu luleadon, kelos binos vemüno zesüdik; ibo men lölik kösekomok dines senedik, ed, if no ugekömom fovik al lesevi: oblibom fredodo stegöl in senedikos.

Kapied 45. No kredonös valikanes! Pökon nefikuliko in vöds.

1. Dünel. — Givolöd, o Sölal! obe yufi in bedränüb! Ibo menayuf binom vanik. Kio mödna no etuvob uso fiedi, kö eniludob, labön omi! Kio mödna etuvob id us oti, kö lu eblesenob oti! Sikod elos spelön in menis binos vanik; abu salud cödikanas binom in Ol, o God! Binolöd papliedöl, o Sölal, God obik, in valikos, kel zidos obe! Binobs fibik e nelaidöfans; lesuno pacütobs e pavotobs.

2. Kim binom men, kel kanom, blibön also kautöl e zilogik tefü valikos, das sotimo no pacütomöv u pakofudomöv? — Yed aikel, o Sölal! konfidom Ole, e sükom Oli se lad balikälik: at no pökom also nefikulo. Ed, üf ufalom in glumi sembal, ailiko binomöx i pakopligöl: foviko podesezugom, u potrodom fa Ol, bi no lüvol aispelölis in Oli. Seledik binom flen fiedik, ledulöl in dränübs valik flena. Ol soelik, o Sölal! binol flen fiedikün in valikos, e plä Ol no binom flen somik.

3. O! kio sapik ebinom lan, kel esagom!: »Ladäl oba binom pafimöl e pastaböl in Kristus.« If stadoböv somo: menidred no dalemufomöv obi so nefikuliko, e vöds spinöl no dazünomsöv obi. Kim binom kanik, biselogön valikosis? Kim kanom, viatön badis füdik? Üf bads sägo pabiselogöls viodoms suvo: no-pabiselogöls odrefoms lio vem obis? — Ye kikod no ebükudob gudikum obe misalöfik? Demü kis ekredob id also nefikuliko votanes? Ye binobs mens, e nos votik, ka mens döfik, do fa mödikans pacedobs ä panemobs lanals. Kime kredoböd, o Sölal! kime plä Ol? Binol verat, kel no citom, ed i no kanom, pacitön. Abu men alik binom neveradel, fibik, nelaidöfan, döfik tefü vöds, sosä nena utos kanos, pakredön foviko, kel labos jini verata.

4. Ebisekaütol kio visedik, ven esagol, das kautonöz tefü mens, bi sägo domakopanans mena binoms-lá neflens omik, e das no kredonöz, if ek upükom: »Ekö! Kristus binom iso, binom uso.« Pebetidob dubü däm obik, e daso ga tienosös obe al kautumi, e no al stupi! — Ek pükom obe: »Binolöd kautik, binolöz kautik, konsefolöd in ol, kelosi sagob ole!« E, du seilob, e kredob, das valikos binos-la klänik, iet no kanom seilön, tefü utos, dö kelos efliagom seili de ob; sod tretom fovik obi ed oki, e mogolom. Jelolös, o Sölal! obi ta lupükelis somik, e menis also nekautikis, dat no falobös in namis otas, e dat nevelo dunobös somikosis! Givolös vödis veratik e stabikis in oba mudi, e fagolös de ob linegi lekäfik! Mutob, kautön vämodso tefü atos, kelosi no vilob, liedön.

5. O! binos kio gudik ä frutöl püde, seilön tefü votans, no kredön nedistino valikosis, no nefikulo konön veitumo pelilölosi, manifamönok nemödikanes, aisükön Oli, duvestigali ladäla, no pazimofön dubü vien alik vödas; sod vipön, das valiks linedälikos e senedikos jenosös ma plid olika vila! O, konseföne Goda beni med ki-sefik binos: fugön utosi, kel plidos loges menas, e desidön nosi, jinöl damufön senedo milägami; sod steifön me dut lölik utosi, kel givos gudumami lifa e zili! Kio mödikanes edämos, das elesevon, ed elobon bispidiko tugi omas! — Abu ki-frutik ebinos, das esävon seilo beni dü lifatim at, kel binom tentad laìk e kligadün!

Kapied 46. Konfidolöd Gode, if vöds slanöl papükoms ta oli !

1. Sölal. — O son! stadolöd fimik, e spelolös in Obi! Ibo vöds binoms kis, ifno vöds? Flitoms da luti; abu no viodoms stoini. If binol debik: tikolöd, das vilol, gudumokön viliko! If no tuvol in ok debi: tikolös, das vilol, liedön vilik atosi löfü Godi! Binos nemödik nogo, das sotimo sufol luüno vödis, kel no nog kanol, ledulön flapis vemik. Ed also pülikos kikod ole golos al ladäli, ifno demüs, bi nogo binol midälik, e konsidol menis umo, ka dütos? Ibo, bi dredol panestümöni: no vilol, pablamön demü pöks, e sükol jüli sekusada.

2. Ye xämoloköd gudikumo! ed olesevol, das in ol lifoms nogo vol e desid vanik plidöna menes. Ibo, bi fugol, pamiugön, e pabejemöni demü döfs: klülükos, das binol ni vo miugik, ni edeilöl veratiko vole, e das vol no binom pakruzöl ole. Ye, lilolöd oba vödi, e no oloigol vödis balsemil menas! Ekö! if valikos papükosöv ta oli, kanosövöl padatikön badnöfüno: kisis odämosöv ole, if uleadolöv valikosis, pafinön, ed osis uloigolöv no umo, ka glenaveadi? Lí-kanosöv, seslütön ole herapi i te bali? —

3. Ye men, kel no flekom ladäli linedoi, e no labom Godi bifü logäls: padalemufom nefikulo dub vöd blama. Abu, kel konfidom Obe, e no fliagom, lekonfidön cödäte lönik: obinom nen menidred. Ibo Ob binob el cödal ä seval klänas valik. Nolob, viomodo din ejenom, sevob negita duneli e sufölani. Pelenleodos somo fa Ob, ezidos dem lüleadam Oba, dat tiks ladas mödik vedomsös notik! Ocödöfob debikani ä nedebikani; ab evilob, xamön büo bofikanis dubü cödöf klänik.

4. Noelüd menas citom suvo; cödat^[3] Oba binom veratik; ostanom, e no padonijokom. Binom suvüno pesävik, e pasevöl nemödikanes in zid dabalik; ye pölom nevelo, e no kanom pölön, ifi jinom no verätik logäles stupanas. Sikodo pötü cödät alik muton, lefugön al Obi, e no lekonfidön cödäte lönik. Ibo cödikan no pokofudom, aikelos uzidos ote fa God. Ifi bos pusagos necödik ta oti: no oloigom osi mödiko. Yed i no ofredom vanik, if pasekusadom lisäliko fa votans. Ibo betikom, das Ob binob duvestigal ladas e loinas, kel no cödöfob ma düv menas e jin senedik. Ibo binos suvo pönik logsü Ob, kelos pakredos, aso loblik segun cödät menas.

5. Dünel. — O Sölal, GOD, cödal cödik, stenüdik ä sufädöl, kel nolol döfiköfi e badöfi menas! binolöd stenüd obik e letelod lölik oba, bi noelüd konsiena oba no saidom obe! Nolol, kelosis no sevob, e dem atos emutob, miugokön pötü blam alik, e ledulön sofugo. Pardolöd i benik obe, alifä no edunob somo, e givolös denu benì sufäduma! Ibo misalad mödlik Ola binom frutikum obe, al getön pardami sinas, ka cödug niludik oba, al giatön konsienäli pesävik oba. E, do no sevob debäli sembal in ob: deno no kanob, giatönok demüs; ibo lifölan nonik potuvom cödik komü ol, if umosumol misaladi Oka.

Kapied 47. Muton, sufön viliko plönis alik plo lif tenüpik.

1. Sölal. — O son! oli no fenomsös vobs, palovesumöl dem Ob, e glums no säkurajomsös lefulnik oli! sod siagod Oba stenüdomös e trodomöd oli tefü zid alik! Binob kanik, bläfön ovü modi e mafi valikosis. Ovobol is no lonediko; i no poivetol dubü plöns. Varolöd nemödiko! ed ologol lesuno fini dinas badlik. Düp okömom, kü vob alik e muifäl ofinoms. Valikos, kel fegolos ko tim: binos pülik ä blefikos.

2. Dunolöd, kelosi dunol! vobolös fiedik in vinabel Oba! obinob mesed ola. Penolöd, lilädolöd, kanidolös, seifolös, seilolös, plekolöd, sufolöd maniko täöfis! Lif tenüpik digom dinis valik atis, e komipis gretikum nogo. Püd okömom in del, kel binom besevik Sölale. Posü del at no sukom neit, äso jenos nu; sod litäl tenüpik, klül nefinik, püd pafimöl e taked sefik obinoms. Tän opükol no: »Kim olibom obi de koap deilik at?« — Id oluvokol no: »Paö obe! bi tim obika tevüga binom palonedöl!« Ibo deil postiurom, e salud no okanom, palunön. Uso trep nonik obinom, sod fred beatöl, zilak lesumik ä jönik.

3. Od! if elogolöv kronis tenüpik saludalas in sül, ed in vio gretik glor nu yuboms uts, kel pinestümoms pio fa vol, e picedoms bido nedigiks liföna: vo miugolövok foviko jü Tali, e desidolöv umo, binön nödik valikanes, ka cifön bale. I no desidolöv delis yofik in lifatim at; sod bufumo fredolöv, paglumön demü God, e läsevolöv, aso lefrutüni, pacedön aso nos bevü mens.

4. Od! if verats at ole plidomsöv, e dranomsöv dibik in ladäli: liko kanolöv, plonön i te balna? No-li södonöv, sufön demü lif tenüpik plönikosis valik? No binos din pülik, perön, ud lefrutön monargäni Goda. Sikodo datovolöd süloi logälis oka! Ekö, Obi, e ke Ob saludalis valik Oba, kels eleduloms komipi gretik in vol at! Nu fredoms, nu patrodoms, nu binoms sefik, nu takedoms, ed obliboms tenüpoi ke Ob in monargän obika Fata.

Kapied 48. Dö del tenüpa e bedränübs ata lifa.

1. Dünel. — O löd beatikün zifa sülik! O tenüpa del klilikün, keli neit no dagom, sod verat geilikün aibestalom! O del aifredik, aisefik, e nevelo votöl oka stadi in tadili! Daso ga del at ekömomös, e timliks dins valik at efinomsös! — Saludales dido litom me glorik klül tenüpik; ye tevölanes su Tal litom te fagoa, e bido in lok.

2. Sifans süla noloms, vio fredik binom del et; ye cils pexilöl jiela Eva seifoms, das del komik binom-la biedik e favik. Dels ata tima binoms blefik e badiks, pafulöl me dols e bedräbübs; talo men pastenom dub sins mödik, pazilesnalom dubü liedods mödik, pajänom me dreds mödik, pavexadom me kudadins mödik, padisipom dubü nudäliks dins mödik, pakopligom dubü vans mödik, pazümom me pölubs mödik, pabäjedom me vobs mödik, paböladom dubü tentads, pasänämom sukü luyofs, patomom dubü pöf…

3. O! kiüp obinom fin badas at!? Kiüp polibob de dünelüg misalöfik klimas? Kiüp, o Sölal! omemob Oli soelik? Kiüp ofredob lefuliko in Ol? Kiüp obinob nen neleadüb in lib veratik, nen bepedam alik lanäla e koapa? Kiüp obinom püd stabik, püd nedistukik ä paseföl, püd in linedäl ed in senedikos, püd fimik väflansoa? — O Yesus gudik! kitim ostanob komü Ol, al logön Oli? Kitim lenlogedob glori monargäna Ola? Kitim obinol valikos in valikos obe? O! kitim obinob ke Ol in Ola monargän, keli eprepadol tenüpoa pelöfanes Ola!? Binob pelüvöl, pöfan e pexilan in län neflenik, kö kligs vädelsik e neläbün söloms.

4. Trodolöd in xil obi, müdolöd oba doli! bi levip lölik oba seifom al Oli. Ibo valikos, kelosi vol lofom, aso trodi: binos bölad obe. Desidob, juitön Oli linedälüno; ab no kanob, rivön osi. Vipob, lenlagön dines sülik; abu dins timlik, e liedods no pafunälöl bäpedoms obi. In tikäl vilob, binön pageilöl ove dinis valik; abu dubü mid pamütob, binön padisojedöl ta vili oba. Somo ob, men neläbik, komipob ke ok; binob bölad oke it, bi tikäl zugom löpoi, e mid disoi.

5. O! linedälo liedob kimikosis, bi, du jäfob tikälo dinis sülik, kum tikas midälik nüdranom su obi dü plek. O God! no fagolösok de ob! ed in zun no yilolös de dünel Ola! Lejedolös oka lelitis, e disipolös tikis midälik! Desedolös sagidis Olik, e nin’givods valik neflena podeüloms! Flekolös sienis obik al Oli! mekolös, das fögedob volikis dinis alik! Gevolöd, das mojedob foviko, e nestümob bitopälis klimik! O verat tenüpik! yufolös obe, dat van nonik mufomös obi! Nakömolös, o svid sülik! e neklin alik fugomöd deü kombin Olik! I pardolös obe, e binolös misaladik, alifä tikob dü plek votikosis, ka oli! Ibo koefob känüdiko, das laidunob, binön vemo disipälik. Lemödna no binob uso, kö stanob ud siedob me koap; binob uso bufum, köi papolob dubü tiks. Binob uso, kö tiks oba binoms; uso tiks oba binoms mödna, kö binos, kelosi löfob. Utos bitopälosok fovik obe, kelos dafreidos nato, u plidos sukü kustöf.

6. Demüs Ol, o Verat! esagol sepetiko: »Kö binom div olik, us i lad ola binom.« If löfob süli: tikob viliko dö sülikos; if löfob voli: fredob tefü leläbs volik, e lügob demü täöfs^[4] omik. If löfob midi: fän bitopom obe suvo dinis midälik. If löfob tikäli: binos blesir obe, tikön dinis tikälnik. Ibo, aikelosi löfob: dö atos pükob e lilob viliko, e polob ke ob domoi magis dinas somik. Ye beatik binom men ut, kel dem Ol moyagom se ladäl jafotis valik, lendunom mekädi nate, e kruzom desidis mida dubü zil tikäla, dat me konsien yofik däblinomös pleki klinik Ole, e dat binomös digik kombinöna korefes lanalas, nag efagom linedälo e senedo talikosis alik. —

Kapied 49. Levipolöd lifi tenüpik; gueds gretik binoms pesiagöl komipölanes.

1. Sölal. — If senol, das levip al beati tenüpik panin’gifom ole delöpoa, ed if vipol, segolön se löd koapa, dat kanolös, lenlogön nen jad cenama obiki glori: täno veitolöd ola ladäli, e lensumolös me desid fulik nin’givami saludik ati! Blöfolöd danüni Gude godik, kel dunom also benik ke ol, visidom gudlik oli, stigom ziliko, datovom stenüdik, dat al talikosis no padonizugolös dubü vät lönik! Ibo atosis no rivol dub löniks medidöf u töbs, sod te me ben sülik e visidam godik, kelis egetol, dat fästepolös tefü tugs e miugum; dat prepadolösok al okomipis, e steifolös, lenlagön Obe me lada fekäl lölik, e dünön Obe me vil filik!

2. O son! fil mödna filedom; ye flam no xänom löpoi nen smok. Also desids anas flamoms süloi, e deno mens at no binoms livik de tentads slopäla midälik. Demüs i no dunoms se desänäl lefulno klinik plo stim Goda tefü dins, kelis fliagoms desidik fa Ot. Un somik binom suvo desid ola, tefü kel esagol, das binom-la levemik. Ibo utos no binos klinik e lefulikos, kel binos pastenöl dubü taisük.

3. Fliagolöd, no kelos ole binos lesumik e frutöl, sod kelos Obe binos plidik, ä födöl Oba stimi! Ibo, if cödätol verätiko: mutol, vipe olik, e dine padesidöl alik, bizugön lenleodami Oba, e sukön ote. Sevob ola desidi, ed elilob seifis mödnik. Vipolöv, binön ya nu in lib e glor cilas Goda; ya nu freidom oli dom tenüpa, e sülik fatän fulik freda. Ye düp at no nog ekömom; nogo tim votik binom nu, os binos: tim kliga, tim vobas e xama. Vipol, padafulön me guedün; yed atosi no kanol, nu rivön. Ob binob gued at, Sölal pükom; valädolöd Obi, jüs monargän Goda okömom.

4. Mutol nogo, paxamön su Tal, e paplägön tefü mödikos. Trod pogivom ole sotimo; ye satam fulik no pogevom. Sikodo binolöd stenüdik e nämik, äd in dunön, äd in sufön taikosis nate! Läkleotolök meni nulik, e pavotolök in mani votik. Dunolök mödna, kelosis no vilol, e lüvolök, kelosis vilol. Kelos votanes plidos: ozidos; kelos plidos ple: ojenos no. Kelosis votikans usagoms: polenlilós; kelosis ol upükol: pocedos, aso nos. Votans ofliagoms, ed ogetoms; ol ofliagol, ed ogetol no.

5. Votikans popliedoms fa mud menas; yed oseilon dö ol. Olenkonfidon atosis ud etosis votanes; ab ol podüvol pötöfik nose. Demüs nat poglumom sotimo, e bos gretik obinos, if upolol seilöl dinis at. In atos ed in dins sümik mödiks dünel fiedik Sölala laidunom, paxamön, dat pojonosös, vio mödiko binom kanik, fenonönok, e blekön vili lönik tefü valikos. Ti nevelo funälam binom also zesüdik, äso tän, if mutol, logön e liedön, kelos binos taik olike vile; yed üno tän, if büdon dinis, kels ole jinoms nelisälik e lu frutiks. E bi, pepladolöl nödü söl, no venüdol, tadunön valüde geilikum: dem atos jinos düfik ole, tägön segunü vil votana, e klemön cedi valik löniki.

6. Ye betikolöd, o son! fruti töbas at, fini lesunik otas, e mesedi legretik! e no olabol en kodi plonöna, sod trodamedi nämikün demü sufädug ola. Ibo plo fliagam smalik, nu libaviliko paklemöl fa ol, oilabol in sül vili lönik. Ibo us otuvol valikosis pulivöl, e valikosis, kelosis ukanol, desidön. Us olabol gudikosis valik nen dred, perön osis. Uso vil olik, aipebalöl ke Ob, ovipom no bosi votik, u bosi patik. Uso nek otadunom ole, nek oplonom tefü ol, nek oneleadom oli, nos osinos taik ole, sod dins pavipöl valiks obinoms leigüpo komik, ostiloms ed osatoms bundemo levipis valik ola. Us ogevob glori demü bejemod pesuföl, mäneoti stima plo lüg, siedi in monargän tenüpik demü plad lätikün. Us ogeton fruti lobedöna, töb bönida pomesedom me freds, e nödöf miugik pokronom glorik.

7. Sikodo nu blegolödok miugik disü namis valikanas, e no loigolös, kim esagom, ud ebüdom atosi! Ye tefü atos kudolöd lepatiko, das lasumol gudik, ä steifol, befulön me vil känüdik valikosis, kelosis uf löpan, ud yunikuman, ud leigan uflagom, ud uvipom de ol! Balan sükomös atosi, votan etosi! At famomödok tefü atos, et tefü etos, e palobomös balionenà! ab ol tadilo fredolöd ni dem atos, ni dem etos, sod in nestümönok iti, ed in soeliks plid e stim Obik! Atos binosöd vip ola, das God poigloromös in ol, va jenos-la dubü lifön, ud dubü deil! —

Kapied 50. Men netrodik lovegivomözok names Goda !

1. Dünel. — O Sölal God, Fat saludik! binolöd papliedön nu, e tenüpoi! Ibo, äso vilol, also ejenos; e kelosi dunol, binos gudik. Dünel ola fredomöd in Ol, e no in ok, i no in din votik! Ibo soelik Ol, o Sölal! binol fred veratik, spel obik e kron oba, yof obik e stim oba. Dünel Ola labom kiosis, plä kelosis egetom fa Ol? ed id atosis egetom nen melid oka. Olikosis binos valikos, keli egivol ed edunol. Binob pöfik ed in töbs des yunüp, e lan oba paglumom sotimo jü drenis; patrepom in ok i sotimo demü lieds füdöl.

2. Levipob fredi püda, fliagob püdi cilas Ola, kel panulüdoms fa Ol in litäl troda. If püdi givol, if nin’gifol fredi saludik: täno lan olika dünela obinom fulik yuba, e zilik, al lobön Oli. Yed, if ufagolok, äso dunol lemödna: dünel Ola no kanom, gonön vegi büdas Ola; sod mutom bufumo, blegön kienapis, e flapön su blötapi, bi no stadom, äs ädelo ed edelo, kü litäl olik estalom ove kap omik, e disü jad flitädas Ola pejelom ta tentadis lukitepöl.

3. O Fat cödik ä pöiloböl! düp ekömom, kü dünel Ola paxamomöz! O Fat pölöföl! binos gidik, das dünel Ola liedom in düp at bosi löfü Oli. O Fat pöilepleköl! düp ekömom, tefü kel enolol sis tenüp, das okömomöv, e das in ot dünel Ola pabevikodomöv senedo dü tim anik, ab ailifomöv linedäliko lä Ol. Panestümomöd boso, pamiugomös, e pabapomöd logsü mens! Padiröbomöd dubü lieds e fibs, dat denu suistanomös ke Ol in gödelared litäla nulik, e padafulomös me klül sülik! — O Fat saludik! Ol elenleodol also, ed evilol also, ed utós ejenós, kelosis ebüdol it.

4. Ibo binos ben plo flen Ola, das liedom e pavexadom demü löf al Oli, alifä e fa men aikelik leadol osi, jenön. Nen oliks slud e bülogam, e nen kod nos zidos su Tal. Binos gudik obe, o Sölal! das emiugol obi, dat lenadobös büdis Ola, e mojedobös valikis pleitäli e rogamis ladäla. Binos obe frutikos, das bejemam tegom oba loapi, dat sükobös bufumo trodi lä Ol, ka lä mens. Id elenadob se atos, dredön cödäti neduvestiglik Ola, kelo pudol cödikani e negodlikani, ye no nen gid e cödug.

5. Danob Ole, bi no espalol Obi esinöl, sod epudol me flaps biedik, sedolöl obe linedäloa e senedoa dolis e trepis. Bevü dins valik disü sil no binom bal, kanölöv, trodön obi, ifno Ol, o Sölal, God oba, sanal sülik lanas! kel flapol e sanol, disidukol in ledibi, e gedukol. Pud Ola pedom obi, e faed olik obetidom obi.

6. Ekö, o Fat palöföl! binob in nams Ola. Blegobok disü faedì olika gijonama. Flapolöd oba bäki e nökapi, dat ma vil Ola blegobös tadunöfi Oba! Mekolöd obi, aso julani devodöl ä miugiki, äso laidunol, dunön gudiko, dat tägobös segunü vineg alik Ola. Obi ed obikosis valik lovegivob Ole pögudumölis; binos gudikum, papönön iso, ka tenüpo. Dinis valik nolol valemo e pato, e nos in konsienäl mena binos pasävöl Ole. Enolol dinis füdik, büfä jenoms; e no zesüdos, das ek Oli betidom u mebom tefü dins zidöl su Tal. Nolol, kelos veilos oba fästepe, e viomödiko glum dünom, al mosuipön feraxüdi sinas. Dunolöd ke ob segunü plid olik, e no nestümolös obi dem oba lif sinik, keli nek sevom gudikumo e klülumo, ka Ol soelik!

7. Mekolöd, o Sölal! obi nolön, kelosi nolobök; löfön, kelosi löfobök; lobön, kelos Ole plidos üno; ledivön, kelos Ole binos kostik; blamön, kelos binos nejönik loges Ola! No leadolöd obi, cödätön segunü jin senedik, i no düvön ma lilsagön menas eneplaköl! sod tidolöd obi, cödätön veratiko dö dins logik e tikälniks, e bu valikos davestigön egelo, kelos plidos Ola vile! —

8. Siens citomsok mödna cödätöno; citomsok i löfans vola, löfölso dinis logik te. Men binom gudikum-li dem atos, bi padivom, aso gretikum fa men? Cütel citom cüteli, vanikan vanikani, bleinan bleinani, malädikan malädani, üf datovom oti; e vo bapom oti bufumo, du lobom döbiko. Ibo, vio mödik binom alikan logsü Ol: also mödik binom, e no mödikum, sagom miugik saludal Franziskud.

Kapied 51. Muton, plägönok in vobäds smalik, if binon nekanik al vobädis geilikum.

1. Sölal. — O son! no kanol, ailabön desidi lefilik al tugis, i no, aiblibön in stad subimikum medidöna; sod zesüdos sotimo, das, demü rüböf rigik, donixänol al dinis bapikum, e das polol, ifi nevilo e favo, böladi lifa döfik. Ünä zipolol koapi deilik: osenol naudi e plönöfi ladäla. Sikodo, binolöl in mid, seifolök suvo tefü bölad midäla, bi no kanol, kösekönok nen ropam plägames tikälnik, e medidöne dinis godik.

2. In tim somik veilos ole, lefugön al vobädis bapik e senedikis, e klietönok dubü plägams gudik, varön in konfid fimik gekömi obik e visidami sülik, sufädo sufön ola xilami e neluimi tikäla, jüs denu pavisidol fa Ob, e palibol de treps valik. Ibo omekob, das fögedol töbis, ed ojuitol takedi linedälik. Opakob komü ol flubis penotas godik, dat ko ladäl fredik beginolös, gonön vegi büdas Oba. Tän opükol: »Lieds ata tima no binoms digik glora füdöl, kel ovedom manifik in obs«.

Kapied 52. Men oki no cedomöz digiki troda, sod bufumo debiki pöna !

1. Dünel. — O Sölal! no digob trodi olik, i no visidi tikälnik sembali; e demüs dunol cödo ke ob, if obi leadol pöfiki e nepatrodöli. Ibo, if kanoböv, spilön meli drenas: no nog binoböv digik olika troda. Demüs no digob bosi votik, ka pafaedön e papönöni, bi enofob Oli vem e mödna, ed epökob vemo tefü dins mödik. Ob klu, if betikon verato dini, binob digik troda smalikün nena. Yed Ol, o God gudlik ä misaladöl! kel no vilol, das vobäds Ola deuloms: donleadolok, do leno emelidom osi, trodön oka düneli in mod lovümenik, al jonön liegis olika guda len gefs misalada! Ibo trods Ola no binoms likik, äso lupükots menas.

2. O Sölal! edunob kisi, das givolös süliki trodi anik obe? — No memob, das emekob bosi gudikosa; ye memob, das eibinob slopälik al klimis, e nedutlik gudumönoke. Also binos, e no kanob, nonön osi. If pükoböv tadili: noelolöv ta obi, e nek binomöv, jälövöl obi. Dem oba sins emelidob kiosis, ifno hölöpi e fili tenüpik? — Koefob känüdo, das binob digik valikas kofa e nestüma, e dan no digob, panumön bevü dünelis devodik Ola. E do neviliko lilob atosis: deno vilob, löfü verati, fekusadön obi demü sins oba, dat melidobös, getön nefikulumo misaladi ola!

3. Kisi sagoböz, ob debik, e fulik bejemama? Mud oba no kanom, pükön votikosi bos, ka te vödis: »Esinob, o Sölal! esinob, misaladolöd obi, pardolöd obe! Leadolöd obe bosi tima, dat bedrenobös stadi dolik oba, büfä lügolob in eli läni daegik, e pategöli me jad deila!« — Kisi fliagol umo fa debikan ä sinel misalöfik, kas lebönidomös, e miugomösok demü sins oka? Sukü lebönid veratik e miugam ladäla vedom spel pardama, palekosilom konsien pakofudöl, pagivom denuo ben peperöl, pojelom men ta zuni füdik; e somo God e lan pönädöl kolkömoms balvoto in kid saludik.

4. Lebönid miugik lada demü sins binom, o Sölal! Ole vitim lesumik, paköl komü Ol smeli vemo svidikumi, ka glüsmok. Lebönid binom leüled lesumik, tefü kel evilol, das me ot futs Ola pabegifomsös; ibo enestümol nevelo ladi lebönidöl ä miugiki. Iso binom lefug ta loapi zunöl neflena. Iso pagudumos, ä padevatükos, aikelos pefedebos, e peneklinlöfos votöpo.

Kapied 53. Ben Goda no pagivom menes talmeugik.

1. Sölal. — O son! ben Oba binom kostik; no leadom, migönok ko dins senedik e trods talik. Sikod, if vilol, das ben panin’gifomös ole: mojedolök valikosis, neleadöl beni. Sükolös soali! löfolöd, binön soelik ke ol, sükolös musami nonikana; sod bufumo sedolöd pleki devodik Gode, dat bekipolös ladäli lebönidöl, e konsieni klinik. Voli lölik cedolöd, aso nosi! Melaki ko God bizugolös dines senedik valikes. Ibo no kanol, kosadön ke Ob, e fredön leigüpo len dins golenik. Mutol, fagönok de besevans e flens, e plesefön ladäli pelivöl de timlik trod alik. Somo postal Peter lebegom kredanis Kristusa, das kondidomsöz, aso voöpäbs e tevels in vol at! —

2. O! konfidi ki-gretik olabom deilölan, keli slopäl nonik gekipom al dini vola ät! Ye lan malädik no nogo suemom, kelos binos-la, labön ladäli so pedepatöl de valikos, e men nimälik no sevom libi mena linedälik. Yed if vilom, binön vo tikälnikan: mutom, klemön ä fagikosis ä nilikosis, e tefü nek kautön umo, ka tefü ok it. If ubevikodol lefulik iti ok: obevikodol nefikulumo lenämikosis. Iti bevikodönok: binos vikod lefulik. Ibo, kel somo sölomok iti, das midäl lobedom lisäle, e lisäl in valikos Obe: at binom vo bevikodel ok’ana, e söl vola. —

3. If vilol, xänön al ati legeili lefuläla: mutol, beginön manälik, e siadön lecüdi len vuli, dat seslütolös, e distukolös neleodiki slopäli pasävöl al iti ok, ed al valiki guedi lönik e sienliki. Se klim at, das men löfom tu neleodo iti ok: dekömos ti valikos pöseslütöl ko vul. If bad at ubinom pabevikodöl ä palepedöl: püd gretik ä taked obinoms foviko. Ye, bi nemödikans steifoms, deilön lefulik okes it, e no segoloms lefulno se òks: demüs bliboms pakopligöl in oks, e no kanoms, tikälo datovokön ove itis ok. Ab, if ek levipom, tägön libo ke Ob: zesüdos, das funälom valikis slopälis badik e nepaleodölis oka, e das me löf patik lenlagom ledesidölo jafote nonik.

Kapied 54. Dö mufs difik nata e bena.

1. Sölal. — O son! loegolöd dutliko mufis nata e bena! ibo mufs at binoms vemo pe’tasiadöl, e deno so feiniks, das ti no kanoms, padistinön, plä fa men tikälnik e padalitöl linedälo. Valikans desidoms dido gudikosis, e lesagoms, das bos gudik binos-la in vöds e vobäds omas: e demüs mödikans pacitoms dubü jin gudikosa.

2. Nat binom käfik; mödikanis zugom, zilesnalom ä cütom, ed aidiseinom iti ok. — Abu ben tägom balikäliko, vitom jini valik badikosa, no gebom cüti, e dunom valikosis demü God te, in kel i takedom, as in zeilün oka.

3. Nat no vilom viliko deilön, papedön, pabevikodön, binön nödik, e disojedönok libaviliko. Abu ben steifom, iti-funälami, tadunom midäle, steifom, vedön nödik e pabevikodöl, e no vilom, juitön libi lönik; ben löfom, pakipön nödü pud, e no desidom, sölön sembalani; sod vilom, vätimo lifön, stadön, e binön nödü God. Binom miugo löbik, demü God blegönok nödü meniki jafoti alik.

4. Nat vobom plo frut lönik, e konsidom, keli lefruti ogetom de votans. Abu ben konsidom umo, no kelos ome binos frutöl e kovenik, sod kelos mödikanes veilos.

5. Nat vilom, getön stimi e drestimi; ye ben lücödätom frediko valikis stimi e glori Gode.

6. Nat dredom bejemami e nestümi; abu ben fredom, sufön lejemodi demü nem Yesusa.

7. Nat löfom nosiduni e takedi koapik; abu ben no kanom, binön nosidunöl, sod lensumom viliko vobi.

8. Nat sükom, getön dinis nudälik e jönikis; naudom, kelos binos pülik e luedikos. — Ye ben fredom tefü balikos e miugikos; no nestümom luedikosi, e no nevilom, pakleotön me luklöfs bäledik.

9. Nat konsidom timlikosi, fredom tefü lefrut talik, lügom pötü peram, e zunom demü lejemodavöd smalik. — Abu ben konsidom tenüpikosi, no lenlägomok len timlikosi, no pamuifom dubü peram dinas talik, e no pabiedälom dubü vöds düfik, bi labom okikis divi e fredi in sül, kö nos deulos.

10. Nat binom labisükik, e getom vilikumo, kas givom; löfom lönikosi e patikosi. — Ye ben binom gudlik ä givöfik; vitom patikosi, kotenugom me nemödikos, e kredom, das givön binos betikum, ka elos getön.

11. Nat slopälom al jafotis, midi lönik, fredis vanik e musami. — Ye ben zugom al Godi e tugis, klemom jafotis, fugom voli, hetom desidis mida, bemietom zigolöni, jemom, pubön maniföfo.

12. Nat löfom trodi senedik, kelo payöfom sienliko. — Abu ben sükom trodi in God soelik, e steifom, fredön in guedün bu logiks gueds alik.

13. Nat dunom valikosis demü lefrut e prof lönik; no kanom, dunön bosi glato; sod spelom, das demü benods ogetom givoti leigik u gudikumi, lobi u göni; levipom, das levidonös dunis e legivotis oka. — Abu ben no sükom bosi timlik, e no fliagom mesedi votik plä Godi soelik. Tefü dins timlik, zesüdiks life, no desidom umosi, ka binos frutöl getöne guedis tenüpik.

14. Nat löfom, labön flenis mödik e palefanis, famomok demü cal nobik e licin cädik; lüsmilom valüdikanes, flätom lieganes, läsevom leimeuganes. Abu ben löfom i neflenis, e no pleidom demü num gretik flenas; ledivom ni dinidi, ni famüli, köa licinom, pläsif tug gretikum patuvom nosi. Binom gönikum pöfikane, ka valüdane, keliedom umo nedebikani, ka valüdani, fredom ko veratilöfan, e no ko cütel. Aimeibom gudanis, steifön benis subimikum, e vedön sümik Sone Goda dubü tugs.

15. Nat plonom lesuno tefü def e plön; ben sufom stanäliko pöfi.

16. Nat tefamom valikosis su oki, feitom e disputom fruti ok. — Abu ben getefamom valikosis ali God, de kel dekömos rigo; lücödätom oke nosi, e rogom nosi; no feitom, e no bizugom oka niludami cedes votanas; sod disojedomok sape tenüpik e cödäte godik tefü valiks tikäds e fekäls. Nat desidom, nolön dinis klänik, e lilön nulikis; vilom, nidön senedo, e plakön mödikosis dubü siens; fliagom paläsevöni, e dunön dinis, kelso lob e milägam pamelidoms. — Ye ben no steifom, lelilön dinis nulik e nudälikis; ibo valikos at licinos de perüböf mena bäledik, e bos nulik e dulöl no patuvos su Tal. Sikodo tidom, nüstöbön sienis, vitön plidi vanik e luglori, sävön miugo dinis loblik e digikis milägama, e sükön in aliks din e nolüg frutüni sa lob e stim Goda. No vilom, das lobon omi ud omikosi; sod vipom, das in benods oka papliedomös God, kel givom valikosis kodü löf teik.

17. Ben at binom litäl lovünatik, legivot patik Goda, mal voik pesevälanas, e paned beata tenüpik; datovom meni de talikos al löföni sülikosis, e se men midälik mekom tikälniki. Klu, pluo nat pabedränom e pabevikodom: ben pluo gretikum panin’gifom, e men linedälik dubü vobädams nulik bena pavotafomom vädelso segunü mag Goda.

Kapied 55. Dö perüböf nata e näm bena godìk.

1. Dünel. — O Sölal, God oba! kel elemekol obi segunü mag olik ed ole sümiki: givolös obe beni at (kela greti e zesüdöfi tefü salud ejonol obe), dat bevikodobös nati lebadik oba, zugöli al sinis ed in rübi! Ibo in mid oba senob sina loni, kel tapükom lone tikäla, e dukom ini pefanüg obi, dat lobedobös midäle in mödikos. No kanob, tadunön liedodes oma, ifno ben saludikün olik uyufom obe, e fil ota punin’gifom oba lade.

2. Ben olik, e sägo ben gretik zesüdom, al bemütön nati, aislopöli des oma yunüp al badi. Ibo, na nat efalom in men balid Adam, e perübom dubü sin: pön ata stenäla elovegolom in menis valik, sosä nat it, kel ebinom pelemeköl, aso gudik ä cödik fa Ol: malom nu sini e fibi nata perüböl, bi mof omik, paloveleadöl oke, zugom al badi e dinis bapik. Ibo näm smalik pe’lemänöl binom bido te spagil pasävöl disü zen. Spagil at binom lisäl natik, pazümöl me dag gretik. Lisäl kanom dido, lesevön gudikosi e badikosi, distinön verati de pölub: ye no kanom, bevobädön gudikosis valik, kelosis läsevom. I no juitom lefulno liti verata, e desids ota no binoms in stad saunik.

3. Demüs zidos, o God oba! das segunü men linedälik fredob tefü lon Ola, noloböl, das binom gudik, cödik ä saludik; das deimom i badikosis valik, e fliagom vitami sinas. Ye dünob me mid lone sina, lobedoböl plu midäle, ka lisäle. Atoso jenos, das labob dido vili meköna gudikosis; ab no tuvob nämis, al bevobädön osis. Sukü atos zidos, das desinob suvo gudikosis mödik; abu zedob, e vedob säkurajöfik kodü tadun smalik, bi ben Ola no yüfom oba fiböfi. Demüs jenos, das lesevob vegi lefuläla, e suemob in mod klülik saido, vio dunobök: ye, pabäpedöl dubü vet perüböfa lönik, no datovobok al lefulikumosi.

4. O Sölal! ben ola ki-vemo zesüdom obe, al beginön gudikosi, fövön e lefulön osi! Ibo nen ben no kanob, dunön bosi gudik; ab okanob valikosis in Ol, if Ola ben ustenüdom obi. O ben vo sülik! nen kel melidods lönik binoms nosik, e givots nata binoms völadnoik: lekanävs, liegs, jön u stenüd, kapäl u püköf nen ben völadoms nosi logsü Ol. Ibo givots nata binoms tugedik gudikanes e badikanes; abu ben ü löf binom givod patik pasevälanes, kelo padeköls pacedoms digik lifa tenüpik. — Ben at binom also subimik, das nen ot ni legivod profedöna, ni näm dunöna milagis, ni medidam geilikün binoms pödivöl. Sägo ni kred, ni spel e tugs valik, nen löf e ben, binoms lesumik Ole.

5. O ben beatikün, kel tikälo pöfikani mekol liegiki tugso, e liegani tefü gueds mödik mekol miugiki ladälo! Kömolöd, donixänolös al obi, gölo dafulolöd obi me trod ola, dat lan oba, no vedomös nämnoik kodü fen e sig tikäla! Lebegob, o Sölal! tuvobös beni logsü Ol! ibo ben Ola saidom obe, ifi no getob lemänikosi pedesidöl fa nat. If pulägleipob, e puvexadob dubü bedränübs mödik: no odredob badis, ünä ben olik ubinom ke ob. At binom stenüd obik; at konsäli givom e yufi. Ben binom valüdikum, ka neflens valik, e sapikum, ka sapans valik.

6. Ben binom seval verata, tidal puda, litäl lada, trod in trep, xilel lüga; ben femofom dredi, nulüdom devodi, pälom drenis. Nen om binob kis, ifno boad sigik, e laem nefrutik ä pömojedöl? — Sikod, o Sölal! ben olik egelo fokömomös obe, ed aikopanomös obi! Mekomöd, das tefü vobäds gudik aidutobös, dubü Yesus Kristus, Son olik! — Jenosöd!

Kapied 56. Mutobs, fenonönok itis, e, pol’obsöl kruzedi, naldunön Kristuse.

1. Sölal. — O son! vio mödiko kanol, segolön se ok: okanol so mödo, lovegolön in Obi. Äso blinos püdi linedälik, if desidon nosi senedik: also vobädos klubami ko God, if lüvonok linedälo. Vilob, das lenadolös, fenonönok lefuliko, ed Oba vile sukön nen tapükam e plon. Sukolöd Obe!: binob el veg, el verat, äd el lif. No kanon, golön nen veg, lesevön nen verat, sibinön nen lif. Binob el veg, kele mutol sukön; el verat, kele mutol kredön; el lif, keli mutol spelön. Binob veg no pölo’duköl, verat no cütöl, lif^[5] nefinik. Binob veg stedikün, verat geilikün, lif veratik, lif beatik, lif ne’palemeköl. If ublinol in veg Oba: olesevol verati; verat olibom oli, ed ogetol lifi tenüpik. —

2. If vilol, nin’golön ini lif: fölolöd büdis! If vilol, lesevön verati: kredolös Obe! If vilol, binön lefulik: selolöd valikosis! If vilol, binön züpel Oba: fenonolöd iti ok! If vilol, labön lifi: nestümolöd lifi nuik! If vilol, pageilön in sül: miugolösok in vol! If vilol, sölön ke Ob: pololöd ke Ob kruzedi! Ibo dünels kruzöma soeliks tuvoms vegi beata e litäla veratik.

3. O Sölal Yesus! bi lif Olik ebinom penüstöböl, e nestümik vole: gevolös, das, nestümoböl voli, sukob Ole! Ibo dünel no binom gretikum, ka söl; e züpel no binom plu, ka masal. Dünel Ola paplägomöd naldunöno lifi Ola, bi salud e saludugäl oba binoms in atos! Aikelosis lilädob u lilob plä tefü lif olik: obi no klietos, e no freidos lefulno.

4. Sölal. — O son! bi nolol atosi, ed elilädol valikosis at: obinol beatik, if udunol osis. Aikel labom büdis obik, e fölom otis: at binom löfölan Obi. Id Ob olöfob oti, omanifamob iti Ok ome, ed omekob oti siedöl ke Ob in monargän obika Fata.

5. Dünel. — O Sölal Yesus! äs epükol ed esiagol: id also zitosöd, e binobös digik, das jenos tefü ob! Egetob fa nam Ola kruzedi; vilob polön, ed opolob oti jü deili, äs omi esuseitol obe. Vö! lif kleudana gudik binom kruzed; ab i dukiel al paladi. Ebeginob; no binos pedälik, gegolön; i no dalob, lüvön vegi.

6. Eyö! o blods, golobsöd kebalvoto! Yesus obinom ke obs. Löfü Yesusi elovesumobs ati kruzedi; demü Yesus ledulobsöd polölso kruzedi! It obinom yufal obas, kel binom dukal ä bisegolal obas. Ekö! regal obas golom bifü obs, ed okomipom ple obs. Sukobsöd manälik, nek dredomös jekis! Binobsöd löbik, deilön stenüdälik in klig, e no jemodobsöd okas glori, säfugölso kruzede!

Kapied 57. Men ovedomöd no tu smakurajöfik, üf ufalom in pökis anik !

1. Sölal. — O son! sufäd e miug in taöfs^[6] plidoms um Obe, ka mödiks trod e devod in läb. Kikod lügol demü din pülik, pesagöl ta oli? Ifi bos badlikum pesagosöv: no dalolöv, pamuifön. Ye nu leadolöd dini, fegolön! No binom balid, e no nulik; i no obinom lätik, if ulifol lonediko. Binol saido kurajöfik, ünä nos taik zidos ole. Givol i konsäli gudik votanes, e nolol, kurajöfön otis me vöds; yed, if glum süpidik nokom len ola yani: täno konsäl e stenüd defoms ole. Lesevolöd ola döfiköfi gretik, keli plakol suvo tefü zids smalik! Yed, if atos u sümikos zidos: jenos frutü salud ola.

2. Fagolöd dunliküno se ladäl fibi at! Ed, if edrefom oli vemiko: deno no bäpedomös oli, e no kofudomöd oli lonedo! Liedolös sufädik luüno, ifno kanol, liedön fredo! If lilol lu viliko bosi, e senol zuni: bemütolödok, e no dälolös, das se mud ola segolom-la vöd nepötik, dubü kel fibans paskanomsöx! Ladäl pe’damuföl postilom lesuno, e dol linedälik pasvidom dubü ben ugekömöl. Lifob nogo (Sölal pükom), ed obinob löbik, ole yufön, ed oli trodön umo, ka kustöfiko, if ukonfidol Obe, ed ulenvokol devodik Obi.

3. Binolöd kurajöfikum, e prepadolösok, al liedön gretikumosis nogo! Lölikos no binos paperöl, if senol suvo vemikis glumi u tentadi. Binol men, e no God; binol mid, e no lanal. Ol — liko kanolöv, aiblibön in stad öt tuga, bi atos edefos sägo lanale in sül, e mene balid in paladöp? Ob binob ut, kel susilüodob, ä sanob glumikanis, e datovob jü Godugi Oba lesevölanis fibi okas.

4. Dünel. — O Sölal! vöd Ola binomöd papliedöl! aibinom svidikum oba mude, ka miel e lemiel. Kisi beginoböv in also gretiks glums e treps, if obi no stenüdolöv dubü vöds saludik Ola? Kikod kudübön, kiomikis e viomödikis dinis liedob, üf fino lükömob al pofi saluda? — Givolös fini gudik, givolös motävi läbik se vol at! Memolöd obi, o God obik! e su veg stedik obi dugolöd ini monargän Ola! Jenosöd!

Kapied 58. No vilonös, sevestigön dinis geilikum, e cödätis pesävik Goda !

1. Sölal. — O son! vitolöd diskusami dö dins geilik e cödäts pasävöl Goda! No siämolöd, viokodo at palüvom, ed et’an padüvom digik bena so gretika! I no sevestigolös, viokodo at’an pavexadom so mödo, du et pa’datovom so gloriko! — Dins at vükodoms aliki kapäli menas; noniks lisäl u diskusam binoms kanik, dakodön cödätis Goda. Sikod, if neflen nin’givom somikosis ole, ud, if mens nudälik jäfoms saekis sümik: gesagolöd vödis at profedala!: »Cödik binol, o Sölal! e cödik binom cödät olik;« e fovo: »Cödäts Sölala binoms veratik, its giatomsok« — Dredonöd cödätis Oba, no diskusonöd dö ots! ibo binoms nesuemik kapäle menas.

2. I no vilolös, vestigön e disputöni tefü melidods saludalas! No siämolöd, kiom otas binom-la saludikum, ka votan, u kiom binom-la gretikum in monargän süla! Atos pälos mödna zani e dikodis nefrutik, sibinamos i pleidi e fami vanik. Atoso glöt e telif vedoms, bi balan sükom, givön bizugi saludale at, votan pleitäliko saludale votik. Vil, nolön e sevestigöna dinis somik, no frutom, sod miplidom bufumo saludales; ibo no binob God telifa, sod püda, kel püd sibinom um in miug veratik, ka in geilönok iti.

3. Ans, se löfazil patik, laboms slopäli gretikum al saludalis at, ud etis; atos dekömos umo de mof menik, ka godik. Ob binob, kel emekob saludalis valik; elegivob beni, egevob glori. Sevob melidodis dabalikanas; efokömob omes me läbädams svidik Oba. Ebise’nolob tenüpoa pelöfanis obik; Ob esevälob otis se vol, oms no eväloms Obi balüdo. Evokob me ben, elenzugob dubü misalad; edukob omis dai tentadis mänifodik. Enin’gifob trodis glorik, egivob ledulugi, ekronob sufädugi omas.

4. Sevob balidi e lätiki saludalas; zisumob valikis me löf nedüvik. Obi lobonöz in saludals valik! Tefü saludals dabalik pliedonöz ä stimonöz Obi umo, ka valikosis, kel eglorob also gretobidiko saludalis, ed esevälob otis nen melidods semkimik büogolöls otas. Klu, aikel nestümom bali saludalas pülikün obik: at i no stümom gretiki, bi Ob emekob eli pülik, ed eli gretik. E men, kel smalom bali saludalas: smalom id Obi ä saludalis votik alikis in monargän süla. Valiks binoms os-bal dubü tan löfa; laboms öti meugi, viloms ötosi, e valiks löfoms okis balvoto.

5. Fovo (ed atos binos nog mödo subimikum) löfoms um Obi, ka okis e melidodis omsik. Ibo, pedatovöls ove okis, ä liviks de taisük alik, pendomsok lölik in Oba löfi, in kela juit tuvoms takedi. Nos kanos, deflekön u bäpedön otis, bi, fuliks verata tenüpik, filedoms in fil löfa nenösik. Sikodo mens midälik e nimäliks, kel noloms te, löfön fredis lönik okas: seilomsöd, e no diskusomsöd tefü stad saludalas, kelis bapoms u geiloms ma slopäl okas, e no segunü plid Verata tenüpik!

6. Mödikans dunoms also sukü nenolöf, pato uts, kel, nemödo pe’dalitöls, noloms seledo, löfön oni me tikälnik löf lefulik. Kodü mof natik e flenüg menik, slopäloms al ati, ud eti; ed, äso tikoms tefü dins talik, also niludoms i dö süliks. Ye distin nemaflik binom bevü utos, kelosi mens nelefulik tikoms, e kelosi mens pe’dalitöl lesevoms dubü manifam godik.

7. Sikodo vitolöd, o son! jäfön nudälo dinis somik, kel vükodoms ola nolügi! sod steifolös, e kudolöd bufumo, dat kanolös vedön i pülikün te in monargän Goda! — Ed if ek nolomöv, kiom binom saludikum, ka votan, ud aso gretikum pacedom in monargän süla: sev at frutomöv ote kisi, if no mekomöv oti miugikum komü Ob, ed if no stigomöv oti, pliedön nog umo nemi Oba. Men, tiköl greti sinas e numi smalik tugas oka, e betiköl, vio fagik binom de lefuläl saludalas: dunom vobädi plidikum Gode, ka et, kel disputom tefü gret u smal saludalas. Binos gudikum, das lenvokon saludalis dubü pleks devodik e drens, e legebon ko ladäl miugik plobegis glorik otas, kas sevestigön vanik otas dinidi pesävöl obes^[7].

8. Saludals lifoms in kotenugün; ed i mens, dasö nolomsös, kotenugön, e nedunön lupükotis vanik okas! Saludals no famomsok demü melidods lönik; ibo lücödätoms gudikosi nonik okes, sod gudikosis valik Obe, bi se löf nefinik elegivob otes lölikosi. Binoms pe’dafulöl me löf also gretik ali Godug, ä me fred so bundemik, das nos glora defos otes, e das nos leläba kanos, defön otes. Saludals alik, pluo binoms geilikum gloro: plu binoms miugikum in oks, e nilikums ä lesumikum Obe. Sikodo binos papenöl! »Ebäseitoms kronis okas komü Godi, efaloms su loapis komü Liäm, ed eleplekoms lifölani de tenüp al tenüpi.«

9. Kim binom-la gretikum in monargän Goda, säkoms mödikans, no nolöls, va binoms digik, ponumön bevü smalikünis. Binos gretik, binön i te pülikün in sül, kö valikans binoms gretik, bi valikans panemoms, ed i binoms cils Goda. Pülikün ovedom, aso mils, e sinel baltumyelik odeulom. Ibo, ven züpels esäkoms, kim binom-la gretikum in monargän süla: eleliloms ati gepüki: »Ifno levotälolsok, e vedols, äso cils: no onin’golols in monargäni süla. Sikod, aikel umiugomok, äso cil at: ot obinom el gretikum in monargän süla.« (Math. 18, 3, 4.)

10. Paö utes, kel neviloms, miugönok vilik, äso cils! ibo leyan bapik monargäna sülik no leadom otis, nin’golön. I lieganes paö! kels laboms iso trodis okas; ibo, du pöfikans onütridoms in monargäni Goda: ets ostanoms seo, äd olukanidoms. Fredolsöd, o miugans! e yubolsöd, o pöfikans! ibo monargän sülas obinom oles, if vo utägols in verat.

Kapied 59. Muton, pladön valikis speli e konfidi in Godi soelik.

1. Dünel. — O Sölal! su kios binom pestaböl konfid, keli labob in lifüp at? U kim dinas valik, binöls disü sil, gevom trodi gretikün obe? — No-li Ol, o Sölal, God oba! kela misalads binoms nenumik? — Kiöp estadob gudiko nen Ol, u kiüp ekanob, stadön badliko komü Ol? Vilob vilikumo, binön pöfan dem Ol, ka liegik nen Ol. Bizugob, tevön, aso voöpäb ke Ol su Tal, ka labedön süli nen Ol. Kö Ol, uso sül; e deil ä höl uso, kö no binol. Binol zeìl levipa obik, e demüs mutob, seifön, vokön e plekön al Oli. I no kanob, konfidön eke lefulno, kel kanomöv, yufön obe gudikumo timü zesüds, ifno Ole soelik, o God oba! Binol spel obik, konfid oba, trodal obik, ä fiedünal tefü valikos. —

2. Valikans sükoms fruti lönik; ab Ol sükol te saludi obik ed oba fästepi, e flekol valikosis al gudikosis obe. Ifi leadol tentadis e taöfis^[8] difik, zitön obe: deno leodol atosis valik al oba^[9] fruti, kel laidunol, xamön pelöfanis Ola me mods mil. Tefü xams at mutol, palöfön e palobön no lu, ka if dafulolöv obi me trods sülik.

3. Sikod, o Sölal God! in Oli pladob oka speli lölik e lefugi. Ole komedob oka valikis glumi e trepi, bi valikos, keli logob plä Ol: binos fibik e nelaidöfikos. Ibo flens, ifi binomsöv mödik: no frutoms; yufels valüdik no kanoms, yüfön; mens visedik no givön gesagi frutöl; buks nolalas no trodön, divs no libön, nonik top pasävöl e lesumik kanom, obi sefön, ifno it Ol yüfol, yufol, stenüdol, ed ubinol trodal, betidal e jepal…

4. Ibo valikos, jinöl blinön püdi e leläbi: binos nos nen Ol, e givos jeno nosi leläba. Sikod Ol binol lefulam gudikosa valik, fonäl lifa, ledib sapa. E spelön umo tefü Ol, ka tefü valikos votik: binos trod stenüdikün dünelas Olik. Al Oli datovob logälis obik, in Oli konfidob, o God oba, Fat misaladas! Läbädolös, e saludükolöd oba lani me läbäd sülik, dat vedomös saludik löd olik, e sied glora tenüpik Ola! in tem at olika geiluga patuvosöv nos, kanölöv, nofön logis olika mayeda! Ma gret guda olik, e segunü möd misaladas Oka, lenlogedolöd obi, e dalilolös pleki dünela pöfik Ola, kel, fagik de Ol, binom pexilan in län deilajada. Jelolöd, e konsefolös lani dünelila olik bevü risköfs also mödiks ata lifa döfik, e dubü ben Ola dugolöd oti su püda veg al fatäni klüla tenüpik! — Jenosöd!

Küpets (fonät: ‚Wikisource’).

1. Ba pöl pla el „nefagikum”.
2. Ma lised bükapökas: „al otosi”.
3. Ba pök pla el cödät.
4. Ma rigädapenäd: taöfs.
5. Bükapök pekoräkon, efe lit.
6. Ba pök pla el täöfs.
7. Ba pök pla el oles.
8. Ba bükapök pla el täöfis.
9. Is minud pepenon pla el Oba rigik.