Buks fol dö Züp Kristusa/Buk folid

Buk folid. Dö Godabodet.

Meibam devodik tefü komünet saludik.

Kristus pükom: »Al Obi kömolsöd! o valikans, kel binols fenik e pavetöls: ed oklietob olis. Bod, keli ogivob, binom mid Oba plo lif volefa. Sumolsöd, e fidolsöd! atos binos koap obik, kel podägivom ple ols: atosi mekolsöd in Oba lememi! Kel fidom Oba midi, e drinom Oba bludi: at blibom in Ob, ed Ob in om. Vöds, kelis epükob oles, binoms tikäl e lif.«

Kapied 1. Ko drestim vio-gretik muton, getön Kristusi. Vöds züpela.

1. Ats binoms vöds olik, o Kristus, Verat tenüpik! do no pepükoms in tim ot, e no binoms papenöl in plad öt. Klu, bi vöds at binoms olik ä veratiks: mutob, lensumön danöl e fredo valikis. Vöds at binoms olik, bi Ol epükol otis: binoms id obiks, bi esagol otis gönü salud oba. Lensubom vilik otis se mud Ola, dat paninpedomsös dibikum in oba ladäli. Vöds at, fuliks guda, svida e löfa, kurajoms obi; ye sins lönik jeikoms obi, e konsienäl ne’paklinöl dejokom obi de juit klänota so gretika. Svid vödas Ola venudom obi; abu möd klimas oba vetom obi.

2. Büdol, das kömoböz konfidik al Oli, if vilob labön dili ke Ol, e das fidoböz zibeti nedeilöfa, if vipob, getön tenüpikis lifi e glori: «Kömolsöd al Obi, (pükol) valikans, kel binols fenik e pavetöls! ed oklietob olis.« O! plo sinela lils pet kio svidik ä löflik, kelo, o Sölal God oba! vüdol dalebani ä pöfani al juitami koapa saludikün Ola! Ye kim binob, o Sölal! das kinoböx, nilön Ole? — Ekö! löliks sül e sil no zisumoms Oli, e deno pükol: «Valikans kömolsöd al Obi!»

3. Donleadam meilädik at, e vüdam so flenik maloms kisi? — Al Oli liko kömoböx, kel in ob tuvob gudikosi nonik, kanosölöv, givön obe konfidi? Liko nondukoböx in domi obik Oli, kel enofob lemödna loapi gudlikün Ola? — Lanals e lelanals binoms fulik drestima, saludals e cödikans dredoms; e deno pükol: «Valikans kömolsöd al Obi!» Ifno it pükolöv vödis at, kim otis cedomöv veratikis? Ifno ìt büdolöv, kim venüdomöv, nilön? —

4. Ekö! Noe, man cödik, ävobom dü yels tum, al fabröpön lenafi, dat pasavomös ko nemödikans! Ed ob, liko kanob, in düp bal prepadönok, al lasumön drestimik fabröpali vola? — Mosed, Ola dünel gretìk ä flen patik, emekom se boad ne’fepuodöl fedastetömi, ed ekovadom oti me golüdain feinikün, al nüpladön letabis lona; ed ob, jafot puodöl, ovenüdoböx-li, stadü prepadam so pülik, getön rigali lona ä givali lifa? — Salomon, regal sapikün Yisraeläna, ebunom dü yels vel temi lobü nem Olik, ed ezelom dü dels jöl zäli kosekama ota; edäblinom vitimis mil lekosilama, e toenü topedüms ä yubo enindukom zeliko lefedasteti in topi peprepadöl ote. Ed ob, neläbik ä pöfikün menas, liko nindukoböx Oli in oba domi, kel nolob töbo, binön devodöl dü düp lafik? — E dasö luüno balna gebobös digiko düpi ba lafiki!

5. O God obik! ets etöboms ki-mödiko, dunön mödikosis, al plidön Ole. Agö! kelosis ob dunob: binos kio pülik! — Gebob timi kio blefiki, al prepadönok komünete! Lefulno pekonleadöl binob seledo! leseledo binob paklinöl de disipäl alik. E vö! pötü komöp saludlik olika Goduga, nedigik tik nonik dalomöv, vedön in ob, i jafot nonik obi disipön, bi desänob, bergön no lanalai, sod Sölali lanalas. —

6. Ye distin vo legretik binom bevü lefedastet sa ninot omik, e koap klinikün Ola ko tugs nesepükik oma; bevü lona vitims, ebinöl te bümags vitima füdik, ed olika koapa, vitima veratik, kel binom lefulam vitimas vönik.

7. Kikodo klu no glutälob umo pötü komöp stunadigik Ola? Kikod no prepadobok me kudöf gretikum, al getön klänotis saludik Ola, bi vöniks et saludiks patrials e profedals, i regals e plinals ko pop lölik, ejonoms devodäli so gretiki lä Godedün? —

8. Regal devodik David edanüdom me näms valik bifü fedastet Goda, ed ebekanidom benodis peblöföl vöno rufates. Emekom, pakofükön stumis musigik modas difik; epoedom psamevis, ed ebüdom, das pakanidomsöz yubo! It ekanidom otis mödna nin’givamü Salutikäl, ed epledom läs zütümi. Ebetidom popi Yisrael, lobön Godi se lad lölik, e vädelso famön e pliedön Oti me vögs pakluböl. If komü fedastet devod äbinom tiemo so gretik, e lob Goda päkanidom also ziliko: ki-gretikis devodi ä drestimi ob, e lölik pop kritik mutobs, nu labön komü Sakramed, e pötü juitön koapi subimikün Kristusa! —

9. Mödikans gonoms in topis difik, al visidön relikädis saludalas; stunoms lilölso dunotis otas, lenlogoms temabumotis gretik, e kidoms saludalas lögemis saludik, peveadölis in sadin ä golüdain. Ed ekö! Ol binol komik iso su latar lä ob, o God oba, Saludal saludalas, Jafal menas e Sölal lanalas! Nudäl, e nul dinas no nogo pelogölas stigoms mödna meni, logön dinis et, e demüs frut nemödik gudumama pageblinom, pato, if snegonon so leitälik nenü lebönid. Yed is in Sakramed kombinol lölik, o God oba, men Kristus Yesus! is ogeton i flukälis lieglik saluda tenüpik, alif Oli ujuiton digik ä devodölo. Yed al juiti at no zugoms leitäl, nudäl u sensualöf, sod te kred fümik, spel devodöl, e löf känüdik.

10. O Jafal nelogik vola, God oba! ki-milagiko dunol ke obs! tölatol ki-svidik ä ki-lesumiko pasevälanis Oka, keles in sakramed dälofolok iti pöjuitöl. Atos vükodos kapäli valik, atos lenzugos pato ladälis devodanas, e flämom löfi. Ibo kredans veratik Ola, köseköls okas lifi lölik gudumame, getoms mödna se Sakramed ledinidikün at beni gretik devoda, e löfi gretik al tugi.

11. O sakrameda ben milagik ä pasävöl, keli te fiedans Kristusa sevoms! Ye nefiedans, e dünels sina no kanoms, senön beni at. In at sakramed ben tikälnik pagivom, lan denugetom tugi peperöl, e jönäl, pe’nefömotöl dubü sin, pagegivom. Ben at binom sotimo so gretik, das, sukü ful devoda pegivöl, noè lan, soi koap fibik senoms, das egetoms nämis gretikum.

12. Ye binos vemo dolik e pidadigik, das binobs so lavik e luleadöls, e das no pazugobs dubü fekäl gretikum, al getön Kristusi, su kel spel lölik e melid pösavölas binom pestaböl. Ibo Kristus binom saludükam obas e dalivam; binom trod tevelas su Tal, e juit tenüpik saludalas. Demüs binos vemo dolik, das mödikans loigoms so nemödo klänoti saludik ati, kel freidom süli, e konsefom volì lölik. Agö bleine e düfäle lada menik! bi no divom umo legivoti nesepükik at, e bi vedom sägo lindifik sukü juitön oti vädelso.

13. Ibo, if Sakramed saludikün at pazelomöv in top te bal, ed if padäblinomöv fa saludan te bal in vol: me desid ki-gretik (liko cedol?) mens levipomsöv topi at e saludani somik, dat kanomsös, läsön zele klänotas godik!? — Abu saludans mödik nu sibinoms, e Kristus pavitimom in tops mödik, dat ben e löf Goda tefü mens pamanifamomsös pluo, plu komünet saludik binom pepakölum ove Tal! O Yesus gudik, lanajepal tenüpik! Ole danö! kel edonleadolok, zibön obis pöfik ä pexilanis, ed i vüdön obis al juitami klänotas at me vöds muda olik it, du pükol: «Al Obi kömolsöd valikans, kel binols fenik ä pavetöls, ed oklietob olis!»

Kapied 2. Gret godikas guda e löfa kol menis jonomok in sakramed at. Vöds züpela.

1. Konfidü gretiks gud e misalad Olik, o Sölal! kömob al Oli, ob malädan al medinali, faöfan ä soöfikan al fonäli lifa, pöfan al regali süla, dünel al Sölali, jafot al Jafali, netrodikan al trodali gudlik oba. Ye kikodo digob, das kömol al obi? — Binob kim, das iti givolok obe? Sinel liko kanom, venüdön puböni komü Ol? Ed Ol, liko kanol, donleadönok, kömön al sineli? — Sevol Oka düneli, e nolol, das labom in ok nosi gudikosa, demü kelos givolös stimi at ome. Demüs koefob oka nonöfi, läsevob Ola gudi, pliedob misaladi, e danisagob plo löf legretik Ola. Ibo dunol atosi no demü melidods oba, sod dem Ol it, dat gud Ola vedomös notikum obe, dat löfum paflämomös in ob, e miug pastabomös lefulikumo. Bi atos plidos Ole, ed ebüdol, das jenosös also: donleadam Ola plidom id obe, e sins oba no binomsös neleadüb!

2. O Yesus svidikün ä gudlikün! ki-gretiks drestim e dan, ä lob kio nefinik padeboms Ole plo get olika koapa saludik, kela dinidi men nonik kanom, seplänön! Ye tikoböd kiosis tefü komünet at, if nilob oba Sölale, keli no kanob, lestimön dütiko, e keli levipob deno, getön devodo. Kanob, tikön kiosis gudikum e saludlikumosis, kas miugobok lefulno komü Ol, e pliedob Ola gudi nefinik kol obi? — Lobob, e pliedob, o God obik! Oli tenüpoi. Nestümob obi, e pendobok komü Ol in ledibi nonöfa obik.

3. Ekö! binol Saludal saludalas, ed ob binob sinel miotikün. Ekö! biegol al obi, kel no digob, lenlogedön Oli. Ekö! kömol al obi; vilol, binön lä ob; vüdol obi ali lefid Ola. Vilol, givön obe fidöni zibeti sülik, bodi lanalas, kel vo no binom bos votik, ka Ol it, bod lifik, kel edonixänol de sül, e givol lifäli volefe.

4. Ekö, donleadam ki-gretik uso, kö löf manifamomok! Ki-gretiks danisagams ä lobs pa’deboms Ole demüs! Kio saludlik ä frutöl ebinom slud Ola, ven efünol ati Sakramedi! — O lezib ki-svidik e ki-löflik, in kel iti elegivolok, aso zibeti! O Sölal, dun Ola binom kio milagik, Ola valüd ki-stenüdik, Ola verat kio nesepükik! Ibo epükol, e dins valik evedoms; ed atós evedós, kelosis ebüdol it.

5. Binos din milagik ä kredadigik, vükodöl kapäli menas, das Ol, o Sölal God oba! veratiks God ä men, binol paninöl lölo disü föm smalik boda e vina, e das, nes pakonsumön, pajuitol fa fidölan. Ol, o Sölal dinas valik! kel neodol neki: evilol, me sakramed Ola lödön bevü obs; oba ladi e koapi konsefolöd nestenikis, dat, stadü konsien fredöl ä klinik, suvo dalobös zelön, ed, al saludi tenüpik oba, dalobös, getön klänotis Ola, kelis elenleodol äd efünol patiko al Oka stimi ä lememi laik! —

6. Fredolöd, o lan obik! e danisagolöd Gode plo legivot also nobik e trod pläleodik, kelis egeleadom in nebel at drenas ole! Ibo, vio mödna uzelol ati sakramedi, ed ugetol koapi Kristusa: so mödna omekol voboti dalivama ola, ed ovedol dilidik melidodas valik Kristusa. Ibo löf Kristusa palunom nevelo, e möd misaladas ota pa’dakupom nevelo. Demüs mutol, prepadokön ali Sakramed at dubü nulam mödnalik ladäla, e medidön me senidöf patik klänoti gretik saluda. Klänot at, if levitimol ud lenlilol levitimi, mutom, ole binön also gretik, nulik ä lesumik, äsif in del at balidno Kristus, donixänöl in vümapi virgana, vedomöv men, ud lagöl len kruzöm, liedomöv e deilomöv frutü saludi menas.

Kapied 3. Elos mödnaliko komünön binos frutik. Vöds züpela.

1. Ekö, o Sölal! Kömob al Oli, dat paklietobös dubü ben Ola, e pafreidobös me saludik lefid Ola, keli fidi se gudug, o God! eprepadol pöfane. Ekö! binos in Ol valikos, kelosi desidön, kanob e södob. Binol oba salud ä dalivam, spel ä stenüd, dek ä glor. Sikodo freidolöd adelo lani dünela olik! Ibo edatovob oba lani al Oli, o Sölal Yesus! Desidob, nu getön devodöl e drestimik Oli. Vipob, Oli nindukön ini dom oba, dat, äso Zagäud, pa’ledivobös, paläbädön fa Ol, e palänumön ciles Abraham’a. Lan oba desidom Ola koapi; ladäl oba levipom, pabalön ke Ol.

2. Givolösok obe, e saidos! ibo plä Ol trod alik binom völadnoik. No kanob, binön nen Ol, e no kanob, lifön nen visid Ola. Demüs mutob, Ole nilön suvo, ed Oli getön, aso saludemedi, dat ba no vedobös nenämik su veg, if ubinoböv paberavöl zibeta sülik. Ibo Ol, o Yesus misaladikün! predöl pope, e sanöl malädis difik, esagol vöno: »No vilob, atis dismidön faöfikis domoi, dat no vedomsös nenämik su veg!« — Eyö! dunolös somo ke ob, kel egeleadol in sakramed Oli, aso trodi kredanes. Ibo binol zibet svidik lana; ed, aikel ufidom digik Oli: obinom dilidan ä gerel glora tenüpik. Obe, kel pökob e sinob so mödna, kel vedob lavik e nämnoik also vifo: zesüdos vo, das obi nulob, klinob e flämob dubü mödnaliks pleks, lekoèfs e gets koapa saludik Ola, dat ba no deyilobös de desinäl saludik, if stönob dü tim lonedikum.

3. Ibo sièns mena binoms klienik al badi desü yunüp ota, ed, if medin godik no yufom: men falom sun in badumi. Abu komünet saludik mozugom de badikos, ä stenüdom in gudikos. Ibo, if nu, kü komünob ud zelob levitimi, binob mödna so luleadik: kis jenosöv, if no juitoböv medini, e no sükoböv yufamedi so gretiki? — E, do in del alik no binob pötöfik, e gudiko paprepadöl, al dablinön levitimi: deno töbob, getön in tims pötik klänotis godik, e mekön obi dilidani bena so gretika. Ibo lane kredik, ünä fagik de Ol tevom in koap deilik, trod gledinik binom at, das memom suvo Godi ok’ik, e getom me ladäl devodik pelöfali oka.

4. O donleadam milagik guduga olik kol obis! das Ol, o Sölal God, Jafal ä belifal tikälas valik! donleadolok, kömön al lani pöfik, e satön me löliks Godug ä menad faöfi ota! — O ladäl läbik e lan beatik! kel paledivom, getön devodik Oli, Sölali God ok’ik, e pafulön me fred tikälnik dubü getön Oli. Lasumom Sölali kio gretiki, nindukom loti ki-löfik, giedom kopanali ki-lesumik, lensumom fleni kio fiedöl, lamom gamali kio jönik ä nobäliki, kel digom, palöfumön, ka valikos, kelosis kanon, löfön e vipön. Komü Ol, o pelöfal svidikün! sil e Tal, e dek valik okas, seilomsöd! Ibo valikos, aikelosi laboms digikosi loba e jönikosi: dekömos de gud givöfik Ola, ed orivoms nevelo jönäli nema olik, bi sap Ola binom nefinik.

Kapied 4. Gudikos mödik pagevos komünöles devodo. Vöds züpela.

1. O Sölal, God oba! fokömolös me läbäd svidik Ola dünele Oka, dat nilobös digik ä devodölo Sakramede subimik Ola! Flekolös oba ladi al Oli, e libolös obi de nedut gretik! Mekolös obe visidi saludlik, dat tikälniko gütobös Ola svidi, kel binom pesävöl in sakramed at, as in fon fulik! — I dalitolös logälis obik, al medidön klänoti so gretiki, e stenüdolös obi, dat oti kredobös me kred dotöl leno! Ibo sakramed at binom vobäd Ola, no menik; binom fünot Ola, no datuvot mena. Nek binom fägik oko, kapälön e suemön kläni at, kel vükodom sägo japäli lanalas. Klu ob sinel nedigik, ob püfin ä zenin: okanob, sevestigön e kapälön kiosi tefü din also subimik e pasävöl? —

2. O Sölal! in balikäl obika lada, in kred gudik ä fimik, e sukü büd Ola, nilob ko spel e drestim Ole, ä kredob fimiko, das aso God ä men binol iso komik in sakramed. Ibo vilol, das getobös Oli, ä balobös obi dubü löf ke Ol. Dem atos begob Ola misaladi, legivön obe beni patik al diseini, das lölik smetobös in Oli, e seaflumobös kodü löf, e das no sükobös fovoi trodi votik! Ibo Sakramed subimikün ä digikün ät binom salud lana e koapa, medin ta malädis tikälnik valikis; binom med, dubü kel klims oba pasanoms, liedods palejäiniloms, tentads pabevikodoms u palunoms, ben gretikum panin’gifom, tug pebeginöl pamödom, kred pafimom, spel pastenüdom, löf vedom filik, ä veitomok.

3. O God oba, kälal obika lana, sanal döfas menik e gival valika troda linedälik! egivol vo, e nogo mödna givol in sakramed at gudikosis mödik pelöfanes Ola komünöles devodo. Ibo nin’gifol omes trodi sülik ta glumis mänifodik, datovol otis se dib nekurajöfa omas ali spelön Ola jeli, klietol e dalitol omas ladäli dubü ben nulik, sosä uts, kels bü get komüneta senomsok patrepölis e nenü fekäl: poso, paklietöls dub süliks zibet e drinet, tuvomsok pavotöl in menis gudikum. Dunol also givöfik kol pesevälanis Ola, dat lesevomsös verato, e plakomsös klülo, vio fibiks binoms okso, e kelosi gudikosa e benas getoms fa Ol. Ibo se oks it binoms kaldälik, düfäliks e nedevodöl; ye dub Ol pafägoms, binön zilik, kurajöfiks e devodöls. Ye kim, nilöl miugo fonäle svida, no gepolom usa bosi svida? — U kim, stanöl lä fil gretik, no getom de ot bosi vama? — Binol fonäl aifulik ä loveflumöl, fil aifiledöl ä palunöl nevelo.

4. Sikod, if no binos pedälik obe, kupön se ful fona, e drinön jü satami: vilob deno, seitön oba mudi len manifodi rüta sülik, dat getobös se om tofi smalik luüno, al stilön soöfi, e dat no xoneluimobös lefulnik. Ed, if no nogo kanob, binön lefulno sülik, ed also filik, äso Kerubs e Serafs: töbob deno, plägönok tefü devod, e prepadön oka ladi, dat dubü juit miugik sakrameda, gevöl lifi, getobös luüno spagi gluta godik. Yed aikelos defos obe, o Yesus gudik, Dalival saludikün!: Ol atosi güvolöd benik e gudliko obe, kel edonleadolok, vokön valikanis al oki, ven esagol: «Al Obi kömolsöd valikans, kel binols fenik e pavetöls, ed oklietob olis!»

5. Vobob suedöl su loap oba; patomob dubü dol ladäla, binob pavetöl me sins, pamuifob dubü tentads, pazümob e papedob dub liedods badik mödiks; e no binom ek yuföl, libel^[1] e savöl, plä Ol, o Sölal God, Dalival oba! kele lovegivobok ed obikosi valik, dat obi jelolös e dukolös in lifi tenüpik! — Lasumolös obi ali lob e stim olika nema, kel eprepadol olikis koapi e bludi, aso zibeti e drineti obe. Gevolös, o God, sanal oba! das devodazil obik aiglofomös sukü juit mödnalik olika sakrameda!

Kapied 5. Dö dinid Sakrameda ät, e dö cal saludanik. Vöds Sölala.

1. If labolöv klini lanalik e saludäli ela Yohan Baptid: no binolöv digik, getön e finedöna Sakramedi at. Ibo no binos sukot melidodas menik, das men levitimom e finedom sakremedi^[2] Kristusa, ed aso zibeti juitom bodi lanalas. Gretik binom klänot at, e gretik binom dinid saludanas, keles binos pegivöl, kelos no binos pagevöl lanales. Ibo saludans soelik, gitomafiko pekoseköls in glügef, laboms valüdi, levitimön e koseköna koapi Kristusa. Saludan binom dido dünel Kristusa; sepükom vödis Goda segunü büd e lenleodam Goda; abu God it binom iso dünal gledinik, vobädal nelogik, kela vile dins valik binoms nödik, e kela büde valikos lobedos.

2. Demüs mutol, dö Sakramed subimikün at kredumön Gode, ka sienes lönik, u male logik sembale. Klu nilolök ko kred ä drestimo sakramede. Kautolöd tefü ol, e betikolöz, kela cal pe’lenkonfidom ole me nama suseitam bijopala! Ekö! evedol saludan, e pekosekol, al levitimön: kudolöd, das in tim fümik levitimi däblinolös fiedik ä devodo Gode, e das oli konsefolös neblamiki! No eleitol oka böladi, sod binol petanöl dubü tan sägo jalopikum puda, e binol pabligöl al lefuli gretikum in saludugäl. Saludan mutom, binön padeköl me tùgs valik, e givön votanes sami lifatäga gudik. No dalom, melakön modü mens komunik popa, sod ko lanals in sül, u ko mans lefulik su Tal.

3. Saludan, pekleotöl me kleots saludik, dunom cali Kristusa, dat al Godi plekomös zilik ä miugo ple ok e pop lölik! Labom kruzömamali su blötap e bäkap al ailememi liedas Kristusa. Polom kruzömi bifü ok su levitimakleot, dat loigomös kuratiko futavegedis Kristusa, e töbomös ziliko, sukön otes! Binom pakleotöl su bäkap me kruzöm, dat demü God sufomös sufädo taöfis^[3] valik, pelendunölis ome fa votans. Polom kruzömi bifü ok, dat belügomös sinis lönik; su bäkap, dat bedrenomös i keliedo sinis votikanas, ed ainolomös, das binom pepladöl in zenodi bevü God e sinel, e das no finomöz plekis e levitimöni, jüs puledivom, getön beni e misaladi! Saludan, kü levitimom: stimom Godi, freidom lanalis, dabumälom glügefi, yufom lifölanes, gevom edeilölanes takedi, ed iti mekomok dilidani guedas valik. —

Kapied 6. Säk dö prepadam al komüneti. Vöds züpela.

1. Üf betikob! o Sölal! dinidi olik, ed oba nonöfi: dremob vem, e pakofudob in ok it. Ibo, if no lügolob, fugob lifi; ed if ulükömob nedigik, onofob oli. Sikodo, kisi södob dunön, o God oba, yufal obik, e konsälal in zesüds!?

2. Tidolös obe vegi stedik, givolös obe plägoti smalik sembali, kel pötom bü komünet! Ibo binos frutik, nolön, vio södob prepadön. Ole devodo ä drestimiko ladäli obik, al getön saludliko sakramedi Ola, ud al zelön i vitimi so gretiki ä godiki.

Kapied 7. Davestigolöd ola konsieni, e desinolös gudumönoki! Vöds Sölala.

1. Goda saludan, kel vilom, zelön ati Sakramedi, finedön e getön oti: mutom bu valikos, lütridön ko miugün lada e drestim dibik, ko kred fulik, e desänäl gudik stimöna Godi. Xämolöd dutlik ola konsieni! Soin kanol, klinolöd e nifälolös omi dubü bönid veratik e lekoèf miugik, dat labolös u nololös nosi vätik, kel vetos konsienäli, e neleados lügolöni libiko! Labolöd miplidi ta sinis valik ola valemo, e tefü pöks vädelsik glumolödok e seifolöd patikumo! Ed, if tim dälom, Gode koefolöd in pesävug lada pöflöfis valik, dekömölis de liedods ola!

2. Seifolös, e lügolöd, das nogo binol also midälik e volameugik; edeilöl so nemödo liedodes; so fulik tefü mufs desidas badik; also negalöl tefü siens senedik; so mödna pekopligöl in fänots vanik mödiks; sovemo slopälöl senedikose, so luleadik tefü linedälikos; so fovik smilöne e nepude, so düfälik, al drenön e lebönidön; also löbik al libikumosis e kovenis koapa, e so nedutlik jalope e zile; so nudälik, al lilön nulöfis e logön dinis jönik; so nämnoik, al lensumön miugikosis e pülikosis; so desidik, al labön mödikosis; so monälik, al givön; so tönälik al bekipön; also nekautik püköno; so nestönik in seilön; so neplüetik tefü süds, so nemükik dunölo; also ledesidöl, al fidön so sudik tefü vöd Goda; so vifik takede, so stifik voböne; also galik lilöl lupükotis, so slipik pötü dün saludik; also spidöl, finön gudikosi; also nosidunik, kü senidolövök; so luleadik plekes delatimik; so lavik, if levitimol; also neluimälik, if komünol; so vifo disipälik, so seledo pekonleadöl ole lefulno; so vifo zunöl; so löbik, kodön miplidi votanes; also klienik cödätöne, so jalopik, al gijonön; so yofik in läb, so fibik in neläb; so mödna desänöl gudikosis, e dunolöl en nemödikosis…

3. Nag ola döfis at e votikis ekoefol, ed ebedrenol ko dol e miplid gretik tefü fib lönik: desinolöd fimiko, gudumön oka lifatägi, e fästepön al gudikumosis. Tän, in divodam fulik e vilöf lölik, däblinolöd su latar lada olik iti ok, as holokoti laik plo stim nema Oba! Lovegivolös fiedik Obe olikis koapi e lani, dat somo vedolös digik, däblinöna levitimi Gode, e getön fruto sakramedi koapa obik!

4. Ibo no binom vitim digikum e saidunam gretikum, al nosön sinis, ka elos suivitmön klinik e lefulniko iti ok sa vitim koapa Kristusa in levitim e pötü get komüneta. If men udunom, kelosis kanom, ed ulabom bönidi veratik: tän, alifä ukömom al Obi, dat ogetomös pardami e beni: God, Sölal, opükom: »Sponob me lif Oka, das no vilob deili sinela, sod bufumo, das levotälomösok e lifomös; omemob no fövoi sinis ota, sod valiks popardoms ote.«

Kapied 8. Dö vitim Kristusa len kruzöm, e dö vitimam obas it. Vöds Kristusa.

1. Äso len kruzöm demü sins olik evitimob libaviliko Gode, Fatè iti ok, laboböl namis pesetenöl e koapi penüdöl, sosä nos in Ob epalemänos no pakösekölöv löliko, aso vitim lekosilama ko God: also ed ol mutol, ladälafilüno ma näms, vädelso pötü levitim däblinön Obe livabiliko iti ol sa valiks näms e fekäls olik, aso vitimi klinik e saludiki. Kisi fliagob dranikumo de ol, kas steifol, lovegivönok Obe lefulno? — No loigob, aikelosis plä ol givol Obe; ibo no fliagob ola givoti, sod oli.

2. Äso lab dinas valik nen Ob oli no mekomöv kotenugiki: so valikós, aikelosis egivolöv Obe, okanos leno, plidön One, if no lovegivolok iti Obe. Vitimolödok Obe, e givolös oli lölik Gode! Tän vitim obinom lesumik. Ekö! edäblinob Oki lölik Fate ple ol; id egivob ole koapi lölik Oba e bludi, aso zibeti, dat lölik binobös olikan, ed ol blibolös obikan. Yed, if vilol, lönön oke it, e no ulovegivolok libavilo vile oba: vitim obinom no lefulik, e klubam bevü obs obinom leno lefulnik. Demüs lovegivam libavilik ola it in namis Goda mutom, jenön bü vobäds ola valiks, if vilol, getön libi e beni. Dem atos nemödikans vedoms pe’dalitöl e libiks linedälo, bi no noloms, fenonönok löliko. Sepet nevotlik Oba binom: «Ek, ifno uklemom valikosis: no kanom, binön züpel Oba.» Klu, if vipol, binön züpel Oba: suivitimolöd iti sa valiks fekäls olik Obe!

Kapied 9. Mutobs, suivitimön Gode obis ed obsikosis valik, e plekön plo valikans ! Vöds züpela.

1. O Sölal! Ole lönos valikos, binöl in sil e su Tal. Desidob, däblinönok, aso vitimi libavilik Ole, ed aiblibön olikan. O Sölal! in balikäl obika lada däblinobok it adelo, aso düneli tenüpik Ole. Lovegivobok Ola sölüge, e vitimobok, aso lobavitimi laik. Lasumolöd obi ko vitim saludik at koapa kostik Ola, keli adelo suivitimob Ole komü lanals, läsöl nelogiko, dat vitim at binomös saludlik obe e pope lölik Ola!

2. O Sölal! däblinob su latari lekosilama valikis sinis e klimis Oba, kelis des del, kü ekanob balidna sinön, jü düpi at edunob logsü Ol e lanals saludik Ola. Däblinob omis, dat filäbolös e fefiledolös valikis tugediko dubü fil löfa olik, dat nosolös stenis valik sinas oba, klinolös konsienäli oba de necödöf alik, e gegivolös obe beni Ola, keli eperob dubü sinön, dat lefulniko pardolös obe valikosis, e lasumolös misaladik obi al püdakidi! —

3. Plo sins oba kanob, dunön kiosi votik, kas koefob miugik ä pidob otis, e dabegob laiko pardami de Ol. Begö! dalitolöd benik obi, kel stanob komü Ol, o God oba! Sins valik oba miplidoms obe levemüno. Vilob, fovoi dunön otis nevelo, sod bönidob, ed, ünä ulifob, obönidob omis; binob löbik, pönädön, e duinöne saidami segunü näms. Pardolös obe, o God! demü nem saludik Ola, pardolös obe sinis oba! Savolös oba lanäli, keli edalivol me blud kostik Ola! Ekö! lovegivobok Ola misalade, loveleadob oki names Ola. Dunolös ke ob segunü gud Ola, no ma badnöf e necödöf oba!

4. Vitimob Ole (do binos nemödik e nelefulikos) i gudikosis valik oba. Gudumolös e saludükolös osis, dat binosös plidik Ole! Lasumolös, e lefulsolös osis, ed al fini beatik ä gudiki dukolös obi, meni nedutlik ä nefrutöli!

5. I däblinob Ole vipis relik valikis devodanas, kudadinis pala, flenas, blodas, jiblodas, pelöfanas valik oba, ed utas, kels, löfü Ol, ebenodoms obe u votanes. Däblinob vipis utas, kel evipoms ud efliagoms, das däblinobös plekis e levitimis ple oms ed omsikàns, ufas nogo lifoms in mid, udas binoms paditöl se vol. Valikans at senomsös yufi bena olik, nämi troda Ola, jeli ta risköfis, libami de pöns! e, pesavöls se bads valik, sagomsöd fredo danis magifik Ole!

6. Däblinob i plekis e vitimis lekosilama, patiko plo uts, kel enofoms obi tefü bos, eglumoms ud eblamoms obi, ekodoms obe sembalis dämi u plönis; i plo uts valik, kelis eglumob evelo, emuifob, evetob ed eskanob, nolöl ud nenolölo, dubü vöds u duns. Obes valik kobo pardolös sinis e nofamis rezipik! Se lads obas, o Sölal! mosumolöd valikis badiniludi, zuenöfi, zuni, dikodi, e valikosis, aikel kanós, viodön löfi, e lunön balifi blodik. Misaladolös, misaladolöd, o Sölal! utis, kel da’lebegoms Ola misaladi! Givolös oka beni obes dalebik, ed obis mekolös menis somik, kel digoms, juitön Ola beni, e getön lifi tenüpik! — Jenosöd!

Kapied 10. No nedunonös demü kods pülik geti komüneta saludik! Vöds Kristusa.

1. Mutol, suvo lügolön al fonäli bena e misalada godik, al foni guda e klina valik, dat kanolös, pasanön de liedods olik e klims, e vedolös stenüdikum ä galölum ta tentadis valik e citamis diabana. Neflen nolom, das frutün e saludamed gudikün binoms in komünet saludik, e demüs töbom in aliks mod e pöt, neleadön e mozugön, soin kanom, kredanis e devodikanis.

2. Ibo ans, if viloms, prepadönok komünete saludik: sufoms tentadis badlikum diabana. Tikäl badnöfik at, äso binos pepenöl in buk Yob, kömom bevü silis Goda, al kofudön otis dubü luvised kustöfik oka, u mekön tu trepikis e lestunikis, dat lunomös devodi, u mosumomös dubü lägleips kredi otas. Somo vilom, bevobädön, ufas nedunoms geti komüneta, udas lügoloms kaldälik. Ye, leno loigonöz luvisedöfi omik e fänotis, vio vemo binoms-la jemodik e naudiks; sod gejedonöz nin’givodis valik ote len kapi! Muton, nestümön e fesmilön misalöfikani, e no nedunön komüneti demü lägleips e mufams, kelis pälom!

3. Kudüb tu gretik demü devod pölaböl, e trepöf sembal tefü lekoef pömeköl neleadoms i suvo. Dunolöd segunü konsäl sapanas, e deseitolös trepi e srupäli, bi neleadoms vobädami bena godik, e distukoms devodi ladäla! No nedunolös komüneti demü kofudam smalik u plönöf, sod gololöd foviko, lekoefön, e pardolös viliko valikanes enoföl oli! Yed, if ol enofol eki: dabegolöd miugo pardami! e God opardom vilik ole.

4. Kisi frutos, zogön lonedo tefü lekoef, u fözogön komüneti? — Klinolödok foviko, sesputolöz vifik venodi; spidolöd, getön medini!: ed ostadol gudikumo, ka if ufözogol atosis lonedo. If nedunol komüneti adelo demü kod at: odelo ba kod gretikum osibinom. Somo pa’neleadolöx lonedo, e vedolöx nogo nefägikum. Livolödok, sosus ukanol, de komiks plönöf e nedut! Ibo frutos nosi, lonedo patrepön, nidesgolön in muifäl, e demü neleadübs vädelsik, blibön fagik de taböm godik. Binos bufumo vemo dämik: fözogön lonedo geti komüneta; ibo atos laidunos, pälön i lavi gretik. Liedö! binoms lans lavik e nepudiks, kel fözogoms viliko lekoefi, e viloms seyilön komünete, dat no binomsös pamütöl, gebön kudöfi gretikum tefü oks.

5. Agö! löfi kio smalik, e devodi ki-fibik laboms uts, kel fözogoms also leitälik komüneti! — Kio läbik, e ki-lesumik Gode binom ut, kel lifom somo, e konsefom konsieni so kliniki, das sägo binomöv löbik e desidik, komünön vädelso, if binosöv pedälik ome, e kanosöv, zitön nenü jov. If ek stönom sotimo sukü miug u neleadüb gitomafik: binom pöloböl demü drestim oka. Yed, if nedut uninlovigolom: mutom, iti kurajöfokön, e dunön, kelosi kanom: täno Sölal yufom oma levipe segun oma vil, keli konsidom patiko.

6. Yed, if binom gitomafiko paneleadöl: olabom alikna vili gudik e desidi relik komünöna, e somo no enelabom fruti sakrameda. Ibo devodan alik kanom, in aliks düp e del, libiko komünön tikälno frutü salud oka; deno mutom in dels fümik, ed in tim pelonöl, getön sakramedo ko drestim ladälafilik koapi Dalivala ok’ik, e sükön plu lobi e stimi Goda, ka trodi lönik. Ibo komünon tikälno, e paklieton nelogiko, alifä betikon devodöl kläni menvedama e liedis Kristusa, e flämonok dubü löf al oti.

7. Kel prepadomok te pötü zäl sunkömöl, u kü südod mütom: at obinom suvo no paprepadöl. Läbik binom ut, kel lovegivomok, aso holokoti Sölale, alifä levitimom u komünom. Binolöd ni tu vifik, kü levitimol! sod dunolöd ma gudik südod valemik utas, ko kels lifol! Mutol, no kodön böladami e naudi votanes, sod konsefön vegi kustöfik segunü lenleodam büpalas, e mutol, steifön umo, födön fruti votanas, ka sukön lönikes devode u slopäle.

Kapied 11. Koap Kristusa e bib binoms zesüdik vemüno lane kredik. Vöds züpela.

1. O svidikün Sölal Yesus! svidi ki-gretik juitom lanäl kredik, fidöl ke Ol len tab Ola, kö zibet votik pöfidöl no pa’bisiadom ote, ka soelik Ol, pelöfal ota, kel binol pölevipöl bu valikos padesidöl fa lad. Binosöv dido svidik obe, drenön se ladäl vemüno pemuföl komü Ol, e vatön me drens ko Magdalena relik futapis Ola. Ye devod at binom kiöp? leflum at drenas patuvom kiplad? — Zelädö! komü Ol ed Ola lanals saludiks ladäl lölik oba mutomöv, glutön, e drenön kodü löf. Ibo in Sakramed labob Oli komik vo, do pasävöli disü föm votik.

2. Ibo logaps oba no kanomsöv, ledulön lenlogedöni Oli in lönik klül godik; ga! vol lölik no ledulomöv komü nid olikas glora e mayeda. — Sikod in atos yufol oba fibe, du sävolok in sakramed. Veratiko labob e leplekob uti, keli lanals leplekoms in sül; ob dido logob Omi bevüno te me kred; ab ets in föm veratik e nenü veadam. Mutob, kotenugön in litäl kreda, e tägön in kred jüs del klüla tenüpik unakömom, e jads magas udepuboms. Ye, sosus ukömos, kel binos lefulik: gebam sakramedas ofinom, bi beatans in sül no neodoms yufamedis sakramedik. Ibo fredoms nefino komü God, logedöls de loap ini loap glori öta. In ledib Goduga paceinoms de klül balanik in votiki, e Goda Vödi, kel evedom mid, juitoms somo, äs Vöd ebinom in begin e blibom tenüpoi. —

3. Kü betikob milagis at: sägo tikälnik trod alik vedom nesmekik obe, bi valikosis, kelosis logob e lilob in vol: cedob, aso nosis, ünä no logob notiko Sölali obik in glor oma. Ol, o God! binol noelal obe, das din nonik kanom, trodön obi, jafot nonik stilön, ifno Ol, o God oba! keli levipob, logön tenüpiko. Yed atos no mögos dü lif deilik at. Sikodo mutob, sufädön mödiko, ed Ole disojedönok tefü levip alik oba. Ibo i saludals olik, o Sölal! yuböls nu ke Ol in monargän süla, ünä elifoms is, evaroms kredik e lesufädo nakömi glora olik. Kredob, kelosis ekredoms; spelob, kelosis espeloms; konfidob, das yufü ben olik okömob usi, kelöpi ekömoms. Bevüno vilob, pastenüdöl dubü sams saludalas, tägön in kred. Labob i bukis saludik, aso trodi e loki lifa; e, kelos vükodos nogo valikosis at: labob Ola koapi saludik, aso medini patik ä lefugi.

4. Ibo tuvob, das in lifüp at dins tel aizesüdoms obe levemüno, e das nen ots lif misalöfik at binomöv nesuflik obe. Koefob, das, pegekipöl in fanüb ata koapa, neodob dinis tel, os binos, zibeti e litäli. Demüs egivol obe fibane koapi saludik oliki, al stenüdön lani e koapi; ed epladol Ola vödi, aso litapoli futes oba. No kanoböv, lifön gudik nenü bofiks at; ibo vöd Goda binom litäl lane, e Sakramed Ola binom bod lifa. Dins at kanoms, i panemön tabs tel, pepladöls ataflano ed etaflano in divacem glügefa saludik. Taböm balanik binom latar saludik, konseföl bodi saludik, os binos, koapi kostik Kristusa. Tab votik binom lon godik, ninöl tidi saludik, kel tidom kredi veratik obes, e dugom sefiko jü poü bifoedi linedikün, kö Saludikünöp aibinom. O Sölal Yesus, nid litäla tenüpik! ole danö demü tida saludika tab, keli eprepadol obes dubü dünels oka, os binos, dubü profedals, postals e tidals… votik!

5. Danob Ole, o Jafal ä Dalival menas! kel, al jonön Oka löfi vole lölik, eprepadol lefidi gretik, in keli epladol, aso zibeti, no liämi bümaglik, sod Ola saludikünis koapi e bludi. Me zibet saludik at freidol kredanis valik, e nirol otis me saluda greköped, ninöl fredis valik paladöpa. — O lanals saludik fidoms ke obs, yed in mod svidikum ä beatikum. —

6. O! kio gretik ä stimadigik binom cal saludanas, kel egetoms valüdi, kosekön me vöds saludik Sölali mayeda, läbädöna me lipaps oti, kipön me nams, getöna me mud lönik, e seidilöna votanes! — O! nams et mutoms, binön ki-nedebik, mud kio klinik, koap ki-saludik, lad kio nestenik in saludan, lä kel Rigal klinuga nin’golom also mödna! Se mud saludana, getöl so suvo koapi Kristusa, no kömomöz vöd votik, ka vöd saludik, stimik e frutöl.

7. Logaps, kel laidunoms, logön koapi Kristusa, binomsök balikälik e puediks. Nams, kel laidunoms, finedön Jafali sila e Tala, binomsöz klinik e pe’datovöls al süli! Patiko saludanes pasagos in lon: »Binolsöd saludik! bi Ob, God ä Sölal olas, binob saludik.« —

8. O God vävalüdik! ben Ola yufomös obes, dat, elensumöls cali saludanik, binobsös kanik, Ole dünön digik ä devodo, in klinug valik e ko konsien gudik. Do no kanobs, tägön in lifa nedebäl also gretik, äso södobs: deno gevolös, das bedrenobs saido badikosis, kelosis edunobs, e das Ole füdoì dünobsös zilikum in tikäl miuga e me desinäl vila gudik!

Kapied 12. Muton, prepadönok me dut gretik, al getön komüneti. Vöds Sölala.

1. Binob löföfal klinuga, e gival saluduga valik. Sükob ladi klinik, ed at binom top obika takeda. Plepadolöd^[4] Obe zibacemi magifo peblimöli, e ko züpels obik ofidob Liämi lä ol. If vilol, das kömob al oli, e blibob lä ol: mosuipolöd züdiki meilevati bäledik, e klinolöz lödi olika lada! Modunolöd voli lölik, e lutouni valik sinas! Siedolöz, äso frindomit soalik su nuföp, ed in bied olika lada tikolöd tefü pöks oka! — Ibo löfel alik prepadom topi gudikün ä jöniküni pelöfane, ed atoso lesevon fekäli, kelo lasumom pelöfani.

2. Ye nololöd, das töb ola no saidom, al prepadokön digik, ifi prepadolövok dü yel lölik, ä tikolöv nosi votik! Te sukü gud e ben Oba padälos ole, lütridön al Oba tabi, äso lubegele, kel, pavoköl al lefidi liegana, labomöv votikosi nonik, al bläfön benodis, kas, miugölok, danisagomöv benodele. Dunolöd ma näms olik, e dunolöz dutlik osi! No kodü südod u müt, sod ko dred, drestim ä löfo getolöd koapi Sölala ä Goda löfik ola, kel donleadomok, kömön al oli! Ob binob, kel evokob; Ob ebüdob, das jenosös; ogüvob, kelos defos ole; kömolöd, e getolöz obi! —

3. Kü ugevob ole beni devoda, danolöd plös Gode ola! Egetol omi, no, bi binol digik, sod bi emisaladob oli. If no labol beni at, sod senolok umo neluimäliki: ledulolöd pleko! seifolöz, e länokolöd! No finolös, jüs puledivol, getön bodadili u tofi bena saludlik! Neodol obi; Ob no neodob oli. No kömol, al saludükön Obi; sod Ob kömob, al saludükön e gudumön oli. Kömol, dat pasaludolös fa Ob, e pabalolös ke Ob; dat getolös beni nulik, e denu paflämolös al gudumami. No vilolöd, luleadön ati beni, sod prepadolös me dut valik ladi olik, ed al oli nindukolöd oliki pelöfali!

4. Ye zesüdos, das noè bü komünet prepadolok devodo, soì das konsefol kudöfik devodi posü get sakrameda. Galöf posik no dalom, binön smalikum, ka büfoik prepadam devodöl. Ibo galöf gudik posü komünet binom denuo prepadam gudikün, al getön beni gretikum. Ibo ut, kel foviko ukösekomok tuvemo trodes senedik: ovedom dub atos vemo nepapredadöl. Vitolöd möpüköni, blibolös in soal, e juitolöd ola Godi! Ibo labol uti, keli vol lölik no kanom, mosumön ole. Binob ut, kele mutol, lölik divodön somo, das fovoi no in ol, sod in Ob lifolös libik de kud alik.

Kapied 13. Lan devodik mutom me ladäl lölik levipön klubami ko Kristus in Sakramed. Vöds züpela.

1. Kim gevom obe läbi, das Oli tuvob, o Sölal! soeliki, ed Ole manifob ladäli lölik oba; das juitob Oli, äso lan oba desidom; das nek fovoi loigom obi, e jafot nonik mufom u lenlogedom obi; sod das Ol soelik obe pükol, ed ob Ole pükob, äso pelöfan laudunom, pükön pelöfale, e flen fredön ko flen pötü lefid! Begob, fliagob, das pabalob lölik ke Ol, das mozugob oba ladäli de dins valik pelemeköls, e das lenadob, dubü komünet saludik u zel mödnalik levitima, gütön umo dinis sülik u tenüpikis. Agö! o Sölal God! kiüp obinob pakluböl lölo ke Ol, pafeslugöl in Oli, e födegöl obi lefulno? — Ol binolös in ob, ed ob binoböz in Ol! e mekolös, das aiblibobs also pakluböls balkevotano!

2. Binol vo pelöfal oba, palesevälöl se mils, in kel plidos oba lane, ailödön dü dels valik lifatima oka. Binol vo püdaplinal obik, in kel binoms püd gretikün ä taked veratik. Plä Ol binoms töb, dol e misalöf nefinik. — Vö! binol God pesävik. No melakol ko badikans; sod pükol ko miugans e balikälans. O Sölal! ki-svidik binom tikäl Ola, kel, al jonön gudi Ola kol omis, donleadolok, klietön cilis Oka me bod svidikün, edonixänöl de sül. Vö! votik net nonik binom also subimik, das labomöv lugodis also nilikis ome, äs Ol, o God obas! binol nilik kredanes valik Ola, keles iti lovegivolok pöfidöli ä pöjuitöli, al gevön trodi vädelsik omes, e datovön ladälis omas in süli. —

3. Ibo kiomik net votik binom also glorik, äso pop kritanas? — U kiomik jafot disü sil palöfom also mödo, äso lan devodik, in keli God nin’golom, al zibön oti me mid glorik Oka? — O ben nesepükik, o donleadam milagik, o löf nemaflik, pablöföl mene soelik! Ye, bläfoböd kiosis Sölale demü ben at, dem löf also sikik? — No kanob, givön bosi lesumikum, kas legivob löliko Gode ladäli obik, e fetanob lefulniko ke Om. Täno linedälikos lölik oba oyubos, kü lan obik ubinom pakluböl lefulno ko God. Täno God opükom obe: «If vilol, binön lä Ob: vilob binöni lä ol.» Ed ogesagob ome: »Donleadolösok, o Sölal! blibön lä ob! Vilob bliböni viliko lä Ol. At binom levip soelik oba, dat ladäl obik binomös peibalöl ke Ol!«

Kapied 14. Dö levip vemik devodanas anik al koapi Kristusa. Vöds züpela.

1. O Sölal! kio gretik binom ful svida olik, keli elesävol dredöles Oli! — If tikob tefü regulans anik, o Sölal! nilöls me gretiküns devod ä ladälafil sakramede Ola: täno pakofudob in ok mödna, e daredob, das lütridob so lavik e kaldälik al Oliki latarì, ed al tabömi komüneta saludik, das blibob also neluimälik, e nenü fek ladäla; das no binob paflämöl löliko komü Ol, o God obik! e das no binob sovemo palenzugöl e klienik al Oli, äs ebinoms devodans mödik, kels, sukü desid levemik al komüneti, e demü löf zadik lada, no ekanoms, stönön drenöni; kels leigüpo me mud ladäla e koapa edesidoms levemüno Oli, o God! fonäli lifik; e kels no ekanoms, stilön e satön votiko faöfi oksik, kas egetoms ko fred valik e ledesid tikälnik koapi Ola.

2. O! kred vo ladälafilik otas binom blöf veratik koma saludik Ola! Ibo ets, kelas lad filedom also vemiko, bi Yesus tägom ke oms: lesevoms veratiko Sölali okas in bodiblekam. Somiks fekäl e devod, also vemiks löf e ladälafil binoms suvo fagik de ob. Binolös benik obe, o Yesus gudik, svidik ä benik! e gevolös obe, lubegele pöfik Ola, das in komünet saludik senob sotimo bosi nemödik löfa ladlik Ola, dat kred oba vedomös stenüdikum, spel tefü gud Ola glofomös, e löf, balna lefuliko paflämöl, panösomös nevelo, nag esmeikom manaeti sülik! —

3. Misalad Ola binom kanik, obe gevön i beni pefliagöl, e visidön obi gudliküno me Tikäl ladälafila, kü ukömom del plidik Ole. Do no glutob in desid also gretik, äso lans pato divodiks Ole: deno dubü ben Ola senob levipi ali desid so gretik ä glutöl etas. Plekob e levipob, dilsumön len ladälafil löfanas somik zilölas valik Ola, e palänumön zilake saludik otas.

Kapied 15. Vöbon beni devoda dubü miug ed itifenonam. Vöds Sölala.

1. Mutol, sükön nezedo beni devoda, fliagön levipik, varön sufädik e konfido, lensumön danöl, konsefön miugo, vobädön dutlik ke ot; e Gode, jüs ukömom, loveleadön timi e modi visida sülik. Mutol, miugönok pato, kü senol linedälo nemödikosis, u nosis devoda; ye, no dalol, pasäkurajöfön, u lügön neleodiko. God givom mödna in timil blefik, kelosis enesiamom dü tim lonedik: givom sotimo finü plek, kelosis beginü plek efözogom, givön.

2. If ben paigivomöv foviko, e kombinomöv segunü vip: atos binosöv ti no pötik mene fibik. Demüs varolök in spel gudik e sufäd miugik beni devoda. Yed ole e sines oka lücödätolöd, kü ben at no pagivom, u pasumom klänöfo! Binom sotimo din smalik, kel neleadom, u sävom beni, üf ba kanon, bosi nemön smalikosi, e no muton bufumo, nemön gretikosi, kel neleados guedi so gretiki. Kelüp umoblinon, ed ubevikodon lefuliko neleadübi smalik ud gretiki at: ogeton, kelosis edesidon.

3. Ibo, sosus ulovegivonok se ladäl lölik Gode, e no usükon atosis ud etosis ma vil e plid ona, sod lölik ulovegivonok ote: tän otuvon oni pakluböl ke Om, e papüdöli, bi nos oplidos, ed osmekos also gudiko, äso plid len vil godik. Sikod, aikel ulüodom me lad balikälik desäni ok’ik ali God, ed ulivomok de valik löf neleodik ud miplid tefü dins pelemeköl: at obinom pötikün, getön beni, e digom laböna legivoti devoda. Ibo Sölal ogivom Oka läbädi uso, kö utuvom gefis vagik. E, plu men uklemom dinis talik, äd udeilom oke it dubü nestümönok: plu vifumo ben kömom, bundemom, e datovom geilikumo ladäli libik. —

4. Tän ologom ed olabom bundemi, lad ota ostunom, e poveitom in ot, bi nam Sölala binom ke ot, nag it elovegivomok löliko e tenüpoi names Sölala. Ekö! somo paläbädom men, kel sükom me ladäl lölik Godi, e no egetom vanliko lani oka. Ot dubü get Sakrameda saludik melidom beni gretik pabalöna ke God, bi no konsidom lönikis devodi e trodi, sod umo glori e stimi Goda, ka valikis devodi e trodi.

Kapied 16. Mutobs, nünön zesüdis obas Kristuse, e fliagön Oma beni. Vöds züpela.

1. O Sölal svidikün ä löfadigikün! keli nu desidob, getön devodiko: nolol oba fibi e zesüdi, keli plönob. Nolol, in ki-gretiks bads e klims seitob, vio-mödna binob pavetöl, patentadöl, kofudik e neklinik. Al Oli kömob, dat getobös yufamedi; dabegob trodi e leitami fa Ol. Pükob nolöle valikosis, kele linedikünos valik ladäla oba binos besevik, e kel soelik kanom, trodön lefulo, e yüfön obi. Nolol, kelosi gudik neodob levemün, e vio-pöfik binob tugso.

2. Ekö! komü Ol stanob pöfik e nüdik; fliagob beni, e lebegob misaladi. Klietolös obi, lebegeli faöfik Ola, me fil löfa olik! Flämolös ladäli kaldik oba! bleinäli oba dalitolös me klül olika komöpa! ceinolös obe talikosis alik in biedi! mekolös, das aisufob sufädo valikis plönis e taöfis^[5], das fögedob e nestümob valikis dinis talik e pejafalölis! Datovolös oba ladäli süloi al Oli, e no dälolös, das zipölob talo! Ol soelik desnu binolöz lesumik obe tenüpoi, bi soelik binol zibet obik e drinet, löf e fred oba, svid ä gued lölik oba.

3. Dubü kom olik obi flämolös löliko, konsumolös e ceinolös in Oli, dat, pekluböl ke Ol dubü ben linedälik, e pesmötöl dubü fil löfa, vedobös tikäl bal ke Ol! No sufolös, das mogolob faöfik e neluimälik de Ol! sod dunolös len ob segunü misalad Oka, äso mödna edunol milagiko len saludals Oka! Milàg-lí binosöv, if vedoböv glutöl löliko dub Ol, e panosoböv in ok it? — Ibo binol fil aifiledöl, e palunöl nevelo, löf klinöl ladälis, e dalitöl kapäli.

Kapied 17. Tefü löf filedöl e desid vemik getöna Kristusi. Vöds züpela.

1. Me devodün e löf filedöl, me lada slopäl lölik e zilo desidob, getön Oli, o Sölal! äso pötü getam komüneta elevipoms Oli saludals mödik e pösodans devodöl, kel eplidoms Ole levemüno demü saludugäl lifa, ed ebinoms in zilün devoda. O God oba, löf tenüpik, gued soelik oba, leläb nefinik! vipob, getön Oli me desid vemikün e drestim lepötikün, kelis sembal saludalas elabom evelo, ud ekanom, senön.

2. E, do no binob digik laböna fekälis valik at devoda: deno suivitimob Ole fekäli lölik ladäla obik, äsif laboböv soelik desidis löflik filedölis valik atis. Yed i me drestimün e zil leladlikün givob e suivitimob Ole valikosis, aikelosis lanäl devodöl kanom, datikön e desidön. Vilob, bübekipön obe nosi, sod Ole suivitimön libik e viliküno obi ed obikosis valik. O Sölal, God oba, Jafal e Dalival oba! desidob, adelo, getön Oli me somiks levip, drestim, lob e stim, dan, digug ä löf, me somiks kred, spel e klinug, äso mot saludikün Ola, Maria virginal, elevipof getön, ed egetof Oli, ven lanale, notöl ofe kläni menvedama, egesagof miugik ä devodo: «Ekö! binob jidünel Sölala: jenosöd obe segunü vöd ola!»

3. Ed, äso bügonal beatik Ola, Yohan Baptidal, sikikün saludalas, egeinom fredo komü Ol, pestigälomöl fa Salutikäl, du nog ebinom peninkiköl in vümap motik, ed äso poso, logöl Yesusi kodötöl bevü mens, epükom in miug dibik e löf filik: «Gamala flen, kel kombinom e lilom oti, fredom ladliko demü vög gamala«: also ed ob vipob, paflämön dubü desids gretik ä saludiks, ed Ole däblinönok iti se lad lölik. Demüs lofob Ole ladas devodöl valikas yubis, desidis filik, lefredis tikälnik, dalitamis lovünatik e pubis sülik sa valiks tugs e lobs, kel Ole pedäblinoms, e nog podäblinoms fa jafot alik in sül e su Tal. Suivitimob atosis valik Ole ple ob e valikans pekomedöl pleke oba, dat palobolös digiko fa valikans, e paglorolös tenüpoi! —

4. Lensumolös, o Sölal! oba vipis at e desidi, lobön e pliedön oli nefiniko, äso padebos Ole gito ma gret mayeda nesepükik Ola. Däblinob Ole vipis at, e desidob, aidäblinön omis vädelso ed in timil alik. Lebegob e vüdob vem ä dranölo tikälis sülik alikis e kredanis valik Ola, dat ke ob däblinomsös danis e lobis Ole.

5. Valiks pops, stamefs e linegaps lobomsöz Oli! Ola nemi saludik ä lesvidiki pliedomsöz me yubün ä devod filedöl. Aikels vitimoms drestimik ä devodo Sakramedi subimikün, e getoms in kred fulik Oti: paledivomsös, tuvön beni e misaladi lä Ol, e begomsös draniko ple ob sinel! E, kü ugetoms devodi pavipöl, e juitami klubama ke Ol; e, kü, patrodöls gudiko, e milagiko paklietöls, ugekömoms de sülik taböm saludik Ola: donleadomsös, memön obi pöfik!

Kapied 18. Men no binomöz duvestigel nudälik sakrameda, sod posdunel miugik Kristusa, e disojedomöz sienis Gode! Vöds Sölala.

1. Vitolöd, duvestigön nudälik e nefrutiko Sakramedi dibikün at, ifno vilol, disön in ledibi dotas! — Aikel vilom, dakodön mayedi Goda, podirpedom fa glor Ota. God kanom, dunön mödikumosis, ka men kanom, kapälön. Ye xäm dogidredik e miugik verata no binom pöblamöl, if binon löbik, lenadön, e steifön suköni cedes saunik Fatas.

2. Beatik binom balikäl, kel vitom vegis fikulik feitasaekas, e tägom su veg kamik e fimik büdas Goda. Mödikans eperoms devodi, bi eviloms, sevestigön dinis tu subimikis. Kred e lifatäg känüdik, no lesev dibik klänas Goda, paflagoms de ol. If no kapälol, e no suemol, kelos binos disü ol: osuemol liko, kelos binos ove ol? — Disojedolödok Gode, miugolöd sienis nödü kredi!: e litäl leseva pogivom ole, soin binos frutöl e zesüdik ole!

3. Ans patentadoms vemo tefü kred e sakramed; yed atos no binos pölücödätöl omes it, sod bufumo neflene. Binolöd nenü kudüb, e no vilolös, feitön ta tikis olik; i no gesagolöd tefü dots penin’givöl ole fa diaban! dos kredolöz vödes Goda, kredolöd saludales e profedales omik!: e neflen badìk ofugom de ol. — Mödna frutos vemo dünele Goda, sufön tentadis somik. Ibo neflen no tentadom nekredanis e sinelis, bi ya labedom otis sefiko; abu tentadom, e vexadom in mods difik kredanis devodöl.

4. Sikodo tägolöd in kred balikälik e nedotöl, e nilolös ko drestim miugik sakramede! Ed, aikelosis no kanol, suemön: loveleadolöd takedik atosis Gode vävalüdik! God no cütom; ut pacütom, kel tu mödiko kredom oke it. God tägom ko balikälans, manifamomok miuganes, givom lesevi smalikanes, manifom siämi lanes klinik, e sävom beni menes nudälik e pleitanes. Lisäl mena binom fibik, ä kanom, pacütön; ye kred veratik no kanom, pacütön.

5. Lisäl alik, e duvestigam natik mutoms, sukön krede, no bisegolön ote, e no distukön oti. Ibo kred e löf binoms tugs bizugikün tefü Sakramed saludikün ä subimikün at, e vobädoms nis in mod klänik. God tenüpik ä nemaflik, kela valüd binom nefinik, dunom in sil e su Tal dinis milagik e nevestiglikis, e milagots ota no kanoms, padakodön. If vobäds Goda binomsöv somik, das kanomsöv, pasuemön nefikulo fa lisäl menik: no binomsöv milagik, e no kanomsöv, panemön nesepükiks. —

Fin.

Küpets (fonät: ‚Wikisource’).

1. Ba pla el liböl.
2. Ba pla el sakramedi.
3. Ba bükapök pla el täöfis.
4. Bükapök pla el prepadolöd.
5. Ba bükapök pla el täöfis.